ກອງປະຊຸມຄັ້ງທໍາອິດຂອງລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານໄດ້ເລີ່ມຂຶ້ນເມື່ອວັນທີ່ 9 ເດືອນພະຈິກ ແລະກໍຈະດໍາເນີນຕໍ່ໄປຈົນເຖິງວັນທີ່ 12 ເດືອນພະຈິກນີ້ຢູ່ທີ່ນະຄອນວຽງຈັນ ໂດຍມີບັນດາຜູ້ ຕ່າງໜ້າຂອງລັດຖະບານຈາກ 120 ກວ່າປະເທດແລະ 150 ກວ່າອົງການສາກົນຈໍານວນຫລາຍກວ່າ 1,000 ຄົນເຂົ້າຮ່ວມໃນກອງປະຊຸມຄັ້ງນີ້.
ໂດຍໃຫ້ກຽດເປັນປະທານໃນພິທີເປີດກອງປະຊຸມກໍແມ່ນທ່ານຈູມມະລີ ໄຊຍະສອນ ປະທານປະເທດລາວ ຊຶ່ງ ທ່ານໄດ້ກ່າວເນັ້ນຍໍ້າຕໍ່ບັນດາຜູ້ເຂົ້າຮ່ວມໃນກອງປະຊຸມໃນຕອນນຶ່ງວ່າ:
“ກອງປະຊຸມຄັ້ງທໍາອິດຂອງບັນດາລັດພາຄີສົນທິສັນຍາ OSLO ຄັ້ງນີ້ແມ່ນມີຄວາມໝາຍສໍາຄັນທາງປະຫວັດສາດຂອງປະຊາຄົມໂລກ ເພາະບັນດາທ່ານທີ່ເຂົ້າຈະໄດ້ພ້ອມກັນປຶກສາຫາລືແນໃສ່ກໍານົດທິດທາງໃນການຈັດ ຕັ້ງປະຕິບັດ ພ້ອມທັງການສ້າງກໄກການຕິດຕໍ່ເພື່ອຮັບປະກັນໃຫ້ສົນທິສັນຍາດັ່ງກ່າວຖືກຈັດຕັ້ງປະຕິບັດຢ່າງເຕັມສ່ວນແລະມີປະສິດທິຜົນແນໃສ່ເພື່ອເຮັດໃຫ້ໂລກເຮົາກ້າວໄປເຖິງຈໍາກັດລະເບີດຊະນິດນີ້ ບໍ່ໃຫ້ເຂັ່ນຂ້າທໍາລາຍຊີວິດຂອງປະຊາຊົນພົນລະເມືອງອີກຕໍ່ໄປ”
ກອງປະຊຸມດັ່ງກ່າວຖືກເປັນການປະຕິບັດຕາມສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານຫລືສົນທິ ສັນຍາ OSLO ທີ່ມີຜົນບັງຄັນໃຊ້ຢ່າງເປັນທາງການເມື່ອວັນທີ່ 1 ສິງຫາທີ່ຜ່ານມາຈຶ່ງເຮັດໃຫ້ຈະຕ້ອງມີການວາງທິດທາງ ການສ້າງຕັ້ງກົນໄກ ແລະມາດຕະການຕ່າງໆເພື່ອປະຕິບັດການ
ຕາມສົນທິສັນຍາໃຫ້ບັນລຸຕາມວັດຖຸປະສົງຢ່າງເປັນຮູບປະທໍາ
ໂດຍໄດ້ມີການພິດຈາລະນາຮັບຮອງເອົາເອກະສານສໍາຄັນ 4
ສະບັບ ກໍຄືຖະແຫລງການວຽງຈັນແຜນປະຕິບັດການວຽງຈັນ
ກ່ຽວກັບການຈັດຕັ້ງປະຕິບັດສົນທິສັນຍາຮູບແບບລາຍງານ
ການປະຕິບັດສົນທິສັນຍາ ແລະແຜນການປະຊຸມສໍາລັບລັດ
ພາຄີໃນປີ 2011.
ຍິ່ງໄປກວ່ານັ້ນ ກໍຍັງເຮັດໃຫ້ບັນດາຜູ້ເຂົ້າຮ່ວມໃນກອງປະຊຸມໄດ້ຮັບຮູ້ເຖິງບັນຫາລະເບີດບໍ່
ທັນແຕກທີ່ຕົກຄ້າງຢູ່ໃນລາວ ຊຶ່ງກໍຈະເຮັດໃຫ້ມີການຊ່ວຍເຫລືອລາວຫລາຍຂຶ້ນດ້ວຍ. ທັງນີ້
ໂດຍກ່ອນກອງປະຊຸມນຶ່ງວັນ ທາງການ ລາວກໍໄດ້ນໍາພາຄະນະຜູ້ຕາງໜ້າຈາກຕ່າງປະເທດ
200 ກວ່າຄົນເດີນທາງໄປຢ້ຽມຊົມການເກັບກູ້ລະເບີດບໍ່ທັນແຕກຢູ່ແຂວງຊຽງຂວາງ ຊຶ່ງເປັນ
ແຂວງນຶ່ງ ທີ່ໄດ້ຮັບຜົນກະທົບຈາກລະເບີດບໍ່ທັນແຕກຫລາຍທີ່ສຸດໃນລາວ.
ທັງນີ້ໂດຍນັບຈາກປີ 1996 ເປັນຕົ້ນມາ ອົງການເກັບກູ້ລະເບີດແຫ່ງຊາດລາວ (Lao UXO) ສາມາດເກັບກູ້ ແລະທໍາລາຍ UXO ໄປຫລາຍກວ່າ 11 ລ້ານໜ່ວຍ ໂດຍເປັນການເກັບກູ້ UXO ອອກໄປຈາກພື້ນທີ່ກວ້າງ 25,000 ເຮັກຕ້າ ຊຶ່ງໃນນີ້ເປັນພື້ນທີ່ການກະເສດກວ້າງກວ່າ 17,000 ເຮັກຕ້າ ສ່ວນທີ່ເຫລືອກໍເປັນພື້ນທີ່ສໍາລັບຢູ່ອາໃສ ແລະໂຄງການພັດທະນາຕ່າງໆຫາກແຕ່ກໍຄິດເປັນສັດສ່ວນພຽງບໍ່ເຖິງ 1% ຂອງພື້ນທີ່ແລະຈໍານວນ UXO ທີ່ຕົກຄ້າງ
ຢູຸ່ໃນລາວເທົ່ານັ້ນ ຊຶ່ງກໍໝາຍຄວາມວ່າຖ້າຫາກສະພາບການເກັບກູ້ລະເບີດຍັງຄົງເປັນຄືກັບໄລຍະ 15 ປີຜ່ານມາ ກໍ
ຈະເຮັດໃຫ້ການເກັບກູ້ UXO ໃນລາວຈະຕ້ອງໃຊ້ເວລາອີກຍາວນານກວ່າ 100 ປີ ຈຶ່ງຈະສາມາດເກັບກູ້ໄດ້ໝົດ.
ດ້ວຍເຫດນີ້ ຈຶ່ງເຮັດໃຫ້ທາງການລາວຕັ້ງຄວາມຫວັງໄວ້ວ່າ ຈະຕ້ອງໄດ້ຮັບການຊ່ວຍເຫລືອຈາກຕ່າງປະເທດບໍ່ໜ້ອຍກວ່າ 30 ລ້ານໂດລາໃນແຕ່ລະປີ ເພື່ອວ່າຈະເຮັດໃຫ້ສາມາດ
ເກັບກູ້ລະເບີດ UXO ອອກຈາກເນື້ອທີ່ເພື່ອການກະເສດໄດ້ເພີ່ມຂຶ້ນອີກ 183,000 ເຮັກ
ຕ້າພາຍໃນປີ 2020 ໃນຂະນະທີ່ໃນໄລຍະ 5 ປີທີ່ຜ່ານມາ ນັ້ນລາວກໍໄດ້ຮັບການຊ່ວຍເຫລືອຈາກຕ່າງປະເທດໂດຍສະເລ່ຍ 19 ລ້ານໂດລາໃນແຕ່ລະປີ.