ກຸ່ມປົກປ້ອງສິດທິມະນຸດສາກົນ Freedom House ກ່າວໃນ
ວັນພຸດມື້ນີ້ວ່າ ຄວາມຫວັງໃນອະນາຄົດຂອງລະບົບສາກົນທີ່
ສ້າງຕັ້ງຂຶ້ນໂດຍແນວຄິດປະຊາ ທິປະໄຕນັ້ນ ກຳລັງຖືກຂົ່ມຂູ່
ໃນປັດຈຸບັນນີ້ ຫລາຍກວ່າຈຸດໃດໆໃນຮອບ 25 ປີທີ່ຜ່ານມາ.
ອົງການ Freedom House ກ່າວຢູ່ໃນລາຍງານປະຈຳປີ ໃນ
ວັນພຸດມື້ນີວ່າ ສະພາບຂອງປະຊາທິປະໄຕໃນປີ 2014 ແມ່ນ
“ມືດມົວເປັນພິເສດ”. ຊີເຣຍ ຕົກຢູ່ໃນອັນດັບຕຳ່ສຸດ ຂອງລາຍ
ງານທີ່ຫາກໍ່ນຳອອກເຜີຍແຜ່ ແຕ່ວ່າບັນທຶກ ຂອງກຸ່ມສະແດງ
ໃຫ້ເຫັນວ່າ ມີການຊຸດໂຊມລົງ ຫລາຍກວ່າດີຂື້ນ ຂອງສິດ
ເສລີພາບປະຊາທິປະໄຕ ຢູ່ໃນທົ່ວໂລກ.
ອົງການ Freedom House ກ່າວວ່າ ສິ່ງນຶ່ງທີ່ໄດ້ຮັບການຍົກເວັ້ນ ນັ້ນກໍຄື ປະເທດ
Tunisia ຊຶ່ງໃນປີ 2014 ໄດ້ກາຍມາເປັນປະເທດອາຣັບທຳອິດ ທີ່ໄດ້ຮັບຖານະບັນລຸ
“ສິດເສລີພາບ” ນັບຕັ້ງແຕ່ສົງຄາມກາງເມືອງທີ່ Lebanon ເມື່ອສີ່ທົດສະວັດກ່ອນ.
ອີງຕາມລາຍງານທີ່ນຳອອກເຜີຍແຜ່ໃນວັນພຸດມື້ນີ້ແລ້ວ “ໂຕເລກທີ່ໜ້າຕື່ນຕົກໃຈ” ຂອງ
ບັນດາມະຫາອຳນາດທາງເສດຖະກິດ ແລະບັນດາປະເທດທີ່ມີອິດທິ ພົນໃນພູມີພາກທີ່
ມາດຕະຖານປະຊາທິປະໄຕຂອງພວກເຂົາເຈົ້າໄດ້ຫລຸດນ້ອຍ ຖອຍລົງ. ໄພອັນຕະລາຍ
ຕໍ່ສິດເສລີພາບໃນການສະແດງຄວາມຄິດຄວາມເຫັນ ກ່າວກັນວ່າ ມາຈາກການສອດ
ແນມຂອງລັດຖະບານ ການຈຳກັດຮັດແຄບໃນການໃຊ້ອິນເຕີແນັດ ແລະການຫລຸດລົງຂອງສິດເສລີພາບເພື່ອເຮັດໃຫ້ການຕັດ ສິນໃຈຂອງສ່ວນບຸກຄົນ ໃນຫລາຍຢ່າງ ເຊັ່ນວ່າການສຶກສາ ວຽກງານ ແລະ ການເດີນທາງ. ຣັດເຊຍ ເວເນຊູເອລາ ອີຈິບ ເທີກີ
ໄທ ໄນຈີເຣຍເຄນຢາ ອາເຈີບາຍຈານ ແລະຮັງກາຣີ ແມ່ນຮວມໃນບັນດາປະເທດ ທີ່ມີ
ການໃຫ້ຂໍ້ສັງເກດວ່າ ມີການຫລຸດຕ່ຳລົງດັ່ງກ່າວນີ້.
ບັນຫາທີ່ເພີ້ມໄປກວ່ານັ້ນອີກ ອົງການ Freedom House ກ່າວວ່າ ມີການປະຕິເສດຢ່າງ
ແຮງ ຕໍ່ມາດຕະຖານປະຊາທິປະໄຕ ເຊັ່ນວ່າ ການຮຸກຮານຂອງ ຣັດເຊຍເຂົ້າໄປໃນ ຢູ
ເຄຣນ “ຮວມທັງການໃຊ້ກຳລັງຍຶດເອົາ ແລະການປະກາດ ຮວມເອົາແຫຼມ Crimea ຢ່າງ
ເປັນທາງການ” ຊຶ່ງລາຍງານ ໃຫ້ຂໍ້ສັງເກດວ່າ “ເປັນໂຕຢ່າງທີ່ສຳຄັນ” ອັນນຶ່ງ.
ອົງການ Freedom House ໄດ້ລະບຸອີກຢ່າງນຶ່ງ ທີ່ອາດເຮັດໃຫ້ສິດເສລີພາບ ປະຊາທິ
ປະໄຕຫລຸດຜ່ອນລົງ ນັ້ນກໍຄືການສູ້ລົບຕ້ານພວກກໍ່ການຮ້າຍ. ລາຍງານກ່າວວ່າ ບັນດາ
ລັດຖະບານເຊັ່ນວ່າ ເວເນຊູເອລາ ເຄນຢາ ແລະຈີນ ໄດ້ອ້າງກົດໝາຍກໍ່ການຮ້າຍ ເພື່ອ
ປິດປາກປິດສຽງພວກຄັດຄ້ານລັດຖະບານ.
