ເວລານີ້ ມີຊາວເກົາຫຼີເໜືອ ປະມານ 50 ພັນຄົນ ເຮັດວຽກຢູ່ໃນ 16 ປະເທດໃນທົ່ວໂລກ ແລະພາກັນສົ່ງເງິນຕາຕ່າງປະເທດ ກັບໄປຍັງພຽງຢາງ. ນັກຂ່າວວີໂອເອພະແນກພາສາເກົາຫຼີ Eunjung Cho ໄດ້ໄປຢ້ຽມຢາມປະເທດກາຕ້າ ເພື່ອເບິ່ງດ້ວຍຕົນເອງ ພວກແຮງງານເກົາຫຼີເໜືອ ປະມານ 3 ພັນຄົນ ທີ່ເຮັດວຽກຢູ່ທີ່ນັ້ນ ພາຍໃຕ້ສະພາບການທີ່ຍາກລຳບາກ ຊຶ່ງສິງຈະນຳເອົາລາຍລະອຽດ ມາສະເໜີທ່ານຕໍ່ໄປ..
ພວກແຮງງານເກົາຫຼີເໜືອ ປະມານ 3 ພັນຄົນ ພາກັນເຮັດວຽກ ໃນສະພາບເຫື່ອໄຫລໄຄຍ້ອຍ ຍ້ອນຄວາມອົບເອົ້າຂອງດິນຟ້າອາກາດ ຢູ່ຕາມສະຖານທີ່ກໍ່ສ້າງແຫ່ງຕ່າງໆໃນກາຕ້າ.
ພວກແຮງງານແລະພວກຫົວໜ້າກໍ່ສ້າງໃນທ້ອງຖິ່ນ ກ່າວຕໍ່ວີໂອເອວ່າ ພວກເຂົາເຈົ້າເຮັດວຽກໜັກເປັນເວລາຫຼາຍໆຊົ່ວໂມງ ແຕ່ສ່ວນຫຼາຍຂອງເງິນຄ່າຈ້າງທີ່ເຂົາເຈົ້າສົ່ງເມືອບ້ານນັ້ນ ຖືກພວກເຈົ້າໜ້າທີ່ເກົາຫຼີເໜືອຍຶດເອົາໄວ້. ແຮງງານເກົາຫຼີເໜືອຄົນນຶ່ງກ່າວວ່າ ມີແຕ່ພວກທີ່ບໍ່ເງິນຈັກໜ້ອຍເທົ່ານັ້ນ ທີ່ພະຍາຍາມໄປເຮັດວຽກ ຢູ່ໃນຕ່າງປະເທດ. ວີໂອເອໄດ້ບິດເບືອນສຽງແຮງງານຜູ້ນີ້ ເພື່ອປົກປ້ອງຊື່ແທ້ຂອງລາວໄວ້.
ລາວເວົ້າວ່າ ປະຊາຊົນຫຼາຍຄົນພາກັນໄປຕ່າງປະເທດ ເພາະວ່າພວກເຂົາເຈົ້າບໍ່ມີເງິນ ແລະມັນຢູ່ຍາກຫຼາຍໃນບ້ານເກີດເມືອງນອນຂອງຕົນ ຖ້າບໍ່ມີເງິນ. ຖ້າຢາກມີວຽກເຮັດ ເຈົ້າຈະຕ້ອງການເງິນ. ລາວກ່າວຕື່ມວ່າ ເຮັດຫຍັງກໍຕາມ ເຈົ້າຕ້ອງມີເງິນ. ເຈົ້າອອກມານອກ ກໍຍ້ອນເຈົ້າບໍ່ມີເງິນ. ແຕ່ໃນຄວາມເປັນຈິງແລ້ວ ເຖິງແມ່ນເຈົ້າອອກມາຢູ່ຕ່າງປະເທດ ເຈົ້າກໍຍັງບໍ່ສາມາດທ້ອນຫອມເງິນໄວ້ໄດ້ ຄືກັນ.
ຊາຍຄົນນີ້ ທີ່ບໍ່ປະສົງໃຫ້ອອກຊື່ ຍ່າງຢູ່ນອກສະຖານທີ່ກໍ່ສ້າງແຫ່ງນຶ່ງ ໃນເມືອງໂດຮາ. ລາວປະຕິຍານວ່າ ລາວຈະບໍ່ໄປເຮັດວຽກຢູ່ຕ່າງປະເທດ ອີກຈັກເທື່ອ.
ລາວກ່າວວ່າ "ບໍ່ມີແຕ່ລາວເທົ່ານັ້ນ ແຕ່ທຸກໆຄົນ ກໍເວົ້າຈັ່ງຊີ້. ພວກ ເຮົາອອກຈາກປະເທດມາ ກໍເພື່ອມາຫາເງິນໃຫ້ພວກເຮົາເອງ ບໍ່ແມ່ນເພື່ອໃຫ້ພວກຜູ້ຈັດການ ຫຼືເລຂາຂອງພັກ ສວຍປະໂຫຍດຈາກພວກເຮົາ. ແຕ່ພວກແຮງງານທີ່ກາຕ້ານີ້ ຫາເງິນໃຫ້ພວກຜູ້ຈັດການ ແລະພວກເລຂາພັກ.”
ລາວຈົ່ມວ່າ ເງິນເດືອນຂອງລາວສ່ວນຫຼາຍຫາຍໄປ ເພາະວ່າ ລັດຖະບານເກົາຫຼີເໜືອ
ແບ່ງເອົາໄປສ່ວນຫຼາຍ ສຳຫລັບ “ທຶນຈົງຮັກພັກດີ” ແລະບໍລິສັດເກົາຫຼີເໜືອ ທີ່ຫາງານໃຫ້ລາວໃນກາຕ້າ ແບ່ງປັນເອົາໄປອີກຈຳນວນນຶ່ງ ສຳຫລັບ “ຄ່າໃຊ້ຈ່າຍຕ່າງໆ”.
ລາວເວົ້າວ່າ "ລາວຄວນຈະໄດ້ຮັບຄ່າຈ້າງ 750 ດອນລາ ຫຼື 2500 ຫລຽນ ເງິນ
ກາຕ້າຕໍ່ເດືອນ. ແຕ່ວ່າ ຫຼັງຈາກຕັດຄ່ານັ້ນຄ່ານີ້ອອກແລ້ວ ເງິນເດືອນຂອງລາວຍັງເຫຼືອພຽງ 150 ດອນລາຕໍ່ເດືອນ. ຫລັງຈາກຕັດຄ່າໃຊ້ຈ່າຍຕ່າງໆ ແລະເງິນທ້ອນຫອມອອກແລ້ວ ໃນທີ່ສຸດພວກເຮົາກໍຍັງເຫລືອເງິນ ປະມານ 100 ດອນລາຕໍ່ເດືອນ.
ລາວກ່າວວ່າ ມີແຕ່ຜູ້ໂຊກດີເທົ່ານັ້ນ ທີ່ສາມາດເກັບເງິນໄວ້ເຖິງ 2 ພັນດອນລາເພື່ອຖືເງິນກັບບ້ານ ຫຼັງຈາກເຮັດວຽກໄດ້ 3 ປີ ໃນກາຕ້າມາແລ້ວນັ້ນ.
ຜົນຂ້າງຄຽງອີກອັນນຶ່ງຂອງຄ່າຈ້າງຕໍ່າ ກໍແມ່ນວ່າ ພວກແຮງງານເກົາຫຼີເໜືອຫຼາຍຄົນ ຖືກຍົວະຍວນໃຫ້ເຂົ້າພົວພັນໃນພຶດຕິກຳຕ່າງໆທີ່ຜິດກົດໝາຍ. ພວກຊາວເກົາຫຼີເໜືອມີຊື່ສຽງວ່າ ເປັນຜູ້ຜະລິດເຫຼົ້າເຖື່ອນຫລາຍທີ່ສຸດໃນກາຕ້າ ບ່ອນທີ່ພວກຊາວຕ່າງປະເທດ ທີ່ໄດ້
ເງິນ ເດືອນກາຍ 1100 ດອນລາຕໍ່ເດືອນເທົ່ານັ້ນ ທີ່ສາມາດໄດ້ຮັບໃບອະນຸຍາດໃຫ້ກິນ
ເຫຼົ້າໄດ້.
ພວກແຮງງານອົບພະຍົບຫຼາຍຄົນ ທີ່ມາເຮັດວຽກຢູ່ກາຕ້າ ຈາກທົ່ວ ໂລກ ແມ່ນຢາກດື່ມເຫຼົ້າ ຫຼັງຈາກເຮັດວຽກມາໝົດມື້ ແລະແມ່ນຊາວເກົາຫຼີເໜືອເປັນຜູ້ສະໜອງເຫລົ້າໃຫ້ເຂົາເຈົ້າ.
ຄົນງານເກົາຫຼີເໜືອຄົນນຶ່ງກ່າວຕໍ່ວີໂອເອວ່າ ເຂົາເຈົ້າເຮັດຈັ່ງຊັ້ນ ເຖິງແມ່ນຈະສ່ຽງຕໍ່ການຖືກຈັບກຸມກໍຕາມ.
ພະນັກງານຄົນນີ້ ກ່າວຊີ້ແຈງວ່າ "ເວລາຄົນຖືກຈັບກຸມ ຍ້ອນຜະລິດເຫລົ້າເຖື່ອນ ພວກເຂົາເຈົ້າຈະຖືກສົ່ງກັບຄືນປະເທດ. ຫວ່າງໄວໆຜ່ານມານີ້ ຊາວເກົາຫຼີເໜືອ 4 ຄົນ ຖືກສົ່ງກັບຄືນປະເທດ ແຕ່ກໍຍັງມີຄົນເກົາຫຼີເໜືອອື່ນໆອີກທີ່ຍັງເຮັດເຫຼົ້າຢູ່ ແລະຂາຍໃຫ້ຄົນເກົາຫຼີ ແລະຄົນຊາດອື່ນໆ. ລາວເວົ້າຕື່ມວ່າ ເຫຼົ້າແກ້ວນຶ່ງລາຄາ 15 won ເງິນເກົາຫຼີເໜືອ ຫລືປະມານ 5 ດອນລາສະຫະລັດ ຊຶ່ງລາວຈົ່ມວ່າ “ມັນແພງໂພດ ແຕ່ພວກເຮົາກໍຍັງດື່ມຢູ່ເພື່ອເຮັດໃຫ້ຈິດໃຂສົດຊື່ນ ແລະມີຄວາມຮູ້ສຶກດີຂຶ້ນ.”
ລາວກ່າວຕໍ່ໄປວ່າ "ພວກຄົນທີ່ເຮັດເຫຼົ້າເຖື່ອນຂາຍນັ້ນ ໄດ້ເງິນຢ່າງໜ້ອຍ 10 ພັນດອນລາ ໃນຊ່ວງເວລາ 6 ເດືອນ."
ໃນເຂດ West Bay ຫຼືອ່າວຕາເວັນຕົກ ຂອງເມືອງໂດຮາ ທີ່ເຕັມໄປດ້ວຍພວກໂຮງແຮມຫລູຫລາ ແລະຕຶກສູງໆດາດຟ້ານັ້ນ ມີບ່ອນກໍ່ສ້າງ ຫຼາຍໆແຫ່ງ ທີ່ວ່າຈ້າງຄົນງານເກົາຫຼີເໜືອ. ຢູ່ບ່ອນກໍ່ສ້າງໂຮງແຮມ
ຫລູຫລາແຫ່ງໜຶ່ງ ທີ່ກຳນົດຈະສ້າງໃຫ້ແລ້ວເສັດ ພາຍໃນອີກ 8 ເດືອນ ຜູ້ຈັດການຄົນອິນເດຍ ເວົ້າວ່າ ມີຊາວເກົາຫຼີເໜືອປະມານ 100 ຄົນ ເຮັດວຽກຢູ່ຊັ້ນເທິງສຸດ ຕິດຕັ້ງເຫຼັກເສີມ
ເພື່ອເຮັດໃຫ້ອາຄານແຂງແຮງ ແຕ່ບໍ່ມີຜູ້ໃດເຕັມໃຈຢາກໃຫ້ສຳພາດ.
ຫຼັງຈາກຜູ້ສື່ຂ່າວວີໂອເອ ໄດ້ໂອ້ລົມ ຢູ່ບ່ອນກໍ່ສ້າງແຫ່ງນັ້ນ ກັບຄົນງານຫຼາຍຄົນ ທີ່ມາຈາກສີລັງກາ ເນປານ ອິນເດຍ ອີຈິບ ແລະຊີເຣຍ ແລ້ວ ຄົນເກົາຫຼີເໜືອຄົນນຶ່ງກໍຖືກຮ້ອງອອກມາ. ຜູ້ກ່ຽວທີ່ທ່າທາງສົງໄສເປັນຢ່າງສູງ ແລະບໍ່ເຕັມໃຈທີ່ຈະເວົ້າຫຍັງອອກມາ.
ລາວບໍ່ຍອມຕອບຄຳຖາມຫຼາຍຄຳ ແຕ່ເວົ້າວ່າ ພວກຄົນເກົາຫຼີເໜືອທີ່ເຮັດວຽກຢູ່ບ່ອນກໍ່
ສ້າງນີ້ ເລີກການເວລາ 10 ໂມງແລງ. ພວກແຮງງານມາຈາກປະເທດອື່ນໆເລີ້ມເລີກການເວລາ 5:00 ໂມງຕອນບ່າຍ ເວລາພວກແຮງງານຍາມມື້ຄືນເລີ້ມມາມາການ. ສະຖານທີ່ກໍ່ສ້າງແຫ່ງຕ່າງໆໃນກາຕ້າ ເລີ້ມເຮັດການເວລາ 6:00 ໂມງເຊົ້າ.
ຜູ້ຈັດການການກໍ່ສ້າງເກົາຫຼີໃຕ້ຄົນນຶ່ງ ທີ່ໃຫ້ຮ້ອງຊື່ຕາມນາມສະກຸນ ຂອງລາວ ຫລີ ນັ້ນ ກ່າວວ່າ ເປັນທີ່ຮູ້ຈັກກັນດີວ່າ ຄົນເກົາຫຼີເໜືອເຮັດວຽກເຮັດການມື້ນຶ່ງຫລາຍໆຊົ່ວໂມງ.
ເກົາຫຼີເໜືອ ຖືວ່າເປັນນຶ່ງໃນບັນດາປະເທດທີ່ທຸກຈົນທີ່ສຸດ ແລະເປັນປະເທດທີ່ປະຊາຊົນ
ຖືກກົດຂີ່ຂົ່ມເຫັງຫລາຍທີ່ສຸດໃນໂລກ. ຊາວເກົາຫລີເໜືອ ຫຼາຍໝື່ນຄົນ ພາກັນໄປເຮັດວຽກຢູ່ໃນປະເທດຕ່າງໆ 16 ປະເທດ ແລະພາກັນສົ່ງເງິນຕາຕ່າງປະເທດທີ່ຫາຍາກ ກັບ
ຄືນບ້ານໃຫ້ລັດຖະບານພຽງຢ້າງ.
ແຮງງານເກົາຫຼີິເໜືອ ໃນກາຕ້າ
