ເລື້ອງຄົນເຂົ້າເມືອງ ແມ່ນຈຸດເພັ່ງເລັງທີ່ສຳຄັນໃນຕອນຄ່ຳຂອງວັນຈັນວານນີ້ ໃນຂະນະທີ່ບັນດາສະມາຊິກພັກ Republican ທີ່ຫວັງວ່າຈະໄດ້ເປັນປະທານາທິບໍດີ ສະຫະລັດ ຄົນຕໍ່ໄປ, ໄດ້ເຂົ້າຮ່ວມໃນການປະຊຸມ ກ່ອນການໂຕ້ວາທີຢ່າງເປັນທາງການຄັ້ງທຳອິດຂອງພັກດັ່ງກ່າວ.
ຜູ້ສະໝັກ 14 ທ່ານ ຂອງຈຳນວນທັງໝົດ 17 ທ່ານໄດ້ເຂົ້າຮ່ວມ ໃນພິ ທີເປັນເວລາສອງ ຊົ່ວໂມງ ຢູ່ລັດ New Hampshire ເຊິ່ງ ມີການຖ່າຍທອດທາງໂທລະພາບທົ່ວປະເທດ ໃນເຄືອຂ່າຍຂ່າວດຽວກັນທີ່ສະແດງ ໃຫ້ເຫັນການປະຕິບັດການຂອງລັດຖະສະພາ ແລະ ທາງຊ່ອງໂທລະພາບຂອງທ້ອງຖິ່ນ ໃນລັດເຊິ່ງຈະເປັນຜູ້ ປ່ອນບັດແຫ່ງທຳອິດ ໃນຂັ້ນ ຕອນການແຕ່ງຕັ້ງສະເໜີຊື່ ໃນຕົ້ນປີໜ້າ.
ເສດຖີເງິນພັນລ້ານ ທ່ານ Donald Trump, ເປັນຜູ້ມີຄະແນນນຳໜ້າ ໃນການຢັ່ງຫາງສຽງ ປະຊາຊົນທົ່ວປະເທດໃນປັດຈຸບັນນີ້, ໄດ້ປະຕິເສດທີ່ຈະເຂົ້າຮ່ວມ, ເຊັ່ນດ່ຽວກັບອະດີດເຈົ້າຄອງລັດ Arkansas ທ່ານ Mike Huckabee.
ສຳລັບຜູ້ສະໝັກຄົນອື່ນໆທີ່ແມ່ນປ່ຽນຜຽນກັນກ່າວໃນການສຳພາດດ່ຽວ, ເຊິ່ງເປັນຮູບແບບທີ່ແຕກຕ່າງຈາກການໂຕ້ວາທີໃນເມືອງ Cleveland, ລັດ Ohio ໃນວັນພະຫັດນີ້ ເຊິ່ງຈະ ອະນຸຍາດໃຫ້ບັນດາຜູ້ລົງສະໝັກຮັບເລືອກຕັ້ງ ກ່າວເຖິງກັນແລະກັນ. ການໂຕ້ວາທີດັ່ງກ່າວຈະຈຳກັດຮັບເອົາຜູ້ສະໝັກ ມີຄະແນນສູງສຸດ 10 ຄົນເທົ່ານັ້ນ ໃນການຢັ່ງຫາງສຽງທົ່ວ ປະເທດ, ອີງຕາມກົດລະບຽບຂອງພັກ.
ພວກທ່ານແນເປົ້າໃສ່ການໂຈມຕີພັກເດໂມແຄຣັດ, ໂດຍສະເພາະຜູ້ມີຄະແນນສຽງນຳໜ້າຂອງພັກ, ທ່ານນາງ Hilary Clinton, ໃນຂະນະທີ່ສະແດງຄວາມຕ້ອງການເພື່ອແນໃສ່ການປົກປັກຮັກສາເຂດຊາຍແດນຂອງປະເທດເປັນອົງປະກອບຫຼັກຂອງນະໂຍບາຍດ້ານຄົນເຂົ້າ ເມືອງ.
ອະດີດຜູ້ປົກຄອງລັດ Texas ທ່ານ Rick Perry ໄດ້ກ່າວວ່າ “ຈົນກວ່າພວກເຮົາຈະເຮັດໃຫ້ເຂດຊາຍແດນນັ້ນປອດໄພ, ມັນຈະບໍ່ມີວັນຢຸດ. ມັນເປັນດັ່ງກັບບາດແຜທີ່ຮ້າຍແຮງ, ທ່ານຢາກຈະຫ້າມການໄຫຼຂອງເລືອດ ແລະ ນັ້ນບໍ່ແມ່ນສິ່ງທີ່ກຳລັງເກີດຂຶ້ນຢູ່ໃນປະເທດນີ້ ໃນປະຈຸບັນ.”
ອະດີດຜູ້ປົກຄອງລັດ Florida ທ່ານ Jeb Bush ໄດ້ກ່າວວ່າ ຊິ້ນສ່ວນໜຶ່ງຂອງການປະຕິ
ຮູບເລື້ອງຄົນເຂົ້າເມືອງ ຄວນແມ່ນການຈຳກັດຈຳນວນຂອງຄົນທີ່ໄດ້ຮັບອະນຸຍາດໃຫ້ເຂົ້າມາໃນ ສະຫະລັດ ເພື່ອຢູ່ຮ່ວມກັບຄອບຄົວຂອງພວກເຂົາທີ່ໄດ້ອາໄສຢູ່ໃນປະເທດແລ້ວ. ສະມາຊິກສະພາສູງຂອງລັດ Florida ທ່ານ Marco Rubio ກໍສະ ໜັບສະໜູນຄວາມຄິດນັ້ນເຊັ່ນກັນ.
ອະດີດສະມາຊິກສະພາສູງຈາກລັດ Pennsylvania ທ່ານ Rick Santorum ສະໜັບ ສະໜູນໃຫ້ຕັດຈຳນວນຄົນເຂົ້າເມືອງທີ່ມີຄວາມ ສາມາດຕ່ຳ ລົງ 25 ເປີເຊັນ. ສ່ວນຜູ້ປົກ ຄອງລັດ Ohio ທ່ານ John Kasich ກ່າວວ່າ ມັນຄວນຈະມີການຂະຫຍາຍໃນໂຄງການແຮງງານຈາກປະເທດຍາກຈົນ, ແລະ ກ່າວວ່າ ແຮງງານຜິດກົດໝາຍ ທີ່ຢູ່ໃນ ສະຫະລັດ ແລ້ວ ເຊິ່ງເຄົາລົບກົດໝາຍຄວນຈະໄດ້ຮັບອະນຸຍາດໃຫ້ຢູ່ໃນປະເທດນີ້ໄດ້.
ສ່ວນຫົວຂໍ້ອື່ນໆ, ຜູ້ປົກຄອງລັດ Wisconsin ທ່ານ Scott Walker ໄດ້ໂຈມຕີແຜນການຂອງປະທາທິບໍດີ ບາຣັກ ໂອບາມາທີ່ໄດ້ເປີດເຜີຍ ການຕັດການປ່ອຍຄວັນພິດທາດຄາບອນຈາກໂຮງໄຟຟ້າຂອງປະເທດໃນວັນຈັນວານນີ້, ໂດຍເອີ້ນວ່າເປັນ “ການຕັດ” ທີ່ມີລາຄາສູງຕໍ່ເສດ ຖະກິດ ອາເມຣິກາ.
