ລິ້ງ ສຳຫລັບເຂົ້າຫາ

​ໄທ ຈະຊ່ວຍເຫຼືອລາວ ດ້ານ​ທຶນ ໃນການ​ພັດທະນາ​ ລະບົບພື້ນຖານ​ໂຄງ​ລ່າ​ງ ​


ການເຊັນສັນຍາກູ້ຢືມເງິນລະຫວ່າງບໍລິສັດ

ຮອງ​ນາຍົກລັດຖະມົນຕີ​ໄທ ຢືນຢັນ​ວ່າ ຈະໃຫ້ການ​ສະໜັບສະໜຸນ​ໃນ​ດ້ານ​ທຶນ​ເພື່ອ​
ການ​ພັດທະນາ​ລະບົບ ພື້ນຖານ​ໂຄງ​ລ່າ​ງ ​ແລະ​ໂຄງການ​ຂະໜາດ​ໃຫຍ່​ໃນ​ລາວ​ໂດຍ
​ຈະ​ສົ່ງ​ເສີມ​ໃຫ້​ລະດົມ​ເງິນ​ທຶນ​ຈາກ​ຕະຫລາດ​ຮຸ້ນ​ໄທ.

ທ່ານ​ສົມ​ຄິດ ຈາຕຸ​ສີ​ພິທັກ ຮອງ​ນາຍົກລັດຖະມົນຕີ ຜູ້​ຮັບຜິດຊອບ​ແລະ​ກໍາກັບ​ນະ
​ໂຍບາຍ​ທາງ​ເສດຖະກິດ​ຂອງ​ລັດຖະບານ​ໄທ ຖະ​ແຫລ​ງຢືນຢັນ​ເນື່ອງ​ໃນ​ໂອກາດ
​ພົບ​ປະ​ເຈລະຈາ​ຮ່ວມ​ກັນ​ກັບ​ທ່ານ​ສົມ​ດີ ດວງ​ດີ ຮອງ​ນາຍົກລັດຖະມົນຕີ ​ແລະ​ລັດ
ຖະມົນຕີະຫະຊວງ​ການ​ເງິນ​ຂອງ​ລາວ ​ເມື່ອ​ບໍ່ນານ​ມານີ້ ທີ່​ນະຄອນ​ຫລວງ​ວຽງຈັນ
ວ່າ​ທາງ​ລັດຖະບານ​ໄທ ຍິນ​ດີ​ທີ່​ຈະ​ໃຫ້ການ​ສະໜັບສະໜຸນການ​ສ້າງຕັ້ງກອງ​ທຶນ
​ເພື່ອ​ການ​ພັດທະນາ​ລະບົບພື້ນຖານ​ໂຄງ​ລ່າ​ງ ​ແລະ​ໂຄງການ​ພັດທະນາ​ຂະໜາດ​
ໃຫຍ່​ໃນ​ລາວ ​ໂດຍ​ຈະ​ສົ່ງ​ເສີມ​ໃຫ້​ມີ​ການ​ລະດົມເງິນທຶນ ຈາກ​ຕະຫລາດ​ຮຸ້ນ ​ແລະ ​
ສະ​ຖາ​ບັນ​ການ​ເງິນ​ໃນ​ໄທ​ຢ່າງ​ເປີດ​ກວ້າງ.

​ໂດຍ​ຈະ​ດໍາ​ເນີນ​ງານ​ຮ່ວມ​ກັນ​ໃນ​ຖານະ​ຫຸ້ນ​ສ່ວນ​ຍຸດ​ທະ​ສາດ ​ໃນ​ການ​ພັດທະນາ​
ເສດຖະກິດ ລະຫວ່າງ​ກັນ​ໃນ​ໄລຍະ​ຍາວ ດັ່ງ​ທີ່​ທ່ານ​ສົມ​ຄິດ​ໄດ້​ໃຫ້ການ​ຢືນຢັນ​ວ່າ:

“ການ​ໃຊ້​ເງິນ​ສະກຸນ​ຮ່ວມ​ກັນ ການ​ເຊື່ອມ​ໂຍງ​ຕະຫລາດ​ຫລັກ​ຊັບ ກໍ​ສາມາດ​ເຊື່ອມ
​ໂຍງ​ກັນ​ໄດ້​ເລີຍ ຕໍ່​ໄປ​ຂ້າງໜ້າ ຈະ​ຕ້ອງ​ເປັນ
Strategic Partner ຮ່ວມ​ກັນ, ​ເປັນ
Joint Cabinet ຍຸດ​ທະ​ສາດ​ຮ່ວມ​ກັນ​ໃນ​ການ​ພັດທະນາ​ເສດຖະກິດ​ຂອງ​ສອງ​ປະ
​ເທດ, Partnerships ​ໃນ​ເຊີງ​ຂອງ​ການ​ສ້າງ​ລາຄາ​ຂອງ Commodity Strategy
ຮ່ວມ​ກັນໃນ​ການ​ສ້າງ Connectivity ຖະໜົນ ຫົນທາງ, Strategy ​ໃນ​ການ​
ເຊື່ອມ​ໂຍງ​ເລື່ອງ​ຂອງ​ສະໜາມບິນ, Strategy ​ຮ່ວມ​ໃນ​ເຊີງ​ຂອງ​ການ​ພັດທະນາ
Digital. ສະນັ້ນ ຄໍາ​ວ່າ Strategic Partnerships ​ເປັນ​ຫຸ້ນ​ສ່ວນ​ທາງເສດຖະກິດ
ຫຸ້ນ​ສ່ວນ​ຍຸດ​ທະ​ສາດ. ສະນັ້ນ ​ໃນ​ເຊີງ​ການ​ສ້າງ​ຍຸດ​ທະ​ສາດ ຮ່ວມ​ກັນ​ ເປັນ​ສິ່ງ​ສໍາ
ຄັນ​ທີ່​ສຸດ​ຂອງ​ເສດຖະກິດ​ໃນ​ອະນາຄົດ​ຂ້າງໜ້າ.”

ກ່ອນໜ້ານີ້ ບໍລິສັດຜະລິດໄຟຟ້າລາວ ມະຫາຊົນ (EDL-GEN) ກໍໄດ້ລະດົມເງິນທຶນ ດ້ວຍການສະເໜີຂາຍພັນທະບັດ ມູນຄ່າລວມ 312 ລ້ານໂດລາ ໃນຕະຫຼາດຫລັກຊັບ
ແຫ່ງປະເທດໄທ ຊຶ່ງກໍປາກົດວ່າ ບັນດານັກລົງທຶນໃນຕະຫຼາດຮຸ້ນໄທ ໄດ້ພາກັນຈອກຊື້
ພັນທະບັດດັ່ງກ່າວ ຢ່າງຄົບຖ້ວນໃນເວລາອັນສັ້ນ ເພາະໝັ້ນໃຈໃນສະຖຽນລະພາບ
ທາງທຸລະກິດຂອງ EDL-GEN ທີ່ສ້າງລາຍຮັບ ຈາກການຂາຍໄຟຟ້າ​ໃນ​ລາວ ​ແລ​ະສົ່ງ​
ໄປ​ໄທ​ໄດ້​ເພີ້ມຂຶ້ນຢ່າງ​ຕໍ່​ເນື່ອງ.

ການລະດົມເງິນທຶນໃນຄັ້ງນີ້ ຂອງ EDL-GEN ນັບເປັນຄັ້ງທີ 2 ແລ້ວ ໂດຍຄັ້ງທຳອິດ
ໄດ້ຈັດຂຶ້ນໃນທ້າຍປີ 2014 ທີ່ສາມາດລະດົມເງິນທຶນໄດ້ໃນມູນຄ່າ ລວມ 6,500 ລ້ານ
ບາດ ຫາກແຕ່ສຳລັບການລະດົມເງິນທຶນ ໃນຄັ້ງທີ 2 ນີ້ ເປັນການລະດົມເງິນທຶນ ໃນ
ສະກຸນເງິນໂດລາ ສະຫະລັດ ເປັນການສະເພາະ ເພື່ອນຳໃຊ້ໃນການຮ່ວມລົງທຶນ ກໍ່ສ້າງເຂື່ອນຜະລິດໄຟຟ້າໃນລາວ ໃຫ້ເພີ່ມຂຶ້ນຈາກ 1,131 ເມກາວັດ ໃນປະຈຸບັນນີ້ ​ແມ່ນບໍ່ໜ້ອຍກວ່າ 2,238 ເມກາວັດ ໃນປີ 2020 ຕໍ່ໄປ.

ພັນທະບັດທີ່ EDL-GEN ສະເໜີຂາຍໃນຕະຫຼາດຮຸ້ນໄທ ຄັ້ງຫຼ້າສຸດນີ້ ໄດ້ແບ່ງການຊຳ
ລະຄືນເງິນຕົ້ນທຶນ ອອກເປັນ 3 ລະຍະຄື 7 ປີ 10 ປີ ແລະ 12 ປີ ດ້ວຍອັດຕາ ດອກເບ້ຍ
5 ເປີເຊັນ 5.59 ເປີເຊັນ ແລະ 5.98 ເປີເຊັນ ຕໍ່ປີຕາມລຳດັບ ຊຶ່ງນັບເປັນ ບໍລິສັດຕ່າງ
ຊາດລາຍທຳອິດ ທີ່ມີລະຍະຊຳລະໜີ້ຍາວນານທີ່ສຸດເຖິງ 12 ປີ ທັງຍັງມີ ມູນຄ່າຂອງ
ການລະດົມເງິນທຶນ ໄດ້ສູງທີ່ສຸດອີກດ້ວຍ.

ທາງດ້ານທ່ານຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະບໍ່ແຮ່
ໃຫ້ການຢືນຢັນວ່າ ລັດວິສາຫະກິດຖືຮຸ້ນລາວ (Laos Holding State Enterprise) ໄດ້ວາງແຜນການຈະຂະຫຍາຍການລົງທຶນໄປໃນການພັດທະນາແຫລ່ງພະລັງງານ
ທາງເລືອກ ດ້ວຍການຮ່ວມລົງທຶນກັບບັນດາບໍລິສັດເອກກະຊົນລາວ ແລະຕ່າງຊາດ
ໃຫ້ຫຼາຍຂຶ້ນ ຮວມທັງ​ການ​ຂຸດ​ຄົ້ນ​ແຮ່​ທາດ​ຕ່າງໆ ອີກ​ດ້ວຍ.

ໂດຍລັດວິສາຫະກິດຖືຮຸ້ນລາວ ໄດ້ຖືກສ້າງຕັ້ງຂຶ້ນໃນປີ 2005 ແລະໃນໂອກາດການ
ສະເຫຼີມສະຫຼອງ ການສ້າງຕັ້ງຄົບຮອບ 10 ປີ ໃນເດືອນມີນາ 2015 ທີ່ຜ່ານມານັ້ນ ກໍ
ມີ ລາຍງານວ່າ ລັດວິສາຫະກິດດັ່ງກ່າວ ໄດ້ລະດົມເງິນທຶນເພື່ອປະກອບສ່ວນເຂົ້າໃນ
ການລົງທຶນສ້າງເຂື່ອນຜະລິດກະແສໄຟຟ້າ 5 ໂຄງການຄິດເປັນມູນຄ່າ ການຮ່ວມລົງ
ທຶນລວມຫຼາຍກວ່າ 600 ລ້ານໂດລາ.

ໂດຍການຮ່ວມລົງທຶນໃນ 5 ໂຄງການດັ່ງກ່າວ ປະກອບດ້ວຍໂຄງການເຂື່ອນໄຟຟ້າ
ນ້ຳເທີນ 2 ຊຶ່ງລັດວິສາຫະກິດ ຖືຮຸ້ນລາວ ຮ່ວມລົງທຶນ 112 ລ້ານໂດລາ ໂຄງການຫົງ
ສາລິກໄນຕ໌ 220 ກວ່າລ້ານໂດລາ ໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ 100
ກວ່າລ້ານໂດລາ ໂຄງການເຂື່ອນນ້ຳງຽບ 1 ຫຼາຍກວ່າ 100 ລ້ານໂດລາ ແລະທຸລະ
ກິດກຳຈັດ ຂີ້ເຖົ່າລອຍ ໃນໂຄງການຫົງສາລິກໄນຕ໌ ອີກ 64 ລ້ານໂດລາ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG