ລິ້ງ ສຳຫລັບເຂົ້າຫາ

ວັນຈັນ, ໒໗ ພຶດສະພາ ໒໐໒໔

ພາບຖ່າຍ ບ່ອນທີ່ ຍານອາວະກາດ ຂອງ ຢູໂຣບຕົກ ເທິງດາວພະອັງຄານ


ນີ້ແມ່ນບ່ອນ ທີ່ເຊື່ອກັນວ່າ ຍານອາວະກາດ Schiaparelli ຕົກ ຈາກພາບຖ່າຍໂດຍຍານ Mars Reconnaissance Orbiter ຂອງອົງການນາຊາ.
ນີ້ແມ່ນບ່ອນ ທີ່ເຊື່ອກັນວ່າ ຍານອາວະກາດ Schiaparelli ຕົກ ຈາກພາບຖ່າຍໂດຍຍານ Mars Reconnaissance Orbiter ຂອງອົງການນາຊາ.

ອົງການ​ອາວະ​ກາດ​ຢູ​ໂຣບ ຫລື ESA ກ່າວ​ວ່າ ຕົນ​ໄດ້​ພົບ​ເຫັນ​ບ່ອນ​ຕົກ​ຂອງ ຍານ​ອາວະ​ກາດ Schiaparelli ​ແລ້ວ ​ຢູ່່ເທິງດາວພະ​ອັງຄານ.

ຫົວໜ້າ​ປະຕິບັດ​ງານຄວບ​ຄຸມການບິນ ExoMars ທ່າ​ນ Michael Denis ກ່າວ​ວ່າ “ຂ້າພ​ະ​ເຈົ້າ​ເຊື່ອ​ວ່າ​ພວກ​ເຮົາ​ໄດ້​ພົບ​ເຫັນ ບ່ອນ​ທີ່​ຍານ​ອາ​ວະ​ກາດ Schiaparelli ​ໄດ້ຕົກ. ນີ້​ບໍ່​ແມ່ນ​ການ​ລົງຈອດແບບ​ລາບ​ລື່ນ​ດັ່ງ​ທີ່​ພວກ​ເຮົາຢາກ ຈະ​ເຫັນ ເພາະ​ວ່າຂັ້ນຕອນສຸດ​ທ້າ​ຍ ຂອງ​ການລົງຈອດ ​ແລະການ​ລົງສູ່​ພື້ນຜິວ​ບໍ່​ໄດ້ເປັນ​ໄປແບບ​ປົກ​ກະຕິ.

ທ່ານ​ກ່າວ​ເພີ້​ມອີກ​ວ່າ ຫລາຍ​ພາກສ່ວນຂອງ​ການ​ລົງຈອດ​ໄດ້ເປັນ​ໄປ​ຕາມ​ແຜ​ນ ​ແຕ່​ວ່າ​ “ຈ້ອງ​ໄດ້​ພື່ງອອກ​ໄວ​ເກີນ​ໄປ” ​ແລະ​ເຄື່ອງ​ຈັກ​ທີ່​ໄດ້​ອອກ​ແບບ​ຊ່ວຍ​ເຮັດ​ໃຫ້​ຍານອາ​ວະ​ກາດຊ້າ​ລົງ ​ໄດ້​ຕິດ​ຂຶ້ນ​ບໍ່​ເທົ່າ​ໃດ​ວິນາທີ ຊຶ່ງທ່ານ​ກ່າວ​ວ່າ “ບໍ່​ໄດ້ຊ່ວຍ​ຫຍັງ​ຫຼາຍ”

ທ່ານ​ກ່າວ​ວ່າ “ຕາມ​ຄວາມ​ຈິງ​ແລ້​ວ ຍານ​ອາ​ວະ​ກາດ Schiaparelli ​ໄດ້​ລົງ​ສູ່​ພື້ນ​ຜິວພ້ອມ ດ້ວຍ​ໄວ​ທີ່​ໄວ​ກວ່າຄວນຈະ​ເປັນ ຫລາຍ​ຮ້ອຍ​ກິ​ໂລ​ແມັດ​ຕໍ່​ຊົ່ວ​ໂມງ ​ແລະບໍ່​ເປັນ​ຈັ່ງ​ໂຊກ ຫລັງ​ຈາກ​ນັ້ນແນ່ນອນມັນ​ໄດ້​ຖືກ​ທຳລາຍ​ຈາກ​ການ​ກະທົບ.

ຍານ Schiaparelli ໂຄຈອນ ເຂົ້າໄປໃກ້ໆ ດາວພະອັງຄານ
ຍານ Schiaparelli ໂຄຈອນ ເຂົ້າໄປໃກ້ໆ ດາວພະອັງຄານ

ທ່ານ Denis ກ່າວ​ວ່າ ຍານ​ອາ​ວະ​ກາດໄດ້​ຕົກລົງ​ໃສ່​ພື້ນຜິວ ​ໃກ້​ກັບບ່ອນ​ທີ່ໄດ້ ວາງ​ແຜນ​ໃຫ້​ລົງ​ຈອດທີ່​ອຳນວຍໃຫ້ຍານ​ສັງ​ເກດ​ການ MRO ຂອງອົງ NASA ສາມາດຖ່າຍຮູບ​ເອົາບ່ອນ​ຕົກ​ໄດ້.

ຮອຍ​ດຳປະມານ 15 ​ແມັດຄູນ 40 ​ແມັດ ​ໄດ້​ແນມ​ເຫັນ ​ຢູ່ໃນ​ຮູບຂອງ MRO. ບ່ອນ​ທີ່​ຕົກ​ນີ້​ ແມ່ນປະມານ​ແປດ​ກິ​ໂລ​ແມັດ ຢູ່​ທາງ​ກ້ຳ​ຕາ​ເວັນ​ຕົກ​ຂອງຈຸດ​ວາງ​ແຜນ​ລົງ​ຈອດ ໃກ້​ກັບ​ເສັ້ນສູນ​ສຸດ​ຂອງ​ທົ່ງ​ຮາບພຽງດາວ​ພະ​ອັງຄານ.

ແຜນທີ່ ອົງການ NASA ສະແດງໃຫ້ເຫັນບ່ອນລົງຈອດຢູ່ເທິງດາວພະອັງຄານ.
ແຜນທີ່ ອົງການ NASA ສະແດງໃຫ້ເຫັນບ່ອນລົງຈອດຢູ່ເທິງດາວພະອັງຄານ.

ທ່ານ​ກ່າວ​ວ່າ “ຜູ້​ໃດ​ຜູ້​ນຶ່ງ​ສາມາດ​ແນມ​ເຫັນ​ຈ້ອງ​ຢ່າງ​ຈະ​ແຈ້ງ ທີ່​ຕົກລົງ​ຫຼັງ​ຈາກ​ ໄດ້​ປ່ອຍ ອອກ ​ໃນ​ບ່ອນ​ທີ່​ຖືກຕ້ອງ ​ແລະ​ບ່ອນທີ່​ຍານ​ອາ​ວະ​ກາດ Schiaparelli ຄວນ​ທີ່​ລົງ​ຈອດ​ຢ່າງ​ລາບ​ລື່ນ ​ແຕ່​ບໍ່​ເປັນ​ຈັ່ງ​ໂຊກ​ ບໍ່​ໄດ້​ລົງຈອດ​ຢ່າງ​ທີ່​ວ່າ ​ແຕ່​ວ່າ​ຜູ້​ໃດ​ຜູ້​ນຶ່ງ​ສາມາດແນມ ເຫັນ​ໄດ້​ຢ່າງ​ຈະ​ແຈ້ງ​ຢູ່​ໃນ​ຮູບ.”

ບັນດາ​ນັກວິ​ສະວະ​ກອນຂອງ​ອົງການ ESA ຍັງ​ສືບ​ຕ່ສຶກສາ​ເບິ່ງ​ຂໍ້​ມູນ​ເພື່ອ​ຊອກ​ຫາ​ເຫດ ຜົນຂອງສິ່ງ​ທີ່ພາ​ໃຫ້​ເກີດ​ຄວາມ​ຜິດພາດ.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG