ຢາທີ່ປະສົມຂຶ້ນມາໃໝ່ໄດ້ຖືກພັດທະນາຂຶ້ນເພື່ອຮັກສາຄູ່ປໍລະປັກເກົ່າ, ໂລກໄຂ້ມາເລເຣຍ, ເຊິ່ງໂຣກທີ່ໄດ້ເຮັດໃຫ້ຄົນຕິດເຊື້ອຫຼາຍກວ່າ 200 ລ້ານຄົນຕໍ່ປີ ແລະ ເຮັດໃຫ້ 500,000 ຄົນໃນຈຳນວນດັ່ງກ່າວເສຍຊີວິດ. ຢານີ້ຈະທຳລາຍທາດໂປຣທີນອັນຕະລາຍ ທີ່ສຳຄັນສຳລັບການຢູ່ລອດຂອງເຊື້ອກາຝາກມາເລເຣຍ.
ນັກຂ່າວຂອງ ວີໂອເອ Jessica Berman ມີລາຍງານ ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານ.
ສານປະກອບ ທີ່ເອີ້ນວ່າ DSM265 ແມ່ນຢາປະເພດໃໝ່ທຳອິດທີ່ຄິດຄົ້ນຂຶ້ນມາ ເພື່ອຮັກສາ ໄຂ້ມາເລເຣຍ. ບັນດານັກຄົ້ນຄວ້າກ່າວວ່າ ມັນອາດຈະເປັນປະເພດຢາຮັກສາກິນເມັດດຽວ ຊະນິດທຳອິດທີ່ໃຊ້ປິ່ນ ປົວເຊື້ອໂຣກໜຶ່ງທີ່ຮ້າຍແຮງເຖິງຊີວິດທີ່ສຸດໃນໂລກ.
ຢາ DSM265 ມີຈຸດໝາຍແນໃສ່ທາດໂປຣທີນ ທີ່ເຊື້ອກາຝາກມາເລເຣຍຕ້ອງການເພື່ອສືບພັນຕໍ່ອີກ. ຖ້າປາສະຈາກທາດໂປຣທີນນີ້, ເຊື້ອກາຝາກ ຈະບໍ່ສາມາດສືບຕໍ່ຕິດແປດໃສ່ຜູ້ຄົນ ໄດ້.
ຢານີ້ເຮັດໜ້າທີ່ທຳລາຍເຊື້ອກາຝາກໃນທຸກຂັ້ນຕອນ ທີ່ຍາກແກ່ການຮັກສາ, ຈາກເຊລສືບພັນຊຶ່ງມີຂະໜາດນ້ອຍຫຼາຍ ທີ່ເຂົ້າໄປໃນຮ່າງ ກາຍຜ່ານການຖືກຍຸງກັດ, ໄປຫາຂັ້ນຕອນຂອງຕັບ, ບ່ອນທີ່ໂຕອ່ອນຖືກບົ່ມລ້ຽງ, ແລະ ໃນທີ່ສຸດກໍຕິດເຊື້ອໃສ່ການໝູນວຽນຂອງເມັດເລືອດແດງນັບລ້ານ.
ທ່ານ ປຣາດີບ ຣາທາດ ແມ່ນສາສະດາຈານດ້ານເຄມີທີ່ມະຫາວິທະ ຍາໄລ ວໍຊິງຕັນ, ເຊິ່ງເປັນສ່ວນໜຶ່ງໃນທີມງານນັກຄົ້ນຄວ້າສາກົນລວມມີທັງໝົດ ຈາກ 20 ສະຖາບັນ ທີ່ໄດ້ຄົ້ນພົບຢາ DSM265.
ທ່ານ ໄດ້ກ່າວວ່າ ການສຶກສາເບື້ອງຕົ້ນໄດ້ສະແດງໃຫ້ເຫັນວ່າ ຢານີ້ ແມ່ນໄດ້ຜົນຫຼາຍຕໍ່ກັບການທຳລາຍເຊື້ອກາຝາກທີ່ແຜ່ເຂົ້າໄປໃນເມັດເລືອດແດງ. ການທົດສອບອື່ນໆກໍເຕັມໄປດ້ວຍຄວາມຫວັງເຊັ່ນກັນ.
ທ່ານ ປຣາດີບ ກ່າວວ່າ “ແລະການສຶກສາໄດ້ສະແດງໃຫ້ເຫັນວ່າຢາແມ່ນໄດ້ຜົນດີຫຼາຍຕໍ່ກັບການຕິດເຊື້ອຂັ້ນຕອນອື່ນເຊັ່ນກັນດ້ວຍ. ແລະ ດັ່ງນັ້ນມັນກໍສາມາດຖືກນຳໃຊ້ເພື່ອປ້ອງກັນໂຣກ, ມັນສາມາດໃຊ້ໃນກັບບໍລິເວນ ທີ່ຄາດວ່າ ຄົນຈະຖືກຍຸງກັດ ແລະ ຖືກຕິດເຊື້ອ, ດັ່ງນັ້ນພວກເຮົາຈຶ່ງກຳຈັດເຊື້ອກາຝາກ ໃນຂະນະທີ່ມັນຍັງຢູ່ໃນຂັ້ນຕອນຕົ້ນໆກ່ອນທີ່ມັນຈະໄປປະກົດຢູ່ໃນເລືອດ.”
ມັນເປັນເວລາຫຼາຍປີຕັ້ງແຕ່ຢາຕ້ານໄຂ້ມາເລເຣຍປະເພດໃໝ່ໄດ້ຮັບການປັບປຸງແກ້ໄຂໃຫ້ດີຂຶ້ນ. ຈົນຮອດປະຈຸບັນ, ຢາໃໝ່ຫຼ້າສຸດນີ້, ແມ່ນທາງເລືອກອື່ນຂອງສານປະກອບເກົ່າທີ່ ໄດ້ ຖືກຄົ້ນພົບຫຼາຍສິບປີມາແລ້ວ. ຫຼາຍສາຍພັນຂອງເຊື້ອກາຝາກມາເລເຣຍ ທີ່ທົນທານຕໍ່ຢານັ້ນແມ່ນໄດ້ຖືກລາຍງານຢູ່ໃນພາກພື້ນເອເຊຍຕາເວັນອອກສຽງໃຕ້.
DSM ໝາຍເຖິງ “Dallas-Seattle-Melbourne,” ເປັນຊື່ຂອງສາມ ນະຄອນໃຫຍ່ ທີ່ເປັນບ້ານຂອງບັນດານັກຄົ້ນຄວ້າແນວໜ້າ, ຜູ້ທີ່ໄດ້ທຳການທົດລອງ ຫຼາຍຮ້ອຍໂມເລກຸນ ກ່ອນທີ່ຈະມາຮອດການທົດລອງຄັ້ງທີ 265 ຂອງຢາຊະນິດໃໝ່ ທີ່ໄດ້ຜົນຫຼາຍທີ່ສຸດຕໍ່ການຍັບຢັ້ງເຊື້ອ ກາຝາກຂອງມາເລເຣຍ.
ທ່ານ ຣາທາດ ກ່າວວ່າ ຂະບວນການທີ່ໄດ້ໃຊ້ໃນການຄົ້ນພົບຢາ DSM265 ມື້ໃດມື້ໜຶ່ງອາດຈະນຳໄປສູ່ການຄົ້ນພົບຢາຕ້ານມາເລເຣຍ ທີ່ໄດ້ຜົນດີກວ່ານີ້ອີກຫຼາຍເທົ່າ.
ທ່ານ ຣາທາດ ກ່າວວ່າ “ພວກເຮົາເລີ່ມເກັ່ງຂຶ້ນແລ້ວ ແລະ ພວກເຮົາກໍສາມາດສ້າງໄດ້ຫຼາຍ ໂມເລກຸນ ຕື່ມອີກ. ແລະ ບາງຄົນກໍເວົ້າວ່າ ຖ້າເຈົ້າສາມາດສ້າງຢາຕ້ານໄຂ້ມາເລເຣຍທີ່ມີປະສິດທິພາບດີແທ້ໆ ມີຄວາມປອດໄພໃນທຸກໆ 5 ຫຼື 10 ປີ, ແລະ ໃນຂະນະທີ່ຫຼາຍປະເທດແມ່ນກຳລັງພັດທະນາຢ່າງປະຢັດມັດທະຍັດ, ສິ່ງທີ່ໄດ້ເວົ້າມານີ້ຈະຫາຈຸດໜຶ່ຶງໃຫ້ພວກເຮົາ ເຊິ່ງພວກເຮົາຕ້ອງຢຸດເປັນຫ່ວງກ່ຽວກັບໂຣກດັ່ງ ກ່າວນີ້. ນັ້ນແມ່ນຄວາມຝັນອັນຍິ່ງໃຫຍ່ຂອງພວກເຮົາ.”
ຢາຕ້ານເຊື້ອມາເລເຣຍ DSM265 ໄດ້ມີການພິມເຜີຍແຜ່ຢູ່ໃນນິຕະຍາສານ Science Translational Medicine.
ຕອນນີ້ການທົດລອງຢາໃນຂັ້ນຕົ້ນທີ່ໂຮງໝໍແມ່ນກຳລັງດຳເນີນຢູ່ ແລະ ຄາດວ່າໃນໄວໆນີ້ກໍຈະມີຫຼາຍເພີ່ມຂຶ້ນອີກ.
