“ບໍ່ມີຜູ້ໃດໃນໂລກ ລົງທຶນໃນການກໍ່ການຮ້າຍ ຫຼາຍໄປກວ່າປະເທດຣັດເຊຍ” ນັ້ນຄືຄຳເວົ້າຂອງປະທານາທິບໍດີໂວໂລດີເມຍ ເຊເລນສກີ ທີ່ກ່າວໃນຄຳປາໄສປະຈຳວັນ ເມື່ອວັນພະຫັດວານນີ້.
ທ່ານກ່າວຕື່ມວ່າ “ເລື້ອງນີ້ ຈຳເປັນແທ້ໆ ຕ້ອງໄດ້ຮັບຄຳຕອບທາງດ້ານກົດໝາຍ ໃນລະດັບໂລກ ແລະມັນກໍບໍ່ມີເຫດຜົນໃດໆເລີຍວ່າ ເປັນຫຍັງປະຕິກິລິຍາໃນທຳນອງນັ້ນຈຶ່ງບໍ່ເກີດຂຶ້ນ ໂດຍສະເພາະແລ້ວຢູ່ໃນສະຫະລັດ.”
ທ່ານເຊເລນສກີ ຂອບອົກຂອບໃຈບັນດາສະມາຊິກສະພາສູງສະຫະລັດ ທີ່ໄດ້ “ໃຫ້ການອະນຸມັດຢ່າງເປັນເອກກະສັນ ຕໍ່ມະຕິທີ່ຮຽກຮ້ອງໃຫ້ກະຊວງການຕ່າງປະເທດສະຫະລັດຮັບຮູ້ວ່າຣັດເຊຍ ເປັນປະເທດໃຫ້ການສະໜັບສະໜຸນການກໍ່ການຮ້າຍ.” ຣັດເຊຍຈະເຂົ້າໄປມີຊື່ຮ່ວມຄິວບາ ເກົາຫຼີເໜືອ ອີຣ່ານ ແລະຊີເຣຍ.
ນັບເປັນເທື່ອທຳອິດໃນຮອບຫຼາຍໆອາທິດ ທີ່ຣັດເຊຍໄດ້ຍິງລູກສອນໄຟໂຈມຕີເຂດນະຄອນຫຼວງກິຢິບ ແລະເຂດເຊີນີຮິບ ໃນພາກເໜືອຂອງປະເທດ ໃນວັນພະຫັດວານນີ້ ໃນອັນທີ່ຢູເຄຣນກ່າວຫາວ່າ ເປັນການຕອບໂຕ້ ໃນການສືບຕໍ່ຕ້ານຢັນການຮຸກຮານຂອງມົສກູ.
ຣັດເຊຍໄດ້ໂຈມຕີເຂດນະຄອນຫຼວງກີຢິບ ດ້ວຍລູກສອນໄຟ 6 ລູກ ຈາກທະເລດຳ ເຮັດໃຫ້ 15 ຄົນບາດເຈັບ ຫ້າຄົນຂອງຈຳນວນນັ້ນແມ່ນເປັນພົນລະເຮືອນ ອີງຕາມຄຳເວົ້າຂອງຜູ້ປົກຄອງລັດຄົນນຶ່ງ. ຢູເຄຣນກ່າວວ່າ ຕົນໄດ້ຍິງທຳລາຍລູກສອນໄຟນຶ່ງລູກ ແຕ່ກຳລັງຂອງມົສກູໄດ້ໂຈມຕີຄ້າຍທະຫານແຫ່ງນຶ່ງ ໃນເມືອງລີອູຕິສ ຢູ່ນອກນະຄອນຫຼວງກີຢິບ ໂດຍໄດ້ທຳລາຍຕຶກອາຄານຫຼັງນຶ່ງ ແລະອີກສອງຫຼັງໄດ້ຮັບຄວາມເສຍຫາຍ.
ຜູ້ປົກຄອງລັດເຂດກີຢິບ ທ່ານໂອເລັກຊີ ກູເລບາ ກ່າວວ່າ ການໂຈມຕີດັ່ງກ່າວນີ້ແມ່ນພົວພັນກັບວັນຄົບຮອບທີ່ປະທານາທິບໍດີເຊເລນສກີໄດ້ສ້າງຕັ້ງເຂດດັ່ງກ່າວຂຶ້ນເປັນລັດເມື່ອປີກາຍນີ້ ແລະຢູເຄຣນໄດ້ລະນຶກເຖິງເປັນເທື່ອທຳອິດໃນວັນພະຫັດວານນີ້.
ທ່ານກູເລບາ ກ່າວຕໍ່ໂທລະພາບຢູເຄຣນວ່າ “ຣັດເຊຍ ດ້ວຍການຊ່ວຍເຫຼືອຈາກລູກສອນໄຟ ແມ່ນໄດ້ທຳການແກ້ແຄ້ນຕໍ່ການຕ້ານຢັນຢ່າງແຜ່ກວ້າງຂອງປະຊາຊົນ ຊຶ່ງເຮັດໃຫ້ຢູເຄຣນສາມາດຈັດຕັ້ງໄດ້ຢ່າງຖືກຕ້ອງ ໃນການກາຍເປັນລັດຂອງພວກເຂົາເຈົ້າ. ຢູເຄຣນໄດ້ທັບມ້າງແຜນການຂອງຣັດເຊຍໄປແລ້ວ ແລະຈະສືບຕໍ່ປ້ອງກັນໂຕເອງ.”
ສ່ວນຜູ້ປົກຄອງເຂດເຊີນີຮິບ ທ່ານວຢາເຊັສລາຟ ຊາອຸສ (Vyacheslav Chaus) ລາຍງານວ່າ ຣັດເຊຍຍັງໄດ້ຍັງໄດ້ຍິງລູກສອນໄຟຈາກເບລາຣຸສ ທີ່ເປັນເພື່ອນບ້ານ ໂຈມຕີບ້ານຮອນຊາຣິບສກາ. ເຂດເຊີນີຮິບບໍ່ໄດ້ຖືກໂຈມຕີມາໄດ້ຫຼາຍອາທິດແລ້ວ.
ຣັດເຊຍໄດ້ຖອນກຳລັງອອກຈາກເຂດກີຢິບ ແລະເຊີນີຮິບ ເມື່ອຫຼາຍໆເດືອນຜ່ານມາ ເມື່ອບໍ່ສາມາດເຂົ້າຢຶດເອົາເຂດທັງສອງ ເພື່ອໂຄ່ນລົ້ມລັດຖະບານຂອງທ່ານເຊເລນສກີໄດ້.
