ສີ່ສິບເອັດປີຫລັງຈາກການສິ້ນສຸດລົງ ຂອງນຶ່ງໃນສົງຄາມທີ່ມີການແບ່ງແຍກກັນຫຼາຍທີ່ ສຸດໃນປະຫວັດສາດຂອງອາເມຣິກັນ ບັນດາຜູ້ຊ່ຽວ ຊານກ່າວວ່າ ຄວາມສຳພັນລະຫວ່າງ ສະຫະລັດ ແລະຫວຽດນາມ ບໍ່ເຄີຍໃກ້ຊິດແບບນີ້ມາກ່ອນ ແລະໄດ້ມີການຮຽກຮ້ອງໃຫ້ ວໍຊິງຕັນ ເສີມຂະຫຍາຍຄວາມສຳພັນໃຫ້ແໜ້ນແຟ້ນຂຶ້ນຕື່ມ ໂດຍຍົກເລີກການຫ້າມຂາຍ ອາວຸດ ທີ່ມີມາເປັນເວລາຫລາຍສິບປີແລ້ວນັນ. ສະມາຊິກຄະນະກຳມະ ການກອງທັບ ຂອງສະພາສູງ ທ່ານ John McCain ຊຶ່ງຄັ້ງນຶ່ງເຄີຍເປັນຊະເລີຍເສິກຢູ່ຫວຽດນາມ ກ່າວ ວ່າ ທ່ານຍິນດີທີ່ຈະໃຫ້ຍົກເລີກການຫ້າມຂາຍອາວຸດແຕ່ຄວນມີເງື່ອນໄຂໃຫ້ປັບປຸງການ ເຄົາລົບນັບຖືສິດທິມະນຸດ. ບັນຫາດັ່ງກ່າວ ແມ່ນເລື້ອງສຳຄັນສຸດໃນລະຫວ່າງການຢ້ຽມ ຢາມຫວຽດນາມ ຂອງປະທານາທິບໍດີ Obama ໃນວັນຈັນມື້ນີ້ ດັ່ງທີ່ນັກຂ່າວ VOA Cindy Saine ມີລາຍງານ ຊຶ່ງ ກິ່ງສະຫັວນ ຈະນຳມາສະເໜີທ່ານ.
ຫຼາຍໆຢ່າງໄດ້ປ່ຽນແປງໄປລະຫວ່າງສອງອະດີດສັດຕູໃນສະໄໝ ສົງຄາມ.
ໃນຂະນະສະມາຊິກສະພາສູງຂອງພັກຣີພັບບລີກັນ ແລະອະດີດຜູ້ສະໝັກປະທານາທິບໍ ດີ ທ່ານ John McCain ແມ່ນຮູ້ເລື້ອງດີ. ທ່ານເປັນນັກບິນກອງທັບເຮືອລະຫວ່າງ ສົງ ຄາມຫວຽດນາມ. ເຮືອບິນຂອງທ່ານໄດ້ຖືກຍິງຕົກ ແລະທ່ານໄດ້ໃຊ້ເວລາຫ້າປີເຄິ່ງໃນ ນາມ ຊະ ເລີຍເສິກຢູ່ທີ່ຮາໂນ່ຍ ທົນທຸກຕໍ່ການຖືກທໍລະມານ ແລະຖືກປະປ່ອຍ. ແຕ່ວ່າ ທ່ານບໍ່ໄດ້ມີຄວາມຂົມຂື່ນໃດໆ ດັ່ງທີ່ທ່ານໄດ້ກ່າວຕໍ່ວີໂອເອ.
ສະມາຊິກສະພາສູງ McCain ກ່າວວ່າ “ຂ້າພະເຈົ້າຄິດວ່າ ເມື່ອພວກເຮົາສ້າງຕັ້ງ ຄວາມ ສຳພັນໃຫ້ເປັນປົກກະຕິ ມັນເປັນການຄືນດີລະຫວ່າງ ປະເທດຂອງພວກເຮົາ ແລະປະ ຊາຊົນ. ເບິ່ງດຸມີສ່ວນບຸກຄົນຈຳນວນນຶ່ງທີ່ໄດ້ທຳຮ້າຍຂ້າພະເຈົ້າຢູ່ໃນຄຸກຊຶ່ງ
ຂ້າພະເຈົ້າຫວັງວ່າຈະບໍ່ເຫັນໜ້າກັນອີກ. ແຕ່ນັ້ນບໍ່ໄດ້ປ່ຽນແປງຄວາມຄິດຂອງຂ້າພະ ເຈົ້າ ທີ່ວ່າ ປະຊາຊົນຫວຽດນາມເປັນຄົນດີ ແລະເປັນເພື່ອນທີ່ດີ ແລະເຮົາຕ້ອງການ ເຂົາເຈົ້າ ແລະເຂົາເຈົ້າກໍຕ້ອງການເຮົາ.”
ທ່ານ McCain ກ່າວວ່າ ທ່ານຕ້ອງການຢາກໃຫ້ເພີ້ມຄວາມສາມາດທາງດ້ານທະຫານ ໃຫ້ແກ່ຫວຽດນາມຕື່ມຂຶ້ນ ເພື່ອປະເຊີນໜ້າກັບການຮຸກຮານຂອງຈີນຢູ່ໃນຂົງເຂດ. ແຕ່ ທ່ານເຊື່ອວ່າ ການຍົກເລີກການຫ້າມອາວຸດນັ້ນ ຕ້ອງເປັນເງື່ອນໄຂພົວພັນກັບການປັບ ປຸງດ້ານສິດທິມະນຸດຂອງຮາໂນ່ຍ. ຫວຽດນາມໄດ້ກົດດັນ ໃຫ້ຍົກເລີກການຫ້າມຂາຍອາວຸດໂດຍທັງໝົດ.
ຜູ້ຊ່ຽວຊານດ້ານເອເຊຍ ທ່ານ Brian Harding ກ່າວວ່າ ຄວາມໝັ້ນຄົງຈະເປັນຈຸດເພັ່ງ ເລັງທີ່ສຳຄັນຢ້ຽມຢາມນະຄອນຮາໂນ່ຍແລະນະຄອນໂຮ ຈີມິນ ຂອງທ່ານ Obama.
ທ່ານ Harding ຈາກສູນກາງເພື່ອຄວາມກ້າວໜ້າຂອງອາເມຣິກັນກ່າວ ວ່າ “ຄວາມສຳ ພັນລະຫວ່າງສະຫະລັດ ກັບຫວຽດນາມ ແມ່ນມີທ່າອຽງໄປໃນທາງບວກເປັນພິເສດ. ຢູ່ໃນລາຍການປະຊຸມທີ່ສຳຄັນຂອງປະທາ ນາທິບໍດີ Obama ກໍຈະແມ່ນເລື້ອງຄວາມ ໝັ້ນຄົງ ສິດທິມະນຸດ ແລະການຄ້າ. ຂ້າພະເຈົ້າຄິດວ່າ ທຸກໆສາຍຕາ ຈະຈ້ອງໃສ່ວ່າ ສະຫະລັດ ຈະຍົກເລີກນະໂຍບາຍ ການຫ້າມຂາຍອາວຸດຮ້າຍແຮງ ໃຫ້ແກ່ຫວຽດນາມ ລະຫວ່າງການເດີນທາງດັ່ງກ່າວນີ້ຫຼືບໍ່.”
ທ່ານ Harding ກ່າວວ່າ ສົງຄາມຫວຽດນາມຍັງເປັນເງົາມືດຢູ່ໃນສອງປະເທດ ແຕ່ວ່າ ອະນາຄົດເບິ່ງແລ້ວມີຄວາມແຈ່ມໃສດີ.
ທ່ານ Harding ກ່າວວ່າ “ຫວຽດນາມເປັນປະເທດທີ່ຍັງໜຸ່ມນ້ອຍເມື່ອເວົ້າເຖິງເລື້ອງ ປະ ຊາກອນ. ປະຊາຊົນຂອງເຂົາເຈົ້າ ໂດຍສະເພາະພວກຊາວໜຸ່ມ ມີຄວາມຮູ້ສຶກ ໄປໃນທາງ ບວກຢ່າງບໍ່ໜ້າເຊື່ອຕໍ່ສະຫະລັດ.”
ໃນການເດີນທາງຄັ້ງນີ້ ປະທານາທິບໍດີ ຍັງຈະໄປຢ້ຽມຢາມຍີ່ປຸ່ນ ອະດີດສັດຕູໃນປາງສົງຄາມອີກປະເທດນຶ່ງ ແລະມີທ່າທາງວ່າ ຈະເນັ້ນໜັກໃຫ້ ເຫັນເຖິງອຳນາດໃນການຄືນດີກັນເພື່ອຫັນປ່ຽນຄວາມສຳພັນ ຢູ່ໃນທັງສອງປະເທດ.
