ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ເຈົ້າຄອງ ນະຄອນຫຼວງວຽງຈັນ ຄົນໃໝ່ ຢືນຢັນວ່າ ຈະຈັດເກັບລາຍຮັບ ໃຫ້ໄດ້ເພີ່ມຂຶ້ນ


ລົດຈໍາໂບ ແລ່ນຜ່ານອານຸສາວະລີ, ນະຄອນຫຼວງ ວຽງຈັນ, ລາວ. 12 ມີນາ 2020.
ລົດຈໍາໂບ ແລ່ນຜ່ານອານຸສາວະລີ, ນະຄອນຫຼວງ ວຽງຈັນ, ລາວ. 12 ມີນາ 2020.

ເຈົ້າຄອງເຂດນະຄອນຫຼວງວຽງຈັນ ຄົນໃໝ່ຢືນຢັນວ່າ ຈະຈັດເກັບລາຍຮັບໃຫ້ໄດ້ເພີ່ມຂຶ້ນດ້ວຍການປາບປາມຢ່າງເດັດຂາດຕໍ່ບັນດາການສໍ້ລາດບັງຫຼວງທັງໂດຍພະນັກງານ ລັດ ແລະ ບໍລິສັດເອກະຊົນ.

ທ່ານ ອາດສະພັງມອງ ສີພັນດອນ ໄດ້ຖະແຫຼງຢືນຢັນໃນໂອກາດການຮັບຕໍາແໜ່ງເຈົ້າຄອງເຂດນະຄອນຫຼວງວຽງຈັນເມື່ອບໍ່ນານມານີ້ວ່າ ເປົ້າໝາຍສຳຄັນທາງດ້ານງົບປະມານຂອງນະຄອນຫຼວງວຽງຈັນ ໃນປີ 2021 ນີ້ຄືການຈັດເກັບລາຍຮັບ ແລະ ການຄວບຄຸມລາຍຈ່າຍໃຫ້ໄດ້ຕາມແຜນການທີ່ວາງເອົາໄວ້ ເຖິງແມ່ນວ່າການລະບາດຂອງເຊື້ອໄວຣັສ COVID-19 ຍັງໄດ້ສືບຕໍ່ການສົ່ງຜົນກະ ທົບຕໍ່ພາກທຸລະກິດ ແລະ ການຜະລິດຕ່າງໆໃນນະຄອນຫຼວງວຽງຈັນ ກໍຄືໃນທົ່ວປະເທດ ລາວ ກໍຕາມ ຫາກແຕ່ດ້ວຍການປັບຫຼຸດຄາດໝາຍດ້ານລາຍຮັບ ແລະ ລາຍຈ່າຍໃຫ້ສອດຄ່ອງກັບສະ ພາບການຕົວຈິງທີ່ສົມທົບດ້ວຍການກວດກາຢ່າງເຂັ້ມງວດທັງໃນການຈັດເກັບລາຍຮັບ ແລະ ການໃຊ້ຈ່າຍງົບປະມານທີ່ແນໃສ່ການປາບປາມການສໍ້ລາດບັງຫຼວງທັງໂດຍພະນັກງານລັດ ແລະ ບໍລິ ສັດເອກະຊົນນັ້ນ ກໍເຮັດໃຫ້ໝັ້ນໃຈວ່າ ການຈັດຕັ້ງປະຕິບັດແຜນການງົບປະມານໃນປີນີ້ຈະສາ ມາດບັນລຸເປົ້າໝາຍທີ່ວາງໄວ້ດັ່ງທີ່ທ່ານ ອາດສະພັງທອງ ໄດ້ຢືນຢັນວ່າ

“ມາດຕະການສະກັດກັ້ນເພື່ອແກ້ໄຂບັນຫາການສໍ້ລາດບັງຫຼວງອັນນີ້ ເປັນບັນຫາລັກທີ່ອົງການປົກຄອງພວກເຮົາໄດ້ເອົາໃຈໃສ່ ຫຼືວ່າພວກເຮົາໄດ້ກຳນົດເອົາບັນຫາ ກ່ຽວກັບ ການແກ້ໄຂປາກົດ ການຫຍໍ້ທໍ້ຕ່າງໆ ໂດຍສະເພາະເລີ່ມຈາກການເກັບລາຍຮັບງົບປະມານພວກເຮົາຈະເຮັດແນວໃດຈະນຳໃຊ້ເຄື່ອງມືອັນໃດ ປັບປຸງກົນໄກອັນໃດ ຫຼືວ່າປັບປຸງການຄຸ້ມຄອງແນວໃດໃນການຈັດເກັບ ແລະ ລວມເຖິງບັນຫາພະນັກງານພວກເຮົາຈະເຮັດແນວໃດເພື່ອບໍ່ໃຫ້ມັນເກີດບັນຫາປາກົດການຫຍໍ້ທໍ້ ແລະ ກະໃຫ້ມັນທັນກັບກຳນົດເວລາ.”

ທັງນີ້ອຳນາດການປົກຄອງນະຄອນຫຼວງວຽງຈັນ ໄດ້ວາງເປົ້າໝາຍທີ່ຈະຈັດເກັບລາຍຮັບໃນປີ 2021 ໃຫ້ໄດ້ໃນມູນຄ່າລວມ 4,609.71 ຕື້ກີບ ຫາກແຕ່ວ່າໃນປີ 2020 ທີ່ຜ່ານມາ ອຳນາດການປົກຄອງເຂດນະຄອນຫຼວງວຽງຈັນກໍສາມາດຈັດເກັບລາຍຮັບໄດ້ພຽງແຕ່ 4,094 ຕື້ກີບເທົ່ານັ້ນ ໃນຂະນະທີ່ແຜນການໄດ້ວາງເປົ້າໝາຍການຈັດເກັບລາຍຮັບໄວ້ເກີນກວ່າ 5,245 ຕື້ກີບ ໝາຍຄວາມວ່າການຈັດເກັບລາຍຮັບສາມາດຈັດຕັ້ງປະຕິບັດໄດ້ຈິງພຽງ 78 ເປີເຊັນຂອງແຜນການປີ ແລະ ເຮັດໃຫ້ອຳນາດການປົກຄອງນະຄອນຫຼວງວຽງຈັນ ສາມາດສົ່ງລາຍຮັບເຂົ້າງົບປະມານຂອງລັດ ຖະບານ ລາວ ໄດ້ພຽງ 539 ຕື້ກີບເທົ່ານັ້ນໃນປີທີ່ຜ່ານມາ.

ສ່ວນທ່ານ ພູໂຂງ ບັນນະວົງ ຮອງເຈົ້າຄອງເຂດນະຄອນຫຼວງວຽງຈັນໄດ້ຖະແຫຼງວ່າ ການລະບາດຂອງໄວຣັສ COVID-19 ທີ່ເຮັດໃຫ້ລັດຖະບານລາວ ຕ້ອງປິດດ່ານຊາຍແດນໃນທົ່ວປະເທດ ນັບແຕ່ເດືອນເມສາ 2020 ເປັນຕົ້ນມາ ໄດ້ສົ່ງຜົນກະທົບຢ່າງໜັກໜ່ວງຕໍ່ທຸລະກິດ ການຄ້າ ການລົງ ທຶນໃນ ລາວ, ໂດຍສະເພາະແມ່ນເຂດນະຄອນຫຼວງວຽງຈັນ ທີ່ມີມູນຄ່າທາງເສດຖະກິດສູງທີ່ສຸດໃນລາວນັ້ນ ກໍຍ່ອມຈະໄດ້ຮັບຜົນກະທົບຢ່າງໜັກໜ່ວງທີ່ສຸດ ຊຶ່ງຜົນຈາກການສຳຫຼວດພົບວ່າ ບັນ ດາຫົວໜ່ວຍທຸລະກິດໃນພາກການຄ້າ ແລະ ບໍລິການໄດ້ຮັບຜົນກະທົບເຖິງ 62 ເປີເຊັນ ຂອງຫົວ ໜ່ວຍທຸລະກິດທັງໝົດ ສ່ວນພາກອຸດສາຫະກຳ ແລະ ກະສິກຳນັ້ນໄດ້ຮັບຜົນກະທົບໃນສັດສ່ວນ 32 ເປີເຊັນ ແລະ 6​ ເປີເຊັນຕາມລຳດັບ ດັ່ງທີ່ທ່ານ ພູໂຂງ ໃຫ້ການຢືນຢັນວ່າ

“ອັນທີ່ກະທົບແຮງນີ້ກະແມ່ນພະແນກບໍລິການ ກະມີເລື່ອງການທ່ອງທ່ຽວ, ການຄົມມະນາຄົມ-ຂົນ ສົ່ງ, ການຂາຍຍົກຍົກ-ຂາຍຍ່ອຍ ແລະ ການບໍລິການອື່ນໆທີ່ວ່າຜົນສຳຫຼວດອອກມານີ້ແມ່ນການ ກະທົບແຮງນີ້ກວມເອົາ 62 ເປີເຊັນ ຖັດລົງມານີ້ກະແມ່ນຂະແໜງອຸດສາຫະກຳ ຊຶ່ງປະກອບມີໂຮງຈັກໂຮງງານ ຜູ້ຜະລິດອຸດສາຫະກຳ ຫັດຖະກຳ ແລ້ວກະອຸດສາຫະກຳອື່ນໆນີ້ທີ່ກະທົບແຮງນີ້ມີຢູ່ 32 ເປີເຊັນ ແລະ ຂະແໜງກະສິກຳພວກຟາມໝູ, ຟາມໄກ່, ປາກະຊັງ ແລະ ປູກພືດຜັກຕ່າງໆນີ້ ຖືກກະທົບບໍ່ຫຼາຍພຽງແຕ່ 6 ເປີເຊັນ.”

ທາງດ້ານເຈົ້າໜ້າທີ່ຂັ້ນສູງໃນຄະນະກວດສອບແຫ່ງລັດຢືນຢັນວ່າ ການກໍ່ສ້າງຖະຫນົນໃນເຂດນະ ຄອນຫຼວງວຽງຈັນ ປະເຊີນກັບບັນຫາຊັກຊ້າໃນທຸກໂຄງການທີ່ບັນດາບໍລິສັດເອກະຊົນເປັນພາກ ສ່ວນທີ່ອອກທຶນໃຫ້ກ່ອນ ເປັນຕົ້ນແມ່ນໂຄງການກໍ່ສ້າງຖະໜົນຈາກ 3 ແຍກບ້ານບໍ່ໂອ ໄປຫາບ້ານສີຖານໃຕ້ ທີ່ລົງມືກໍ່ສ້າງນັບແຕ່ປີ 2015 ເປັນຕົ້ນມາ ຈົນເຖິງປັດຈຸບັນ ກໍປາກົດວ່າມີຄວາມຄືບໜ້າບໍ່ເຖິງ 70 ເປີເຊັນ ເພາະບໍລິສັດຂາດເງິນທຶນໝຸນວຽນເຊັ່ນດຽວກັນກັບໂຄງການກໍ່ສ້າງຖະໜົນ T5 ກັບໂຄງການກໍ່ສ້າງຖະໜົນ T6 ຊຶ່ງຍັງບໍ່ມີຄວາມຊັດເຈນວ່າບໍລິສັດຜູ້ໄດ້ຮັບສຳປະທານຈະສາມາດຫາເງິນທຶນເພື່ອການກໍ່ສ້າງຕໍ່ໄປໄດ້ເມື່ອໃດ

XS
SM
MD
LG