ອີງຕາມການສຶກສາຄົ້ນຄວ້າ ທີ່ຫາກໍນຳອອກເຜີຍແຜ່ ໂດຍ
ອົງການອະວະກາດແຫ່ງຊາດຂອງສະຫະລັດ ຫຼື NASA ແລ້ວ
ພາກສ່ວນໃຫຍ່ໆ ຂອງແຜ່ນນ້ຳກ້ອນທີ່ຫຸ້ມຂົ້ວໂລກໃຕ້ ຫຼື
Antartica ແມ່ນກຳລັງລະ ລາຍຢ່າງວ່ອງໄວ. ບັນດານັກ
ວິທະຍາສາດກ່າວວ່າ ການສູນເສຍ ແຜ່ນນ້ຳກ້ອນຈາກ
ຂົ້ວໂລກໃຕ້ ແມ່ນດຳເນີນໄປຢ່າງຊ້າໆ ແຕ່ກໍເຮັດໃຫ້ ລະດັບ
ນ້ຳໃນມະຫາສະໝຸດຂອງໂລກ ສູງຂຶ້ນຢ່າງສະໝ່ຳສະເໝີ.
ຜູ້ສື່ຂ່າວວີໂອເອ George Putic ມີລາຍລະອຽດກ່ຽວກັບ
ເລື້ອງນີ້ ຊຶ່ງໄຊຈະເລີນສຸກ ຈະນຳມາສະເໜີທ່ານ ໃນອັນດັບຕໍ່ໄປ.
ບັນດາ ນັກວິທະຍາສາດ ກ່າວວ່າ ຍັງອີກພຽງບໍ່ເທົ່າໃດປີ ກ່ອນທີ່ແຜ່ນ ນ້ຳກ້ອນ Larsen B ທີ່ມີເນື້ອທີ່ກວ້າງເຖິງ 1,600 ຕາລາງກິໂລແມັດ ຈະແຕກອອກຈາກດິນໄປທັງໝົດ ແລະແຍກອອກເປັນພູນ້ຳກ້ອນຫຼາຍ ຮ້ອຍໜ່ວຍ ລົງສູ່ມະຫາສະໝຸດ.
ທ່ານ Ala Khazendar ຜູ້ນຳພາໃນການສຶກສາຄົ້ນຄວ້ານີ້ ກ່າວວ່າ ສອງສ່ວນສາມຂອງ ແຜ່ນນ້ຳກ້ອນທີ່ມີອາຍຸໄດ້ 10,000 ປີ ແມ່ນໄດ້ລະລາຍໄປໝົດແລ້ວ.
ທ່ານ Khazendar ເວົ້າວ່າ “ອັນນີ້ ມັນເປັນສິ່ງທີ່ຊີ້ໃຫ້ເຫັນຢ່າງຈະແຈ້ງ ຂອງການ
ປ່ຽນແປງອັນໃຫຍ່ຫລວງ ຊຶ່ງກຳລັງເກີດຂຶ້ນ ຢູ່ໃນແຫລມຂົ້ວໂລກໃຕ້ ແລະ ບ່ອນ
ອື່ນໆໃນເຂດແອນຕາກຕິກາ.”
ແຜ່ນນ້ຳກ້ອນ ແມ່ນແທ່ງນ້ຳກ້ອນຍັກ ທີ່ແຂງກ້າມເກາະຕິດຢູ່ທາງຂອບທະວີບຂົ້ວໂລກໃຕ້
ຊຶ່ງໄດ້ຮັບການໜຸນໄວ້ ໂດຍນ້ຳທະເລ ຢູ່ເບື້ອງລຸ່ມ. ສ່ວນແທ່ງທີ່ໃຫຍ່ທີ່ສຸດຂອງແຜ່ນນ້ຳ
ກ້ອນນີ້ ແມ່ນໃຫຍ່ເກືອບເທົ່າກັບປະເທດຝຣັ່ງ.
ທ່ານ Khazendar ກ່າວວ່າ ແຜ່ນນ້ຳກ້ອນ ຫຼື glacier 3 ແຜ່ນທີ່ສະໜອງນ້ຳກ້ອນໃຫ້ແກ່
ແຜ່ນນ້ຳກ້ອນ Larsen B ດັ່ງກ່າວ ແມ່ນກຳລັງບາງລົງ ແລະ ກຳລັງໄວຂຶ້ນ.
ທ່ານ Khazendar ເວົ້າວ່າ “ຈາກການສຶກສາຄົ້ນຄວ້າຂອງພວກເຮົາ ດຽວນີ້ ພວກ
ເຮົາຮູ້ຈັກວ່າ ພວກແຜ່ນນ້ຳກ້ອນເຫຼົ່ານີ້ ແມ່ນພວມໄຫລໄວຂຶ້ນກວ່າເກົ່າ ແລະມີທ່າ
ທາງວ່າ ແຜ່ນນ້ຳກ້ອນເຫຼົ່ານີ້ ໄດ້ເຮັດໃຫ້ນ້ຳກ້ອນໄຫລລົງ ສູ່ມະຫາສະໝຸດຫຼາຍຂຶ້ນ.”
ດ້ວຍການນຳໃຊ້ພວກອຸປະກອນ ອັນທັນສະໄໝທາງອາກາດ ທີ່ລວມທັງ ເຄື່ອງເຣດາ ບັນດານັກວິທະຍາສາດ ໄດ້ສັງເກດເຫັນວ່າ ມີຮອຍແຕກໃໝ່ ຢູ່ແຜ່ນນ້ຳກ້ອນດັ່ງກ່າວ
ທີ່ບໍ່ເຄີຍເຫັນມາກ່ອນ ເວລາ ທີ່ພວກເຂົາເຈົ້າ ໄດ້ນຳສະເໜີການຄົ້ນຄວ້າ ເມື່ອເກົ້າເດືອນກ່ອນ.
ທ່ານ Khazendar ເວົ້າວ່າ “ດັ່ງນັ້ນ ມັນກຳລັງເກີດຂຶ້ນຢ່າງວ່ອງໄວ ແລະ ມັນເປັນ
ເລື້ອງຂອງເວລາ ພຽງບໍ່ເທົ່າໃດປີຕໍ່ໜ້ານີ້.”
ບົດສຶກສາຄົ້ນຄວ້າດັ່ງກ່າວ ໄດ້ຖືກພິມລົງໃນ ວາລະສານ Earth and Planetary Science Letters.
