ການກວດສອບທີ່ບໍ່ມີຄວາມໂປ່ງໃດ ແລະລະບົບຕຸລາການ ທີ່ບໍ່ຍຸຕິທໍາ ໄດ້ກາຍເປັນບັນຫາໃຫຍ່ຂຶ້ນນັບມື້ ທັງເຮັດໃຫ້ປະຊາຊາຊົນລາວ ເສື່ອມສັດທາ ແລະ ການພັດທະນາປະເທດຊັກຊ້າໃນທຸກດ້ານ, ຊົງລິດ ໂພນເງິນມີລາຍງານເລື້ອງນີ້ ມາສະເໜີທ່ານຈາກບາງກອກ.
ທ່ານນາງ ຄໍາຈັນ ພົມແສງສະຫວັນ, ຮອງປະທານສູນກາງແນວລາວສ້າງຊາດ ຖະແຫລງ ຢືນຢັນວ່າ ການຈັດຕັ້ງປະຕິບັດທີ່ບໍ່ໂປ່ງໃສຂອງບັນດາພະນັກງານຮັບຜິດຊອບວຽກງານ ດ້ານການປ້ອງກັນ ແລະປາບປາມ ການທຸດຈະລິດໃນວົງການພັກ-ລັດ ແລະການຂາດ ຈັນຍາບັນຂອງພະນັກງານໃນລະບົບຕຸລາການ ຫລື ສານຍຸຕິທໍານັ້ນ ໄດ້ກາຍເປັນບັນຫາ ໃຫຍ່ຂຶ້ນນັບມື້ໃນລາວ ຊຶ່ງບໍ່ພຽງແຕ່ ຈະເຮັດໃຫ້ການພັດທະນາປະເທດຊັກຊ້າໃນທຸກດ້ານ ເທົ່ານັ້ນ ແຕ່ຍັງເຮັດໃຫ້ປະຊາຊາຊົນລາວ ເສື່ອມສັດທາຕໍ່ລະບົບຕຸລາການໃນລາວເພີ້ມ ຂຶ້ນນັບມື້ ອີກດ້ວຍ, ດັ່ງທ່ານນາງ ຄໍາຈັນ ໄດ້ຖະແຫລງ ຢືນຢັນວ່າ:
“ການກວດກາຜົນການກວດສອບ ຍັງຊັກຊ້າ ແກ່ຍາວ ບໍ່ສັກສິດ. ຜ່ານມາມີຫາງສຽງສັງຄົມ ຕໍ່ວຽກງານດັ່ງກ່າວວ່າ ກວດກາເອົາຮູບການ. ກວດກາແລ້ວໆ ໄປແກ້ໄຂບັນຫາບໍ່ໄດ້. ການ ປະຕິບັດໜ້າທີ່ຂອງພະນັກງານຂົງເຂດຍຸຕິທໍາ ຍັງບໍ່ທັນຫລີກລ້ຽງໄດ້ ຈາກຫາງສຽງສັງຄົມ ຈົ່ມວ່າ ຕໍ່ພະນັກງານລັດ. ຍັງຂາດຈັນຍາບັນ, ບໍ່ໂປ່ງໃສ, ຮຽກຮ້ອງເອົາຜົນປະໂຫຍດຈາກ ຄູ່ກໍລະນີ ແລະອື່ນໆ.”
ທາງດ້ານ ທ່ານນາງ ວຽງທອງ ສີພັນດອນ, ປະທານອົງການກວດສອບແຫ່ງລັດຖະແຫຼງຢືນຢັນວ່າ ການທຸດຈະລິດ ໂດຍບັນດາພະນັກງານລັດ ຍັງເກີດຂຶ້ນຢ່າງກວ້າງຂວາງ ເພາະໄດ້ມີການຮ່ວມມືກັບຢ່າງເປັນຂະບວນການໃນທຸກລະດັບ ດັ່ງກໍລະນີການຂາຍໄມ້ ຂອງລັດຖະບານໃນລາຄາຕໍ່າກວ່າຄວາມເປັນຈິງ ແລະບໍ່ຖືກຕ້ອງຕາມລະບຽບການປະມູນ ເຮັດໃຫ້ລັດຖະບານເສຍຫາຍໄປຢ່າງຫລວງຫລາຍ ທັງຍັງພົບວ່າ ມີພະນັກງານລັດ ນໍາເອົາ ເງິນລາຍໄດ້ຂອງລັດ ໄປຝາກກັບທະນາຄານເອກະຊົນ ເພື່ອຍັກຍອກເອົາ ດອກເບ້ຍໄປເປັນ ຜົນປະໂຫຍດຂອງຕົນ ຈຶ່ງເຮັດໃຫ້ຈະຕ້ອງເພີ້ມຄວາມເຂັ້ມງວດເຂົ້າໃນການກວດສອບ ການປະຕິບັດໜ້າທີ່ຂອງພະນັກງານລັດ ທັງຢູ່ຂັ້ນສູນກາງ ແລະຂັ້ນທ້ອງຖິ່ນຢ່າງຈິງຈັງ ໂດຍສະເພາະແມ່ນ ການທຸດຈະລິດ ທີ່ເປັນການຮ່ວມມືກັບ ລະຫວ່າງພະນັກງານລັດ ກັບ ທຸລະກິດເອກະຊົນນັ້ນ ຖືເປັນເຫດສໍາຄັນ ທີ່ເຮັດໃຫ້ລັດຖະບານ ສູນເສຍລາຍຮັບເພີ້ມຂຶ້ນ ນັບມື້ ທັງຍັງກວດພົບອີກດ້ວຍວ່າ ມີພະນັກງານທີ່ກ່ຽວຂ້ອງບໍ່ສົ່ງລາຍຮັບສ່ວຍສາອາກອນ ແລະ ຊັບສິນຕ່າງໆ ເຂົ້າງົບປະມານລັດຫລາຍກວ່າ 999 ຕື້ກີບ ແລະ 67 ລ້ານໂດລາ ຊຶ່ງ ເຮັດໃຫ້ມີການລົງໂທດທາງວິໄນຕໍ່ພະນັກງານລັດ 849 ຄົນ, ດໍາເນີນຄະດີໃນສານ 113 ຄົນ ໃນນີ້ ສານຕັດສິນໂທດແລ້ວ 55 ຄົນ ເກັບເງິນຄືນມາໄດ້ 26.5 ຕື້ ກີບ ແລະ 17 ລ້ານໂດລາ ຍົກເລີກສໍາປະທານໂຄງການຮ່ວມທຶນຂອງເອກະຊົນລາວ ກັບຕ່າງປະເທດ ທີ່ພົວພັນໃນ ການທຸດຈະລິດ 315 ລາຍ ໃນປີ 2019 ທີ່ຜ່ານມາ.
ສ່ວນອົງການ Human Rights Watch ລາຍງານວ່າການບັງຄັບໃຊ້ກົດໝາຍໃນໜ່ວຍງານຕ່າງໆຂອງລັດຖະບານລາວ ທັງໃນຂັ້ນສູນກາງ ແລະໃນທ້ອງຖິ່ນຍັງເກີດບັນຫາຊັກຊ້າ ແລະ ບໍ່ມີປະສິດທິພາບໃນທົ່ວປະເທດ ທັງຍັງປາກົດວ່າໄດ້ມີການບັງຄັບໃຊ້ກົດໝາຍເກົ່າທີ່ຖືກແທນທີ່ໂດຍກົດໝາຍໃໝ່ແລ້ວ. ພາຍໃຕ້ສະພາບການດັ່ງກ່າວຍັງເຮັດໃຫ້ມີການເລືອກປະຕິບັດກົດໝາຍຕໍ່ປະຊາຊົນທີ່ຂັດແຍ້ງກັບພະນັກງານລັດ ກ່ຽວກັບຜົນປະໂຫຍດໃນທີ່ດິນທີ່ຖືກບັງຄັບເວນຄືນຢ່າງບໍ່ຍຸຕິທຳອີກທັງຍັງມີຜູ້ພິພາກສາຈຳນວນບໍ່ໜ້ອຍທີ່ປະຕິບັດໜ້າທີ່ໂດຍບໍ່ສຸດຈະລິດ ແລະ ບໍ່ມີຈັນຍາທຳ.
ທາງດ້ານອົງການ USAID ຂອງສະຫະລັດ ອາເມຣິກາ ກໍໄດ້ໃຫ້ການຊ່ວຍເຫຼືອລັດຖະບານ ລາວ ເພື່ອພັດທະນາໂຄງຂ່າຍການເຜີຍແຜ່ລະບຽບກົດໝາຍຕ່າງໆດ້ວຍ ແອັບພລີເຄຊັ້ນ ໃນລະບົບໂທລະສັບມືຖືທີ່ທັນສະໄໝ ເພື່ອເຮັດໃຫ້ປະຊາຊົນ ລາວ ສາມາດເຂົ້າເຖິງ ແລະ ໄດ້ຮັບຂ່າວສານດ້ານລະບຽບກົດໝາຍຕ່າງໆຂອງລັດຖະບານ ໄດ້ຢ່າງເທົ່າທັນກັບສະພາບການ ທັງຍັງໄດ້ພັດທະນາລະບົບທີ່ສາມາດເຊື່ອມໂຍງເຂົ້າກັບຕະຫຼາດໂລກຢ່າງມີປະສິດທິພາບ ເພື່ອເຮັດໃຫ້ນັກທຸລະກິດ ລາວ ແລະ ຕ່າງຊາດສາມາດເຂົ້າເຖິງນິຕິກຳຕ່າງໆໃນ ລາວ ຢ່າງສະດວກວ່ອງໄວ ແລະ ສາມາດປະກອບຄວາມຄິດເຫັນຕໍ່ນິຕິກຳຕ່າງໆໄດ້ດ້ວຍ ໂດຍ ອົງການ USAID ໄດ້ໃຫ້ການຊ່ວຍເຫລືອລາວ ໃນໂຄງການດັ່ງກ່າວນີ້ ໃນຊ່ວງປີ 2019-2022.