ທ່ານ Chaudhry Nisar Ali Khan ລັດຖະມົນຕີກະຊວງ
ພາຍໃນປາກິສຖານ ກ່າວວ່າ ລັດຖະບານມີຂ່າວຂໍ້ມູນທີ່ວ່າ
ພວກກໍ່ການຮ້າຍ ອາດຈະວາງແຜນທຳການໂຈມຕີອີກຄັ້ງ
ໃໝ່ ຄືກັນກັບການໂຈມຕີທີ່ໜ້າຢ້ານກົວແລະນອງເລືອດ
ໃນສັບປະດາແລ້ວນີ້ ທີ່ໂຮງຮຽນທະຫານແຫ່ງນຶ່ງນັ້ນ.
ທ່ານ Chaudhry Nisar ບໍ່ໄດ້ໃຫ້ລາຍລະອຽດ ກ່ຽວກັບ
ຂ່າວຂໍ້ມູນດັ່ງ ກ່າວ ແຕ່ເວົ້າວ່າ ປະເທດທັງໝົດຈະຕ້ອງຢູ່
ໃນທ່າຕຽມພ້ອມ. ທ່ານເຕືອນພວກບໍລິສັດໂທລະສັບມືຖື
ວ່າ ພວກເຂົາເຈົ້າອາດປະເຊີນກັບຂໍ້ກ່າວຫາຖານທຳການ
ກໍ່ການຮ້າຍໄດ້ ຖ້າພວກເຂົາເຈົ້າອອກບັດໂທລະ ສັບທີ່ຜິດ
ກົດໝາຍ.
ທ່ານ Chaudhry Nisar ຍັງກ່າວອີກວ່າ ພວກເຈົ້າຂອງໂຮງແຮມຈະຕ້ອງກວດກາເບິ່ງ
ໜັງສືປະຈຳຕົວຂອງພວກແຂກທີ່ມາພັກ ຢູ່ໂຮງແຮມ ຂອງເຂົາເຈົ້າ ແລະຈະຕ້ອງຮັບຜິດ
ຊອບ ຖ້າຫາກເຂົາເຈົ້າເອົາຫ້ອງໃຫ້ ພວກກໍ່ການຮ້າຍພັກເຊົາ. ທ່ານໄດ້ຮຽກຮ້ອງໄປຍັງ
ປະຊາຊົນປາກິສຖານທັງໝົດ ໃຫ້ແບ່ງປັນຂ່າວຂໍ້ມູນໃດໆທີ່ເຂົາເຈົ້າມີນັ້ນ ກັບພວກເຈົ້າ
ໜ້າທີ່ຮັກສາຄວາມປອດໄພ.
ທ່ານກ່າວຊີ້ອອກຕື່ມວ່າ ທະຫານປາກິສຖານສາມາດເປີດສາກໂຈມຕີ ຢ່າງຂະໜານ
ໃຫຍ່ໄດ້ ຢູ່ໃນຫົວເມືອງຕ່າງໆ ບ່ອນທີ່ພວກກໍ່ການຮ້າຍອາໄສຢູ່ນັ້ນ ແຕ່ທາງກອງທັບ
ບໍ່ຢາກເຮັດໃຫ້ພົນລະເຮືອນເສຍຊີວິດ. ທ່ານກ່າວຕໍ່ໄປວ່າ ກອງທັບບໍ່ໄດ້ແນເປົ້າໝາຍ
ໃສ່ພວກແມ່ຍິງ ແລະເດັກນ້ອຍ.
ພວກມືປືນກຸ່ມຕາລີບານປາກິສຖານ ໄດ້ບຸກໂຈມຕີໂຮງຮຽນແຫ່ງນຶ່ງທີ່ກອງທັບເປັນຜູ້ສະໜັບສະໜຸນ ໃນເມືອງ Peshawar ໃນສັບປະດາແລ້ວນີ້ ໂດຍໄດ້ສັງຫານພວກນັກ
ຮຽນແລະນາຍຄູເກືອບ 150 ຄົນ.
ກຸ່ມຕາລີບານເອີ້ນການໂຈມຕີດັ່ງກ່າວ ວ່າເປັນການແກ້ແຄ້ນຕໍ່ການບຸກໂຈມຕີຂອງກອງ
ທັບປາກິສຖານຕໍ່ພວກກະບົດ.