ລິ້ງ ສຳຫລັບເຂົ້າຫາ

ເຂດລົງທຶນ ຕ່າງປະເທດ ກໍ່ໃຫ້ເກີດ ມີການຍຶດເອົາດິນ ໃນມຽນມາ


ຕະຫລາດອະສັງຫາລິມມະ​ຊັບ ຂອງປະເທດມຽນມາ ກຳລັງ
ຈະເລີນງອກງາມ ແຕ່ກໍມີການຈົ່ມທຸກຫຼາຍຂຶ້ນ ກ່ຽວກັບການ
ຍຶດເອົາທີ່ດິນ ຈາກພວກຜູ້ຄົນ ຜູ້ທີ່ກ່າວວ່າ ເຂົາເຈົ້າຖືກຂັບໄລ່
ອອກຈາກທີ່ດິນຂອງເຂົາເຈົ້າ ແບບຜິດກົດໝາຍ ແລະ ເຮັດໃຫ້
ເຂົາເຈົ້າບໍ່ໄດ້ຮັບກຳໄລຢ່າງຫລວງຫຼາຍນັ້ນ. ຜູ້ສື່ຂ່າວວີໂອເອ
Steve Sanford ມີລາຍງານ ຈາກນະຄອນຢ້າງກຸ້ງ ບ່ອນທີ່ເຂດ
ພັດທະນາອຸສາຫະກຳ ບໍ່ໄກປານໃດ ອອກໄປຈາກເມືອງດັ່ງກ່າວ
ພວມກາຍມາເປັນຈຸດພ້ອມແລ້ວ ທີ່ຈະລະເບີດ ຂອງບັນຫາຂັດ
ແຍ້ງກ່ຽວກັບເລື່ອງດິນ. ໄຊຈະເລີນສຸກ ຈະນຳລາຍລະອຽດ ມາ
ສະເໜີທ່ານ ໃນອັນດັບຕໍ່ໄປ.

ຮ່ອງຮອຍຂອງການພັດທະນາ ຢູ່ໃນນະຄອນຢ້າງກຸ້ງ ແມ່ນເປັນການຢືນຢັນ ເຖິງເປົ້າໝາຍ ຂອງລັດຖະບານ ໃນການເປີດກວ້າງປະເທດ ຮັບເອົາການ​ລົງທຶນ ຂອງພວກນັກທຸລະກິດ
ນາໆຊາດ.

ແຕ່ອ້ອມແອ້ມບໍລິເວນ ເຂດເສດຖະກິດພິເສດ Thilawa ຊຶ່ງເປັນໂຄງ ການຮ່ວມລະຫວ່າງ
ມຽນມາ​ ແລະ ຍີ່ປຸ່ນ ສຳຫລັບບັນດາບໍລິສັດຜະລິດ ສິນຄ້າຂອງຕ່າງປະເທດ ກໍເກີດມີບັນຫາ ໂຕ້ຖຽງຂຶ້ນ.

ຊາວບ້ານຫຼາຍພັນ​ຄົນໃນເຂດທ້ອງຖິ່ນ ກ່າວ​ວ່າ ທະຫານໄດ້​ເລີ້ມຍຶດ​ເອົາໃບຕາ​ດິນ​ຂອງ​
ພວກ​ເຂົາ​ເຈົ້າ​ຢ່າງຜິດ​ກົດໝາຍ ເມື່ອ 20 ກວ່າປີ ຜ່ານມາ​ແລ້ວ ​ແລະເວລາ​ນີ້ ດິນ​ດອນ
ດັ່ງກ່າວ​ ​ໄດ້ມີ​ລາຄາແພງຂຶ້ນ ພວກ​ເຂົາ​ເຈົ້າຈຶ່ງເລີ້ມຂັບ​ໄລ່​ຊາວບ້ານອອກ​ໄປ.

ນາງ Saw Min ​ແມ່ນນຶ່ງ​ ຢູ່​ໃນ​ກຸ່ມ​ຊາວບ້ານ ​ທີ່​ກ່າວ​ວ່າ​ ພວກທະຫານໄດ້ຍຶດເອົາທີ່ດິນ
ປູກຝັງ ຂອງພວກເຂົາເຈົ້າຫຼາຍກວ່າ 320 ​ເຮັກ ຕາ.

ຄອບຄົວ​ຂອງ​ນາງ ໄດ້ຖືກບັງຄັບໃຫ້ຍ້າຍ ​ອອກ​ໄປ​ຢູ່​ຕູບ​ນ້ອຍ​ຫລັງນຶ່ງ ທີ່ຕັ້ງຢູ່ກົງກັນຂ້າມ​ກັບ​ດິນ​ຂອງ​ນາງ ຊຶ່ງ​ດຽວ​ນີ້​ດິນ​ດັ່ງກ່າວໄດ້​ກາຍ​ມາ​ເປັນຕຶກອາຄານຄອນໂດມູນຄ່າຫຼາຍໆ​ລ້ານ​ດອນ​ລາ. ​ໂດຍ​ທີ່​ບໍ່​ມີ​ບ່ອນ​ໃດ​ອີກ​ຈະ​ໄປແລ້ວ ນາງ​ໄດ້ພະຍາຍາມ ເຮັດທຸກວິທີທາງ ທີ່ຖືກຕ້ອງ​ຕາມກົດໝາຍ​ ​ເພື່ອ​ໃຫ້ໄດ້ຮັບເງິນ​ຊົດ​ເຊີຍ.

ນາງ ຊໍ ມີນ ​ເວົ້າວ່າ “ພວກ​ເຂົາ​ເຈົ້າອ້າງ​ວ່າ ພວກ​ເຮົາ​ບໍ່​ມີ​ໃບຕາດິນ ທີ່​ຖືກຕ້ອງຕາມ​ກົດໝາຍ ​ແລະ ພວກ​ເຂົາ​ເຈົ້າຈຶ່ງ​ກົດ​ດັນ​ພວກ​ເຮົາ​ໃຫ້​ອອກໄປຈາກທີ່​ນີ້ ​ໂດຍອອກຄຳ​ສັ່ງ ​ແລະໃບ​ແຈ້ງເຕືອນຕ່າງໆ. ຂ້ອຍ​ບໍ່​ສາມາດ ຍ້າຍ​ອອກ​ໄປ​ຈາກ​ທີ່​ນີ້ໄດ້ ​ເພາະ​ຂ້ອຍບໍ່​ມີ​ບ່ອນ​ໃດ ຊິ​ໄປຢູ່​. ດຽວ​ນີ້ ພວກ​ເຮົາ​ຍັງຕໍ່ສູ້​ປົກ​ປ້ອງ​ດິນ​ດອນ​ຂອງ​ພວກ​ເຮົາ​ຢູ່ ​ໂດຍ​ສະແດງເອກະສານ​ກຳມະສິດ​ຕ່າງໆ ​ແລະສົ່ງ​ໜັງສື ​ໄປ​ຫາປະທານສະພາ ທ່ານ U Shwe Mann.”

​ເລື່ອງ​ລາວດັ່ງກ່າວນີ້ ​ແມ່ນ​ຄື​ກັນ ກັບອີກຫຼາຍໆພັນ​ຄົນ​.

ປະທານ​າທິບໍດີ Thein Sein ​ໄດ້​ໃຫ້​ຄຳ​ໝັ້ນສັນຍາ ທີ່​ຈະ​ທຳ​ການສືບ ສວນ​ສອບ​ສວນ ​ໃນ​ເລື້ອງ​ຂໍ້​ກ່າວ​ຫາ​ການຢຶດ​ເອົາ​ດິນ​ດອນ​ທັງ​ໝົດ ​ແຕ່ ບັນດາ​ກຸ່ມ​ປົກປ້ອງສິດທິ​ມະນຸດກ່າວ​ວ່າ ຄວາມ​ພະຍາຍາມຂອງລັດຖະ ບານ ​ບໍ່ໄດ້ເປັນໄປຕາມທີ່ໄດ້ໃຫ້ໄວ້. ພວກ​ເຂົ້າ​ເຈົ້າຮຽກຮ້ອງ​ໃຫ້ບັນດາ​ບໍລິສັດຕ່າງປະ​ເທດ ທີ່ລົງທຶນໃນ​ການ​ພັດທະນາ ​ຢູ່​ມຽນມານັ້ນ ​ໃຫ້​ເຮັດ​ໜ້າ​ທີ່ດີກວ່າເກົ່າ ​ໃນ​ການຕັດສິນໃຈກ່ຽວກັບເຈົ້າໜ້າທີ່ ທີ່​ຖືກຕ້ອງ ສຳ​ຫລັບ​ການ​ຊື້​ທີ່​ດິນ​.

​ໃນ​ຂະນະ​ດຽວກັນ ກົດໝາຍກ່ຽວກັບເລື່ອງ​ຊັບ​ສິນນັ້ນ ​ແມ່ນຍັງມີການ ປ່ຽນແປງຢູ່ຢ່າງ
ຕໍ່ເນື່ອງ ​ແລະໃນອະ​ນາດ​ຄົດ ກໍຍັງ​ບໍ່​ມີ​ຄວາມ​ແນ່ນອນ​ເທື່ອ​ສຳຫລັບ​ຜູ້ຄົນ​ຄື​ກັບ ນາງ
Tamya Tay ທີ່ບໍ່ມີບ່ອນພັກພາອາໄສ ​ຍ້ອນການ​ສ້າງສາທີ່​ພວມຂະ​ຫຍາ​ຍຕົວ​ນັ້ນ.

ນາງ Tamya Tay ​ເວົ້າວ່າ “ຖ້າຂ້ອຍບໍ່​ໄດ້​ຮັບ​ເງິນ​ຊົດ​ເຊີຍ​ແລ້ວ ຂ້ອຍບໍ່​ຮູ້​ວ່າ ຈະຮຽກ ຮ້ອງ​ເອົາ​ມັນ​ແບບໃດ. ຂ້ອຍ​ບໍ່​ມີ​ຜົວ ຂ້ອຍຍັງ​ບໍ່​ເຂົ້າ​ໃຈຫຼາຍຢ່າງກ່ຽວ​ກັບ​ກົດໝາຍ ​ແລະ ສິດທາງດ້ານ​ກົດໝາຍຂອງ​ຂ້ອຍ. ຂ້ອຍ​ຫວັງ​ວ່າ ຂ້ອຍ​ຈະ​ໄດ້​ຮັບ​ເງິນ​ຊົດ​ເຊີຍ ​ເວ​ລາ​ເພື່ອນ​ບ້ານ​ຄົນອື່ນໆ ​ໄດ້​ຮັບ​ມັນ.”

ຜູ້ນຳ​ຊຸມ​ຊົນ ທ່ານ Makon Suha ທີ່​ກ່າວ​ວ່າ ທ່ານ​ສູນເສຍທີ່ດິນ ​ເກືອບ 20 ​ເຮັກຕາ ໃຫ້ແກ່​ເຂດ​ເສດຖະກິດ​ນັ້ນ​ແມ່ນກຳລັງຊຸກຍູ້​ໃຫ້​ສະມາຊິກ​ສະພາ ນຳ​ເອົາ​ຄຳ​ຮ້ອງທຸກ​ຂອງ​ພວກ​ເຂົາ​ເຈົ້າ ໄປສະ​ເໜີ​ຕໍ່ ຄະນະ​ກຳມະການ ສືບສວນ​ສອບ​ສວນ ເລື່ອງດິນ​ປູກຝັງ.

​ແຕ່​ເຖິງ​ແມ່ນ​ວ່າ​ ປະທານາທິບໍດີ ​ໄ​ດ້​ໃຫ້​ຄຳ​ໝັ້ນ​ສັນຍາ ທີ່​ຈະຈ່າຍເງິນ​ຊົດ​ເຊີຍກໍ່ຕາມ ຊາວ​ບ້ານ​ກ່າວ​ວ່າ ພວກ​ເຂົາ​ເຈົ້າ ກໍ່​ຍັງ​ມີ​ຄວາມ​ຮູ້ສຶກ​ບໍ່​ດີ​ເລີຍ ວ່າ​ພວກ​ເຂົາ​ເຈົ້າ ຈະ​ໄດ້​ຮັບ​ເງິນຊົດ​ເຊີຍສຳ​ຫລັບ​ດິນ​ດອນ​ຂອງ​ເຂົາ​ເຈົ້າ ທີ່​ພວກ​ເຂົາ​ໄດ້​ປູກຝັງ​ ເພື່ອທຳມາຫາກິນ ເປັນ​ເວລາ
ຫຼາຍທົດ ສະວັດ​ມາ​ແລ້ວນັ້ນ.

ທ່ານ Makon Suha ​ເວົ້າວ່າ “ຂ້ອຍ​ບໍ່ເຂົ້າ​ໃຈ​ກ່ຽວ​ກັບກົດໝາຍ ກຳ ມະສິດທີ່​ດິນ​
​ແລະ ສິດໃນການໃຫ້ເຊົ່າ​ດິນຕ່າງໆ​ເຫຼົ່ານັ້ນ ດ້ວຍ​ເຫດນີ້ ພວກເຂົາ​ເຈົ້າຈຶ່ງ​ສໍ້​ໂກງ
ພວກ​ເຮົາ​ໄດ້ ​ຕາມ​ຄວາມ​ປາດ​ຖະໜາ​ຂອງເຂົາ​ເຈົ້າ. ພວກ​ເຮົາ​ເປັນຊາວ​ມຽນມາ​
ທຳ​ມະ​ດາສາມັນ ທີ່​ກຳລັງ​ທຸກທໍລະ ມານ​ຢ່າງ​ໜັກ. ມີ​ແຕ່​ພວກ​ລູກ​ນ້ອງ​ ຂອງ​
ລັດຖະບານທະຫານມຽນມາ ​ເທົ່າ​ນັ້ນ ທີ່​ມີ​ໂອກາດ​ດີໆ ຢູ່​ນະ​ທີ່​ນີ້.”

ໃນຂະນະທີ່ການ​ພັດທະນາ​ແລະການ​ລົງທຶນ​ຈາກ​ຕ່າງປະ​ເທດ ເພີ້ມຂຶ້ນ ​ຢ່າງ​ວ່ອງ​ໄວຢູ່​ໃນ​ມຽນມານັ້ນ ກໍລະນີ​ຂອງ​ການ​ຍຶດ​ເອົາ​ດິນ​ທັງຫຼາຍ ຈຶ່ງ ​ເປັນ​ການ​ທົດ​ສອບ​ວ່າ ນະ​ໂຍບາຍ​ເສດຖະກິດ​ຕ່າງໆ​ ຂອງ​ລັດຖະບານ ​ແມ່ນ​ເພື່ອຈະເຮັດໃຫ້ ລາຍ​ຮັບ​ຂອງ​ປະຊາຊົນ​ສ່ວນ
ຫຼາຍ ສູງຂຶ້ນ ຫຼືພຽງ​ແຕ່ ສອງ-ສາມຄົນເທົ່ານັ້ນລ້ຳລວຍ.

XS
SM
MD
LG