ລິ້ງ ສຳຫລັບເຂົ້າຫາ

logo-print

ເສັ້ນ​ທາງ ນັກ​ວິ​ທະ​ຍາ​ສາດ ເພື່ອ​​ ຮຽນ​ຮູ້​ວ່າ ພວກ​ເຮົາ ຢູ່​ໃນ​ຈັກ​ກະ​ວານນີ້ ຕາມ​ລຳ​ພັງ​ຫຼື​ບໍ່


ຮູບກາ​ແລັກ​ຊີ Ursa Major ຈາກ​ກ້ອງ​ສ່ອງ​ຮັບ​ໂບ ທີ່​ໄກ​ອອກ​ໄປ​ຈາກ​ໂລກ​ມະ​ນຸດ​ເຮົາ 65 ລ້ານ​ປີ​ແສງ.

ລັດ​ຖະ​ສະ​ພາ​ສະ​ຫະ​ລັດ ຍັງ​ມີ​ຄຳ​ຖາມ​ທີ່​ສຳ​ຄັນ ສຳ​ລັບສະ​ຖາ​ບັນ​ວິ​ທະ​ຍາ​ສາດ​ແຫ່ງ​ຊາດ ​ຫຼື NAS ​ຊຶ່ງ​ທາງ​ລັດ​ຖະ​ສະ​ພາ​ ຢາກ​ຮູ້​ຈັກ​ວ່າ “ມີແຕ່ພວກ​ເຮົາຕາມ​ລຳ​ພັງບໍ ຢູ່​ໃນ​ຈັກ​ກະ​ວານນີ້” ຫຼື​ມີ​ດາວ​ໜ່ວຍ​ອື່ນຄື​ກັນ​ກັບ​ພວກ​ເຮົາຊຶ່ງ​ມີ​ສິ່ງ​ທີ່​ມີ​ຊີ​ວິດ​ສະ​ຫຼຽວ​ສ​ະ​ຫຼາດ​ຢູ່​ທີ່ນັ້ນ​? ສະ​ຖາ​ບັນ​ວິ​ທະ​ຍາ​ສາດ​ແຫ່ງ​ຊາດພວມ​ເຮັດ​ວຽກ​ຮ່ວມ​ກັບ​ພວກ​ນັກ​ວິ​ທະ​ຍາ​ສາດ​ໃນ​ທົ່ວ​ປະ​ເທດເພື່ອ​ຕອບ​ຄຳ​ຖາມດັ່ງ​ກ່າວ. Erika Celeste ໄດ້​ໂອ້​ລົມ​ກັບ​ນັກ​ວິ​ທະ​ຍາ​ສາດ​ທ່ານ​ນຶ່ງ ທີ່​ມະ​ຫາວິ​ທະ​ຍາ​ໄລ Notre Dame ດັ່ງ​ໄພ​ສານ ຈະນຳເອົາລາຍລະອຽດ ມາ ສະເໜີທ່ານ ໃນອັນດັບຕໍ່ໄປ.

ກ້ອງ​ສ່ອງ​ທາງ​ໄກ​ຮັບ​ໂບ (Hubble) ເຮັດ​ໃຫ້​ພວກ​ເຮົາ​ສາ​ມາດ​ມອງ​ເຫັນ​ພາບ​ທີ່​ໜ້າ​ຕື່ນ​ເຕັ້ນ​ຈາກ​ອະ​ວະ​ກາດ ແຕ່​ກໍ​ບໍ່​ໄດ້​ໃຫ້​ລາຍ​ລະ​ອຽດ​ຢ່າງ​ພຽງ​ພໍ​ເພື່ອຊ່ອຍ​ພວກ​ເຮົາ ໃນ​ການ​ຊອກ​ຄົ້ນ​ຫາ​ສິ່ງ​ທີ່​ມີ​ຊີ​ວິດ ຢູ່​ໃນ​ຫຼາຍ​ພັນ​ຕື້​ກາ​ແລັກ​ຊີ​ທົ່ວຈັກ​ກະ​ວານ.

ທ່ານ​ຈັ​ສ​ຕິນ ເຄ​ຣັບ ຮອງ​ສາ​ສະ​ດາ​ຈານ​ສອນ​ຟີ​ຊິກ ທີ່​ມີ​ຫາ​ວິ​ທະ​ຍາ​ໄລ Notre Dame ກ່າວ​ວ່າ “ຖ້າ​ນຶ່ງ​ສ່ວນ​ສິບ​ເປີ​ເຊັນ​ຂອງ​ດາວ​ຕ່າງໆ​ ມີ​ດາວ​ເຄາະ​ຄ້າຍ​ຄືກັນ​ກັບ​ໂລກເຮົາ ແລະ​ອາດ​ມີ​ສິ່ງ​ທີ່​ມີ​ຊີ​ວິດ​ ອາ​ໄສ​ຢູ່ນັ້ນ ​ດ້ວຍ​ເຫດນີ້​ຈຶ່ງ​ພາ​ໃຫ້​ມີ​ຄວາມຄຸມ​ເຄືອ​ຢູ່​ວ່​າ ​ອາດມີ​ຫຼາຍ​ພັນ​ລ້ານ​ໜ່ວຍ ຢູ່​ໃນ ແຕ່ລະ​ບົບ​ກາ​ແລັກ​ຊີ​ທາງ​ຊ້າງ​ເຜືອກຂອງ​ພວກ​ເຮົາ​ເທົ່າ​ນັ້ນ.”

ໃນ​ຖາ​ນະ​ທີ່​ເປັນ​ສະ​ມາ​ຊິກ​ຄະ​ນະ​ກຳ​ມະ​ການຍຸດ​ທະ​ສາດ​ວິ​ທະ​ຍາ​ສາດ Exoplanet ຂອງ​ສະ​ຖາ​ບັນ​ວິ​ທະ​ຍາ​ສາດ​ແຫ່ງ​ຊາດ ທ່ານ​ຈັ​ສ​ຕິນ ເຄ​ຣັບ ແມ່ນ​ໄດ້​ເພັ່ງເລັງ​ໃສ່​ວ່າ ສະ​ຫະ​ລັດ​ຈະ​ສຳ​ຫຼວດ​ອະ​ວະ​ກາດ​ແບບ​ໃດ? ແລະ​ຢູ່​ໃສ ໃນ​ທົດ​ສະວັດ​ຕໍ່​ໜ້ານີ້.

ໃນ​ເດືອນ​ກັນ​ຍາ​ຜ່ານ​ມາ ທາ​ງຄະ​ນະ​ກຳ​ມະ​ການ​ ໄດ້​ເປີດ​ເຜີຍ​ລາຍ​ງານ​ສະ​ບັບ​ນຶ່ງ ​ທີ່​ໃຫ້​ລາ​ຍ​ລະ​ອຽດກ່ຽວ​ກັບ​ຂໍ້​ສະ​ເໜີ​ຫຼາຍໆ​ຢ່າງກ່ຽວ​ກັບ​ເລື້ອງນີ້. ທຳ​ອິດ​ຂໍ້ສະ​ເໜີ ໄດ້​ຊຸກ​ຍູ້​ໃຫ້​ອົງ​ການ​ອະ​ວະ​ກາດ​ສະ​ຫະ​ລັດ​ ຫຼື​ນາ​ຊາ ພັ​ດ​ທະ​ນາ​ແລະ​ສົ່ງຄະ​ນະ​ປະ​ຕິ​ບັດ​ງານ ​ຊຶ່ງ​ມີ​ຖານ​ປະ​ຕິ​ບັດ​ງານ​ຢູ່​ອະ​ວະ​ກາດ ເພື່ອ​ໄປ​ຊອກ​ຄົ້ນ​ຫາດາວ​ເຄາະ​ທີ່​ມີ​ຮູບ​ຮ່າງ​ ແລະ​ລັກ​ສະ​ນະ ​ຄ້າຍ​ຄື​ກັນ​ກັບ​ໂລກ ຢູ່​ຕາມ​ລະ​ບົບ​ດາວ​ຕ່າງໆ ແຕ່ນັ້ນ ແມ່ນ​ເລື້ອງ​ທີ່​ບໍ່​ງ່າຍ​ເລີຍ.

ທ່ານ​ຈັ​ສ​ຕິນ ເຄ​ຣັບ ກ່າວ​ວ່າ “ຖ້າ​ເຮົາ​ຫາກ​ພະ​ຍາ​ຍາມ​ຈະ​ຖ່າຍ​ພາບ ເອົາ​ດາວ​ເຄາະ​ ພວກ​ເຮົາ​ແມ່ນ​ປະ​ເຊີນ​ກັບ ​ຄວາມ​ຫຍຸ້ງ​ຍາກ ​ຫຼາຍ​ຢ່າງ. ນຶ່ງ​ໃນ​ນັ້ນ​ກໍ​ຄືມັນ​ຢູ່​ຫ່າງ​ກັນ​ພຽງ​ໜ້ອຍ​ດຽວ​ຢູ່​ເທິງ​ທ້ອງ​ຟ້າ ດັ່ງ​ນັ້ນ​ພວກ​ເຮົາ​ຈຶ່ງ​ຕ້ອງ​ການ​ກ້ອງສ່ອງ​ທີ່​ດີ​ສົມ​ຄວນ ເພື່ອ​ຈະ​ຖ່າຍ​ຮູບ​ພາບ​ໄດ້. ບັນ​ຫາ​ກໍ​ມີ​ຢູ່​ວ່າ ບັນ​ຍາ​ກາດ​ຂອງ ໂລກ​ເຮົາ ເຮັດ​ໃຫ້​ຮູບ​ມົວ ແລະ​ເຮັດ​ໃຫ້​ບັນ​ຫາ​ຮ້າຍ​ແຮງ​ຕື່ມ.”

ຄະ​ນະ​ກຳ​ມະ​ການ​ເຊື່ອ​ວ່າ ການ​ປະ​ຕິ​ບັດ​ງານ​ຂອງ​ອົງ​ການ​ນາ​ຊາເພື່ອ​ເກັບ​ກຳ​ຂໍ້​ມູນ ຢູ່​ເທິງ​ບັນ​ຍາ​ກາດ​ຂອງ​ໂລກ ແລະ​ອຸບ​ປະ​ກອນ​ທີ່​ມີ​ກຳ​ລັງ​ແຮງ​ສູງ​ຂຶ້ນ ອາດ​ສາ​ມາດ​ແກ້​ໄຂ​ບັນ​ຫານີ້​ໄດ້ ຊຶ່ງ​ນຳ​ໄປ​ສູ່ ​ຄຳ​ແນະ​ນຳ​ຂໍ້​ທີ​ສອງ ກໍ​ຄື​ໃຫ້​ສ້າງ​ກ້ອງ​ສ່ອງ​ຂ​ະ​ໜາດ​ໃຫຍ່ 2 ໜ່ວຍ​ຢູ່​ທີ່​ພື້ນ​ດິນ ຊຶ່ງ​ສາ​ມາດ​ຖ່າຍ​ພາບ 10 ເທື່ອ​ ແຈ້ງກວ່າ​ກ້ອງ​ສ່ອງອະ​ວະ​ກາດ ​ຮັບ​ໂບ (Hubble). ຢູ່​ທີ່​ຫ້ອງ​ແລັບ​ຂອງ​ທ່ານ ທ່ານ​ເຄ​ຣັບແລະ​ບັນ​ດາ​ເພື່ອນ​ຮ່ວມ​ງານ​ຂອງ​ທ່ານ ພວມ​ທຳ​ການ​ຄົ້ນ​ຄວ້າ​ກ່ຽວ​ກັບ​ອຸບ​ປະ​ກອນໃໝ່​ອື່ນໆ.

ອຸບ​ປະ​ກອນ​ທີ່​ມີ​ຄວາມ​ຊັບ​ຊ້ອນ​ສູງ ຍັງ​ຈະ​ສາ​ມາດ​ຊ່ອຍ​ພວກ​ນັກ​ວິ​ທະ​ຍາ​ສາດ​ທີ່​ໄດ້​ໃຫ້​ຄຳ​ແນະ​ນຳ​ອີກ​ຂໍ້​ນຶ່ງ ນັ້ນ​ກໍ​ຄື​ໃຫ້​ສຳ​ເລັດ ກ້ອງ​ສ່ອງ Wide Field infra-red Survey ທີ່​ໄດ້​ຮັບ​ທຶນ​ຈຳ​ນວນ​ນຶ່ງນັ້ນ. ເມື່ອ​ສົ່ງ​ຂຶ້ນ​ໄປ​ອະ​ວະ​ກາດນັ້ນ ມັນ​ບໍ່​ພຽງ​ແຕ່​ສາ​ມາດ​ຄົ້ນ​ຫາ​ດາວ​ເຄາະ ທີ່​ຢູ່​ຫ່າງ​ອອກ​ໄປ ຫຼາຍ​ຮ້ອຍ​ປີ​ແສງເທົ່າ​ນັ້ນ​ແຕ່ມັນ​ຍັງ​ສາ​ມາດ​ເກັບ​ກຳ​ຂໍ້​ມູນ​ກ່ຽວ​ກັບ​ວ່າ ດາວ​ເຫຼົ່າ​ນີ້​ເຮັດ​ຈາກ​ຫຍັງ ແລະ​ມັນ​ສາ​ມາດ​ສະ​ໜັບ​ສະ​ໜຸນ​ສິ່ງ​ທີ່​ມີ​ຊີ​ວິດ​ໄດ້​ຫຼື​ບໍ່.

ກ້ອງ​ສ່ອງ Wide Field Infrared Survey ທີ່​ສະ​ແດງ​ໃຫ້​ເຫັນ​ຢ​ູ່ນີ້ ແມ່ນ​ຮູບ​ແຕ້ມ ທີ່​ຈະ​ສາ​ມາດ​ຖ່າຍ​ພາບ ທີ່​ມີ​ຄຸນ​ນະ​ພາບ ເທົ່າ​ກັນ​ກັບ​ກ້​ອງ​ສ່ອງ​ຮັບ​ໂບ ຢູ່​ໃນ​ພາກ​ສ່ວນ​ໃຫຍ່ ຂອງ​ຈັກ​ກະ​ວານ
ກ້ອງ​ສ່ອງ Wide Field Infrared Survey ທີ່​ສະ​ແດງ​ໃຫ້​ເຫັນ​ຢ​ູ່ນີ້ ແມ່ນ​ຮູບ​ແຕ້ມ ທີ່​ຈະ​ສາ​ມາດ​ຖ່າຍ​ພາບ ທີ່​ມີ​ຄຸນ​ນະ​ພາບ ເທົ່າ​ກັນ​ກັບ​ກ້​ອງ​ສ່ອງ​ຮັບ​ໂບ ຢູ່​ໃນ​ພາກ​ສ່ວນ​ໃຫຍ່ ຂອງ​ຈັກ​ກະ​ວານ

ທ່ານ​ເຄ​ຣັບ​ກ່າວ​ວ່າ ມັນ​ຈະ​ໃຫ້​ຄຳ​ຕອບ ກ່ຽວ​ກັບ​ຄຳ​ຖາມ​ທີ່​ມີ​ມາ​ເປັນ​ເວ​ລ​າ​ຊ້າ​ນານ.

ທ່ານ​ຈັ​ສ​ຕິນ ເຄ​ຣັບ ກ່າວ​ວ່າ “ພວກ​ເຮົາ​ຢູ່​ທີ່ນີ້​ແຕ່​ພຽງ​ຜູ້​ດຽວ​ຕາມ​ລຳ​ພັງ​ບໍ? ນີ້​ແມ່ນ​ຄຳ​ຖາມ ທີ່​ມີ​ຜົນ​ບໍ່​ພຽງ​ແຕ່​ຕໍ່​ວິ​ທະ​ຍາ​ສາດ​ເທົ່າ​ນັ້ນ ແຕ່​ຍັງ​ມີ​ຜົນ​ຕໍ່​ເທວະ​ວິ​ທະ​ຍາ ປ​ລັດ​ຊະ​ຍາ ແລະ​ຂົງ​ເຂດ​ອື່ນໆ ​ນຳ​ດ້ວຍ. ມັນ​ເປັນ​ເລື້ອງ​ທີ່​ໜ້າ​ສົນ​ໃຈ ມັນ​ເປັນ​ສ່ວນ​ນຶ່ງ​ຂອງ​ການ​ເປັນ​ມະ​ນຸດ. ໂລກ​ຂອງ​ເຮົາ ​ມີ​ຄວາມ​ພິ​ເສດ​ ແທ້​ບໍ? ມັນ​ເປັນ​ໂລກ​ທີ່​ໂດດ​ດ່ຽວ​ບໍ? ມີ​ດາວ​ເຄາະ​ໜ່ວຍ​ອື່ນ​ບໍ ທີ່​ມີ​ສິ່ງ​ທີ່​ມີ​ຊີ​ວິດ​ອາ​ໄສ​ຢູ່? ພວກ​ເຮົາ​ສາ​ມາດ​ຕິດ​ຕໍ່​ກັບ​ພວກ​ເຂົາ​ໄດ້​ບໍ?”

ສ່ວນ​ຄຳ​ແນະ​ນຳ​ອື່ນໆ​ເພື່ອ​ຈະ​ຕອບ​ຄຳ​ຖາມ​ເຫຼົ່າ​ນັ້ນ ແມ່ນ​ຮວມ​ທັງ​ການ​ສ້າງ​ອຸບ​ປະ​ກອນ​ທີ່​ໃຊ້​ເທັກ​ໂນ​ໂລ​ຈີ​ຫຼ້າ​ສຸດ ສ້າງ​ຕ່າ​ໜ່າງ​ທີມ​ງານ​ຢູ່​ໃນ​ທົ່ວ​ໂລກ ​ເພື່ອ​ປະ​ສານ​ງານ​ກັນ ແລະ​ສ້າງ​ໂຄງ​ການ​ເພື່ອ​ໃຫ້​ພວກ​ນັກ​ລົງ​ທຶນ ​ສະ​ໜັບ​ສະ​ໜຸນ​ຕ່າງໆ. ລາຍ​ງານ​ຈະ​ໄດ້​ຮັບ​ການ​ທົບ​ທວນ ​ໂດຍ​ທາງ​ລັດ​ຖະ​ສະ​ພາ​ສະ​ຫະ​ລັດ ແລະ​ນຳ​ໃຊ້​ໃນ​ການ​ວາງ​ແຜນ ​ຂອງ​ລັດ​ຖະ​ບານ​ກາງ ເພື່ອ​ຊອກ​ຄົ້ນ​ຫາ​ດາວ​ເຄາະ​ໃໝ່ ແລະ​ສິ່ງ​ທີ່​ມີ​ຊີ​ວິດ ນອກ​ໂລກ​ມະ​ນຸດ​ເຮົາ ໃນ​ຮອບ​ທົດ​ສະ​ວັດ​ຕໍ່​ໜ້ານີ້.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG