ລິ້ງ ສຳຫລັບເຂົ້າຫາ

logo-print

​ປະ​ເທດ​ເຂດ​ລຸ່ມ​ແມ່​ນ້ຳ​ຂອງ ຈະ​ເຊື່ອມ​ໂຍງ​ໂຄງ​ການ​ພັດ​ທະ​ນາ​ ໃນ​ຂົງ​ເຂດ​ ໃສ່​ກັບ​ໂຄງ​ການ​ນຶ່ງ​ແລວ-ນຶ່ງ​ເສັ້ນ​ທາງ​ ຂອງ​ຈີນ


ກອງ​ປະ​ຊຸມ​ຄັ້ງ​ທີ 5 ຂອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ເຂດ​​ແມ່​ນ້ຳ​ຂອງກັບ​ແມ່​ນ້ຳ​ລ້ານ​ຊ້າງ ທີ່​ມີ​ຂຶ້ນ​ໃນ ວັນ​ທີ 20 ກຸມ​ພາ 2020 ທີ່​ຜ່ານ​ມາ​ທີ່​ນະ​ຄອນ​ວຽງ​ຈັນ

ບັນ​ດາລັດ​ຖະ​ມົນ​ຕີໃນ​ເຂດ​ລຸ່ມ​ແມ່​ນ້ຳຂອງ ໄດ້​ຕົ​ກ​ລົງ​ກັນໃນ​ຫລັກ​ການ​ກ່ຽວ​ກັບ​ການ​ເຊື່ອມ​ໂຍງ ໂຄງ​ການ​ພັດ​ທະ​ນາ ໃນ​ແຜນ​ແມ່​ບົດ​ອາ​ຊຽນ 2025 ກັບ​ແຜນ​ການ​ນຶ່ງ​ແລວ-ນຶ່ງ​ເສັ້ນ​ທາງ​ຂອງ​ຜູ້​ນຳ​ຈີນ. ຊົງ​ລິດ​ໂພນ​ເງິນ​ມີ​ລາຍ​ງານ​ກ່ຽວ​ກັບ​ເລື້ອງນີ້​ມາ​ສະ​ເໜີ​ທ່ານ ຈາກ​ບາງກອກ.


ທ່ານ ສະ​ເຫລີມ​ໄຊ ກົມ​ມະ​ສິດ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ຖະ​ແຫລງວ່າ ກອງ​ປະ​ຊຸມລັດ​ຖະ​ມົນ​ຕີຕ່າງ​ປະ​ເທດ​ແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ຄັ້ງ​ທີ 5 ທີ່​ມີ​ຂຶ້ນ​ໃນ ວັນ​ທີ 20 ກຸມ​ພາ 2020 ທີ່​ຜ່ານ​ມາ​ທີ່​ນະ​ຄອນ​ວຽງ​ຈັນ ໂດຍ​ເຂົ້າ​ຮ່ວມກອງ​ປະ​ຊຸມ​ຄັ້ງ​ນີ້ ກໍ​ຄື ລັດ​ຖະ​ມົນ​ຕີ ກະ​ຊວງ​ການ​ຕ່າງ​ປະ​ເທດຂອງ​ຈີນ, ພະ​ມ້າ, ກຳ​ປູ​ເຈຍ, ລາວ, ໄທ ແລະ​ຫວຽດ​ນາມນັ້ນ ໄດ້​ມີ​ມະ​ຕິ​ຕົກ​ລົງ​ຮ່ວມ​ກັນ​ໃນ​ຫລັກ​ການ​ກ່ຽວ​ກັບ​ການ​ເຊື່ອມ​ໂຍງ ບັນ​ດາ​ໂຄງ​ການ​ພັດ​ທະ​ນາ​ໃນ​ເຊດ​ບຸ່ມ​ແມ່​ນ້ຳ​ຂອງເຂົ້າ​ກັບ​ແຜນກ​ານ​ນຶ່ງ​ແລວ-ນຶ່ງ​ເສັ້ນ​ທາງ ​(Belt and Road Initiative-BRI) ທີ່​ລິ​ເລີ້ມ​ໂດຍ​ທ່ານ ສີ ຈິ້ນ​ຜິງ, ປະ​ທານ​ປະ​ເທດ​ຈີນນັ້ນ ໃຫ້​ເປັນ​ເຂດ​ຮ່ວມ​ພັດ​ທະ​ນາ​ລະ​ຫວ່າງ​ຈີນ ກັບ​ອາ​ຊຽນ ໃຫ້​ໄດ້​ຢ່າງ​ເປັນ​ຮູບ​ປະ​ທຳ ໂດຍ​ສະ​ເພາະ​ແມ່ນການ​ເຊື່ອມ​ຕໍ່ ການ​ຄົມ​ມະ​ນາ​ຄົມ-ຂົນ​ສົ່ງ​ທາງ​ບົກ-ທາງ​ທະ​ເລ ພາຍ​ໃຕ້​ແຜນ​ແມ່​ບົດ ການເຊື່ອ​ຈອດ​ອາ​ຊຽນ 2025 ນັ້ນ ດັ່ງ​ທີ່​ທ່ານ ສະ​ເຫລີມ​ໄຊ​ໄດ້​ຖະ​ແຫລງ​ຢື​ນ​ຢັນ​ວ່າ:

“ບັນ​ດາລັດ​ຖະ​ມົນ​ຕີແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ພວກ​ເຮົາ​ກະ​ຍັງ​ໄດ້​ຢື​ນ​ຢັນ ຄືນ​ການ​ຮ່ວມ​ມື ເພື່ອ​ສືບ​ຕໍ່​ຂະ​ຫຍາຍການ​ເຊື່ອມ​ໂຍງ​-ການ​ເຊື່ອມ​ຈອດ ພ້ອມ​ທັງ​ສະ​ເໜີ​ໃຫ້​ມີ​ການ ຄົ້ນ​ຄວ້າ ຄວາມ​ເປັນ​ໄປ​ໄດ້ ໃນ​ການ​ເຊື່ອມ​ສານ​ແຜນ​ປະ​ຕິ​ບັດ​ງານ​ເພື່ອ​ເຊື່ອມ​ຈອດ​ແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ເຂົ້າ​ກັບ​ແຜນລິ​ເລີ້ມ​ນຶ່ງ​ແລວ​ທາງ-ນຶ່ງ​ເສັ້ນ​ທາງ ແຜນ​ແມ່​ບົດ ເຊື່ອມ​ຈອດ​ອາ​ຊຽນ 2025 ແລະ​ແລວ​ທາງ​ຂົນ​ສົ່ງທາງ​ບົກ-ທາງ​ທະ​ເລສາຍ​ໄໝ ພາຍ​ໃຕ້ກອບ​ອາ​ຊຽນ-ຈີນ.”

ສ່ວນ​ທ່ານ ສອນ​ໄຊ ສີ​ພັນ​ດອນ ຮອງ​ນາ​ຍົກ​ລັດ​ຖະ​ມົນ​ຕີ ແລະ ລັດ​ຖະ​ມົນ​ຕີ​ວ່າ​ການ​ກະ​ຊວງ​ແຜນ​ການ ແລະການ​ລົງ​ທຶນຖະ​ແຫຼງ​ຢືນ​ຢັນ​ວ່າ​ລັດ​ຖະ​ບານລາວ ຈະ​ທຸ້ມ​ເທ​ຢ່າງ​ສຸດ​ຂີດ ເພື່ອ​ປະ​ກອບ​ສ່ວນ​ເຂົ້າ​ໃນ​ແຜນ​ຍຸດ​ທະ​ສາດ​ນຶ່ງ​ແລວ​ທາງ-​ນຶ່ງ​ເສັ້ນ​ທາງ ທັງ​ນີ້​ດ້ວຍ​ການ​ພັດ​ທະ​ນາລາວ ໃຫ້​ເປັນ​ເຂດ​ເຊື່ອມ​ຕໍ່​ຂອງ​ແຜນ​ຍຸດ​ທະ​ສາດ​ດັ່ງ​ກ່າວ​ຢູ່ໃນເຂດ ລຸ່ມ​ແມ່​ນ້ຳ​ຂອງໃຫ້​ໄດ້​ຢ່າງ​ເປັນ​ຮູບ​ປະ​ຕິ​ທຳ ​ໂດຍ​ສິ່ງ​ທີ່​ກຳ​ລັງ​ຈະ​ປາ​ກົດ​ເປັນ​ຈິງ​ໃນ​ທ້າຍ​ປີ 2021 ກໍ​ຄື​ໂຄງ​ການ​ກໍ່​ສ້າງ​ທາງ​ລົດ​ໄຟ​ເຊື່ອມ​ຕໍ່ລາວ ກັບ ຈີນ ທີ່​ເປັນ​ການ​ຮ່ວມ​ທຶນ​ລະ​ຫວ່າງ ລັດ​ຖະ​ບານ ລາວ-ຈີນ ນັ້ນ.

ໂຄງ​ການກໍ່​ສ້າງ​ທາງ​ດ່ວນ ລາວ​-ຈີນ ຈາກວຽງ​ຈັນ ຫາ ວັງ​ວຽງ
ໂຄງ​ການກໍ່​ສ້າງ​ທາງ​ດ່ວນ ລາວ​-ຈີນ ຈາກວຽງ​ຈັນ ຫາ ວັງ​ວຽງ

ທາງ​ດ້ານ ທ່ານ ທອງ​ລຸ​ນ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ ໄດ້​ສັ່ງ​ການ​ໃຫ້​ທຸກ​ພາກ​ສ່ວນ​ທີ່​ກ່ຽວ​ຂ້ອງ​ໃນ​ແຜນ​ການ​ນຶ່ງ​ແລວ-​ນຶ່ງ​ເສັ້ນ​ທາງ​ໃນລາວ ຈະ​ຕ້ອງ​ຮ່ວມ​ມື​ກັນ​ຢ່າງ​ແຂງ​ແຮງ​ ​ເພື່ອ​ການ​ຍາດ​ແຍ່ງ​ເອົາ​ການ​ຊ່ວຍ​ເຫຼືອ​ຈາ​ກກອງ​ທຶນ​ນຶ່ງ​ແລວ-​ນຶ່ງ​ເສັ້ນ​ທາງ​ໃຫ້​ໄດ້ຫຼາຍ​ຂຶ້ນ ​ແນ​ໃສ່​ການ​ພັດ​ທະ​ນາ​ເພື່ອ​ຍົກ​ລະ​ດັບ​ຄຸນ​ນະ​ພາບ​ການ​ສຶກ​ສາ, ສາ​ທາ​ລະ​ນະ​ສຸກ, ເທັກ​ໂນ​ໂລ​ຈີ​ທັນ​ສະ​ໄໝ ເພື່ອ​ນຳ​ໃຊ້​ໃນການ​ຜ​ະ​ລິດ​ກະ​ສິ​ກຳ ແລະພັດ​ທະ​ນາ​ລະ​ບົບ​ໂຄງ​ຂ່າຍອິນ​ເຕີ​ແນັດ ເພື່ອ​ການ​ຜະ​ລິດສິນ​ຄ້າສົ່ງອອກ​ໄປຕ່າງ​ປະ​ເທດເພີ້ມ​ຂຶ້ນ​ນັບ​ມື້.

ນັບ​ແຕ່​ປີ 1990 ເຖິງ​ປັດ​ຈຸ​ບັນ​ນີ້ ລັດ​ຖະ​ບານ ຈີນ ໄດ້​ໃຫ້​ການ​ຊ່ວຍ​ເຫຼືອ​ແກ່​ລັດ​ຖະ​ບານ ລາວ ຄິດ​ເປັນ​ມູນ​ຄ່າ​ລວມ​ເກີນກວ່າ 22,540 ລ້ານຢວນ ຊຶ່ງ​ໃນ​ນີ້​ແບ່ງ​ເປັນ​ການ​ຊ່ວຍ​ເຫຼືອ​ລ້າ 5,900​ ລ້ານຢວນ​ ​ເງິນ​ກູ້ບໍ່​ມີ​ດອກ​ເບ້ຍ 1,300 ລ້ານຢວນ ແລະເງິນ​ກູ້ດອກ​ເບ້ຍ​ຕ່ຳອີກຫລາຍກວ່າ 11,000 ພັນ​ລ້ານ​ຢວນ ໂດຍ​ເມື່ອ​ປະ​ກອບກັບການ​ທີ່ຈີນ ເປັນ​ຜູ້​ລົງ​ທຶນ​ອັນ​ດັບ​ທີ 1 ໃນການ​ພັດ​ທະ​ນາ​ພື້ນ​ຖານ​ໂຄງ​ລ່າງ​ໃນ ລາວ ເຊັ່ນ​ທາງ​ລົດ​ໄຟ, ທາງ​ດ່ວນ ແລະ ໂຄງ​ຂ່າຍ​ສາຍ​ສົ່ງ​ໄຟ​ຟ້າ​ແຮງ​ສູງ​ທີ່​ລັດ​ຖະ​ບານລາວ ຈະ​ຕ້ອງ​ກູ້​ຢືມ​ທຶນ​ຈາກຈີນເປັນ​ດ້ານຫຼັກ​ນັ້ນ ເຮັດ​ໃຫ້​ສາ​ມາດ​ຄາດ​ໝາຍ​ໄດ້​ວ່າ​ລັດ​ຖະ​ບານລາວ ຈະ​ເປັນ​ໜີ້​ເງິນ​ກູ້​ຈາກ​ລັດ​ຖະ​ບານຈີນ ເພີ່ມ​ຂຶ້ນ​ເປັນ​ເກີນກວ່າ 30,000 ລ້ານຢວນ​ໃນ​ປີ 2022 ທັງຕ້ອງ​ເພິ່ງ​ພາຈີນ ໃນດ້ານ​ວິ​ທະ​ຍາ​ສາດ ແລະ ເທັກ​ໂນ​ໂລ​ຈີຕ່າງໆ ຫຼາຍ​ຂຶ້ນອີກ​ດ້ວຍ

ທາງ​ດ້ານ​ຜູ້​ຊ່ຽວ​ຊານ​ດ້ານ​ການ​ເງິນ​ຂອງ​ທະ​ນາ​ຄານ​ໂລກ​ປະ​ຈຳ​ລາວ ຢືນ​ຢັນ​ວ່າລັດ​ຖະ​ບານລາວ ຕ້ອງ​ປະ​ເຊີນ​ກັບ​ສະ​ພາ​ວະ​ການ​ເປັນ​ໜີ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ຊຶ່ງ​ເຫັນ​ໄດ້​ໃນ​ປີ 2016 ທີ່​ຖື​ເປັນ​ປີ​ທຳ​ອິດ​ທີ່​ໜີ້​ສິນ​ຂອງ​ລັດ​ຖະ​ບານລາວ ມີ​ສັດ​ສ່ວນ​ເກີນກວ່າ 60 ເປີ​ເຊັນ​ຂອງ​ມູນ​ຄ່າ​ຜະ​ລິດ​ຕະ​ພັນ​ລວມ​ພາຍ​ໃນ (GDP) ແລະ​ເພີ່ມ​ຂຶ້ນ​ເປັນ 65.3 ເປີ​ເຊັນ ​ໃນ​ປີ 2018 ທັງ​ຍັງ​ຈະ​ເພີ່ມ​ຂຶ້ນ​ເປັນ​ເກີນກວ່າ 68 ເປີ​ເຊັນ ແລະ ເກີນກວ່າ 70 ເປີ​ເຊັນ​ໃນ​ປີ 2020 ຊຶ່ງ​ເປັນ​ປີ​ສິ້ນ​ສຸດ​ຂອງ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ໄລ​ຍະ 5 ປີ ​ຄັ້ງ​ທີ 8 ຂອງ​ລັດ​ຖະ​ບານລາວ ໂດຍ​ເຈົ້າ​ໜີ້​ລາຍ​ໃຫຍ່​ຂອງ​ລັດ​ຖະ​ບານລາວ ຄື​ທະ​ນາ​ຄານ​ພັດ​ທະ​ນາ​ເອ​ເຊຍ (ADB), ຕິດ​ຕາມ​ດ້ວຍທະ​ນາ​ຄານ​ໂລກ ແລະ ລັດ​ຖະ​ບານຈີນ ຕາມ​ລຳ​ດັບ. ຫາກ​ແຕ່​ກໍ​ຄາດ​ວ່າ ຈີນຈະ​ກ້າວ​ຂຶ້ນ​ເປັນ​ເຈົ້າ​ໜີ້​ອັນ​ດັບ​ 1 ຂອງ​ລາວນັບ​ແຕ່​ປີ 2021 ເປັນ​ຕົ້ນ​ໄປ ເພາະ​ວ່າ​ລັດ​ຖະ​ບານ​ຕ້ອງ​ກູ້​ຢືມ​ຈາກ​ຈີນ ເພື່ອ​ນຳ​ໃຊ້​ໃນ​ການ​ພັດ​ທະ​ນາ​ພື້ນ​ຖານ​ໂຄງ​ລ່າງ​ຕ່າງໆ ໃນ​ລາວ​ຫລາຍ​ຊຶ້ນນັ້ນ​ເອງ.

XS
SM
MD
LG