ນາຍົກໄທບໍ່ເຫັນດີນໍາການ ລະເບີດແກ້ງຫີນໃນແມ່ນໍ້າຂອງ

07.06.2017

ກຸ່ມອະນຸລັກແມ່ນໍ້າປະທ້ວງການລະເບີດແກ້ງຫີນໃນແມ່ນໍ້າຂອງ ທີ່ອາດຈະສົ່ງຜົນກະທົບຕໍ່ຮ່ອງນໍ້າເລິກ ທີ່ເປັນເຂດແດນລະຫວ່າງລາວ-ໄທ ໃນແມ່ນໍ້າຂອງ.

ນາຍົກລັດຖະມົນຕີໄທຢືນຢັນວ່າ ການທີ່ລັດຖະບານໄທສະໜັບສະໜຸນແຜນການຂອງ
ລັດຖະບານຈີນ ໃນການຂະຫຍາຍເສັ້ນທາງເດີນເຮືອໃນແມ່ນໍ້າຂອງ ບໍ່ແມ່ນການຕົກລົງ
ໃຫ້ລະເບີດແກ້ງຫີນ ແຕ່ຢ່າງໃດ.

ເຊີນທ່າຮັບຟັງຂ່າວກ່ຽວກັບການລະເບີດແກ້ງຫີນ

ເນື່ອງຈາກກອງປະຊຸມລັດຖະບານໄທ ຊຶ່ງເປັນທານໂດຍພົນເອກ ປະຢຸດ ຈັນໂອຊາ
ນາຍົກລັດຖະມົນຕີ ແລະຫົວໜ້າຄະນະຮັກສາຄວາມສະຫງົບແຫ່ງຊາດໄທ ໄດ້ມີມະຕິ
ຕົກລົງ ໃຫ້ການສະໜັບສະໜຸນແຜນການຂອງລັດຖະບານຈີນກ່ຽວກັບການຂະຫຍາຍ
ເສັ້ນທາງເດີນເຮືອໃນແມ່ນໍ້າຂອງ ທີ່ເລີ້ມຈາກເຂດສິບສອງພັນນາຂອງຈີນ ເຂດສາມ
ຫລ່ຽມຄໍາ ໃນເຂດມຽນມາ-ລາວ-ໄທ ເພື່ອເຊື່ອມຕໍ່ໄປໃຫ້ເຖິງຫລວງພະບາງ ຕາມຂໍ້ຕົກ
ລົງລະຫວ່າງ 4 ປະເທດ ທີ່ໄດ້ລົງນາມຮ່ວມກັນ ນັບແຕ່ປີ 1992 ເປັນຕົ້ນມາແລ້ວນັ້ນ
ພົນເອກປະຢຸດ ໄດ້ໃຫ້ການຢືນຢັນວ່າ ຍັງບໍ່ແມ່ນການຕົກລົງໃຫ້ທໍາການລະເບີດເພື່ອ
ເຄື່ອນຍ້າຍແກ້ງຫີນອອກໄປຈາກເສັ້ນທາງເດີນເຮືອ ແຕ່ຢ່າງໃດ.

ທັງນີ້ ພົນເອກປະຢຸດ ໄດ້ອະທິບາຍວ່າ ເຖິງແມ່ນວ່າແກ້ງຫີນໃນແມ່ນໍ້າຂອງ ທີ່ຢູ່ໃນເຂດ
ແດນລະຫວ່າງລາວກັບໄທນັ້ນ ບໍ່ແມ່ນເຂດອະທິປະໄຕຂອງໄທ ແຕ່ເປັນເຂດອະທິປະໄຕ
ຂອງລາວ ຕາມທີ່ໄດ້ມີການກໍານົດ ໄວ້ໃນສົນທິສັນຍາ ລະຫວ່າງສະຫຍາມກັບຝຣັ່ງ ໃນ
ອະດີດກໍຕາມ ແຕ່ເນື່ອງຈາກວ່າ ແກ້ງຫີນທີ່ຈະຕ້ອງທໍາການລະເບີດເພື່ອເຄື່ອນຍ້າຍ
ມັນອອກໄປຈາກເສັ້ນທາງເດີນເຮືອນນັ້ນ ອາດຈະສົ່ງຜົນກະທົບຕໍ່ຮ່ອງນໍາເລິກ ທີ່ເປັນ
ເຂດແດນລະຫວ່າງລາວ-ໄທ ໃນແມ່ນໍ້າຂອງ ສະນັ້ນມັນຈຶ່ງເປັນບັນຫາທີ່ຈະຕ້ອງຮ່ວມ
ກັນສຶກສາ ສໍາຫລວດໃນໄລຍະຕໍ່ໄປ ດັ່ງທີ່ທ່ານໄດ້ຢືນຢັນວ່າ:

“ການລະເບີດແກ້ງແມ່ນໍ້າຂອງມະຕິ ຄຣມ (ມະຕິຄະນະລັດຖະມົນຕີ) ບອກວ່າ ໃຫ້ໄປ
ສຶກສາ ແລ້ວກໍໃຫ້ນໍາຂໍ້ມູນນີ້ໄປຊີ້ແຈງໃນທີ່ປະຊຸມກັນວ່າ ຖ້າເຂົາທໍາ ຈະທໍາຢ່າງໃດ
ຈະທໍາໄດ້ຫລືບໍ່ ສະມາຊິກເຫັນດີນໍາກັນໝົດ ຫລືບໍ່ ໃນດ້ານຂໍ້ມູນ ທີ່ເວົ້າເຖິງການການ
ຂະຫຍາຍເສັ້ນທາງເດີນເຮືອ ການຂົນສົ່ງສິນຄ້າໃນແມ່ນໍ້າຂອງ ມັນກໍຕ້ອງໄປຕໍ່ອີກວ່າ
ສະມາຊິກທັງໝົດ 4-5 ປະເທດເຫັນພ້ອມນໍາກັນໝົດຫລືບໍ່. ຖ້າເຫັນດີຢ່າງໃດແລ້ວ
ກໍຕ້ອງນໍາເອົາເລື່ອງເຂົ້າໄປຫາ ຄຣມ. ມັນຍັງໄປບໍ່ເຖິງຕອນນັ້ນເລີຍນະ ແລ້ວກໍຄົງ
ໄມ້ປ່ອຍໃຫ້ມັນເສຍຫາຍດອກ ແລະຂໍ້ທີ່ສໍາຄັນທຸກຄົນຮູ້ ຫລືຍັງວ່າ ເກາະແກ້ງກາງ
ແມ່ນໍ້າຂອງທັງໝົດບໍ່ແມ່ນຂອງໄທ. ສະນັ້ນ ການລະເບີດມັນກໍມີຜົນໃນເລື່ອງຂອງ
ຮ່ອງນໍ້າເລິກ ຊຶ່ງມັນເປັນເສັ້ນເຂດແດນ.”

ການຄັດຄ້ານຕໍ່ການລະເບີດແກ້ງຫີນໃນແມ່ນໍ້າຂອງ

ການເດີນເຮືອໃນແມ່ນໍ້າຂອງຕາມການຕົກລົງດັ່ງກ່າວ ແມ່ນປະກອບມີທ່າເຮືອ 14
ແຫ່ງດ້ວຍກັນ ຊຶ່ງແບ່ງເປັນ 4 ແຫ່ງໃນຈີນ, 6 ແຫ່ງໃນລາວ, 2 ແຫ່ງໃນມຽນມາ ແລະ 2
ແຫ່ງໃນໄທ. ແຕ່ວ່າການເດີນເຮືອກໍຍັງບໍ່ເຊື່ອມຕໍ່ໄປເຖິງທ່າເຮືອປາຍທາງ ທີ່ຫລວງ
ພະບາງຂອງລາວໄດ້ເລີຍ ເນື່ອງຈາກມີ ແກ້ງຫີນຂະໜາດໃຫຍ່ ທີ່ຂວາງກັ້ນເສັ້ນທາງ
ເດີນເຮືອ ທີ່ເປັນເຂດແດນໃນແມ່ນໍ້າຂອງ ລະຫວ່າງບໍ່ແກ້ວຂອງລາວ ກັບຈັງຫວັດຊຽງ
ຣາຍຂອງໄທ ທີ່ຈະຕ້ອງເຄື່ອນຍ້າຍດ້ວຍການລະເບີດເທົ່ານັ້ນ.

ຫາກແຕ່ວ່າ ກໍຍັງຖືກຄັດຄ້ານຈາກເຄືອຂ່າຍອະນຸລັກແມ່ນໍ້າໃນເຂດລຸ່ມແມ່ນໍ້າຂອງມາ
ໂດຍຕະຫລອດ ເພາະເກງວ່າຈະສົ່ງຜົນກະທົບຕໍ່ສິ່ງແວດລ້ອມທໍາມະຊາດ ແລະສັດນໍ້າ
ໃນເຂດດອນຕ່າງໆ ຂອງແມ່ນໍ້າຢ່າງຮຸນແຮງ ລວມທັງຜົນກະທົບຕໍ່ສະພາບຊີວິດການ
ເປັນຢູ່ປະຊາຊົນລາວ-ໄທຢູ່ 2 ຝັ່ງແມ່ນໍ້າຂອງອີກດ້ວຍ.

ນອກຈາກນັ້ນ ເຄືອຂ່າຍອະນຸລັກແມ່ນໍ້າໃນເຂດລຸ່ມແມ່ນໍ້າຂອງ ຍັງໄດ້ຄັດຄ້ານການສ້າງ
ເຂື່ອນໄຟຟ້າ ໃນແລວແມ່ນໍ້າຂອງໃນເຂດຂອງລາວອີກດ້ວຍ ເຊັ່ນໂຄງການເຂື່ອນໄຊ
ຍະບູລີ, ໂຄງການເຂື່ອນດອນສະຫົງ ແລະ ໂຄງການເຂື່ອນປາກແບງ ທີ່ກໍາລັງດໍາເນີນ
ການກໍ່ສ້າງຢູ່ໃນເວລານີ້.

ທາງດ້ານທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ຢືນຢັນວ່າໂຄງການ ຂື່ອນດອນສະ
ໂຫງ ມີຜົນກະທົບຕໍ່ສະພາບແວດລ້ອມທຳມະຊາດໃນລະດັບຕ່ຳ ແລະ ມີປະຊາຊົນພຽງ 14 ຄອບຄົວເທົ່ານັ້ນທີ່ຈະຖືກຍົກຍ້າຍອອກໄປຈາກ ເຂດກໍ່ສ້າງໂດຍກຸ່ມຜູ້ລົງທຶນໄດ້ປຸກເຮືອນຢູ່
ຢ່າງຖາວອນໃຫ້ ພ້ອມທັງສົ່ງເສີມ ວິຊາຊີບເພື່ອໃຫ້ປະຊາຊົນມີອາຊີບຄົງທີ່ ແລະມີລາຍຮັບທີ່
ໝັ້ນຄົງອີກດ້ວຍ.