ໂຄງການເຊື່ອມຕໍ່ທໍ່ສົ່ງນ້ຳມັນ ຈາກຫວຽດນາມ ມາລາວຈະເລີ້ມ
ລົງມືກໍ່ສ້າງໃນທ້າຍປີ 2015 ເພື່ອໃຫ້ແລ້ວສຳເລັດ ໃນທ້າຍປີ
2017 ໂດຍໄດ້ຮັບການສະໜັບສະໜຸນທຶນກູ້ຢືມ ຈາກຫວຽດນາມ
ແລະ ສະໂລວາເກຍ.
ການລົງນາມ ໃນບົດບັນທຶກຄວາມເຂົ້າໃຈ (MOU) ກ່ຽວກັບການດຳເນີນການສຶກສາ ຄວາມເປັນໄປໄດ້ຂອງໂຄງການທໍ່ສົ່ງນ້ຳມັນຈາກຫວຽດນາມ ເຂົ້າມາລາວ ຊຶ່ງເປັນການລົງນາມຮ່ວມກັນລະຫວ່າງທະນາຄານເພື່ອການລົງທຶນ ແລະການພັດທະນາແຫ່ງຫວຽດນາມ ກັບທະນາຄານເພື່ອການສົ່ງອອກ ແລະນຳເຂົ້າຂອງສະໂລວາເກຍນັ້ນ ໄດ້ມີຂຶ້ນຢ່າງເປັນທາງການ ໃນໂອກາດທີ່ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດ ການຜະລິດ ແລະການຈາລາຈອນ ໄດ້ເດີນທາງໄປຢ້ຽມຢາມປະເທດສະໂລວາເກຍ ເມື່ອກາງເດືອນພະຈິກນີ້.
ໂດຍພາຍໃຕ້ MOU ດັ່ງກ່າວ ທະນາຄານເພື່ອການສົ່ງອອກ ແລະນຳເຂົ້າຂອງສະໂລວາເກຍ ໄດ້ຕົກລົງທີ່ຈະໃຫ້ການສະໜັບສະໜຸນເງິນທຶນກູ້ຢືມ ໃນສັດສ່ວນ 85 ເປີເຊັນ ໃນຂະນະທີ່ທະນາຄານຂອງຫວຽດນາມ ກໍຈະສົມທົບໃນສັດສ່ວນ 15 ເປີເຊັນ ຂອງເງິນທຶນ ທີ່ຈະນຳໃຊ້ໃນໂຄງການທັງໝົດ ຄິດເປັນມູນຄ່າລວມ 200 ລ້ານດອນລາ ແລະ ຄາດວ່າພາຍຫຼັງຈາກການສຶກສາຄວາມເປັນໄປໄດ້ແລ້ວສຳເລັດ ກໍຈະສາມາດເລີ້ມລົງມືດຳເນີນການກໍ່ສ້າງໄດ້ນັບຈາກໄຕມາດທີ 4 ຂອງປີ 2015 ເປັນຕົ້ນໄປ ເພື່ອໃຫ້ແລ້ວສຳເລັດໃນທ້າຍປີ 2017 ເປັນຢ່າງຊ້າ.
ໂຄງການທໍ່ສົ່ງນ້ຳມັນ ຈາກຫວຽດນາມເຂົ້າມາລາວປະກອບດ້ວຍການກໍ່ສ້າງ ສາງເກັບນ້ຳມັນທີ່ທ່າເຮືອຮອນລາ ໃນແຂວງກວາງບິງ ຂອງຫວຽດນາມ 1 ແຫ່ງ ທີ່ສາມາດເກັບນ້ຳມັນໄດ້ເຖິງ 5 ແສນແມັດກ້ອນ ກັບອີກແຫ່ງໜຶ່ງ ຈະກໍ່ສ້າງຢູ່ໃນແຂວງຄຳມ່ວນຂອງລາວ ທີ່ສາມາດເກັບນ້ຳມັນໄດ້ເຖິງ 2 ແສນແມັນດກ້ອນ ສ່ວນທໍ່ສົ່ງນ້ຳມັນນັ້ນ ກໍຈະມີຄວາມຍາວລວມ 290 ກິໂລແມັດ ຊຶ່ງແບ່ງເປັນ 138 ກິໂລແມັດ ໃນເຂດຫວຽດນາມ ແລະ 152 ກິໂລແມັດໃນເຂດລາວ.
ສຳຫລັບກ່ຽວກັບເງິນທຶນ 200 ລ້ານດອນລາ ທີ່ເປັນການ
ປະກອບສ່ວນ ລະຫວ່າງທະນາຄານຂອງສະໂລວາເກຍ ກັບ
ທະນາຄານຂອງຫວຽດນາມ ໃນສັດສ່ວນ 85 ເປີເຊັນ ຕໍ່ 15
ເປີເຊັນ ດັ່ງກ່າວນັ້ນ ກໍຈະຖືເປັນເງິນທຶນກູ້ຢືມ 100 ເປີເຊັນ
ທີ່ທະນາຄານສະໂລວາເກຍ ແລະ ຫວຽດນາມ ໄດ້ຮ່ວມກັນ
ເປັນເຈົ້າໜີ້ ທີ່ລັດຖະບານລາວ ຈະຕ້ອງຊຳລະຄືນຕໍ່ໄປ.
ໂຄງການດັ່ງກ່າວນີ້ ຈະເຮັດໃຫ້ລາວປະຢັດຄ່າຂົນສົ່ງນ້ຳມັນ
ຈາກຕ່າງປະເທດເຂົ້າມາໃນລາວໄດ້ຢ່າງຫລວງຫຼາຍ ໃນແຕ່
ລະປີ ເນື່ອງຈາກວ່າລາວຕ້ອງນຳເຂົ້ານ້ຳມັນທັງ 100 ເປີເຊັນ
ຈາກຕ່າງປະເທດ ຫາກແຕ່ວ່າໄດ້ມີການສຳຫລວດພົບແຫລ່ງນ້ຳມັນ ແລະ ແກັສທຳມະຊາດໃນລາວ ໃນລະຍະຕໍ່ໄປ.
ໂດຍທ່ານຄຳຕັນ ວົງພັນສີປະເສີດ ຮອງຫົວໜ້າກົມບໍ່ແຮ່ ກະຊວງພະລັງງານແລະບໍ່ແຮ່ ໄດ້ໃຫ້ການຢືນຢັນກັບ ວີໂອເອ ວ່າການສຳຫລວດ ເພື່ອຊອກຫາແຫລ່ງນ້ຳມັນ ແລະ ແກັສທຳມະຊາດໃນລາວ ຍັງຄົງສືບຕໍ່ຢູ່ເລື້ອຍມາຈົນເຖິງທຸກມື້ນີ້ ໂດຍເຖິງແມ່ນວ່າ ການສຳຫລວດໃນລະຍະທີ່ຜ່ານມານັ້ນ ຈະຍັງບໍ່ພົບແຫລ່ງ ທີ່ມີຄວາມອາດສາມາດທີ່ກຸ້ມຄ່າສຳຫລັບການລົງທຶນກໍຕາມ.
ທັງນີ້ລັດຖະບານລາວ ໄດ້ອະນຸຍາດໃຫ້ບໍລິສັດ Salamander Energy ຈາກອັງກິດ ກັບ
ລັດວິສາຫະກິດນ້ຳມັນຂອງຫວຽດນາມ ເພື່ອໃຫ້ຮ່ວມກັນສຳຫລວດ ໃນເຂດແຂວງສາລະວັນ ຈຳປາສັກ ເຊກອງ ແລະ ອັດຕະປື ໂດຍສະເພາະແມ່ນຢູ່ທີ່ເຊບັ້ງນວນ ທີ່ເປັນເຂດຕິດຕໍ່ລະຫວ່າງ ແຂວງສາລະວັນ ກັບ ຈຳປາສັກ ນັ້ນຖືເປັນພື້ນທີ່ເປົ້າໝາຍສຳຄັນ ດັ່ງທີ່ທ່ານຄຳຕັນ ໄດ້ຢືນຢັນວ່າ:
“ບໍລິສັດ Salamander ນີ້ ສຳຫລວດແຕ່ສະຫະຫວັນນະເຂດ ໄປເຂົາຜາງ່ອນ ແລ້ວກະບໍລິສັດ Petro-Vietnam ເຂົາຈະສາມາດເຮັດຕອນລຸ່ມສິເຂົ້າຈຳປາສັກ ກັບ ສາລະວັນ ຊຶ່ງວ່າ ບໍລິສັດຂອງ Salamander ກໍຈະເຈາະທີ່ເຊບັ້ງນວນ ຢູ່ສາລະວັນ ແລ້ວຍັງບໍລິສັດ Petro-Vietnam ກຳລັງເຮັດການສຶກສາຢູ່ ຕາມແຜນການກະວ່າປີນີ້ ຈະເຈາະແຕ່ເນື່ອງຈາກວ່າຂໍ້ມູນທາງດ້ານທໍລະນີຟີສິກນັ້ນ ກໍກຳລັງເອົາຂໍ້ມູນໄປສຶກສາຢູ່ ແລະຕາມແຜນການນີ້ ປີໜ້າກໍຈະເຈາະ.”
ແຕ່ຢ່າງໃດກໍຕາມ ບໍລິສັດ Salamander Energy ກໍໄດ້ທຳການສຳຫລວດເພື່ອຄົ້ນຫາແຫລ່ງນ້ຳມັນ ແລະແກັສທຳມະຊາດ ໃນພື້ນທີ່ແຂວງສະຫວັນນະເຂດມາແລ້ວ ກ່ອນໜ້ານີ້ ຫາກແຕ່ວ່າກໍຍັງບໍ່ພົບແຫລ່ງທີ່ກຸ້ມຄ່າສຳຫລັບການລົງທຶນຂຸດຄົ້ນ ຈຶ່ງໄດ້ໂຈະການສຳຫລວດໃນແຂວງສະຫວັນນະເຂດ ໄວ້ຊົ່ວຄາວ ສ່ວນຈະມີການເລີ້ມດຳເນີນການສຳຫລວດອີກເທື່ອໃໝ່ເມື່ອໃດນັ້ນ ຍັງຄົງບໍ່ມີຄວາມຊັດເຈນ ແຕ່ກໍຄາດວ່າຈະມີຂຶ້ນຫຼັງຈາກການສຳຫລວດໃນແຂວງຈຳປາສັກ ແລະ ສາລະວັນ ໄດ້ຜົນຮັບຢ່າງຊັດເຈນແລ້ວ.
