ພວກເຜິ້ງກຳລັງຕົກຢູ່ໃນອັນຕະລາຍໃນທົ່ວໂລກ ສາເຫດທີ່ພາໃຫ້ເກີດໃນອັນທີ່ເອີ້ນວ່າ ການພັງທະລາຍລົງໃນການເຮັດຮັງຂອງເຜິ້ງ ແມ່ນມາຈາກຈາກຫຼາຍໆປະການ ນັບແຕ່ການໃຊ້ຢາຂ້າແມງໄມ້ ຕະຫຼອດຈົນການສູນເສຍທີ່ຢູ່ອາໄສຍ້ອນການຕິດແປດເຊື້ອຈຸລິນຊີ ຫຼື microorganisms ແຕ່ວ່າພວກນັກວິທະ ຍາສາດ ໃນປະເທດໂປແລນກ່າວວ່າ ພວກເຂົາເຈົ້າກຳລັງຫາຊ່ອງທາງ ເພື່ອຈະຊ່ອຍປິ່ນປົວຮັກສາພະຍາດແນວນຶ່ງ ໃຫ້ຫາຍດີໄດ້. George Putic ນັກຂ່າວຂອງ VOA ມີລາຍງານຂອງກ່ຽວກັບເລື້ອງນີ້ ຊຶ່ງວັນນະສອນຈະນຳເອົາລາຍລະອຽດມາສະເໜີທ່ານ ໃນອັນດັບຕໍ່ໄປ.
ພວກນັກວິທະຍາສາດ ແມ່ນກຳລັງຕໍ່ສູ້ໃນຫລາຍໆດ້ານ ເພື່ອຈະຊ່ອຍປົກປ້ອງການຫລຸດນ້ອຍຖອຍລົງຂອງຈຳນວນເຜິ້ງຢູ່ໃນທົ່ວໂລກ.
ສາເຫດນຶ່ງ ທີ່ມີຜົນກະທົບ ຕໍ່ການເຮັດຮັງຂອງເຜິ້ງ ໃນປະເທດໂປແລນ ແມ່ນ ເຊື້ອ Nose- mosis ຫຼື nosema ຊຶ່ງເປັນໂຣກທີ່ເກີດຈາກພວກເຊື້ອລາທັງຫຼາຍ ທີ່ສົ່ງຜົນ ກະທົບຕໍ່ ພວກເຜິ້ງທີ່ຕົວແກ່ທັງຫຼາຍ.
ທ່ານນາງ Aneta Ptaszynska ຈາກມະຫາວິທະຍາໄລ Maria Curie-Sklodowska ກ່າວວ່າ “ພວກເຜິ້ງທີ່ເປັນຄົນງານທີ່ຕິດໂຣກ ແມ່ນມີຊີວິດຢູ່ໄດ້ ໃນເວລາສັ້ນໆ ໃນຊ່ວງ ລະດູຮ້ອນ ປະມານ 8 ຫາ 12 ມື້ ໃນຂະນະທີ່ຕາມປົກ ກະຕິແລ້ວ ພວກມັນມີຊີວິດຢູ່ໄດ້ 36 ມື້ ເພາະສະນັ້ນການປະກອບກິດຈະກຳອື່ນໆຂອງພວກຄອບຄົວເຜິ້ງທັງໝົດ ຈະລົດ ນ້ອຍຖອຍລົງແລະພວກເຜິ້ງ ຍັງຈະຕ້ອງມີບັນຫາກັບລະດູໜາວທີ່ກຳລັງຈະຜ່ານໄປນັ້ນ.”
ພວກນັກວິທະຍາສາດ ຕັ້ງທິດສະດີຂຶ້ນວ່າ ຢາຂ້າແມງໄມ້ບາງຢ່າງ ສາມາດເຮັດໃຫ້ລະບົບ ພູມຕ້ານ ທານພາຍໃນຂອງພວກເຜິ້ງອ່ອນເພຍຊຶ່ງເຮັດໃຫ້ມັນບໍ່ສາມາດ ຕໍ່ສູ້ກັບພວກກາຝາກຕ່າງໆໄດ້. ຫຼັງຈາກທີ່ພວກມັນ ໄດ້ກືນກິນອາຫານ ຫຼືນ້ຳ ທີ່ມີສານພິດເຈືອປົນເຂົ້າໄປ ແລ້ວ ເຜິ້ງກໍຈະປະພຶດຕົວແບບຜິດປົກກະຕິແລະກໍຕາຍຢ່າງໄວວາ.
ສິ່ງດັ່ງກ່າວນີ້ຄິດວ່າ ແມ່ນນຶ່ງໃນສາເຫດຫຼັກທີ່ເຮັດໃຫ້ພົນລະເມືອງຂອງພວກເຜິ້ງໃນໂປແລນ ຫລຸດລົງເຫລືອພຽງເຄິ່ງນຶ່ງ ໃນໄລຍະ 15 ປີທີ່ຜ່ານມາ.
ພວກນັກວິທະຍາສາດໂປແລນ ກ່າວວ່າ ພວກເຂົາເຈົ້າໄດ້ຄົ້ນພົບ ນ້ຳຢາທີ່ກັ່ນຈາກດອກໄມ້ຊະນິດນຶ່ງ ທີ່ມີປະສິດທິຜົນ ຫຼາຍກວ່າ 90 ເປີເຊັນ ໃນການຊ່ອຍຊີວິດຂອງພວກເຜິ້ງ.
ທ່ານນາງ Aneta Ptaszynska ກ່າວວ່າ “ໃນອີກດ້ານນຶ່ງ ກໍຄືວ່າ ພວກເຜິ້ງນີ້ ແມ່ນໄດ້ລຸດລະດັບ ຂອງເຊື້ອພະຍາດ Nosemosi ລົງ. ພວກເຮົາໄດ້ສັງເກດເຫັນຢ່າງຈະແຈ້ງ ກ່ຽວກັບການຫຼຸດລົງຂອງຈຳນວນສະປໍໃນລຳໄສ້ຂອງພວກເຜິ້ງ ຫລັງຈາກໄດ້ກິນນ້ຳດອກໄມ້ແລ້ວ. ໃນອີກດ້ານນຶ່ງ ພວກເຂົາຈະເພີ້ມ ລະດັບ ຂອງ enzymes ທີ່ຮັບຜິດ ຊອບ ຕໍ່ປະຕິກິລິຍາໃນລະບົບພູມຕ້ານທານຂອງພວກແມງໄມ້ຕ່າງໆ. enzymes ທີ່ສາມາດສັງເກດ ຕົວການຂອງການເຮັດໃຫ້ເກີດໂຣກ ສິ່ງແປກປອມເຂົ້າໄປໃນຮ່າງກາຍ.”
ຢາໃໝ່ທີ່ວ່ານີ້ ແມ່ນກຳລັງຢູ່ໃນຂັ້ນຕອນການທົດລອງ ກ່ອນທີ່ຈະໄດ້ຮັບການອະນຸມັດໃຫ້ໃຊ້ໄດ້.
ພວກນັກວິທະຍາສາດ ພາກັນເຕືອນວ່າ ການສີດຢາກັນຍຸງ ທີ່ນຳເຊື້ອໄວຣັສ Zika ກໍສາມາດທຳລາຍພວກເຜິ້ງໄດ້ເຊັ່ນກັນ.
ເຈົ້າໜ້າທີ່ ໃນຂົງເຂດທີ່ໄດ້ຮັບຜົນກະທົບ ແມ່ນແນະນຳໃຫ້ສີດຢາກັນແມງໄມ້ ຫຼັງຈາກມືດ ຄ່ຳແລ້ວ ເວລາພວກເຜິ້ງພາກັນຫຼັບນອນແລ້ວນັ້ນ ແລະໃຫ້ໃຊ້ຢາຊະນິດທີ່ເປັນສານເຄມີປະສົມນ້ຳ ທີ່ສາມາດຂ້າພຽງແຕ່ໜອນນ້ຳຂອງຍຸງເທົ່ານັ້ນ.
ທ່ານ Michael Steinkampf ຊຶ່ງເປັນຄົນລ້ຽງເຜິ້ງກ່າວວ່າ “ຢາທີ່ວ່ານີ້ ແມ່ນເປັນພິດແຮງຫຼາຍຕໍ່ພວກໜອນນ້ຳຂອງຍຸງ ແຕ່ວ່າ ເມື່ອປະສົມກັບນ້ຳເຂົ້າໄປແລ້ວ ຈະບໍ່ເປັນພິດເປັນໄພຕໍ່ພວກເຜິ້ງເລີຍ.”
ເທົ່າທີ່ພວກເຮົາຊາບນັ້ນ ພວກເຜິ້ງແມ່ນເປັນຜູ້ນຳເກສອນຂອງພວກຜົນໄມ້ແລະພືດຜັກຕ່າງໆໄປປະສົມພັນກັນ ຊຶ່ງບັນດານັກວິທະຍາສາດ ກ່າວວ່າ ການຕື່ນຕົວ ເພີ້ມຂຶ້ນກ່ຽວກັບການປົກປ້ອງຮັກສາພວກເຜິ້ງ ແມ່ນມີຄວາມຫຼໍ່ແຫຼມສຳຄັນສຳລັບອຸດສາຫະກຳອາຫານໃນທົ່ວໂລກ.
