ລິ້ງ ສຳຫລັບເຂົ້າຫາ

logo-print

ຊາວກະ​ສິ​ກອນ​ ປູກ​ຢາງ​ພາ​ລາ​ໃນ ລາວ ປະ​ເຊີນ​​ບັນ​ຫາ​ໜີ​້​ສິນ ​ເພີ່ມ​ຂຶ້ນ


ສວນ​ຕົ້ນ​ຢາງ​ພາ​ລາ​ໃນ ລາວ.

ຊາວກະ​ສິ​ກອນຜູ້​ປູກ​ຢາງ​ພາ​ລາ​ໃນ ລາວ ກຳ​ລັງ​ປະ​ເຊີນ​ກັບ​ບັນ​ຫາ​ໜີ​້​ສິນ​ທີ່ງອກ​ເງີຍ​ຈາກດອກ​ເບ້ຍ​ເງິນ​ກູ້ທະ​ນາ​ຄານ​ທີ່​ເພີ່ມ​ຂຶ້ນ ຂະ​ນະ​ທີ່​ລາ​ຄາ​ຢາງ​ກໍ​ຍັງ​ເຮັດ​ໃຫ້​ຊາວ​ກະ​ສິ​ກອນ​ຕ້ອງ​ແບກ​ຫາບ​ການ​ຂາດ​ທຶນ​ຢູ່​ຕໍ່​ໄປ.

ທ່ານ ວິ​ໄລ​ວັນ ພົມ​ເຂ ປະ​ທານ​ສະ​ມາ​ຄົມ​ຢາງ​ພາ​ລາ ລາວ ຖະ​ແຫຼງວ່າ​ການ​ປູກ​ຢາງ​ພາ​ລາ​ຢູ່​ໃນ ລາວ ໃນ​ປັດ​ຈຸ​ບັນ​ມີ 3 ຮູບ​ແບບ​ດ້ວຍ​ກັນ​ຄື ການ​ປູກ​ໃນ​ທີ່​ດິນ​ສຳ​ປະ​ທານ​ຂະ​ໜາດ​ໃຫຍ່​ຂອງ​ນັກ​ລົງ​ທຶນ​ຕ່າງ​ຊາດ, ການ​ປູກ​ໂດຍ​ນັກ​ທຸ​ລະ​ກິດ ລາວ ແລະ ການ​ປູກ​ແບບ​ຄອບ​ຄົວ​ຂອງ​ຊາວ​ກະ​ສິ​ກອນ ລາວ ໂດຍ​ມີ​ເນື້ອ​ທີ່​ລວມກັນເຖິງ 3 ແສນ​ເຮັກ​ຕາໃນ​ນີ້​ສາ​ມາດ​ປາດ​ເອົາ​ນ້ຳ​ຢາງ​ໄດ້​ແລ້ວ 160,000 ເຮັກ​ຕາ ແລະ ຈະ​ສາ​ມາດ​ປາດ​ເອົາ​ນ້ຳ​ຢາງ​ໄດ້​ທັງ​ 3 ແສນ​ເຮັກ​ຕາພາຍ​ໃນ​ປີ 2020 ຊຶ່ງ​ຈະ​ເຮັດ​ໃຫ້​ມີ​ຜົນ​ຜະ​ລິດ​ນ້ຳ​ຢາງ​ອອກ​ສູ່​ຕະຫຼາດ​ເພີ່ມ​ຂຶ້ນ​ອີກ​ເຖິງ 1 ເທົ່າ ອັນ​ຈະ​ສົ່ງ​ຜົນ​ກະ​ທົບ​ຕໍ່​ຊາວ​ກະ​ສິ​ກອນ ລາວ ໂດຍ​ກົງ ຖ້າ​ຫາກ​ລາ​ຄາ​ຢາງ​ໃນ ລາວ ຍັງ​ບໍ່​ປັບ​ຕົວ​ສູງ​ຂຶ້ນກວ່າ​ທີ່​ເປັນ​ຢູ່​ໃນ​ປັດ​ຈຸ​ບັນ​ໂດຍ​ສະ​ເພາະ​ແມ່​ນ​ນັກ​ທຸ​ລະ​ກິດ ລາວ ທີ່​ກູ້​ຢືມ​ເງິນ​ທະ​ນາ​ຄານ​ນັ້ນ​ຈະ​ໄດ້​ຮັບ​ຜົນ​ກ​ະ​ທົບຫຼາຍ​ທີ່​ສຸດ​ເພາະ​ຍັງ​ຈະ​ຕ້ອງ​ແບກ​ຫາບ​ພາ​ລະ​ດອກ​ເບ້ຍ​ເງິນ​ກູ້​ຕໍ່​ໄປ ດັ່ງ​ທີ່​ທ່ານ ວິ​ໄລ​ວັນ ໄດ້​ໃຫ້​ການ​ຢືນ​ຢັນ​ວ່າ

"ສ່ວນ​ບຸກ​ຄົນ​ທີ່​ລົງ​ທຶນ​ເຮັດ​ແບບ​ເສດ​ຖະ​ກິດ​ຄອບ​ຄົວ​ເຂົາ​ບໍ່​ມີ​ບັນ​ຫາ ນ້ອຍ​ເຂົາ​ກະ​ຂາຍ ຫຼາຍ​ເຂົາ​ກະ​ຂາຍ ອັນ​ນີ້​ແມ່ນ​ແຮງ​ງານ​ຂອງ​ເຂົາ ​ແຕ່​ວ່າ​ພາກ​ສ່ວນ​ທີ່​ຢືມ​ເງິນ​ຈາກ​ທະ​ນາ​ຄານ​ຫັ້ນ​ນະ​ມີ​ບັນ​ຫາ​ຍ້ອນ​ວ່າ​ອັດ​ຕາ​ດອກ​ເບ້ຍ​ການ​ກູ້​ຢືມ​ມັນ​ສູງ​ແລ້ວ​ມາ​ລົງ​ທຶນ​ໃສ່​ຢາງ​ພາ​ລາ ແລະ ລາ​ຄາ​ຢາງ​ພາ​ລານີ້​ໄປ​ຂາຍ​ໄປ​ທົດ​ແທນດອກ​ເບ້ຍ​ທະ​ນາ​ຄານ​ແລ້ວ​ເກືອບ​ຈຸ​ຈະ ອັນ​ນີ້​ເປັນ​ບັນ​ຫາ​ເຖິງ​ຢ່າງ​ໃດ​ກະ​ດີ ຖື​ວ່າ​ຢາງ​ພາ​ລານີ້​ກະ​ຍັງ​ເປັນ​ພືດ​ສຳ​ຄັນ​ສ້າງ​ລາຍ​ໄດ້​ໃຫ້​ປະ​ຊາ​ຊົນ ຖື​ວ່າ​ໄດ້​ອັນ​ດັບ​ອັນ​ແນ່ນອນ."

ສ່ວນ​ທ່ານ ພອນ​ໄຊ ແກ້ວ​ສົມພັນ ເຈົ້າ​ເມືອງ​ບຸນ​ເໜືອ ແຂວງ​ຜົ້ງ​ສາ​ລີ ໃຫ້​ການ​ຢືນ​ຢັນ​ວ່າ​ກະ​ເສດ​ຕະ​ກອນ ລາວ ຢູ່​ເມືອງ​ບຸ​ນ​ເໜືອ​ກຳ​ລັງ​ປະ​ສົບ​ບັ​ນ​ຫາ​ຫຍຸ້ງ​ຍາກ ກ່ຽວ​ກັບ ການ​ສົ່ງ​ຜົນ​ຜະ​ລິດ​ດ້ານ​ກະ​ສິ​ກຳ​ໄປ ຈີນ ເພາະ​ວ່າ​ທາງ​ການ ຈີນ ໄດ້​ປະ​ກາດ​ສັ່ງ​ຫ້າມ​ນຳ​ເຂົ້າ​ສິນ​ຄ້າ​ກະ​ສິ​ກຳ​ຈາກ ລາວ ໂດຍ​ຜ່ານ​ດ່ານ​ຊາຍ​ແດນ​ທ້ອງ​ຖິ່ນ​ລະ​ຫວ່າງ ຈີນ ກັບ ລາວ ທີ່​ເມືອງ​ບຸນ​ເໜືອ ແລະ ກຳ​ນົດ​ໃຫ້​ນຳ​ເຂົ້າ​ຜົນ​ຜ​ະ​ລິດ​ກະ​ສິ​ກຳ​ຈາກ​ແຂວງ​ພາກ​ເໜືອ​ຂອງ ລາວ ໂດຍ​ຜ່ານ​ດ່ານ​ສາ​ກົນ​ທີ່ບໍ່​ເຕັນ​ໃນ​ແຂວງຫຼວງ​ນ້ຳ​ທາ​ເທົ່າ​ນັ້ນ ຈຶ່ງ​ສົ່ງ​ຜົນ​ກະ​ທົບ​ເຮັດ​ໃຫ້​ເກີດ​ບັນ​ຫາ​ຫຍຸ້ງ​ຍາກ​ທີ່​ກ່ຽວ​ກັບ​ຄ່າ​ຂົນ​ສົ່ງ​ສິນ​ຄ້າ​ທີ່​ເພີ່ມ​ສູງ​ຂຶ້ນ ແລະ ເຮັດ​ໃຫ້​ບໍ່​ຄຸ້ມ​ຄ​່າ​ທີ່​ກະ​ເສດ​ຕະ​ກອນ ລາວ ຈະ​ຂົນ​ສົ່ງ​ຜົນ​ຜະ​ລິດ​ກະ​ສິ​ກຳ​ໄປ ຈີນ ຕາມ​ການ​ກຳ​ນົດ​ດັ່ງ​ກ່າວ​ຂອງ​ທາງ​ການ ຈີນ ຊຶ່ງ​ໃນ​ນີ້​ກໍ​ລວມ​ເຖິງ​ຢາງ​ພາ​ລາ​ທີ່​ພໍ່​ຄ້າ ຈີນ ຮັບ​ຊື້​ໃນ​ລາ​ຄາ​ລະ​ຫວ່າງ 4,800-5,600 ກີບ​ຕໍ່​ກິ​ໂລກ​ຣາມ​ດ້ວຍ​ນັ້ນ.

ອີງ​ຕາມ​ສູນ​ຂໍ້​ມູນ​ຂ່າວ​ສານ​ການ​ຄ້າ​ຂອງ​ທາງ​ການ ຈີນ ລາຍ​ງານ​ວ່າ​ໃນ​ຊ່ວງ​ປີ 2015-2018 ຈີນ ໄດ້​ນຳ​ເຂົ້າ​ສິນ​ຄ້າ​ຈາກ ລາວ ພາຍ​ໃຕ້​ຂໍ້​ຕົກ​ລົງ​ທີ່​ທາງ​ການ ຈີນ ໃຫ້​ສິດ​ທິ​ພິ​ເສດ​ທາງ​ການ​ຄ້າ​ແກ່ ລາວ ຄິດ​ເປັນ​ມູນ​ຄ່າ​ສະ​ເລ່ຍ​ເກີນກວ່າ 70 ລ້ານ​ໂດ​ລາ​ໃນ​ແຕ່​ລະ​ປີ ທັງ​ນີ້​ໂດຍ​ສິນ​ຄ້າຫຼັກ​ທີ່ ຈີນ ນຳ​ເຂົ້າ​ຈາກ ລາວ ເຊັ່ນ ກາ​ເຟ, ຊາ, ຢາງ​ພາ​ລາ, ກ້ວຍ​ຫອມ, ໃບ​ຢາ​ສູບ, ຖົ່ວ ແລະ ພືດ​ຜັກ​ຕ່າງໆ ສ່ວນ​ອ້ອຍ​ນັ້ນ​ຍັງ​ອະ​ນຸ​ຍາດ​ໃຫ້​ນຳ​ເຂົ້າ​ໂດຍ​ຜ່ານ​ດ່ານ​ຊາຍ​ແດນ​ທ້ອງ​ຖິ່ນ​ໄດ້​ຕໍ່​ໄປ ເພາະ​ໄດ້​ມີ​ສັນ​ຍາ​ຮັບ​ຊື້​ໄວ້​ເປັນ​ການ​ລ່ວງ​ໜ້າ​ແລ້ວ.

ທັງ​ນີ້​ລັດ​ຖະ​ບານ ລາວ ໄດ້​ເລີ່ມ​ສົ່ງ​ເສີມ​ໃຫ້​ມີ​ການ​ປູກ​ຢາງ​ພາ​ລາ​ຢ່າງກວ້າງ​ຂວາງ​ນັບ​ແຕ່​ປີ 2000 ເປັນ​ຕົ້ນ​ມາ ເນື່ອງ​ຈາກ​ເຫັນ​ວ່າ​ຢາງ​ພາ​ລາ​ໃນ​ເວ​ລາ​ນັ້ນ​ມີ​ລາ​ຄາ​ສູງ​ເຖິງ 18,000 ກີບ​ຕໍ່​ກິ​ໂລກ​ຣາມ ໂດຍ​ໄດ້​ໃຫ້​ການ​ສົ່ງ​ເສີມ​ການ​ລົງ​ທຶນ​ໃນ​ຮູບ​ແບບ 2+3 ຄ​ື​ຊາວ​ກະ​ສິ​ກອນ ລາວ ລົງ​ທຶນ​ດ້ວຍ​ທີ່​ດິນ ແລະ ແຮງ​ງານ ສ່ວນ​ນັກ​ທຸ​ລະ​ກິດ​ຊາວ​ຕ່າງ​ຊາດ​ເປັນ​ຝ່າຍ​ອອກ​ເງິນ​ທຶນ, ການ​ຈັດ​ຫາ​ແນວ​ພັນ ແລະ ເທັກ​ນິກ​ຕ່າງໆ​ລວມ​ເຖິງ​ຮັບ​ຊື້​ຜົນ​ຜະ​ລິດ​ໄປ​ຂາຍ​ໃນ​ຕ່າງ​ປະ​ເທດ ​ຊຶ່ງ​ກໍ​ປາ​ກົດ​ວ່າ​ມີ​ຊາວ​ກະ​ສິ​ກອນ ລາວ ຫຼາຍ​ໜື່ນ​ຄອບ​ຄົວ​ທີ່​ໄດ້​ເຂົ້າ​ຮ່ວມ​ການ​ລົງ​ທຶນ​ໃນ​ຮູບ​ແບບ​ດັ່ງ​ກ່າວ ຫາກ​ແຕ່​ການ​ທີ່​ລາ​ຄາ​ຢາງ​ພາ​ລາ​ໄດ້​ຕົກ​ຕ່ຳ​ລົງ​ຢ່າງ​ຕໍ່​ເນື່ອງ​ນັບ​ຈາກ​ປີ 2015 ເປັນ​ຕົ້ນ​ມາ ກໍ​ເຮັດ​ໃຫ້​ຊາວ​ກະ​ສິກ​ອນ ລາວ ຕ້ອງ​ສູນ​ເສຍ​ທີ່​ດິນ​ໃຫ້​ກັບ​ນາຍ​ທຶນ ຈີນ ເພີ່ມ​ຂຶ້ນ​ນັບ​ມື້ ໂດຍ​ອີງ​ຕາມ​ການ​ວິ​ໄຈ​ຂອງ ດ​ຣ. ວາດ​ສະ​ໜາ ລະ​ອອງ​ປິ​ວ ນັກ​ວິ​ໄຈ​ທີ່​ມະ​ຫາ​ວິ​ທະ​ຍາ​ໄລ​ທຳມະ​ສາດ​ລະ​ບຸ​ວ່າ ຊາວ​ກະ​ສິ​ກອນ ລາວ ຖື​ກ​ບັງ​ຄັບ​ໃຫ້​ເຂົ້າ​ຮ່ວມ​ໃນ​ການ​ປູກ​ຢາງ​ພາ​ລາ ໂດຍ​ທີ່​ພວກ​ເຂົາ​ເຈົ້າ​ບໍ່​ມີ​ເງິນ​ລົງທຶນ ຈຶ່ງ​ຕ້ອງ​ກູ້​ຢືມ​ຈາກ​ນັກ​ທຸ​ລະ​ກິດ ຈີນ ແລະ ໃຊ້​ທີ່​ດິນ​ຄ້ຳ​ປະ​ກັນ ຄັນ​ເມື່ອ​ລາ​ຄາ​ຢາງ​ຕົກ​ຕ່ຳ ຈຶ່ງ​ເຮັດ​ໃຫ້​ບໍ່​ມີ​ເງິນ​ຊຳ​ລະ​ໜີ້ ໂດຍ​ຜົນ​ທີ່​ຕາມ​ມາ​ກໍ​ຄື​ການ​ຖືກ​ນາຍ​ທຶນ ຈີນ ຍຶດ​ເອົາ​ທີ່​ດິນ​ໄປ​ແລ້ວຫຼາຍ​ເຮັກ​ຕາ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG