ນາຍົກລັດຖະມົນຕີລາວຍອມຮັບວ່າ ເປັນການຍາກຍິ່ງທີ່ຈະ
ຢຸດຢັ້ງຂະບວນການລັກລອບຕັດໄມ້ຜິດກົດໝາຍຖ້າຫາກວ່າ
ບັນດາພະນັກງານຂອງລັດຖະບານ ຍັງສໍ້ລາດບັງຫລວງ ຫຼື
ຄໍລັບຊັ່ນ ໃນການປະຕິບັດໜ້າທີ່.
ທ່ານດວງດີ ອຸດທະຈັກ ສະມາຊິກສະພາແຫ່ງຊາດລາວ ຈາກ
ເຂດນະຄອນວຽງຈັນ ໄດ້ຕັ້ງຂໍ້ສົງໄສຕໍ່ນະໂຍບາຍ ກ່ຽວກັບປ່າໄມ້
ຂອງລັດຖະບານລາວ ຊຸດປັດຈຸບັນ ໃນໂອກາດການປະຊຸມສະ
ໄໝສາມັນຄັ້ງທີ 7 ຂອງສະພາແຫ່ງຊາດລາວຊຸດທີ 7 ວ່າການບໍລິ
ຫານງານໃນດ້ານປ່າໄມ້ໃນລະຍະທີ່ຜ່ານມາ ຍັງຂາດຄວາມຊັດເຈນ ທັງຍັງຂັດແຍ້ງກັບ
ເປົ້າໝາຍທີ່ຈະເພີ້ມຄວາມໜາແໜ້ນ ຂອງປ່າໄມ້ໃຫ້ຫຼາຍຂຶ້ນອີກດ້ວຍ ດັ່ງທີ່ທ່ານດວງດີ
ໄດ້ຖະແຫລງ ຢືນຢັນວ່າ:
“ກະແມ່ນວ່າປະຊາຊົນຂັດຂ້ອງວ່າ ເປັນແນວໃດ ອັນລັດຖະບານນີ້ ຄືຈັ່ງວ່າປ່ອຍໃຫ້ຂຸດຄົ້ນໄມ້ຫຼາຍແທ້ ຂົນໝົດມື້ໝົດຄືນ ຈັກໄປທາງເລກ 7 ໄປທາງນ້ຳກັນ ໄປທາງເລກ 12 ໄປທາງເລກ 9 ແລະ ວ່າເລື່ອງນີ້ ຜູ້ແທນຫລວງນ້ຳທາ ກະວ່າໄປ
ທາງພຸ້ນອີກ.”
ທາງດ້ານທ່ານທອງສິງ ທຳມະວົງ ນາຍົກລັດຖະມົນຕີລາວ ກໍໄດ້
ຖະແຫລງເພື່ອຕອບຂໍ້ສົງໄສດັ່ງກ່າວນີ້ວ່າ ລັດຖະບານລາວມີ
ແນວນະໂຍບາຍກ່ຽວກັບປ່າໄມ້ ທີ່ຊັດເຈນກໍຄືການເພີ້ມລະດັບ
ຄວາມໜາແໜ້ນຂອງປ່າໄມ້ພາຍໃນປະເທດໃຫ້ໄດ້ເຖິງ 65
ເປີເຊັນ ແລະ 70 ເປີເຊັນ ຂອງພື້ນທີ່ທັງໝົດໃນປີ 2015 ແລະ
ປີ 2020 ແຕ່ ການທີ່ຈະສາມາດບັນລຸເປົ້າໝາຍດັ່ງກ່າວໄດ້ຢ່າງ
ແທ້ຈິງນັ້ນ ກໍຈະຕ້ອງໄດ້ຮັບການຮ່ວມມືຈາກທຸກພາກສ່ວນທັງໃນ
ພາກລັດຖະບານ ພາກເອກະຊົນ ແລະ ປະຊາຊົນລາວບັນດາ
ເຜົ່າໃນທົ່ວປະເທດ.
ທັງນີ້ໂດຍທ່ານທອງສິງ ຍອມຮັບວ່າໃນປັດຈຸບັນນີ້ ຍັງມີການລັກ
ລອບຕັດໄມ້ໂດຍຜິດກົດໝາຍເກີດຂຶ້ນຢ່າງກວ້າງຂວາງໃນທົ່ວ
ປະເທດ ໂດຍເງື່ອນໄຂສຳຄັນທີ່ເຮັດໃຫ້ສະພາບການດັ່ງກ່າວສາມາດເກີດຂຶ້ນໄດ້ ກໍຄື
ການປະຕິບັດໜ້າທີ່ຢ່າງບໍ່ຖືກຕ້ອງຕາມກົດໝາຍ ຂອງບັນດາພະນັກງານລັດຖະບານ
ໃນທຸກລະດັບຊັ້ນ ດັ່ງທີ່ທ່ານທອງສິງ ໄດ້ໃຫ້ການຊີ້ແຈງວ່າ:
“ເລື້ອງການຕັດໄມ້ ມີນະໂຍບາຍ ໃຫ້ຢຸດການຕັດໄມ້ນີ້ ແມ່ນໄດ້ອອກມາດົນແລ້ວ ຂ້າພະເຈົ້າເປັນ ກຳມະການສູນກາງນີ້ ກະຫ້າຫົກສະໄໝແລ້ວ ແລະກະໄດ້ຍິນສະໄໝໃດ ກະເວົ້າກັນ ກໍໄດ້ປຶກສາຫາລືເວົ້າເລື້ອງການຢຸດ ການຖາງປ່າເຮັດໄຮ່ ຢຸດການຕັດໄມ້ ແຕ່ວ່າ ບໍ່ມີເວລາໃດ ຢຸດໄດ້.”
ກ່ອນໜ້ານີ້ ກະຊວງກະສິກຳ ປ່າໄມ້ ລາຍງານວ່າໜ່ວຍຕຳຫລວດສະເພາະກິດ ສາມາດ
ຢຶດໄມ້ທີ່ລັກລອບຕັດ ໄດ້ 8 ແສນກວ່າແມັດກ້ອນໃນຊ່ວງ 6 ເດືອນທຳອິດຂອງແຜນການ
ປະຈຳປີ 2013-2014 ນີ້ ໂດຍໄມ້ທີ່ຢຶດໄດ້ດັ່ງກ່າວຖືເປັນປະລິມານ ທີ່ຫຼາຍກວ່າໄມ້ທີ່ຖືກ
ຕັດຢ່າງຖືກຕ້ອງຕາມກົດໝາຍໃນລະຍະດຽວກັນນີ້ເຖິງ 8 ເທົ້າຕົວ.
ທັງນີ້ ກໍເນື່ອງຈາກວ່າ ໃນຕະຫລອດແຜນການປີ 2013-2014 ນີ້ ລັດຖະບານລາວໄດ້ ອະນຸມັດໂຄວຕ້າການຕັດໄມ້ຄິດເປັນ ປະລິມານລວມຫຼາຍກວ່າ 1 ລ້ານແມັດກ້ອນ ໃນ
ທົ່ວປະເທດ ໂດຍໃນນີ້ກໍແບ່ງເປັນໂຄວຕ້າໄມ້ປົກກະຕິ 580,071 ແມັດກ້ອນ ແລະໂຄວ
ຕ້າໄມ້ພິເສດ ທີ່ຕ້ອງຕັດອອກຈາກ ເຂດພັດທະນາ ໂຄງການຕ່າງໆ ໃນປະລິມານລວມ
446,783 ແມັດກ້ອນ.
ຫາກແຕ່ວ່າ ຈາກການຈັດຕັ້ງປະຕິບັດ ໃນລະຍະ 6 ເດືອນທຳອິດ ຂອງແຜນການ ກໍຄື
ນັບແຕ່ເດືອນຕຸລາ 2013 ເຖິງເດືອນມີນາ 2014 ນີ້ ກໍປາກົດວ່າໄດ້ຕັດໄມ້ ໃນລະບົບ
ໂຄວຕ້າປົກກະຕິໄປແລ້ວ 69,888 ແມັດກ້ອນ ຫຼື ຄິດເປັນ 12 ເປີເຊັນ ຂອງແຜນການປີ
ເທົ່ານັ້ນ ສ່ວນໄມ້ໃນລະບົບໂຄວຕ້າພິເສດກໍໄດ້ຕັດໄປແລ້ວ 58,142 ແມັດກ້ອນ ຫຼື ຄິດ
ເປັນພຽງແຕ່ 13 ເປີເຊັນ ຂອງແຜນການ ຕະຫລອດປີເທົ່ານັ້ນ.
ທັງນີ້ໂດຍທ່ານວິໄລວັນ ພົມເຂ ລັດຖະມົນຕີວ່າການກະຊວງກະສິກຳ ປ່າໄມ້ ໄດ້ໃຫ້ການ
ອະທິບາຍວ່າ ສາເຫດທີ່ເຮັດໃຫ້ການຈັດຕັ້ງປະຕິບັດ ໃນລະຍະດັ່ງກ່າວ ດຳເນີນໄປຢ່າງ
ຊັກຊ້ານັ້ນ ກໍຍ້ອນວ່າ ມີການປະສານງານລະຫວ່າງສູນກາງ ແລະລະດັບທ້ອງຖິ່ນ ຫຼາຍ
ຂັ້ນຕອນ ຈຶ່ງເຮັດໃຫ້ການຕັດໄມ້ ໃນພາກຕົວຈິງ ສາມາດປະຕິບັດໄດ້ ນັບແຕ່ຕົ້ນປີ 2014
ມານີ້.
ຍິ່ງໄປກວ່ານັ້ນ ເຈົ້າໜ້າທີ່ຂັ້ນສູງຂອງລາວ ກໍຍັງປະເມີນດ້ວຍວ່າ ການລັກລອບຕັດໄມ້
ຜິດກົດໝາຍ ໃນຕະຫລອດແຜນການປີ 2013-2014 ນີ້ຈະມີປະລິມານລວມເກີນກວ່າ 1
ລ້ານແມັດກ້ອນ ອີກດ້ວຍ ແລະພື້ນທີ່ ທີ່ມີການລັກລອບຕັດໄມ້ຫຼາຍທີ່ສຸດ ກໍແມ່ນເຂດຊາຍ
ແດນລາວ ທີ່ຕິດຕໍ່ກັບ ຫວຽດນາມ ຈີນ ແລະໄທ ຕາມລຳດັບ.
