ຜົນຜະລິດ ໃນອຸດສາຫະກຳຂຸດຄົ້ນແຮ່ທາດຂອງລາວ ເພີ້ມຂຶ້ນ 9.16 ເປີເຊັນ ໃນແຜນການປີ 2014-2015 ແຕ່ກໍມີລາຍຮັບລົດລົງ 4.56 ເປີເຊັນ ທຽບກັບແຜນການປີ 2013-2014 ເພາະລາຄາແຮ່ທາດຫຼຸດລົງເລື້ອຍໆ.
ທ່ານສົມດີ ດວງດີ ລັດຖະມົນຕີວ່າການ ກະຊວງແຜນການ ແລະ ການລົງທຶນ ຖະແຫລງ ຄາດໝາດຍວ່າ ໃນຕະຫຼອດແຜນການປະຈຳປີ 2014-2015 ທີ່ຈະສິ້ນສຸດລົງໃນທ້າຍເດືອນກັນຍາ 2015 ນີ້ ການຜະລິດພາກອຸດສາຫະກຳຂຸດຄົ້ນແຮ່ທາດ ຈະເພີ້ມຂຶ້ນ ໃນອັດຕາສະເລ່ຍ 9.16 ເປີເຊັນ ທຽບກັບແຜນການປີ 2013-2014 ໂດຍເປັນຜົນຜະລິດແຮ່ເງິນປະສົມຄຳເກືອບ 17,000 ໂຕນ ທອງຝຸ່ນ 183,034 ໂຕນ ທອງແຜ່ນ 46,000 ກວ່າໂຕນ ແລະ ແຮ່ທາດຊະນິດອື່ນໆ ອີກຈຳນວນໜຶ່ງ.
ໂດຍຜົນຜະລິດແຮ່ທາດດັ່ງກ່າວນີ້ ຄິດເປັນມູນຄ່າລວມ 6,504.55 ຕື້ກີບ ຫຼື ປະມານ 813 ລ້ານໂດລາ ຊຶ່ງຫຼຸດລົງຈາກແຜນການປີ 2013-2014 ໃນອັດຕາສະເລ່ຍ 4.56 ເປີເຊັນ ເນື່ອງຈາກວ່າ ລາຄາແຮ່ທາດ ໃນຕະຫຼາດໂລກໄດ້ລົດຕ່ຳລົງຢ່າງຕໍ່ເນື່ອງ ແລະ ປະກອບກັບຜົນຜະລິດແຮ່ຄຳ ໃນລາວ ກໍຫຼຸດລົງດ້ວຍ ຊຶ່ງກໍເປັນຜົນໂດຍກົງ ຈາກການທີ່ບໍ່ແຮ່ເຊໂປນຢູ່ເມືອງວີລະບູລີ ໃນເຂດແຂວງສະຫວັນນະເຂດນັ້ນ ບໍ່ມີແຮ່ຄຳເຫຼືອໃຫ້ຂຸດຄົ້ນອີກຕໍ່ໄປ ນັບແຕ່ທ້າຍປີ 2013 ເປັນຕົ້ນມາແລ້ວ.
ແຕ່ຢ່າງໃດກໍຕາມ ທ່ານສົມດີ ກໍໄດ້ຖະແຫລງຢືນຢັນວ່າ ສຳຫລັບໃນແຜນການປີ 2015-2016 ລັດຖະບານລາວ ກໍຈະສູ້ຊົນເຮັດໃຫ້ຜົນຜະລິດແຮ່ທາດມີມູນຄ່າລວມເຖິງ 11,000 ຕື້ກີບ ຫຼື ປະມານ 1,375 ລ້ານໂດລາ ໂດຍຈະຂຸດຄົ້ນແຮ່ເງິນປະສົມຄຳໃຫ້ໄດ້ເຖິງ 24,882 ໂຕນ ທັງແຜ່ນ 91,000 ໂຕນ ທອງຝຸ່ນ 353,250 ໂຕນຫິນກາວ 600,000 ໂຕນ ແລະ ແຮ່ໂປຣແຕັສ 200,000 ກວ່າໂຕນ.
ກ່ອນໜ້ານີ້ ກະຊວງພະລັງງານ ແລະ ບໍ່ແຮ່ ໄດ້ສະເໜີລາຍງານວ່າ ຜົນຜະລິດໃນພາກພະລັງງານ ແລະ ບໍ່ແຮ່ໄດ້ເພີ້ມຂຶ້ນ ໃນອັດຕາສະເລ່ຍ 8 ເປີເຊັນ ຕໍ່ປີໃນແຜນການປີ 2011-2015 ໂດຍມີມູນຄ່າເຖິງ 94,342.39 ຕື້ກີບ ຊຶ່ງຄິດເປັນ 12 ເປີເຊັນຂອງຍອດຜະລິດຕະພັນລວມພາຍໃນ (GDP) ແລະເພີ້ມຂຶ້ນ 9.22 ເປີເຊັນ ທຽບກັບແຜນ ການປີ 2006-2010 ທີ່ຜ່ານມາ ທັງກໍຍັງຄາດໝາຍດ້ວຍວ່າ ຜົນຜະລິດໃນພາກພະລົງງານ ແລະ ບໍ່ແຮ່ ຈະເພີ້ມຂຶ້ນເປັນ 20 ເປີເຊັນ ຂອງ GDP ໃນປີ 2020 ຖ້າຫາກວ່າ ສາມາດຮັກສາອັດຕາການຂະຫຍາຍຕົວໃຫ້ໄດ້ ໃນລະດັບ 12 ເປີເຊັນ ຕໍ່ປີໃນແຜນການປີ 2016-
2020 ໂດຍແບ່ງເປັນການຂະຫຍາຍຕົວ ຂອງຂະແໜງພະລັງງານ ໃນອັດຕາສະເລ່ຍ 15 ເປີເຊັນ ແລະ ຂະແໜງບໍ່ແຮ່ໃນອັດຕາສະເລ່ຍ 10 ເປີເຊັນ ຕໍ່ປີຕາມລຳດັບ.
ທາງດ້ານທ່ານສຸລິວົງ ດາລາວົງ ອະດີດລັດຖະມົນຕີວ່າການ ກະຊວງພະລັງງານ ແລະ ບໍ່ແຮ່ ຢືນຢັນວ່າ ການພັດທະນາພະລັງງານ ໃນລາວ ທີ່ສ່ວນໃຫຍ່ ເປັນການສ້າງເຂື່ອນໄຟຟ້າ ນັ້ນ ຖືເປັນພະລັງງານສະອາດ ສົ່ງຜົນກະທົບຕໍ່ສັງຄົມ ແລະ ສະພາບແວດລ້ອມທຳມະຊາດ ໃນລະດັບທີ່ຕ່ຳຫຼາຍ ທັງກໍຍັງຈະສົ່ງຜົນດີ ຕໍ່ການພັດທະນາເສດຖະກິດ ເພື່ອຍົກລະດັບ ຄຸນນະ ພາບຊີວິດການເປັນຢູ່ ຂອງປະຊາຊົນລາວ ໃຫ້ດີຂຶ້ນ ເທື່ອລະກ້າວອີກດ້ວຍ ດັ່ງທີ່ທ່ານສຸລິວົງ ໄດ້ເນັ້ນຢ້ຳວ່າ:
“ການພັດທະນາໄຟຟ້າຢູ່ ສປປ ລາວ ສ່ວນໃຫຍ່ ແມ່ນໄຟຟ້ານ້ຳຕົກ ຊຶ່ງຈັດເປັນພະລັງງານ ໃນກຸ່ມແຫຼ່ງພະລັງງານທີ່ສະອາດ ເປັນພະລັງງານທົດແທນໄດ້ ແລະ ມີຜົນກະທົບນ້ອຍ ຕໍ່ສິ່ງແດວລ້ອມທຳມະຊາດ ແລະ ສັງຄົມ ພ້ອມກັນນັ້ນ ພະລັງງານໄຟຟ້ານ້ຳຕົກ ຍັງປະກອບສ່ວນ ອັນໃຫຍ່ຫລວງຕໍ່ການພັດທະນາທ້ອງຖິ່ນຊົນນະບົດ ໄປໃນຕົວ ເປັນການປະກອບສ່ວນສ້າງລາຍຮັບແຫ່ງຊາດ ຈາກການຂາຍໄຟຟ້າ ແລະ ເປັນການຊ່ວຍໃຫ້ຂະແໜງການອື່ນໆ ໄດ້ຮັບການພັດທະນາອີກດ້ວຍ.”
ກະຊວງພະລັງງານ ແລະ ບໍ່ແຮ່ ໄດ້ວາງແຜນການ ຈະເພີ້ມຄວາມອາດສາມາດການຜະລິດພະລັງງານໄຟຟ້າ ຈາກ 3,200 ເມກາວັດ ໃນປັດຈຸບັນເປັນບໍ່ນ້ອຍກວ່າ 12,500 ເມກາວັດ ໃນປີ 2020 ຊຶ່ງຈະຕ້ອງດຳເນີນການກໍ່ສ້າງ ເຂື່ອນໄຟຟ້າຈຳນວນ 38 ໂຄງການ ແລະ ໂຮງ ງານໄຟຟ້າຖ່ານຫິນ 1 ໂຄງການ ຊຶ່ງໃນປັດຈຸບັນ ໂຮງງານໄຟຟ້າຫົງສາລິກໄນຕ໌ ຢູ່ໃນເຂດແຂວງໄຊຍະບູລີ ກໍໄດ້ເລີ້ມການຜະລິດກະແສໄຟຟ້າ ເພື່ອສົ່ງໄປຂາຍໃຫ້ການໄຟຟ້າຜະລິດແຫ່ງປະເທດໄທ ນັບແຕ່ເດືອນມິຖຸນາ ເປັນຕົ້ນມາແລ້ວ.
