ການທົດລອງຍິງລູກສອນໄຟຂອງເກົາຫຼີເໜືອໃນວັນອັງຄານມື້ນີ້ ເບິ່ງຄືວ່າລົ້ມແຫຼວ ອິງຕາມເຈົ້າໜ້າທີ່ຂອງເກົາຫຼີໃຕ້.
“ຄວາມພະຍາຍາມໃນການທົດລອງຍິງລູກສອນໄຟນັ້ນ ແມ່ນໄດ້ລົ້ມແຫຼວລົງ. ພວກເຮົາແມ່ນໄດ້ວິເຄາະ ແລະຕິດຕາມສິ້ງຊອມເບິ່ງຢ່າງໃກ້ຊິດ ໃນສະຖານະການທີ່ວ່ານີ້ແລະຢູ່ ໃນທ່າທີກຽມພ້ອມເພື່ອຮັບມືກັບສະຖານະການດັ່ງກ່າວ.” ນັ້ນຄືຄຳເວົ້າຂອງໂຄສົກກະ ຊວງປ້ອງກັນປະເທດເກົາຫຼີໃຕ້.
ເສນາທິການຮ່ວມຂອງເກົາຫຼີໃຕ້ ໄດ້ອອກຖະແຫຼງການສະບັບນຶ່ງ ກ່າວວ່າ ການທົດລອງລູກສອນໄຟຂອງເກົາຫຼີເໜືອ ຖືກຍິງຂຶ້ນໃນເວລາ 5 ໂມງ 20 ຕອນເຊົ້າ ຂອງວັນຈັນວານນີ້ ທີ່ເມືອງທ່າ Wosan ທາງພາກຕາເວັນອອກຂອງປະເທດ.
ໃນເຊົ້າຂອງມື້ວານນີ້ ອົງການຂ່າວ NHK ຂອງຍີ່ປຸ່ນ ໄດ້ກ່າວວ່າ ລັດຖະບານໄດ້ຢູ່ໃນທ່າກຽມພ້ອມ. ຍີ່ປຸ່ນ ໄດ້ສັ່ງການໃຫ້ກ່ຳປັ່ນລົບຂອງຕົນ ຍິງທຳລາຍສິ່ງໃດກໍຕາມ ທີ່ເປັນການຂົ່ມຂູ່ຕໍ່ເຂດນ້ຳແດນດິນຂອງຕົນ. ທາງກະຊວງປ້ອງກັນປະເທດເກົາຫຼີໃຕ້ ໄດ້ກ່າວວ່າ
ໂຊລ ແມ່ນຢູ່ໃນທ່າກຽມພ້ອມເຊັ່ນດຽວກັນ.
ເຈົ້າໜ້າທີ່ໄດ້ກ່າວວ່າ ບໍ່ໄດ້ໃຫ້ລາຍລະອຽດກ່ຽວກັບຊະນິດຂອງລູກສອນໄຟ ແຕ່ລາຍງານກ່າວວ່າ ເບິ່ງຄືວ່າຈະແມ່ນລູກສອນໄລຍະປານກາງ Musudan ທີ່ຄ້າຍຄືກັນກັບອັນທີ່ທາງເກົາຫຼີເໜືອໄດ້ພະຍາຍາມທົດລອງໄປແລ້ວ 3 ເທື່ອແຕ່ບໍ່ປະສົບຜົນສຳເລັດໃນເດືອນເມສາຜ່ານມານີ້.
ລູກສອນໄຟດັ່ງກ່າວ ແມ່ນສາມາດຍິງໄດ້ໃນລັດສະໝີປະມານ 3 ຫາ 4 ພັນກິໂລແມັດ ຖ້າຫາກສຳເລັດ ສາມາດຍິງໄປເຖິງເປົ້າໝາຍໃນຍີ່ປຸ່ນ, ຈີນ ແລະເກາະ Guam ໄດ້.
ລູກສອນໄຟ Musudan ແມ່ນມີພື້ນຖານມາຈາກການອອກແບບລູກສອນໄຟທີ່ຍິງຈາກເຮືອ ດຳນ້ຳຂອງອະດີດສະຫະພາບໂຊຫວຽດ ທີ່ເກົາຫຼີເໜືອ ໄດ້ນຳມາດັດແປງໃຫ້ສາມາດຍິງຈາກຖານໃນພື້ນດິນ ແບບເຄື່ອນທີ່ໄດ້.
ສະພາຄວາມໝັ້ນຄົງອົງການສະຫະປະຊາຊາດ ໄດ້ຫ້າມບໍ່ໃຫ້ເກົາຫຼີເໜືອ ພັດທະນານິວເຄລຍ ແລະໂຄງການລູກສອນໄຟຂີປະນາວຸດ. ຈີນຊຶ່ງເປັນຄູ່ພາຄີສຳຄັນຂອງເກົາຫຼີເໜືອໄດ້ຮຽກຮ້ອງໃຫ້ປະທານປະເທດເກົາຫຼີເໜືອ ທ່ານ Kim Jong Un ກັບຄືນສູ່ການເຈລະຈານາໆຊາດ ແລະທັບມ້າງໂຄງການນິວເຄລຍຂອງຕົນ ເພື່ອຮັບເອົາການຊ່ອຍເຫລືອທາງດ້ານເສດຖະກິດ ແລະການຄ້ຳປະກັນທາງຄວາມປອດໄພ.
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ
