ລິ້ງ ສຳຫລັບເຂົ້າຫາ

logo-print

ອົງ​ການ​ນາ​ຊາ ປະ​ກາດ​ວ່າ ໂຄງ​ການ​ອາ​ວະ​ກາດ​ ສຳ​ລັບ​ເອກ​ກະ​ຊົນ ແມ່ນ​ຈະ​ມີ​ຂຶ້ນ​ໃນ​ໄວໆ​ນີ້


ນັກ​ທີ່ອງ​ທ່ຽວ ພາ​ກັນ​ຖ່າຍ​ຮູບ​ກັບ​ກັບ​ປ້າຍ​ຂອງ​ອົງ​ການ​ນາ​ຊາ ​ທີ່​ສະ​ຖາ​ນີ​ອາ​ວະ​ກາດ Kennedy Space Center, ​ເມືອງ Cape Canaveral, ລັດ ຟ​ລິ​ຣີ​ດາ.

​ຜູ້​ໃດກໍ​ຕາມທີ່ເຄີຍໄຝ່ຝັນຢາກເປັນ​ນັກ​ບິນອາ​ວະ​ກາດແຕ່ຕອນ​ຍັງນ້ອຍ ເມື່ອໃຫຍ່
​ຂຶ້ນ​ມາກໍ​ໄດ້​ຄອງ​ຄອຍຖ້າໂອ​ກາດດ້ວຍ​ໃຈ​ຈົດ​ຈໍ່ ທີ່ຈະ​ໄດ້ຫລຽວ​ເບິ່ງ​ໂລກອັນ​ເຫຼື້ອມໆ​
ຂອງ​ພວກ​ເຮົາ ຢູ່ເທິງ​ອະ​ວະ​ກາດ. ດຽວ​ນີ້ ມີ​ການ​ປ່ຽນ​ແປງ​ຢ່າງ​ໜ້າ​ເຫລືອ​ເຊື່ອ,
ອົງ​ການ​ນາ​ຊາຂອງ​ສະ​ຫະ​ລັດ ໄດ້​ຕົກ​ລົງ​ອະ​ນຸ​ຍາດໃຫ້​ບຸກ​ຄົນ​ທົ່ວ​ໄປ ໃຊ້​ເວ​ລາ​ຢູ່
​ໃນ​ສະ​ຖາ​ນີ​ອາ​ລະ​ກາດ​ນາໆ​ຊາດໄດ້ແລ້ວ. ແຕ່ວ່າ​ ມັນ​ກໍ​ມີຄ່າ​ໃຊ້​ຈ່າຍ​ທີ່ບໍ່​ຖືກ​ເລີຍ.
ນັກ​ຂ່າວ​ຂອງວີ​ໂອ​ເອ Kevin Enochs ມີ​ລາຍ​ງານ​ກ່ຽວ​ກັບ​ເລື້ອງນີ້ ຊຶ່ງ​ວັນ​ນະ​ສອນ
​ຈະ​ນຳລາຍ​ລະ​ອຽດ ມາ​ສະ​ເໜີ​ທ່ານ ໃນ​ອັນ​ດັບ​ຕໍ່​ໄປ.

ໃນ​ກອງ​ປະ​ຊຸມ​ຖະ​ແຫຼງ​ຂ່າວ​ທີ່ມີ​ຄວາມເປັນ​ໄປ​ໄດ້​ຫລາຍນັ້ນ, ອົງ​ການ​ນາ​ຊາຂອງ​
ສະ​ຫະ​ລັດໄດ້​ປະ​ກາດ​ຂ່າວໃຫຍ່ລະດັບ​ໂລກອັນ​ນີ້.

ທ່ານ Jeff Dewitt,ຫົວ​ໜ້າເຈົ້າ​ໜ້າ​ທີ່ການ​ເງິນ​ຂອງ​ອົງ​ການ​ນາ​ຊາ (NASA) ກ່າວ​ວ່າ:
“​ອົງ​ການ​ນາ​ຊາແມ່ນ​ໄດ້​ເປີດ​ສະ​ຖາ​ນີ​ອະ​ວະ​ກາດສາ​ກົນໃຫ້ມີ​ໂອ​ກາດທາງ​ດ້ານ
​ການ​ຄ້າ ແລະທຳ​ການ​ຕະ​ຫຼາດໂຄ​ສະ​ນະ​ໃຫ້​ຄົນ​ຮູ້​ກ່ຽວ​ກັບ​ໂອ​ກາດ​ເຫລົ່າ​ນີ້
ໃນ​ຂະ​ນະ​ທີ່​ ພວກ​ເຮົາບໍ່​ເຄີຍ​ເຮັດ​ແບບ​ນີ້​ມາ​ກ່ອນ. ພວກ​ເຮົາ​ກຳ​ລັງ​ປະ​ກາດ
ໃຫ້​ນັກ​ອະວະ​ກາດສ່ວນບຸກ​ຄົນ ສາ​ມາດ​ໄປ​ຢ້ຽມ​ສະ​ຖາ​ນີ​ອະ​ວະ​ກາດ​ສາ​ກົນ
ໂດຍ​ໃຊ້​ຍານ​ອະ​ວະ​ກາດ​ຂອງ​ສະ​ຫະ​ລັດ ແລະໃຫ້​ພວກ​ບໍ​ລິ​ສັດເຮັດ​ກິດ​ຈະ​ກຳ​
ຕ່າງໆ ທາງ​ການ​ຄ້າ​ຢູ່ທີ່ສະ​ຖາ​ນີ​ອະ​ວະ​ກາດສາ​ກົນ​ເພື່ອ​ຫາ​ຜົນ​ກຳ​ໄລໄດ້.

ໃນໄລ​ຍະ​ໃດ​ນຶ່ງ​ຂອງ​ປີ 2020 ຈະ​ມາ​ເຖິງນີ້ອົງ​ການ​ນາ​ຊາຄາດ​ຫວັງວ່າ ​ຈະ​ເລີ້ມ
​ອະ​ນຸ​ຍາດ​ໃຫ້​ນັກ​ບິນ​ອະວະ​ກາດທີ່​ເປັນ​ສ່ວນ​ບຸກ​ຄົນສອງ​ທ່ານຕໍ່​ປີທີ່​ຈະຖືກ ເອົາ​ບິນ
​ຈາກ​ໂລກ​ມະ​ນຸດຂຶ້ນ​ໄປ ແລະໃຊ້​ເວ​ລາ​ປະ​ມານ 30 ມື້ ຢູ່​ໃນ​ຍານ​ອາ​ວະ​ກາດ
ເພື່ອ​ຢ້ຽມ​ຊົມ​ສະ​ຖາ​ນີ​ອະ​ວະ​ກາດ​ສາ​ກົນຫລື​ ISS.

​ມັນ​ຈະ​ເປັນ​ການ​ປະ​ຢັດເງິນໄດ້​ຫລາຍສຳ​ລັບ​ອົງ​ການ​ນາ​ຊາ, ແຕ່​ວ່າ ມັນ​ຈະ​ຕ້ອງ
​ໃຊ້​ເງິນ​ຈຳ​ນວນ​ເປັນ​ລ້ານໆ​ໂດ​ລາ ສຳ​ລັບ​ນັກ​ບິນ​ອາ​ວະ​ກາດ​ທີ່ມີ​ຄວາມ​ປາດ​ຖະ​ໜາ
ຢາກ​ເຮັດ​ເຊັ່ນ​ນັ້ນ.

ພາບຈາກອົງການນາຊາ ທີ່ສະແດງໃຫ້ເຫັນຂະບວນບັນທຸກສຳ​ພາ​ລະ ໃນຂະນະທີ່ ໄປຮອດໄປເຖິງ ສະຖານີອາວະກາດນາໆຊາດ, 13 ທັນວາ 2016.
ພາບຈາກອົງການນາຊາ ທີ່ສະແດງໃຫ້ເຫັນຂະບວນບັນທຸກສຳ​ພາ​ລະ ໃນຂະນະທີ່ ໄປຮອດໄປເຖິງ ສະຖານີອາວະກາດນາໆຊາດ, 13 ທັນວາ 2016.

ທ່ານ Jeff Dewitt ກ່າວເພີ້ມ​ຕື່ມ​ວ່າ “ເມື່ອ​ພວກ​ເຂົາ​ເຈົ້າ​ໄປ​ຮອດ​ສະຖາ​ນີ​ອະ​ວະ​ກາດ
ສາ​ກົນແລ້ວ, ມັນ​ຈະຕ້ອງ​ມີ​ຄ່າ​ໃຊ້​ຈ່າຍ​ສຳ​ລັບ​ສະຖາ​ນີ​ດັ່ງ​ກ່າວ…ມັນ​ແບບ​ວ່າ…
ຖ້າ​ຫາກ​ທ່ານ​ຄິດເບິ່ງ​ລາ​ຄາ​ແລ້ວ ແລະ​ທ່ານ​ບວກມັນ​ເຂົ້າເປັນ​ຄ່າໃຊ້​ຈ່າຍ​ທັງ​ໝົດ,
ມັນ​ກໍຈະ​ເປັນ​ປະ​ມານ 35 ພັນໂດ​ລາຕໍ່​ຄືນ ສຳ​ລັບ​ນັກ​ບິນ​ອາ​ວະ​ກາດ ຄົນ​ນຶ່ງ ແຕ່​ວ່າ
ມັນ​ບໍ່​ໄດ້ມີ​ການ​ສະ​ສົມ​ຄະ​ແນນເພື່ອ​ເອົາ​ລາງວັນ ຄື​ກັນ​ກັບໂຮງ​ແຮມ​ Hilton ຫຼື
Marriott ເລີຍ.”

ນອກ​ເໜືອ​ໄປ​ຈາກ​ຄ່າ​ໃຊ້​ຈ່າຍ​ຂອງ​ແຕ່​ລະ​ຄືນ​ແລ້ວ, ​ນັກ​ບິນ​ອາ​ວະ​ກາດ​ມີ​ຄວາມ​ປາດ​
ຖະ​ນາ​ນັ້ນ ຍັງ​ຕ້ອງ​ຈ່າຍໃຫ້​ບໍ​ລິ​ສັດ​ໂບ​ອິ້ງ​ແລະ Space X, ຊຶ່ງ​ເປັນ​ສອງ​ບໍ​ລິ​ສັດທີ່​ຈະ​
ອະ​ນຸ​ຍາດສະ​ໜອງ​ພາ​ຫະ​ນະ​ໃຫ້​ຄົນຂີ່​ໄປຫາ ISS ອີກ​ດ້ວຍ ແລະ ການ​ເຮັດ​ແນວນັ້ນ
ກໍ​ອາດຈະຍິ່ງມີ​ຄ່າ​ໃຊ້​ຈ່າຍເພີ້ມສູງ​ຂຶ້ນ​ອີກ.

ທ່ານ Jeff Dewitt ກ່າວຕໍ່​ວ່າ “ການຂີ່​ຍານຂຶ້ນ​ໄປ​ຮອດ​ທີ່​ນັ້ນ, ດັ່ງ​ທີ່ທ່ານ​ຊາບ ຢູ່​ດຽວ​ນີ້,
ພວກ​ເຮົາ​ຈ່າ​ຍປະ​ມານ 80 ລ້ານ​ໂດ​ລາຕໍ່ນຶ່ງບ່ອນ​ນັ່ງ ​ສຳ​ລັບ ນັກ​ບິນ​ອາ​ວະ​ກາດ​ຂອງ​
ພວກ​ເຮົາ​ເພື່ອ​ເດີນ​ທາງ​ໄປທີ່ນັ້ນ. ຖ້າ​ຫາກ​ທ່ານ​ຄິ​ດ​ສະ​ເລ່ຍ​ແລ້ວ ໂຄງ​ການ​ຂອງ​
ນັກ​ບິນທາງ​ການ​ຄ້າ, ​ລາ​ຄາ​ຂອງ​ພວກ​ເຮົ​າກໍ​ແມ່ນ​ແມ່ນ​ຫຼຸດ​ລົງມາ​ຫາປະ​ມານ 58 ລ້ານ​
ໂດ​ລາ ຕໍ່ບ່ອນ​ນັ່ງ. ສະ​ນັ້ນ ໃນ​ທາງ​ທິດ​ສະ​ດີ​ແລ້ວ, ນັກ​ບິນ​ອາ​ວະ​ກາດເອກ​ກະ​ຊົນ,
ຂ້າ​ພະ​ເຈົ້າ​ຄາດ​ວ່າ ລາ​ຄາ​ກໍ​ຄົງ​ຢູ່​ປະ​ມານລະ​ດັບ​ນັ້ນຫລະ.”

ຜູ້​ໃດ​ກໍ​ຕາມ​ທີ່​ມີ​ເງິນ ແລະ​ຮູ້​ສຶກ​ຢາກ​ຈະເຮັດ​ເຊັ່ນ​ນີ້ ຕ້ອງ​ໄດ້​ຜ່ານສິ່ງ​ທີ່​ເອີ້ນ​ວ່າ ກວດ​ກາ
​ເລື້ອງ​ສຸ​ຂະ​ພາບທີ່​ເຂັ້ມ​ງວດ​ສົມ​ຄວນ​ກ່ອນ.

ແຕ່​ອົງ​ການ​ນາ​ຊາເວົ້າ​ວ່າ, ປ່ອຍໂອ​ກາດ​ໃຫ້​ພວກ​ບໍ​ລິ​ສັດ​ເອກ​ກະ​ຊົນ ແລະ​ຜູ້​ຄົນບິນ​ໄປ
​ເຖິງອະ​ວະ​ກາດ ຈະ​ອະ​ນຸ​ຍາດ​ໃຫ້​ພວກ​ເຂົາ​ເຈົ້າສາ​ມາດເລີ້ມຊອກ​ຫາຂໍ້​ມູນຕ່າງໆກ່ຽວ​ກັບ
​ອະ​ວະ​ກາດເພີ້​ມ​ຂຶ້ນ​ໄປ​ອີກ.

ທ່ານ Bill Gerstenmaier ຈາກ​ຫ້ອງ​ການຊອກ​ຄົ້ນ​ຫາ​ແລະດຳ​ເນີນ​ການ​ຂອງອົງ​
ການ​ນາ​ຊາກ່າວ​ວ່າ “ມັນ​ສະ​ແດງ​ໃຫ້​ເຫັນ​ວ່າ ອົງ​ການ​ນາ​ຊາແມ່ນກຳ​ລັງຈະປ່ອຍ​
ແລະຢາກ​ເບິ່ງວ່າພາກ​ເອກ​ກະ​ຊົນສາ​ມາດ​ທີ່​ຄວບ​ຄຸມວົງ​ໂຄຈອນອະ​ວະ​ກາດຢູ່
​ເບື້ອງ​ລຸ່ມໄດ້​ຫລືບໍ່ ເມື່ອ​ເວ​ລາ​ຜ່ານ​ໄປ ແລະນັ້ນ​ຄືວິ​ໄສ​ທັດ​ທີ່ກວ້າງ​ໄກ​ຂອງ​ພວກ​ເຮົາ
​ທີ່​ຈະກ້າວ​ໄປໃນ​ຕໍ່​ໜ້າ.”

​ໂຄງ​ການ​ທັງ​ຫຼາຍ​ ເຊັ່ນ​ການເອົາ​ມະ​ນຸດກັບ​ຄືນ​ໄປ​ຍັງ​ດວງ​ເດືອນ ພາຍ​ໃນ​ປີ 2024 ແລະຈາກນັ້ນກໍ​ໄປ​ຍັງດາວ​ພະອັງຄານ.

ອ່ານ​ຂ່າວ​ນີ້​ເພີ້ມ​ຕື່ມ​ເປັນ​ພາ​ສາ​ອັງ​ກິດ

ຈຸບິນຂອງ SpaceX Crew Dragon ທີ່ເຫັນໃນພາບ, 03 ມີນາ 2019 ທີ່ມີຄວາມຍາວ 20 ແມັດ ຈາກສະຖານີອາວະກາດນາໆຊາດ ຮາໂມນີ.
ຈຸບິນຂອງ SpaceX Crew Dragon ທີ່ເຫັນໃນພາບ, 03 ມີນາ 2019 ທີ່ມີຄວາມຍາວ 20 ແມັດ ຈາກສະຖານີອາວະກາດນາໆຊາດ ຮາໂມນີ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG