ບັນດານັກຄົ້ນຄວ້າ ໄດ້ຊ່ວຍຫລຸດຜ່ອນ ບັນຫາສຸຂະພາບ ທີ່
ສຳຄັນ ດ້ວຍມັນດ້າງ ແບບງ່າຍດາຍ.
ໂຄງການນຶ່ງ ທີ່ຊ່ວຍພວກກະສິກອນ ຂະໜາດນ້ອຍ ຢູ່ໃນ
ປະເທດ Mozambique ປູກມັນດ້າງຫວານ ເນື້ອສີສົ້ມ ທີ່
ສົມບູນດ້ວຍ ວິຕາມິນ A ສາມາດຕັດອັດຕາ ອາການຖອກທ້ອງ
ຂອງພວກເດັກນ້ອຍ ລົງເຖິງ 40 ຫາ 50 ເປີເຊັນ ອິງຕາມການ
ສຶກສາຄົ້ນຄວ້າໃໝ່.
ມັນເປັນຄັ້ງທຳອິດ ທີ່ໂຄງການພັດທະນາດັ່ງກ່າວ ແນເປົ້າໝາຍ
ໃສ່ຜະລິດຜົນກະສິກຳ ທີ່ເຫັນວ່າ ສາມາດສົ່ງເສີມສຸຂະພາບ
ນຳດ້ວຍ. ຜູ້ສື່ຂ່າວ ວີໂອເອ Steve Baragona ມີລາຍງານ
ຊຶ່ງໄຊຈະເລີນສຸກ ຈະນຳມາສະເໜີທ່ານໃນອັນດັບຕໍ່ໄປ.
ການຂາດແຄນ ວິຕາມິນ A ນັ້ນ ຈະເພີ້ມຄວາມສ່ຽງ ຕໍ່ການຕິດແປດພະຍາດຮ້າຍແຮງ ແລະ ເຖິງແກ່ຄວາມຕາຍໄດ້. ອິງຕາມອົງການອະນາໄມໂລກ ຫຼື WHO ພວກເດັກນ້ອຍ 190 ລ້ານຄົນ ໃນທົ່ວໂລກ ບໍ່ໄດ້ຮັບ ວິຕາມິນ A ຢ່າງພຽງພໍ.
ນັກຊ່ຽວຊານດ້ານໂພຊະນາການ ທ່ານນາງ Anna Herforth
ກ່າວຜ່ານທາງ Skype ວ່າ ວິຕາມິນເສີມຕ່າງໆ ສາມາດແກ້
ບັນຫາໄດ້ ຊົ່ວຄາວເທົ່ານັ້ນ.
ທ່ານ ນາງ Herforth ເວົ້າວ່າ “ມັນຄືກັນກັບວ່າ ເປັນການ
ແກ້ໄຂ ບັນຫາພື້ນຖານ ດ້ວຍວິທີການຊົ່ວຄາວຫຼາຍກວ່າ
ຊຶ່ງເປັນການທີ່ ປະຊາຊົນ ບໍ່ສາມາດໄດ້ຮັບ ອາຫານ
ການກິນ ທີ່ມີຄຸນນະພາບສູງ.”
ດັ່ງນັ້ນ ອົງການ ຄົ້ນຄວ້າ ດ້ານກະສິກຳ ທີ່ມີຊື່ວ່າ HarvestPlus
ຢາກປັບປຸງອາຫານການກິນ ຂອງພວກຄົນທຸກຍາກ ໃນໂລກ ຢູ່ຕາມຊົນນະບົດ ໂດຍການ
ນຳສະເໜີ ພືດພັນຫຼັກຕ່າງໆ ທີ່ອຸດົມສົມບູນ ດ້ວຍທາດອາຫານຫຼັກຕ່າງໆ ຕາມທຳມະຊາດ.
ທ່ານ Alan de Brauw ເວົ້າວ່າ “ຖ້າເຈົ້າສາມາດເຮັດສິ່ງໃດນຶ່ງໄດ້ ໂດຍຜ່ານການປູກຝັງ ເພື່ອເພີ້ມປະລິມານຂອງວິຕາມິນ A ໃນອາຫານການກິນ ເຈົ້າກໍຈະຢູ່ໃນສະພາບດີຫຼາຍທີ່ສຸດ ເພາະວ່າ ອັນນັ້ນມັນຍືນຍົງຫຼາຍກວ່າ.”
ທ່ານ Alan de Brauw ເປັນນັກເສດຖະສາດ ຢູ່ທີ່ສະຖາບັນຄົ້ນຄວ້າ ນະໂຍບາຍ ດ້ານອາຫານສາກົນ ຊຶ່ງເປັນຜູ້ຮ່ວມຂຽນລາຍງານກ່ຽວກັບ ສຶກສາຄົ້ນຄວ້າໃໝ່ດັ່ງກ່າວ ຢູ່ໃນວາລະສານ World Development.
ບັນດາເພື່ອນຮ່ວມງານຂອງທ່ານ ຢູ່ທີ່ອົງການ HarvestPlus ໄດ້ນຳສະເໜີ ພວກມັນດ້າງ
ຫວານເນື້ອສີສົ້ມ ໃຫ້ແກ່ຊາວໂມຊຳບິກ ໃນປີ 2006.
ທ່ານ de Brauw ເວົ້າວ່າ “ປະມານ 70 ເປີເຊັນ ຂອງພວກເດັກນ້ອຍ ອາຍຸຕ່ຳກວ່າ
5 ປີ ແມ່ນຂາດແຄນ ວິຕາມິນ A. ສະນັ້ນ ເຮົາມີຄວາມຈຳເປັນຢ່າງຍິ່ງ ທີ່ຈະຕ້ອງ
ຫາການແກ້ໄຂໃໝ່ໆ.”
ຊາວກະສິກອນ ໂມຊຳບິກ ໄດ້ພາກັນປູກມັນດ້າງຫວານ ສີຂາວ ຫຼື ສີເຫຼືອງຢູ່ແລ້ວ. ແຕ່
ມັນດ້າງເຫລົ່ານີ້ ໃຫ້ວິຕາມິນ A ພຽງໜ້ອຍດຽວ. ແຕ່ມັນດ້າງຫວານສີສົ້ມ ນ້ອຍຫົວດຽວ
ມີ ວິຕາມິນ A ເຕັມສ່ວນທີ່ຈະສະໜອງໃຫ້ພຽງພໍ ພາຍໃນນຶ່ງມື້.
ປະຊາຊົນ ໃນ 24 ໝູ່ບ້ານ ໄດ້ຮັບເຄືອມັນດ້າງຫວານສີສົ້ມ ພ້ອມ ດ້ວຍ ການເຝິກອົບຮົມ
ແລະ ການສິດສອນໃຫ້ຮູ້ ກ່ຽວກັບວິທີການປູກຝັງເຄືອມັນດ້າງດັ່ງກ່າວ ແລະ ຄວາມສຳຄັນ
ຂອງວິຕາມິນ A.
ໃນຕອນທ້າຍຂອງການສຶກສາຄົ້ນຄວ້າ ໄລຍະ 3 ປີນັ້ນ ມີກໍລະນີ ພວກເດັກນ້ອຍ ທີ່ມີ
ອາການຖອກທ້ອງ ຕ່ຳກວ່າ 40 ເປີເຊັນ ໃນບັນດາໝູ່ບ້ານ ທີ່ປູກມັນດ້າງຫວານສີສົ້ມ ເມື່ອ
ປຽບທຽບກັບ 12 ໝູ່ບ້ານ ບ່ອນທີ່ພວກເຂົາເຈົ້າ ບໍ່ໄດ້ຮັບການແນະນຳ ມັນດ້າງຫວານນັ້ນ.
ໃນບັນດາພວກເດັກນ້ອຍ ອາຍຸຕ່ຳກວ່າ 3 ປີ ຄວາມແຕກຕ່າງ ກໍຄື 50 ເປີເຊັນ.
ທ່ານ de Brauw ເວົ້າວ່າ “ມັນເປັນເລື້ອງທີ່ສຳຄັນຫຼາຍ ເພາະວ່າ ຜ່ານມາ ບໍ່ມີຜູ້ໃດ
ສະແດງໃຫ້ເຫັນໄດ້ວ່າ ການແຊກແຊງ ດ້ວຍຜະລິດຜົນດ້ານກະສິກຳ ສາມາດມີ
ຜົນຢ່າງກວ້າງຂວາງ ຕໍ່ສຸຂະພາບ ດ້ານໃດດ້ານນຶ່ງໄດ້.”
ບັນດານັກຊ່ຽວຊານ ກຳລັງສົ່ງເສີມແນວຄິດ ທີ່ສິດສອນໃຫ້ແກ່ຊາວກະສິກອນ ວິທີການ
ປູກຝັງ ໃຫ້ຫຼາຍຂຶ້ນ ແລະ ໃຫ້ອາຫານດີຂຶ້ນຕື່ມ ຊຶ່ງເປັນແນວທາງທີ່ດີທີ່ສຸດ ໃນບັນດາແນວ
ທາງຕ່າງໆ ເພື່ອປັບປຸງ ສຸຂະພາບ.
ທ່ານນາງ Herforth ກໍເວົ້າວ່າ “ອັນນີ້ ເປັນບ່ອນການຄົ້ນຄົ້ວ ທີ່ກຳລັງເປັນທີ່ສົນໃຈ
ແທ້ໆ ໃນເວລານີ້.”
ທ່ານ ນາງ Anna Herforth ບໍ່ໄດ້ມີສ່ວນຮ່ວມໃນການສຶກສາຄົ້ນຄວ້ານີ້. ແຕ່ທ່ານນາງ
ກ່າວວ່າ ມັນເຮັດໜ້າທີ່ ໃນການເຊື່ອມໂຍງຕໍ່ກັນ ໄດ້ເປັນຢ່າງດີ.
ທ່ານນາງ Herforth ເວົ້າວ່າ “ມັນເປັນການປະກາດວ່າ ເບິ່ງແມ້ ຖ້າ ເຈົ້າຜະລິດ
ອາຫານ ແລະ ມັນມີຢູ່ທົ່ວໄປ ທີ່ປະຊາຊົນ ຫາກິນໄດ້ ແລະ ພວກເຂົາເຈົ້າມັກມັນ
ແລະ ກິນມັນໄດ້ ສະນັ້ນ ມັນເປັນສິ່ງທີ່ດີຫຼາຍ ສຳຫລັບສຸຂະພາບ.”
ອົງການ HarvestPlus ເອົາວິທີການແບບດຽວກັນກັບ ພືດຜົນອື່ນໆ ລວມທັງ ມັນຕົ້ນ ທີ່ມີ
ວິຕາມິນ A ສູງ ຢູ່ໃນປະເທດໄນຈີເຣຍ, ເຂົ້າຟ່າງທີ່ອຸດົມດ້ວຍທາດເຫຼັກ ຢູ່ໃນອິນເດຍ,
ເຂົ້າທີ່ມີທາດສັງກະສີສູງ ຢູ່ໃນບັງກລາແດັສ.
