ລິ້ງ ສຳຫລັບເຂົ້າຫາ

ຢາວັກຊີນໃໝ່ ສຳຫລັບ ປ້ອງກັນໂຣກມາລາເຣຍ ປາກົດວ່າ ມີຄວາມຫວັງສູງ ຢູ່ໃນ ເຄັນຢາ


ຄວາມ​ພະຍາຍາມ​ ທີ່​ຈະ​ຄວບ​ຄຸມ ໂຣກມາລາ​ເຣຍ ຫລື​ໄຂ້ຍຸງ ​ໃນ
​ເວລາ​ນີ້ ​ສ່ວນໃຫຍ່ແລ້ວ ແມ່ນ​ກາງ​ຕໍ່ສິ່ງ​ຕ່າງໆ ​ເຊັ່ນ ມຸ້ງທີ່ຍ້ອມ
ສານເຄມີ ແລະ ສະເປ​ຕໍ່ຕ້ານ​ພວກ​ແມງ​ໄມ້​ຕ່າງໆ ​ທີ່ເປັນ​ພາຫະ
ນະ ໃນການນຳເຊື້ອ​ພະຍາດ. ​ແຕ່​ບັນດາ​ນັກວິທະຍາສາດ ໃນ
​ປະ​ເທດ​ເຄັນ​ຢາ ກ່າວ​ວ່າ ​ໃນ​ປີໜ້າ​ນີ້ ຢາ​ວັກ​ຊີ​ນໃໝ່ ຕ້ານ​ມາລາ
​ເຣຍ ຈະ​ມີ​ໃຫ້​ໃຊ້ແລ້ວ ທີ່​ອາດ​ເປັນ​ອົງ​ປະກອບ ອັນສຳຄັນຕື່ມ​ອີກ
​ໃນ​ການ​ຄວບ​ຄຸມ ​ແລະ ບາງທີອາດຈະ​ລົບ​ລ້າງ​ພະຍາດ​ນີ້​ໄດ້. ຜູ້ ​
ສື່​ຂ່າວ​ວີ​ໂອ​ເອ Mohammed Yusuf ມີ​ລາຍ​ງານ ​ກ່ຽວ​ກັບ​ເລື້ອງ​
ນີ້ ຊຶ່ງໄຊ​ຈະ​ເລີ​ນສຸກ ຈະ​ນຳມາ​ສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.

ໂຣກ​ມາລາ​ເຣຍ ​ໄດ້​ເອົາ​ຊີວິດຜູ້ຄົນ​ ຫຼາຍກວ່າ 500,000 ຄົນ ໃນແຕ່ລະປີ ​ຢູ່ໃນທົ່ວ​ໂລກ​ ​ແລະ ​ເປັນສາ​ເຫດ​ໃນການ​ເຈັບ​ປ່ວຍຂອງ ອີກຫຼາຍລ້ານ​ຄົນ​ ​ໂດຍ​ສ່ວນ​ໃຫຍ່​ແລ້ວ ​ແມ່ນ
ເດັກນ້ອຍ ທີ່​ອາ​ໄສ​ຢູ່​ໃນ​ເຂດ​ໃຕ້​ທະ​ເລ​ຊາຍ​ຊາ​ຮາຣາ ຂອງ​ອາ​ຟຣິກາ.

ໜຶ່ງ​ສ່ວນ​ສາມ ຂອງ​ຄົນ​ປ່ວຍ​ທັງ​ໝົດ ຢູ່​ໃນ​ເມືອງ Kisumu ຊຶ່ງ​ເປັນເມືອງ​ໃຫຍ່​ອັນ​ດັບ​ສາມ​ຂອງເຄັນ​ຢາ ​ແລະເຂດອ້ອມແອ້ມ ແມ່ນເປັນ ມາລາ​ເຣຍ.

​ເຖິງ​ແມ່ນ​ວ່າ ​ການປາບປາມແລະປິ່ນປົວທີ່ມີຢູ່ໃນປັດຈຸບັນນີ້ ໄດ້​ຊ່ອຍ​ໃຫ້ພະຍາດ​ດັ່ງກ່າວ​
ຫລຸດນ້ອຍຖອຍລົງ ໃນ​ທົດ​ສະ​ວັດ ​ທີ່​ຜ່ານ​ມາກໍ​ຕາມ ແຕ່ບັນດາ​ນັກຄົ້ນຄວ້າ ຢູ່​ຫ້ອງ​ທົດ​ລອງ​ແຫ່ງ​ນີ້​ ໃນ​ພາກ​ຕາ​ເວັນ​ຕົກ​ຂອງ​ເຄັນ​ຢາ ​ແມ່ນ​ກຳລັງ​ດຳເນີນງານ​ກ່ຽວກັບ​ຢາວັກ​ຊີ​ນ ​ໂດຍ​
ໄດ້​ຮັບ​ການ​ຊ່ອຍ​ເຫຼືອ ຈາກບໍລິສັດຜະລິດ​ຢາ GlaxoSmithKline ຂອງ​ອັງກິດ ​ແລະ ພາຄີ​ອື່ນໆ​ອີກ ທີ່​ອາດ​ຈະກາຍເປັນອົງປະກອບ ອັນ​ສຳຄັນ​ໃນ​ການ​ຄວບ​ຄຸມ​ໂຣກ​ມາລາ​ເຣຍ ກໍ
ເປັນໄດ້.

ນັກວິທະຍາສາດ​ຄົນ​ໜຶ່ງ ກ່າວ​ວ່າ ການສັກຢາ​ວັກ​ຊີ​ນ​ ​ໃຫ້​ຄົນ​ທັງຫຼາຍ ​ໂດຍ​ສະເພາະ​ແລ້ວ
ພວກເດັກ​ເຍົາວະ​ຊົນນັ້ນ ​ແມ່ນ​ຈະເປັນ​ກະ​ແຈ ທີ່​ສຳຄັນເພື່ອຈະ​ລົບ​ລ້າງ​ພະຍາດ​ນີ້​ໄດ້.

ດຣ. Martina Oneko ​ໄດ້​ຊ່ອຍ​ໃນ​ການ​ຊັກ​ຢາ​ວັກ​ຊີ​ນ ຢູ່​ໃນ​ເຂດ​ຫ່າງ​ໄກ​ສອກຫລີກ ທາງພາກ ​ຕາ​ເວັນ​ຕົກ​ຂອງ​ເຄັນ​ຢາ.

ດຣ. Oneko ​ອະທິ​ບາຍວ່າ “ພວກ​ເຮົາ​ເຫັນ​ວ່າ ​ໄດ້​ຮັບ​ຄວາມ​ສຳ​ເລັດ​ ຫຼາຍໃນການ
ສັກຢາວັກ​ຊີ​ນນີ້ ທີ່​ເປັນ​ຜົນເຮັດໃຫ້ສຸຂະພາບ ​ຂອງ​ພວກ​ເດັກນ້ອຍດີ​ຂຶ້ນ. ພວກ​
ເດັກນ້ອຍ​ທີ່ໄດ້​ສັກຢາ​ວັກ​ຊີນບໍ່​ໄດ້​ເຈັບ​ປ່ວຍ​ຫຼາຍປານ​ໃດ ຕ່າງກັນ​ກັບ​ພວກ​ເດັກ
ນ້ອຍຜູ້ທີ່​ບໍ່​ໄດ້​ສັກກຢາວັກຊີ​ນ ຢູ່ໃນ​ຊຸມ​ຊົນ​ນັ້ນ. ປະສິດທິພາບ​ຂອງ​ຢາ​ວັກ​ຊີ​ນ ໂດຍ​ລວມ​ແລ້ວ ຢູ່​ໃນ​ກຸ່ມ ຜູ້​ມີ​ອາຍຸ​ຫຼາຍ ​ແລ້ວນັ້ນ ສຳ​ຫລັບ​ໃນ​ຈຸດ​ຕ່າງໆທັງ​ໝົດ ​ແມ່ນ 47 ​ເປີ​ເຊັນ ​ແລະ ​ໃນ​ກຸ່ມ​ທີ່​ມີ​ອາຍຸ​ນ້ອຍ ​ແມ່ນ 27 ເປີ​ເຊັນ.”

ຢາ​ວັກ​ຊີ​ນ RTS ແມ່ນປ້ອງ​ກັນ ບໍ່ໃຫ້ຕິດເຊື້ອກາ​ຝາກ​ມາລາ​ເຣຍ ​ບໍ່ໃຫ້ເຊື້ອນີ້ເຕີບ​ໃຫຍ່ ​
ແລະ ຂະຫາຍຕົວຢູ່​ໃນ​ຕັບ ຊຶ່ງ​ຫລັງຈາກນັ້ນຕາມ ປົກກະຕິ​ແລ້ວ ມັນ​ສາມາດ​ກັບ​ຄືນ​ເຂົ້າ​ໄປ​ໃນເລືອດອີກ ​ແລະຕິດ​ແປດ​ພວກເມັດ​ເລືອດ​ແດງ ທີ່​ນຳ​ໄປ​ສູ່​ການ​ເປັນ​ພະຍາດນັ້ນ​ເອງ.

ປະຊາຊົນຈຳນວນນຶ່ງ ​ໄດ້​ພາກັນຕ້ອນຮັບ ການ​ລິ​ເລີ້ມ​ສັກຢາ​ວັກ​ຊີ​ນ​ດັ່ງກ່າວ​ນີ້.

ທ້າວ Jepheth Mume ​ເວົ້າວ່າ “ພວກ​ແມ່ຍິງ​ທີ່​ຕັ້ງຄັນ ​ແລະ ພ້ອມ​ດ້ວຍ​ພວກ​ເດັກ
ນ້ອຍ ​ແລະ ພວກທາຫລົກ​ ທີ່​ຍັງ​ບໍ່​ທັນ​ເກີດ ພວກ​ເຂົາ​ເຫຼົ່ານີ້ ຕາຍ​ຍ້ອນ​ມາລາ​ເຣຍ
ສະ​ນັ້ນ ຂ້ອຍ​ຄິດ​ວ່າ ການລິເລີ້ມຊັກຢາ​ວັກ​ຊີ​ນນີ້ ຈະ​ຊ່ອຍຮັກສາ​ຊີວິດ​ຂອງພວກ
ເດັກນ້ອຍຫຼາຍໆຄົນ​ໄດ້.”

ສ່ວນ​ນາງ Mercy Adhiambo ​ເວົ້າ​ວ່າ “​ແມ່ນ​ແຕ່​ຂ້ອຍ​ເອງ ຂ້ອຍ​ຈະ​ໃຊ້​ມັນ ​ແມ່ນ​ແຕ່ ຄອບຄົວ​ຂອງ​ຂ້ອຍ ກໍຈະ​ໃຊ້​ມັນ ​ແລະພວກ​ເຮົາ​ຍອມ ຮັບ​ກ່ຽວກັບເລື່ອງນີ້.”

ອິງ​ຕາມ​ບັນດາ​ນັກຄົ້ນຄວ້າ​ແລ້ວ ຢາ​ວັກ​ຊີ​ນ ອາດ​ບໍ່​ເປັນ​ຄຳ​ຕອບ​ອັນ​ສຸດ​ທ້າຍ ສຳ​ຫລັບໂຣກ
ມາລາ​ເຣຍ ​ແຕ່​ພ້ອມ​ກັນ​ກັບມາດຕາ​ການ​ອື່ນໆ ຄື ມຸ້ງ​ກັນ​ຍຸງ ສະ​ເປ​ໃສ່​ລະບົບຮ່ອງລະບາຍ ນ້ຳ ​ແລະການ​ຕັດ​ພຸ່ມ​ໄມ້ ​ອອກ ​ອາດ​ເຮັດ​ໃຫ້​ມີ​ຄວາມ​ແຕກ​ຕ່າງ ໃນທາງທີ່ດີຂຶ້ນ ສຳ​ຫລັບ​ຫຼາຍລ້ານ​ຄົນ ຢູ່​ໃນເຂດ​ໃຕ້​ທະ​ເລ​ຊາຍ​ຊາ​ຮາຣາຂອງ​ອາ​ຟຣິກາ.

XS
SM
MD
LG