ສະມາຊິກສະພາແຫ່ງຊາດລາວ ຮັບຮອງເອົາລັດຖະທຳມະນູນ
ສະບັບປັບປຸງໃໝ່ ທີ່ກຳນົດໃຫ້ມີການສ້າງຕັ້ງ ສະພາປະຊາຊົນ
ທ້ອງຖິ່ນ ຄະນະກຳມະການເລືອກຕັ້ງລະດັບຊາດ ແລະ ອົງການ
ກວດສອບແຫ່ງຊາດ.
ທ່ານສົມພັນ ແພງຄຳມີ ຮອງປະທານສະພາແຫ່ງຊາດລາວ ຖະແຫຼງວ່າ ສະມາຊິກສະພາ
ແຫ່ງຊາດລາວ ໄດ້ມີມະຕິຮັບຮອງເອົາລັດຖະທຳມະນູນປີ 2003 ສະບັບປັບປຸງໃໝ່ ດ້ວຍ
ຄະແນນສຽງສ່ວນຫຼາຍ ໃນລະຫວ່າງກອງປະຊຸມສະໄໝສາມັນ ຄັ້ງທີ 10 ອັນຖືເປັນກອງ
ປະຊຸມຄັ້ງສຸດທ້າຍ ຂອງສະພາແຫ່ງຊາດລາວຊຸດທີ 7 ທີ່ມີກຳນົດການດຳເນີນກອງປະຊຸມ
ໃນລະຫວ່າງ ວັນທີ 7-25 ທັນວາ 2015 ນີ້ ດັ່ງທີ່ທ່ານກ່າວວ່າ:
“ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ 7 ໄດ້ຮັບຟັງການ
ລາຍງານພິຈາລະນາ ແລະ ຕົກລົງບັນຫາສຳຄັນຕ່າງໆ ດັ່ງນີ້ ໜຶ່ງ ໄດ້ພິຈາລະນາ ຮັບ
ຮອງເອົາລັດຖະທຳມະນູນ ສະບັບປັບປຸງ ຟັງການລາຍງານກ່ຽວກັບ ການກະກຽມ
ການເລືອກຕັ້ງສະມາຊິກສະພາແຫ່ງຊາດ ຊຸດທີ 8 ແລະ ສະມາຊິກສະພາປະຊາຊົນ
ຂັ້ນແຂວງ.”
ໂດຍລັດຖະທຳມະນູນສະບັບປັບປຸງໃໝ່ນີ້ ປະກອບມີ 14 ໝວດ
119 ມາດຕາ ແລະ ໃນນີ້ມີ 3 ໝວດ 21 ມາດຕາໃໝ່ ທີ່ເພີ້ມຂຶ້ນ
ຈາກເດີມ ກໍຄືໝວດທີ່ວ່າດ້ວຍ ສະພາປະຊາຊົນທ້ອງຖິ່ນ ອົງການ
ກວດສອບແຫ່ງລັດ ແລະ ຄະນະກຳມະການເລືອກຕັ້ງ ລະດັບຊາດ
ພ້ອມທັງຍັງໄດ້ປັບປຸງຄຳນຳກັບບົດບັນຍັດ ໃນໝວດທີ່ວ່າດ້ວຍ
ສະພາແຫ່ງຊາດ ປະທານປະເທດກັບລັດຖະບານ ການປົກຄອງ
ທ້ອງຖິ່ນ ສານປະຊາຊົນ ແລະອົງການໄອຍະການປະຊາຊົນ.
ນອກຈາກນັ້ນ ກອງປະຊຸມຍັງໄດ້ມີການພິຈາລະນາ ຮ່າງກົດໝາຍ
ໃໝ່ 3 ສະບັບ ຄືກົດໝາຍວ່າດ້ວຍສະພາແຫ່ງຊາດ ກົດໝາຍວ່າ
ດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍ ການເລືອກຕັ້ງສະມາຊິກສະພາ
ແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.
ທ່ານສົມພັນ ໃຫ້ການຢືນຢັນດ້ວຍວ່າ ນອກຈາການພິຈາລະນາເພື່ອຮັບຮອງເອົາກົດ
ໝາຍທັງ 4 ສະບັບດັ່ງກ່າວ ກອງປະຊຸມ ກໍຍັງຈະຮັບຟັງການລາຍງານ ກ່ຽວກັບການ
ກະກຽມ ການເລືອກຕັ້ງສະມາຊິກສະພາແຫ່ງຊາດ ຊຸດທີ 8 ຊຶ່ງຈະມີການເລືອກຕັ້ງ
ຢ່າງເປັນທາງການ ໃນປີ 2016 ເພື່ອແທນສະມາຊິກສະພາແຫ່ງຊາດລາວ ຊຸດທີ 7
ທີ່ຈະຄົບວາລະ 5 ປີ ໃນທ້າຍປີ 2015 ນີ້ ແລະນອກຈາກນັ້ນ ກໍຍັງຈະມີການເລືອກຕັ້ງ
ສະມາຊິກສະພາປະຊາຊົນຂັ້ນແຂວງອີກດ້ວຍ.
ໂດຍລັດຖະທຳມະນູນ ສະບັບປັບປຸງ ແລະ ຮ່າງກົດໝາຍທັງ 3 ສະບັບ ດັ່ງກ່າວນີ້ ຖື
ເປັນສ່ວນປະກອບສຳຄັນ ໃນການປະຕິຮູບທາງດ້ານການຄຸ້ມຄອງຂອງລັດ ເພື່ອການ
ກະຈາຍອຳນາດການບໍລິຫານ ໄປສູ່ລະດັບທ້ອງຖິ່ນໃຫ້ຫຼາຍຂຶ້ນ ທັງຍັງເປັນຫຼັກການ
ສຳຄັນທີ່ທາງການລາວ ໄດ້ສັນຍາໄວ້ກັບນານາຊາດ ເພື່ອເປັນການແລກກັບການຊ່ວຍ
ເຫຼືອ ທີ່ຈະໄດ້ຮັບຈາກຕ່າງປະເທດຢ່າງຕໍ່ເນື່ອງ.
ທາງດ້ານທ່ານສົມດີ ດວງດີ ລັດຖະມົນຕີວ່າການ ກະຊວງແຜນການ ແລະ ການລົງທຶນ
ຖະແຫຼງຍອມຮັບວ່າ ແຜນການພັດທະນາເສດຖະກິດ ແລະ ສັງຄົມ ໃນຊ່ວງປີ 2016-
2020 ລັດຖະບານລາວໄດ້ວາງຄາດໝາຍຈະສູ້ຊົນ ເພື່ອຍາດແຍ່ງເອົາຄວາມຊ່ວຍເຫຼືອ
ຈາກຕ່າງປະເທດໃຫ້ໄດ້ ໃນມູນຄ່າລວມ 3,500 ລ້ານໂດລາ ຫຼືບໍ່ໃຫ້ຫຼຸດ 700 ລ້ານໂດລາ
ໃນແຕ່ລະປີ ແລະຄິດເປັນ 12.5 ເປີເຊັນ ຂອງການລົງທຶນ ໃນພາກລັດຖະບານທັງໝົດ.
ໂດຍສຳລັບໃນລະຍະແຜນການປີ 2011-2015 ທີ່ຜ່ານມາລັດຖະບານລາວ ກໍໄດ້ຮັບ
ຄວາມຊ່ວຍເຫຼືອຈາກຕ່າງປະເທດ ຄິດເປັນມູນຄ່າລວມ 3,368 ລ້ານໂດລາ ຫຼືປະມານ
673 ລ້ານໂດລາຕໍ່ປີ ຊຶ່ງໃນນີ້ແບ່ງເປັນການຊ່ວຍເຫຼືອລ້າ ໃນມູນຄ່າ 2,270 ລ້ານໂດລາ
ແລະ ເງິນທຶນກູ້ຢືມໃນມູນຄ່າ 1,098 ລ້ານໂດລາ ສ່ວນການຄາດໝາຍ ໃນແຜນການປີ
2016-2020 ກໍຄິດເປັນລະດັບທີ່ເພີ້ມຂຶ້ນຈາກແຜນການປີ 2011-2015 ພຽງ 4 ເປີເຊັນ
ເທົ່ານັ້ນ ຈຶ່ງເຮັດໃຫ້ລັດຖະບານລາວໝັ້ນໃຈວ່າ ຈະໄດ້ຮັບການຕອບສະໜອງ ຈາກນາ
ນາຊາດຕາມຄາດໝາຍດັ່ງກ່າວ.
ຍິ່ງໄປກວ່ານັ້ນ ການຊ່ວຍເຫຼືອຈາກຕ່າງປະເທດ ຍັງເຮັດໃຫ້ອັດຕາຄວາມຍາກຈົນ ຂອງ
ປະຊາຊົນລາວ ລົດລົງຈາກ 48 ເປີເຊັນ ຂອງຈຳນວນປະຊາກອນທັງໝົດ ໃນປີ 1992
ເປັນ 27.6 ເປີເຊັນ ໃນປີ 2008 ແລະ 17 ເປີເຊັນ ໃນປີ 2015 ໂດຍບັນດາປະເທດຄູ່
ຮ່ວມພັດທະນາຂອງລາວ ໄດ້ໃຫ້ການຊ່ວຍເຫຼືອເພີ້ມຂຶ້ນຢ່າງຕໍ່ເນື່ອງເຊັ່ນດຽວກັນ ກໍຄື
ເພີ້ມຂຶ້ນຈາກ 178 ລ້ານໂດລາ ໃນປີ 1991 ເປັນ 795 ລ້ານໂດລາ ໃນປີ 2013-2014
ຕາມລຳດັບ.
