ພະສັນຕະປາປາ Francis ໄດ້ຊົງປະພາດ ນະຄອນຫລວງ
ຮາວານາ ແລ້ວ ຊຶ່ງເປັນການເລີ້ມຕົ້ນຂອງການເດີນທາງໄລຍະ
10 ມື້ ທີ່ເປັນປະຫວັດສາດ ໄປຍັງປະເທດຄິວບາ ແລະມາຍັງ
ສະຫະລັດ ທີ່ໄດ້ຖືກ ສັນລະເສີນວ່າ ເປັນການຜ່ອນຄາຍ
ຄວາມເຄັ່ງຕຶງ ລະຫວ່າງ ສອງປະເທດເພື່ອນບ້ານ ທີ່ເປັນຄູ່
ປໍລະປັກກັນນັ້ນ ໃຫ້ກາຍເປັນ “ແບບຢ່າງຂອງການຄືນດີ
ກັນ ສຳຫລັບໂລກທັງມວນ ທີ່ຈະເຮັດໃຫ້ພວກເຮົາມີ
ຄວາມຫວັງ.”
ພະສັນຕະປາປາ Francis ໄດ້ຊົງເອີ້ນວ່າເປັນສາຍພົວພັນ
ທີ່ຜ່ອນຄາຍ ຄວາມເຄັ່ງຕຶງລົງລະຫວ່າງສອງປະເທດ ທີ່
Vatican ໄດ້ມີບົດບາດອັນສຳຄັນ “ອັນເປັນສັນຍານແຫ່ງ ໄຊຊະນະດ້ານວັດທະນະທຳ ໃນການເຈລະຈາແລະປຶກສາຫາລືກັນ.”
ພະສັນຕະປາປາ ຈະຊົງທຳພິທີສວດມົນພາວະນາ ຢູ່ໃນເຂດຈັດຕຸລັດປະຕິວັດ ທີ່ຍາວຢຽດຂອງນະຄອນ ຮາວານາໃນວັນອາທິດມື້ນີ້ ກ່ອນໜ້າ ທີ່ຈະພົບປະກັບປະທານປະເທດ ຄິວບາ ທ່ານ Raul Castro ເປັນສ່ວນຕົວ. ພະອົງ ຍັງຄົງຈະປະພາດ ເມືອງ Hoguin ແລະ Satiago ໃນລະຫວ່າງ ການຢ້ຽມຢາມຄິວບາ ໄລຍະ 3 ມື້ ພ້ອມດ້ວຍ ແຜນການທີ່ຈະຈັດພິທີສວດມົນພາວະນາ ແລະ ພົບປະກັບ ຄຸນພໍ່ແຄໂທລິກ ຂອງທັງສອງເມືອງດັ່ງກ່າວນັ້ນ ກ່ອນທີ່ຈະຊົງມາປະພາດນະຄອນຫລວງວໍຊິງຕັນຕໍ່ໄປ.
ພະ ສັນຕະປາປາ ໄດ້ຮັບການຕ້ອນຮັບ ຢູ່ທີ່ສະໜາມບິນ ໂດຍປະທານປະເທດຄິວບາ ຜູ້ທີ່ໄດ້ກ່າວໃນຖະແຫລງການຍິນດີຕ້ອນຮັບ ທີ່ໃຫ້ການຮັບປະກັນຕໍ່ ພະສັນຕະປາປາ ວ່າ ສິດເສລີໃນການນັບຖືສາສະໜາ ແມ່ນ “ໄດ້ຖືກເຮັດໃຫ້ເປັນທີ່ສັກສິດ ໃນລັດຖະທຳມະນູນຂອງຄິວບາ.”
ໃນການກ່າວປາໄສຍາວ 15 ນາທີ ທີ່ກາຍໄປເປັນເລື້ອງການເມືອງຢ່າງວ່ອງໄວ ທ່ານ Castro ໄດ້ຮຽກຮ້ອງອີກ ໃຫ້ສະຫະລັດ ຍຸດຕິການຫ້າມສົ່ງສິນຄ້າຂອງຕົນ ຕໍ່ປະເທດເກາະນັ້ນ ຊຶ່ງທ່ານໄດ້ເອີ້ນມັນວ່າ “ໂຫດຮ້າຍ ຂາດສິນທຳ ແລະ ຜິດກົດໝາຍ” ແລະ ໃຫ້ສົ່ງຄືນຖານທັບກອງທັບເຮືອ Guantanamo.
ເອກອັກຄະລັດຖະທູດ ສະຫະລັດ ປະຈຳອົງການສະຫະປະຊາຊາດ ໄດ້ຕອບໂຕ້ຄືນຜ່ານທາງ tweeter ທີ່ຕຳນິຕິຕຽນ ບັນດາເຈົ້າໜ້າທີ່ຄິວບາ ກ່ຽວກັບເລື້ອງການລາຍງານ ຂອງການຈັບກຸມຄຸມຂັງຕ່າງໆ ກ່ອນໜ້າການເດີນທາງໄປຢ້ຽມຢາມຂອງພະສັນຕະປາປາ Francis ນັ້ນ.
ເອກ ອັກຄະລັດຖະທູດ Samantha Power ໄດ້ຂຽນຂໍ້ຄວາມຜ່ານທາງທະວີດເຕີ້ ວ່າ
ບັນດານັກເຄື່ອນໄຫວ ເພື່ອສິດທິມະນຸດ “ແລະ ແມ່ນກະທັງພວກອະນາຖາ ໄດ້ມີລາຍງານວ່າ ໄດ້ຖືກຄຸມຂັງ. ກ່ອນໜ້າ ການຢ້ຽມຢາມໝາຍເນັ້ນໃສ່ຄື @Pontifex visit ຊຶ່ງເຮັດໃຫ້ທຸລະກິດຊຸດໂຊມຕາມເຄີຍ ສຳຫລັບ ຫົວຂໍ້ ຫຼື #Cuba Government.”
ກຸ່ມຝ່າຍຄ້ານຕ່າງໆ ໄດ້ລາຍງານວ່າ ມີການຈັບກຸມຄຸມຂັງ ພວກທີ່ບໍ່ເຫັນດີເຫັນພ້ອມກັບລັດຖະບານ ເພີ້ມຂຶ້ນ. ລັດຖະບານຂອງ ຄິວບາ ບໍ່ໄດ້ໃຫ້ຄຳເຫັນຕໍ່ຂໍ້ກ່າວອ້າງນັ້ນ.
ພະສັນຕະປາປາ Francis ຊົງຈະໄດ້ຮັບການຕ້ອນຮັບ ແບບເປັນຄືກັບວິລະບູລຸດຕໍ່ຊາວຄິວບາ ຜູ້ທີ່ພວກເຂົາເຊື່ອຖືວ່າ ໄດ້ຊ່ວຍເຮັດໃຫ້ມີການຟື້ນຟູສາຍສຳພັນທາງການທູດຄືນ ລະຫວ່າງ ສະຫະລັດ ແລະ ຄິວບາ. ພະອົງ ແລະ ບັນດາເຈົ້າໜ້າທີ່ Vatican ໄດ້ອຳນວຍຄວາມສະດວກເປັນເວລາຫຼາຍເດືອນ ສຳຫລັບການເຈລະຈາແບບປິດລັບ ລະຫວ່າງຮາວານາ ແລະ ວໍຊິງຕັນ ໃນປີ 2014 ທີ່ໄດ້ສິ້ນສຸດລົງດ້ວຍ ການປະກາດ ທີ່ເປັນປະຫວັດສາດ ໂດຍທ່ານ Castro ແລະ ປະທານາທິບໍດີສະຫະລັດ ທ່ານ ບາຣັກ ໂອບາມາ ທີ່ທັງສອງປະເທດ ໄດ້ຕັດສິນໃຈ ຈະຟື້ນຟູສາຍສຳພັນທາງດ້ານການທູດຄືນ ເມື່ອເດືອນທັນວາປີກາຍນີ້.
