ລິ້ງ ສຳຫລັບເຂົ້າຫາ

logo-print

​ລັດ​ North Carolina ເປັນລັດນຶ່ງ ​​ທີ່ມີ​ການ​ແຂ່ງຂັນ ທີ່ສຳຄັນ ໃນການເລືອກຕັ້ງ ກາງສະໄໝ


ເບິ່ງວີດີໂອ ລາຍງານ ເລື້ອງນີ້.

ການ​ເລືອກ​ຕັ້ງ ລັດຖະສະພາ​ກາງສະໄໝ ​ທີ່​ບໍ່​ມີການ​ເລືອກ​ເອົາ​
ປະທານາທິບໍດີນຳນັ້ນ​ແມ່ນ​ຈະ​ມີ​ຂຶ້ນ​ໃນ​ວັນທີ 4 ພະຈິກ​ມື້ນີ້ແລະ
ບັນດານັກວິ​ເຄາະ​ ດ້ານ​ການ​ເມືອງສ່ວນຫຼາຍ ເວົ້າວ່າ ພັກຣີພັບ
​ບຣິກັນ ​ມີໂອກາດ​ດີ​ທີ່​ສຸດ ທີ່​ຈະ​ໄດ້ຊະນະ ສຽງ​ສ່ວນ​ຫລາຍ ໃນ
​ສະພາ​ສູງ ຊຶ່ງ​ໃນ​ເວລາ​ນີ້​ ພັກເດໂມ​ແຄ​ຣັດ ຄວບ​ຄຸມ​ຢູ່. ຄັນວ່າ
ພັກ​ຣີພັບ​ບຣິກັນສາມາດເຂົ້າຄວບ​ຄຸມ​ທັງ​ສະພາ​ສູງ​ ແລະ​ສະພາ
​ຕ່ຳແລ້ວ ມັນອາດ​ຈະເປັນ​ຜົນກະທົບ ​ຢ່າງ​ໃຫຍ່​ຕໍ່ການ​ບໍລິຫານ​
ງານ​ໃນ​ຊ່ວງ 2 ປີ​ສຸດ​ທ້າຍ​ຂອງປະທານາທິບໍດີບາຣັກ ​ໂອ​ບາ​ມາ.
ສະນັ້ນ ໃນ​ການ​ເລືອກ​ຕັ້ງສະມາຊິກສະພາ​ ໃນ​ປີ​ນີ້ ມີບັນຫາ​ອັນ​
ໃດ​ແດ່? ທີ່​ຈະ​ຊຸກຍູ້​ ໃຫ້​ບັນດາ​ຜູ້​ມີ​ສິດ​ປ່ອນບັດທັງຫຼາຍ ອອກ​ໄປ
​ໃຊ້ສິດໃຊ້​ສຽງ. Jim Malone ຜູ້ສື່​ຂ່າວ​ວີ​ໂອ​ເອ​ ໄດ້​ເດີນທາງ​ໄປ
ລັດ North Carolina ຊຶ່ງ​ເປັນ​ລັດ​ນຶ່ງ​ ທີ່​ມີ​ການ​ແຂ່ງຂັນ ທາງ​ການ
​ເມືອງ​ຢ່າງ​ດຸເດືອດ​ໃນ​ປະ​ເທດ ​ເພື່ອ​ເກັບກຳຂ່າວ​ ເລື້ອ​ງນີ້ ​ແລະ
ໄຊ​ຈະ​ເລີ​ນສຸກ ມີລາຍລະອຽດ​ ມາສະ​ເໜີ​ທ່ານ ໃນ​ອັນ​ດັບ​ຕໍ່​ໄປ.

ເວລາ​ນີ້ ​ແມ່ນ​ລະດູ​ການ​ເກັບ​ກ່ຽວ​ຢູ່​ລັດ North Carolina. ​ເວລາ​ໃນຕອນກາງວັນ ​ແມ່ນ
ສັ້ນລົງນຳທຸກມື້ພວກຕົ້ນ​ຢາສູບ​ໃນ​ສວນ​ຕ່າງໆແລະພວກກະ​ເສດຕະກອນກຳລັງຂຸ້ນຂ້ຽວ
​ນຳ​ເອົາຜົນລະປູກ​ ​ຂອງ​ເຂົາ​ເຈົ້າ​ໄປ​ສົ່ງ​ຕະຫລາດ.

ບໍ່​ຫ່າງ​ໄກ​ປານໃດຈາກ​ເມືອງ Wilson ນັ້ນ ແມ່ນມີ​ການ​ເກັບ​ກ່ຽວ​ທີ່​ແຕກ​ຕ່າງ​ ກຳລັງດຳເນີນ
ຢູ່ ອັນ​ນັ້ນ ແມ່ນ​ການເກັບ​ກຳເອົາ ບັນດາ​ຜູ້​ມີ​ສິດ​ປ່ອນ​ບັດ​ເລືອກ​ຕັ້ງ.

ນັກ​ສອນ​ສາສະໜາ William Barber ປະທານປະຈຳລັດ ສະ​ມາຄົມ​ເພື່ອ​ຄວາມ​ກ້າວໜ້າ​
ໃຫ້ແກ່​ປະຊາຊົນ​ຜິວດຳ​ແຫ່ງ​ຊາດ ຫຼື National Association for the Advancement
of Colored People ທີ່​ມີ​ຄຳຫ​ຍໍ້ວ່າ N.A.A.C.P. ນັ້ນ ​ເປັນ​ຜູ້ນຳ ໃນຄວາມພະຍາຍາມ​
ທີ່​ຈະ​ຂຶ້ນທະບຽນ​ ບັນດາ​ຜູ້​ມີ​ສິດປ່ອນ​ບັດ​ເລືອກ​ຕັ້ງ ​ທີ່​ເປັນ​ຊົນ​ຊັ້ນກຸ່ມນ້ອຍ.

ທ່ານ William Barber ​ເວົ້າ​ວ່າ “ຊາວ​ອາ​ເມຣິກັນ ໝົດ​ທຸກ​ຄົນ ຕ້ອງ​ມີ​ສິດ ​ປ່ອນ​ບັດ​
ເລືອກ​ຕັ້ງ ໂດຍ​ບໍ່​ຖືກ​ກີດ​ກັ້ນ ບໍ່ຖືກ​ຕັດສິດ ​ບໍ່​ຖືກປະຕິ​ເສດ!”

ທ່ານ Barber ຫວັງທີ່​ຈະ​ລະດົມ​ ບັນດາ​ຜູ້​ມີ​ສິດປ່ອນ​ບັດ​ເລືອກ​ຕັ້ງ ​ໃນ​ນາມ​ ສະມາຊິກ
ສະພາສູງ Kay Hagan ຊຶ່ງສັງກັດພັກ​ເດໂມ​ແຄ​ຣັດ ທີ່​ກຳລັງ​ປະ​ເຊີນ​ໜ້າ​ ກັບ​ການ​ທ້າ​ທາຍ​
ຢ່າງແຂງ​ຂັນ ຈາກທ່ານ Thom Tillis ຜູ້ສະໝັກຂອງພັກ​ຣີພັບ​ບຣິກັນ.

ທ່ານ Barber ​ເວົ້າ​ອີກວ່າ “ການ​ເຄື່ອນ​ໄຫວ​ອັນ​ນີ້ ​ແມ່ນ​ກ່ຽວ​ກັບ​ການ​ເພັ່ງ​ເລັ່ງຢ່າງ
ເຂັ້ມງວດ ​ໃສ່​ຄຸ​ນຄ່າ​ຕ່າງ​ໆ ໃນດ້ານ​ສິນ​ທຳ ອັນ​ເລີກ​ເຊິ່ງ ຂອງ​ພວກ​ເຮົາ​ ຈາກ​ຄຳ​ພີ
ຂອງຫຼາຍໆ​ສາສະໜາ​ ​ແລະ ຄຸນຄ່າ​ຕ່າງໆ ທີ່ເລິກເຊິ່ງ ທາງດ້ານ​ລັດຖະທຳ​ມະນູນ
ຂອງ​ພວກ​ເຮົາອີກ​ ​ແລະ ທ້າ​ທາຍຕໍ່​ພວກຫົວ​ຮຸນ​ແຮງ​ຈັດ ​ທີ່​ກຳລັງ​ພະຍາຍາມ ຈະ​
ນຳ​ພວກ​ເຮົາຫັນໄປສູ່​ການ​ຖອຍຫຼັງທຸກຫົນ​ແຫ່ງ​ໃນທົ່ວ​ອາ​ເມຣິກາ.”

ສະມາຊິກ ສະພາສູງ ທ່ານນາງ Kay Hagan ຊຶ່ງສັງກັດພັກ​ເດໂມ​ແຄ​ຣັດ ແລະ ຄູ່ແຂງ​ຂັນ ທ່ານ Thom Tillis ຜູ້ສະໝັກຂອງລັດ North Carolina ສັງກັດພັກ​ຣີພັບ​ບຣິກັນ ຈັບມືກັນ ກ່ອນໜ້າການໂຕ້ວາທີ, ວັນທີ 7 ຕຸລາ 2014.
ສະມາຊິກ ສະພາສູງ ທ່ານນາງ Kay Hagan ຊຶ່ງສັງກັດພັກ​ເດໂມ​ແຄ​ຣັດ ແລະ ຄູ່ແຂງ​ຂັນ ທ່ານ Thom Tillis ຜູ້ສະໝັກຂອງລັດ North Carolina ສັງກັດພັກ​ຣີພັບ​ບຣິກັນ ຈັບມືກັນ ກ່ອນໜ້າການໂຕ້ວາທີ, ວັນທີ 7 ຕຸລາ 2014.

ບັນດານັກ​ເຄື່ອນ​ໄຫວ ​ນິຍົມແນວທາງເດີມ ກໍກຳລັງກະ​ກຽມ
ສຳ​ຫລັບ​ການ​ເລືອກ​ຕັ້ງ ໃນຄັ້ງນີ້ ​ເຊັ່ນ​ກັນ ລວມທັງ ທ່ານ Joel
Killion ນັກ​ເຄື່ອ​ນ​ໄຫວ ນິຍົມແນວທາງເດີມ ຂອງກຸ່ມ Tea Party
ໃນ​ເມືອງ Wilson ນຳດ້ວຍ.

ຈຸດ​ເພັ່ງ​ເລັ່ງຂອງ​ທ່ານ Killion ນັ້ນ ​ແມ່ນ​ຫລຸດ​ຂະໜາດ​ ຂອງ​
ລັດຖະບານ​ໃຫ້ນ້ອຍລົງ.

ທ່ານ Killion ​ເວົ້າວ່າ “ ​ລັດທິເສລີ​ນິຍົມ ລັດທິກ້າວໜ້າ​ນິຍົມ​
ໃນ​ຄວາມ​ໝາຍແບບ​ດັ້ງເດີມແລ້ວ ​ເຖິງ​ແມ່ນ​ກັບຄືນ​ໄປຫາ
ປີ 1890 ​ເມື່ອ​ເວລາ​ ​ຍຸກ​ສະ​ໄໝ​ ຂອງ​ລັດທິ​ກ້າວໜ້າ​ເລີ້ມ​
ຕົ້ນຂຶ້ນ ອັນ​ນັ້ນ​ແມ່ນ​ຢາເບື່ອ ທີ່​ຂ້າ ພະ​ເຈົ້າ​ເຊື່ອ​ວ່າ ​ໄດ້​
ແຊກ​ຊຶມ​ເຂົ້າມາ​ໃນ​ປະ​ເທດ ​ແລະ ​ໄດ້​ປູກຝັງແນວ​ຄິດ​ ຂອງ​ລະບົບເຈົ້າຂຸນມຸນນາຍຂະໜາດໃຫຍ່ ​ແລະ ລັດຖະບານ ​ທີ່ຍາດແຍ່ງເອົາຄວາມ
ຮັບຜິດຊອບ ແລະ ເສລີພາບ ໃນທາງເລືອກ ໄປຈາກສ່ວນບຸກຄົນນັ້ນ.”

ຢູ່ ​ທີ່​ຕະຫລາດ​ກະ​ເສດຕະກອນແຫ່ງນຶ່ງ ​ໃນ​ນະຄອນຫລວງ​ Raleigh ຂອງລັດ North Carolina ບັນ​ດາ​ຜູ້​ມີ​ສິດ​ປ່ອນ​ບັດ​ເລືອກ​ຕັ້ງ ​ໄດ້​ຢຸດ​ພັກ​ຊົ່ວຄາວ ຈາກ​ຂາຍ​ພືດ​ຜັກທຳ​ມະ​ຊາດ ​ແລະ ຂະໜົມຄຸກກີ້ຕ່າງໆ ນາໆ​ ມາ​ໂອ້​ລົມ​ກັນ​ກ່ຽວ​ກັບບັນຫາ​ຕ່າງໆ ທີ່ເຂົາ​ເຈົ້າມີ​ຄວາມ​ສົນ​ໃຈນຳ ​ໃນ​ການ​ເລືອກ​ຕັ້ງ ທີ່​ຈະ​ມາ​ເຖິງ​ນີ້.

ນາງ Caresha ຊຶ່ງເປັນຜູ້​ມີ​ສິດປ່ອນ​ບັດ​ເລືອກ​ຕັ້ງ ​ເວົ້າວ່າ “ສິ່ງ ສຳ ຄັນ​ທີ່​ສຸດ ສຳ​ຫລັບ​ຂ້ອຍ​ແລ້ວ ​ແມ່ນ​ການ​ສຶກສາ. ຂ້ອຍ​ເຊື່ອ​ວ່າ ​ເດັກ ນ້ອຍ​ໝົດ​ທຸກ​ຄົນ ຄວນມີ​ໂອກາດ ໄດ້​ຮັບ​ການ​ສຶກສາ​ ​ທີ່​ມີ​ຄຸນ​ນະພາ​ບ.”

ທ້າວ Ethan Hill ​ຜູ້​ມີ​ສິດປ່ອນ​ບັດ​ເລືອກ​ຕັ້ງອີກຄົນນຶ່ງ ເວົ້າວ່າ “ບັນ ຫາ​ຕ່າງໆ​ ຢູ່​ປະ​ເທດ​ອີຣັກ ​ແລະຢູ່​ຕ່າງ​ປະເທດນັ້ນ ​ພ້ອມ​ກັບ ເລື້ອ​ງ​ການ​ປ້ອງ​ກັນ​ພາຍ​ໃນ​ປະ​ເທດ ​ຂ້ອຍຄິດ​ວ່າ ​ເປັນ​ບັນຫາ​ອັນ​ໃຫຍ່​ຫຼວງ.”

ນາງ Niki Morock ຜູ້​ມີ​ສິດປ່ອນ​ບັດ​ເລືອກ​ຕັ້ງ ອີກຄົນ​ນຶ່ງ ​ເວົ້າວ່າ “ສຳ​ຫລັບ​ຂ້ອຍ​ແລ້ວ ມັນ​ແມ່ນ​ເລື້ອ​ງ​ເສດຖະກິດ. ​ເລື້ອ​ງຄວາມ​ໝັ້ນຄົງແຫ່ງ​ຊາດ. ທັງ​ສອງ​ເລື້ອງ​ນີ້ ​ແມ່ນ​ເລື້ອງ​ໃຫຍ່.”

ນັກວິ ​ເຄາະ John Davis ກ່າວ​ວ່າ ການ​ຫລັ່ງ​ໄຫ​ລ​ເຂົ້າມາ​ໃນ​ລັດ ທີ່​ຢູ່​ທາງ​ພາກ​ໃຕ້ດັ່ງກ່າວ​ຂອງ​ພວກຄົນ​ພາຍ​ນອກ​ໂດຍ​ສ່ວນ​ໃຫຍ່​ແລ້ວແມ່ນ​ ມາ​ຈາກ​ລັດທາງ​ພາກ​ເໜືອ ​ແລະ ພາກຕາ​ເວັນ​ຕົກ​ຕອນກາງ ໄດ້​ປ່ຽນ​ແປງ​ພື້ນຖານ​ທາງ​ການ​ເມືອງ​ໃນ​ລັດ North Carolina ​ເມື່ອ​ສອງ​ສາມ​ຜ່ານມາ​ນີ້.

ທ່ານ Davis ​ເວົ້າວ່າ “ມັນ​ໄດ້​ ປ່ຽນ​ແປງ​ ວ່າ​ ເຮົາ​ແມ່ນ​ໃຜ. ມັນ​ໄດ້​ຫັນປ່ຽນ ລັດພວກ​ເຮົາ ​ໃຫ້ກາຍເປັນລັດ​ ທີ່​ມີການ​ແຂ່ງຂັນ​ທາງ​ການ​ເມືອງ ຊຶ່ງ​ເປັນ​ພື້ນ​ທີ່ການແຂ່ງຂັນ​ ແບບ​ມີລະດັບ​ເທົ່າ​ທຽມ​ກັນ​ແທ້ ເປັນລັດທີ່​ນິຍົມ ແນວທາງປານກາງ ຫຼາຍຂຶ້ນ ກວ່າ
ລັດທີ່ນິຍົມ ແນວທາງເດີມ ເມື່ອ 30 ປີ ກ່ອນ.”

Jim Malone ຜູ້ສື່​ຂ່າວ​ວີ​ໂອ​ເອ ກ່າວ​ວ່າ “ເມື່ອ​ສອງ​ສາມ​ປີ​ຜ່ານມາ​ນີ້ North Carolina ​ໄດ້​ກາຍ​ມາ​ເປັນລັດ ​ທີ່ມີການແ​ຂ່ງຂັນທີ່​ສຳຄັນ​ ເມື່ອເວົ້າເຖິງ ການເລືອກຕັ້ງ
ປະທານາ​ທິບໍດີສະຫະລັດ. ທ່ານ ບາຣັກ ​ໂອ​ບາ​ມາ ​ໄດ້​ຮັບ​ໄຊຊະນະ​ຢູ່​ໃນ​ລັດ​ນີ້​
ເມື່ອ​ປີ 2008 ​ແຕ່ເມື່ອ 2 ປີກ່ອນນີ້ ທ່ານ​ໄດ້​ເສຍ​ໄຊ ຢ່າງຫວຸດຫວິດໃຫ້ແກ່ທ່ານ
Mitt Romney ຜູ້ສະໝັກ ປະທານາທິບໍດີ ຂອງພັກຣີພັບບລີກັນ. ດັ່ງ​ນັ້ນ ຈຶ່ງ​ເຮັດ
ໃຫ້ລັດ North Carolina ເປັນ​ຈຸດ​ເພັ່ງ​ເລັ່ງອັນ​ສຳຄັນ ອີກ​ຄັ້ງນຶ່ງ ສຳ​ຫລັບ​ທັງ​
ສອງ​ພັກ ໃນການແຂ່ງຂັນ​ເລືອກ​ຕັ້ງປະທານາທິບໍດີ ​ປີ 2016 ທີ່​ຈະມາເຖິງ ນີ້.”

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG