ກະຊວງປ້ອງກັນປະເທດຂອງອັງກິດ ໃຫ້ເຫດຜົນວ່າ “ການເພີ້ມຂຶ້ນເມື່ອໄວໆມານີ້” ກ່ຽວກັບອຸບັດຕິເຫດທາງລົດໄຟ ຂອງຣັດເຊຍ ໃນເຂດຊາຍແດນຕິດກັບຢູເຄຣນ ແມ່ນເປັນ “ການກໍ່ວິນາດສະກຳຂອງພວກທີ່ບໍ່ຊາບຝ່າຍ.”
ໃນລາຍງານທີ່ນຳອອກເຜີຍແຜ່ທາງທວີດເຕີ້ ໃນວັນສຸກມື້ນີ້ ກະຊວງປ້ອງກັນປະເທດອັງກິດກ່າວວ່າ ການໂຈມຕີ “ແມ່ນເກືອບເປັນທີ່ແນ່ນອນ” ເປັນຜົນດີ “ໃນໄລຍະສັ້ນລົບກວນການເຄື່ອນຍ້າຍທາງລົດໄຟຂອງຣັດເຊຍຢູ່ໃນເຂດທ້ອງຖິ່ນ.”
ກອງພັນທະຫານຊ່າງທາງລົດໄຟຂອງຣັດເຊຍສາມາດສ້ອມແປງເພື່ອຟື້ນຟູທາງລົດໄຟດັ່ງກ່າວ ໄດ້ຢ່າງວ່ອງໄວ ກະຊວງປ້ອງກັນປະເທດກ່າວ. ແຕ່ແນວໃດກໍຕາມ ກຳລັງຮັກສາຄວາມປອດໄພພາຍໃນຂອງຣັດເຊຍ ຊຶ່ງໃນທີ່ສຸດ ຈະໄດ້ຮັບຄວາມກົດດັນເພີ້ມຂຶ້ນ ແລະ “ມີທ່າທາງວ່າຍັງຈະບໍ່ສາມາດປ້ອງກັນຕາໜ່າງທາງລົດໄຟ ໃນຂອບເຂດທີ່ກວ້າງຂວາງ ແລະມີຄວາມຫຼໍ່ແຫຼມຂອງຣັດເຊຍ ຈາກການໂຈມຕີໄດ້.
ໃນຂະນະດຽວກັນ ມີລາຍງານວ່າ ຢູເຄຣນໄດ້ຍິງໂດຣນຂອງຕົນລຳນຶ່ງຕົກ ທີ່ເກີດການຕິດຂັດທາງດ້ານເຄື່ອງຈັກ ຢູ່ໃນເຂດໃຈກາງນະຄອນຫຼວງກີຢິບໃນຕອນແລງວັນພະຫັດນີ້.
ລາຍງານໃນຂັ້ນຕົ້ນຂອງເຈົ້າໜ້າທີ່ລັດຖະບານເວົ້າວ່າ ເຮືອບິນບໍ່ມີຄົນຂັບບາຍຣັກຕາ TB2 ແມ່ນເປັນໂດຣນຂອງຝ່າຍສັດຕູ ແຕ່ຕໍ່ມາກອງທັບອາກາດເວົ້າວ່າ ມັນເປັນຂອງຝ່າຍລັດຖະບານ.
ກອງທັບອາກາດກ່າວຢູ່ໃນຖະແຫຼງການວ່າ ໂດຣນທີ່ຄວບຄຸມບໍ່ໄດ້ລຳດັ່ງກ່າວ ອາດຈະນຳໄປສູ່ “ຜົນຕິດຕາມມາທີ່ບໍ່ເພິ່ງປາຖະໜາ.”
ບໍ່ມີລາຍງານໃດໆ ກ່ຽວກັບການບາດເຈັບລົ້ມຕາຍ ຈາກການຍິງໂດຣນລຳດັ່ງກ່າວຕົກ.
ໃນຕອນເຊົ້າຂອງວັນພະຫັດ ປະທານາທິບໍດີຢູເຄຣນ ທ່ານໂວໂລດີເມຍ ເຊເລນສກີ ກ່າວວ່າ ທ່ານໝັ້ນໃຈວ່າ ປະທານາທິບໍດີຣັດເຊຍ ທ່ານວລາດີເມຍ ປູຕິນ ໃນທີ່ສຸດກໍຈະປະເຊີນກັບການດຳເນີນຄະດີໃນການກໍ່ອາຊະຍາກຳສົງຄາມ ຍ້ອນການຮຸກຮານຢູເຄຣນຂອງມົສກູ.
ໃນການກ່າວຄຳປາໄສ ຕໍ່ສານອາຍາສາກົນ ທີ່ນະຄອນເຮກ ປະທານາທິບໍດີເຊເລນສກີເວົ້າວ່າ “ມີແຕ່ອາຊະຍາກຳຂອງຣັດເຊຍອັນດຽວເທົ່ານັ້ນ ທີ່ນຳໄປສູ່ອາຊະຍາກຳທັງໝົດເຫຼົ່ານີ້: ນັ້ນກໍຄື ອາຊະຍາກຳໃນການຮຸກຮານ ການເລີ້ມຕົ້ນຂອງຜີມານ ແມ່ນຕົ້ນຕໍຂອງອາຊະຍາກຳ. ມັນຄວນຈະມີການຮັບຜິດຊອບຕໍ່ອາຊະຍາກຳອັນນີ້.
ສານອາຍາສາກົນ ໃນເດືອນມີນາຜ່ານມາໄດ້ອອກໝາຍຈັບທ່ານປູຕິນ ໃນຂໍ້ຫາກໍ່ອາຊະຍາກຳສົງຄາມ ທີ່ພົວພັນກັບເນລະເທດແລະສົ່ງເດັກນ້ອຍຢູເຄຣນໄປຣັດເຊຍ. ທ່ານເຊເລນສກີກ່າວວ່າ ທ່ານປູຕິນ “ຄວນໄດ້ຮັບການລົງໂທດເຫຼົ່ານີ້ ຢູ່ທີ່ນີ້ ນະຄອນຫຼວງຂອງກົດໝາຍລະຫວ່າງປະເທດ.”
“ແລະຂ້າພະເຈົ້າແນ່ໃຈວ່າ ພວກເຮົາຈະໄດ້ເຫັນສິ່ງນັ້ນເກີດຂຶ້ນ ເວລາພວກເຮົາຊະນະ. ແລະພວກເຮົາກໍຈະຊະນະ” ທ່ານເຊເລນສກີກ່າວ.
ສານອາຍາສາກົນ ບໍ່ສາມາດດຳເນີນຄະດີອາຊະຍາກຳ ໃນການເຮັດສົງຄາມຮຸກຮານດ້ວຍຕົວຂອງມັນເອງ. ແຕ່ທ່ານເຊເລນສກີໄດ້ຮ້ອງຂໍໃຫ້ເປີດສານພິເສດ ທີ່ສົມບູນແບບ ເພື່ອດຳເນີນຄະດີລົງໂທດຜູ້ກໍ່ອາຊະຍາກຳ.
ທ່ານກ່າວວ່າ “ຖ້າພວກເຮົາຕ້ອງການຄວາມຍຸຕິທຳອັນແທ້ຈິງ ພວກເຮົາບໍ່ຄວນຊອກຫາຂໍ້ອ້າງ ແລະບໍ່ຄວນອ້າງອີງເຖິງການຂາດຕົກບົກຜ່ອງຂອງກົດໝາຍລະຫວ່າງປະເທດທີ່ມີຢູ່ໃນປັດຈຸບັນ ແຕ່ເຮັດການຕັດສິນໃຈແບບກ້າຫານ ທີ່ຈະແກ້ໄຂການຂາດຕົກບົກຜ່ອງ ຊຶ່ງບໍ່ເປັນຈັ່ງໂຊກ ມີຢູ່ໃນກົດໝາຍລະຫວ່າງປະເທດ ນັ້ນ.”
ທ່ານເຊເລນສກີໄດ້ຖືກຕ້ອນຮັບຢູ່ຂ້າງນອກຕຶກສານອາຍາສາກົນ ໂດຍປະທານ ສານ ທ່ານພີອອດເຕີ ຮອຟມານສກີ (Piotr Hofmanski) ທີ່ເປັນຄົນໂປແລນ. ບັນດາພະນັກງານຂອງສານໄດ້ພາກັນສ່ອງເບິ່ງການໄປເຖິງ ຂອງທ່ານເຊເລນສກີຢູ່ທາງປ່ອງຢ້ຽມ ແລະການຊັກທຸງຊາດຢູເຄຣນຂຶ້ນສູ່ຫຼັກທຸງຄຽງຄູ່ກັບທຸງຂອງສານຢູ່ນອກຕຶກອາຄານ.
ສານອາຍາສາກົນກ່າວໃນຖະແຫຼງຂ່າວ ເມື່ອວັນທີ 18 ມີນາຜ່ານມານີ້ວ່າ ທ່ານປູຕິນ “ຖືກກ່າວຫາວ່າເປັນຜູ້ຮັບຜິດຊອບໃນການກໍ່ອາຊະຍາກຳສົງຄາມ ດ້ວຍການເນລະເທດແບບຜິດກົດໝາຍ (ພວກເດັກນ້ອຍ) ແລະການສົ່ງ (ພວກເດັກນ້ອຍ) ແບບຜິດກົດໝາຍ ຈາກເຂດຢຶດຄອງໃນຢູເຄຣນ ໄປຍັງສະຫະພັນຣັດເຊຍ.”
