ລິ້ງ ສຳຫລັບເຂົ້າຫາ

ວັນສຸກ, 30 ກັນຍາ 2022

ຕົວເມືອງຕ່າງໆຂອງ ມຽນມາ ຈັດການນັດຢຸດງານທີ່ມິດງຽບ ເພື່ອລະນຶກເຖິງວັນຄົບຮອບນຶ່ງປີ ຂອງການກໍ່ລັດຖະປະຫານ


ຖະໜົນສາຍຫຼັກເປົ່າຫວ່າງໃນນະຄອນ ແມນດາເລ, ພາກກາງຂອງ ມຽນມາ, 1 ກຸມພາ 2022.

ຖະໜົນຫົນທາງໃນບັນດາຕົວເມືອງທີ່ສຳຄັນທົ່ວປະເທດ ມຽນມາ ແມ່ນເປົ່າຫວ່າງ ໃນຂະນະທີ່ປະຊາຊົນໄດ້ເຊື່ອຟັງການຮຽກຮ້ອງເພື່ອປະຕິບັດ “ການນັດຢຸດງານທີ່ມິດງຽບ” ໃນວັນອັງຄານວານນີ້ ເພື່ອລະນຶກເຖິງວັນຄົບຮອບນຶ່ງປີຂອງການໂຄ່ນລົ້ມ ລັດຖະບານພົນລະເຮືອນຂອງທ່ານນາງ ອອງ ຊານ ຊູ ຈີ ໂດຍທະຫານ.

ບັນດານັກເຄື່ອນໄຫວໄດ້ຮຽກຮ້ອງປະຊາຊົນໃນທົ່ວປະເທດໃຫ້ຢູ່ບ້ານ ແລະ ປິດທຸລະກິດຂອງເຂົາເຈົ້າເເພື່ອປະທ້ວງການກໍ່ລັດຖະປະຫານ. ພວກຜູ້ນຳລັດຖະ ບານທະຫານໄດ້ຂົ່ມຂູ່ທີ່ຈະຍຶດທຸລະກິດຕ່າງໆ ແລະ ຈັບກຸມຄົນຜູ້ໃດທີ່ເຜີຍແຜ່ຂໍ້ມູນ ກ່ຽວກັບ ການນັດຢຸດງານນັ້ນ. ອົງການຂ່າວ AP ໄດ້ກ່າວວ່າຢ່າງໜ້ອຍປະຊາຊົນ 58 ຄົນໃນທົ່ວ ມຽນມາ ໄດ້ຖືກຈັບນັບຕັ້ງແຕ່ອາທິດທີ່ຜ່ານມາ ຫຼັງ ຈາກໄດ້ລົງຂໍ້ຄວາມໃນ ເຟສບຸກ ວ່າຮ້ານ ແລະ ທຸລະກິດຂອງເຂົາເຈົ້າຈະປິດໃນວັນອັງຄານວານນີ້, ອີງຕາມລາຍງານຈາກໜັງສືພິມລາຍວັນ Myanmar Alinn ທີ່ດຳເນີນການໂດຍລັດຖະບານ.

ການຍຶດອຳນາດຂອງທະຫານໃນວັນທີ 1 ກຸມພາ 2021, ໄດ້ກັກຂັງທ່ານນາງ ຊູ ຈີ, ຜູ້ນຳລັດຖະ ບານພົນລະເຮືອນທີ່ແທ້ຈິງ, ແລະ ບັນດາເຈົ້າໜ້າທີ່ລະດັບສູງອື່ນໆ, ໂດຍອ້າງວ່າມີການສໍ້ໂກງຢ່າງກວ້າງຂວາງໃນການເລືອກຕັ້ງທົ່ວໄປເມື່ອເດືອນພະຈິກທີ່ຜ່ານມາ, ເຊິ່ງພັກສັນນິບາດແຫ່ງ​ຊາດເພື່ອປະຊາທິປະໄຕຂອງທ່ານນາງ ຊູ ຈີ ໄດ້ຊະນະ ພັກສະຫະພັນສາມັກຄີ ແລະ ການພັດທະນາ ທີ່ໄດ້ຮັບການໜູນຫຼັງໂດຍທະຫານຢ່າງຖ້ວມລົ້ນ.

ໃນວັນຈັນທີ່ຜ່ານມາ, ຜູ້ນຳລັດຖະບານທະຫານ ນາຍພົນ ມິນ ອອງ ແລງ ໄດ້ຕໍ່ເວລາຂອງພາວະສຸກເສີນໃນປັດຈຸບັນທີ່ຖືກກຳນົດ ຫຼັງຈາກການກໍ່ລັດຖະປະ ຫານ ໃນປີກາຍນີ້ອອກໄປອີກ 6 ເດືອນ.

ກຸ່ມນັກເຄື່ອນໄຫວອິດສະຫຼະຊື່ວ່າ ສະມາຄົມການຊ່ວຍເຫຼືອນັກໂທດການເມືອງ, ໄດ້ກ່າວວ່າຢ່າງໜ້ອຍ 1,500 ຄົນໄດ້ຖືກຂ້າຕາຍໃນຄວາມຮຸນແຮງຕໍ່ລະບອບການປົກຄອງທະຫານ ນັບຕັ້ງແຕ່ການກໍ່ລັດຖະປະຫານວັນທີ 1 ກຸມພາ 2021.

ເອກອັກຄະລັດຖະທູດ ສະຫະລັດ ປະຈຳອົງການສະຫະປະຊາຊາດ ທ່ານນາງ ລິນດາ ທອມມັສ ກຣີນຟີລດ໌ (Linda Thomas Greenfield) ໄດ້ກ່າວໃນຖະແຫຼງການສະບັບນຶ່ງໃນວັນອັງຄານວານນີ້ວ່າ “ພວກເຮົາເຫັນການລະເມີດສິດທິມະນຸດ ແລະ ການລ່ວງລະເມີດຕ່າງໆຂອງລະບອບການປົກຄອງນັ້ນເພີ່ມຂຶ້ນ, ພ້ອມກັບວິກິດການດ້ານມະນຸດສະທຳຮ້າຍແຮງຍິ່ງຂຶ້ນ.”

ທ່ານນາງໄດ້ກ່າວວ່າ ສະຫະລັດ ໄດ້ “ດຳເນີນການປະຕິບັດການຫຼາຍຢ່າງ” ກັບອົງການສະຫະປະຊາຊາດ ເພື່ອແກ້ໄຂບັນຫາ ມຽນມາ, ລວມທັງກົດດັນລັດຖະບານທະຫານ “ໃຫ້ຢຸດການເຄື່ອນໄປໃນທິດທາງທີ່ກົງກັນຂ້າມ ແລະ ກັບໄປສູ່ເສັ້ນທາງຂອງປະຊາທິປະໄຕ.”

ອ່ານຂ່າວນີ້ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG