ລິ້ງ ສຳຫລັບເຂົ້າຫາ

ເຂື່ອນໄຟຟ້າ ໃນລາວ ໃຫ້ປະໂຫຍດ ຢ່າງຫຼວງຫຼາຍ ແລະມີ ຜົນກະທົບໜ້ອຍ

  • ຊົງຣິດ ໂພນເງິນ

ເຂື່ອນໄຟຟ້າ ນໍ້າເທີນ 2 ທີ່ສ້າງສໍາເລັດ ແລະຜະລິດ ກະແສໄຟຟ້າໃຊ້ແລ້ວ
ລັດຖະມົນຕີ​ລາວ​ຢືນຢັນ​ວ່າ ການ​ກໍ່ສ້າງ​ເຂື່ອນ​ຜະລິດ​ໄຟຟ້າໃນ​
ລາວ ນອກຈາກ​ຈະ​ສ້າງຜົນ​ປະ​ໂຫຍ​ດຢ່າງ​ຫຼວງ​ຫຼາຍ​ແລ້ວ ກໍ​ຍັງ​
ເປັນ​ພະລັງງານ​ທົດ​ແທນ​ ທີ່​ສະອາດ ​ແລະ​ສົ່ງ​ຜົນ​ກະທົບ​ບໍ່​ຫຼາຍ​
ອີກ​ດ້ວຍ​.


ທ່ານ​ສຸ​ລິ​ວົງ ດາລາ​ວົງ ລັດຖະມົນຕີ​ກະຊວງ​ພະລັງງານ​ແລະ​ບໍ່​ແຮ່ ຖະ​ແຫຼ​ງຢືນຢັນ​ວ່າ ການພັດທະ​ນາ​ດ້ານ​ພະລັງງານ​ໃນ​ລາວ​ທີ່​ສ່ວນ​ໃຫຍ່​ຈະ​ເປັນ​ການ​ກໍ່ສ້າງ​ເຂື່ອນ​ໄຟຟ້າ​ນໍ້າຕົກ​ນັ້ນ ຖື​ເປັນ​ພະລັງງານທາງ​ເລືອກ​ແລະ​ທົດ​ແທນ​ທີ່​ສະອາດ ​ແລະ​ເປັນ​ມິດ​ຕໍ່​ສະ ພາບ​ແວດ​ລ້ອມທໍ​າມະ​ຊາດ ທັງ​ຍັງ​ຈະສົ່ງ​ຜົນ​ກະທົບ​ດ້ານ​ລົບ​ຕໍ່​ສັງຄົມ​ໃນ​ລະດັບ​ທີ່​ຕໍ່າ​ຫຼາຍ​ອີກ​ດ້ວຍ. ຍິ່ງ​ໄປ​ກວ່າ​ນັ້ນ ກາ​ນກໍ່ສ້າງ​ເຂື່ອນ​ໄຟ​ຟາ​ນໍ້າຕົກ ກໍ​ຍັງ​ຈະ​ສົ່ງ​ຜົນ​ດີ​ຕໍ່​ການ​ພັດທະນາ​ທາງ​ເສດຖະກິດ ​ເພື່ອ​ຍົກ​ລະດັບ​ຄຸນ​ນະພາ​ບຊີວິດ​ການ​ເປັນ​ຢູ່​ຂອງ​ປະ ຊາຊົນ.

ຍິ່ງ​ໄປ​ກວ່າ​ນັ້ນ ການ​ກໍ່ສ້າງ​ເຂື່ອນ​ໄຟຟ້ານໍ້າຕົກ ກໍ​ຍັງ​ຈະ​ສົ່ງ​ຜົນ​ດີ​ຕໍ່​ການ​ພັດທະນາ​ທາງ​ເສ​ດຖະກິດ​ ​ເພື່ອ​ຍົກ​ລະດັບ​ຄຸນ​ນະພາ​ບຊີວິດ ການ​ເປັນ​ຢູ່ຂອງ​ປະຊາຊົນ​ລາວ​ໃຫ້​ດີ​ຂຶ້ນ​ເທື່ອ​ລະກ້າວ ​ເນື່ອງ​ຈາກ​ລາວ​ສາມາດ​ ທີ່​ຈະ​ສ້າງ​ລາຍ​ຮັບ​ຈາກ​ການ​ຂາຍ​ກະ​ແສ​ໄຟຟ້າ ​ແລະ​ໃນ​ຂະນະດຽວ​ກັນ ການ​ຕອບ​ສະໜອງ​ກະ​ແສ​ໄຟຟ້າ ​ໄປ​ໃຫ້​ປະຊາຊົນ​ລາວ ​ໄດ້​ຊົມ​ໃຊ້​ຢ່າງ​ກວ້າງ​ຂວາງ ຫຼາຍ​ຂຶ້ນນັບ​ມື້ນັ້ນ ກໍ​ຍັງ​ໄດ້​ປະກອບສ່ວນຢ່າງ​ສໍາຄັນ​ເຂົ້າ​ໃນ​ການ​ພັດທະນາ​ພາກ​ການ​ຜະລິດ​ຕ່າງໆ​ໄດ້​ເປັນ​ຢ່າງ​ດີ ດັ່ງ​ທີ່​ທ່ານ​ສຸ​ລິ​ວົງ ​ໄດ້​ໃຫ້ການ​ຢືນຢັນ​ວ່າ:

ທ່ານ​ສຸ​ລິ​ວົງ ດາລາ​ວົງ ລມຕ ກະຊວງ​ພະລັງງານ​ແລະ​ບໍ່​ແຮ່
ທ່ານ​ສຸ​ລິ​ວົງ ດາລາ​ວົງ ລມຕ ກະຊວງ​ພະລັງງານ​ແລະ​ບໍ່​ແຮ່

“ການ​ພັດທະນາ​ໄຟຟ້າ​ຢູ່​ ສປປ.ລາວ ສ່ວນ​ໃຫຍ່​ແມ່ນ​ໄຟ
ຟ້າ​ນໍ້າຕົກ ຊຶ່ງ​ຈັດ​ເປັນ​ພະລັງງານ​ໃນ​ກຸ່ມ​ແຫຼ່ງພະລັງງານ​
ທີ່​ສະອາດ ​ເປັນ​ພະລັງງານ ທີ່​ທົດ​ແທນ​ໄດ້ ​ແລະ​ມີ​ຜົນ​ກະ
ທົບ​ໜ້ອຍ​ຕໍ່​ສິ່ງ​ແວດ​ລ້ອມ​ທໍາ​ມະ​ຊາດ ​ແລະສັງຄົມ ພ້ອມ​
ກັນ​ນັ້ນ​ຍັງ​ໄດ້​ປະກອບສ່ວນ​ອັນ​ໃຫຍ່​ຫຼວງ​ ຕໍ່​ກາ​ນພັດທະ
ນາ​ຊົນນະບົດ ​ເປັນ​ການປະກອບສ່ວນ​ສ້າງ​ລາຍ​ຮັບ​ແຫ່ງ​
ຊາດ ຈາກ​ການ​ຂາຍ​ໄຟຟ້າ ​ແລະ​ເປັນ​ກາ​ນຊ່ວຍ​ໃຫ້​ຂະ
ແໜງການ​ອື່ນໆ ​ໄດ້​ຮັບ​ການ​ພັດທະນາ​ອີກ​ດ້ວຍ.”


ທັງ​ນີ້​ໂດຍ​ກະຊວງ​ພະລັງງານ ​ແລະ​ບໍ່​ແຮ່ ​ໄດ້​ວາງ​ແຜນການ​ທີ່​ຈະ​ເພີ່ມ​ລະດັບ​ຄວາມ​ອາດ​ສາມາດ​ໃນ​ການຜະລິດພະລັງງານ​ໄຟຟ້າ​ຈາກ 3,200 MW ​ໃນ​ປັດຈຸບັນ ​ເປັນ​ບໍ່​ໜ້ອຍ​ກວ່າ 12,500 MW ​ໃນ​ປີ 2020 ຊຶ່ງ​ຖ້າ​ຫາກວ່າການ​ດໍາ​ເນີນ​ງານ​ເປັນ​ໄປ​ຕາມ​ແຜນການ​ທີ່​ວາງໄວ້ ກໍຄື​ການ​ກໍ່ສ້າງ​ເຂື່ອນ 8 ​ໂຄງການ ​ແລະ​ໂຮງງານ​ຜະລິດໄຟຟ້າ ລິກ​ໄນ​ຕ໌ 1 ​ແຫ່ງ​ໃຫ້ສໍາ​ເລັດ​ຕາມ​ແຜນການນັ້ນ​ເອງ. ​

ໂດຍ​ສໍາລັບ​ໂຄງການ​ທີ່​ຄາດໝາຍ​ວ່າ​ຈະ​ກໍ່ສ້າງ​ໃຫ້​ສໍາ​ເລັດ​ພາຍ​ໃນ​ປີ 2015 ກໍ​ມີ​ຢູ່ 3 ​ໂຄງ ການ​ດ້ວຍ​ກັນ ກໍ​ຄື​ໂຄງການ​ເຂື່ອນ​ຫ້ວຍ​ລໍາ​ພັນ​ຂະໜາດ 88 MW ​ໃນ​ແຂວງ​ຫຼວງ​ນໍ້າ​ທາ ​ໂຄງການ​ເຂື່ອນ​ນໍ້າ​ຄານ 2 ຂະໜາດ 130 MW ​ໃນ​ແຂວງຫຼວງ​ພະ​ບາງ ​ແລະ​ໂຮງງານ​ຜະລິດ​ພະລັງງ​ານ​ໄຟຟ້າ​ຈາກຖ່ານລິກ​ໄນ​ຕ໌ ຫຼື​ໂຄງການ​ຫົງ​ສາ ລິກ​ໄນ​ຕ໌ ຂະ ໜາດ 1,800 MW ​ໃນ​ແຂວງ​ໄຊ​ຍະ​ບຸລີ.

ສ່ວນ​ທີ່​ຈະ​ກໍ່ສ້າງ​ສໍາ​ເລັດ​ພາຍ​ໃນ​ປີ 2016 ກໍ​ປະກອບ​ດ້ວຍ 3 ​ໂຄງການ ກໍ​ຄື​ໂຄງການ​ເຂື່ອນ​ນໍ້າ​ອູ່ 5 ຂະໜາດ 240 MW ກັບ​ໂຄງການ​ເຂື່ອນ​ນໍ້າ​ອູ່ 6 ຂະໜາດ 180 MW ​ໃນ​ແຂວງ​ຫຼວງ​ພະ​ບາງ ​ແລະໂຄງການ​ເຂື່ອນນໍ້າ​ງຽບ​ 1 ຂະໜາດ 180 MW ​ໃນ​ແຂວງ​ວຽງ​ຈັນ ​ແລະ​ອີກ 3 ​ໂຄງການ​ທີ່​ເຫຼືອ​ນັ້ນ ກໍ​ຄື​ໂຄງການ​ເຂື່ອນ​ນໍ້າ​ອູ່ 2 ຂະໜາດ 120 MW ກັບ​ໂຄງການ​ເຂື່ອນ​ນໍ້າ​ຄານ 3 ຂະໜາດ 60 MW ​ໃນ​ເຂ​ດ​ແຂວງຫຼວງ​ພະ​ບາງ​ນັ້ນ ຈະ​ກໍ່ສ້າງສໍາ​ເລັດ​ໃນ​ປີ 2017 ​ແລະ​ໂຄງການ​ເຂື່ອນ​ໄຊ​ຍະ​ບຸລີ​ເທິງ​ແນວ​ແມ່​ນໍ້າຂອງ​ໃນ​ເຂດ​ແຂວງ​ໄຊຍະ​ບຸລີ ທີ່​ຈະ​ຜະລິດ​ພະລັງງານ​ໄຟຟ້າ ​ໄດ້​ເຖິງ 1,280 MW ນັ້ນ ກໍ​ມີ​ກໍານົດ​ການ​ກໍ່ສ້າງ​ໃຫ້ສໍາ​ເລັດ​ພາຍໃນ​ປີ 2019 ​ໂດຍ​ຈະ​ສົ່ງ​ກະ​ແສ​ໄຟຟ້າ​ຂາຍ​ໃຫ້ໄທ​ໃນ​ສັດສ່ວນ 85% ຂອງ​ພະລັງ​ງານ​ໄຟຟ້າ ທີ່​ຜະລິດ​ໄດ້​ທັງ​ໝົດ​ເຖິງ 6 ໝື່ນ​ລ້ານ​ກິ​ໂລ​ວັດ/​ໂມງ​ຕໍ່​ປີ. ​

ໃນ​ປັດຈຸບັນ​ ​ເຂື່ອນ​ທີ່​ກໍ່ສ້າງ​ສໍາ​ເລັດ ​ແລະ​ໄດ້​ຜະລິດ​ກະ​ແສ​ໄຟຟ້າ​ແລ້ວ ມີ​ຢູ່ 18 ​ໂຄງ ການທີ່ ຜະລິດ​ພະລັງງານ​ໄຟຟ້າ​ໄດ້​ລວມກັນ 3,200 MW ຫຼື 12,039.67 ລ້ານ​ກິ​ໂລ​ວັດ/​ໂມງ​ຕໍ່​ປີ ​ແລະ​ກໍ​ໄດ້​ສົ່ງ​ຂາຍ​ໃຫ້ການໄຟຟ້າ​ຝ່າຍ​ຜະລິດ​ແຫ່ງ​ປະ​ເທດ​ໄທ EGAT ​ໃນ​ປະລິມານ​ລວມ 11,178.5 ລ້ານ​ກິ​ໂລ​ວັດ/​ໂມງ​ຕໍ່​ປີ ​ຄິດ​ເປັນ​ມມູນ​ຄ່າ​ເກີນ​ກວ່າ 470 ລ້ານ​ໂດ​ລ່າ​ໃນ​ປີ​ທີ່​ຜ່ານມາ.

ໂດຍ​ການ​ດໍາ​ເນີນ ​ແຜນການ​ດັ່ງກ່າວ​ນີ້ ຂອງ​ກະຊວງ​ພະລັງງານ ​ແລະ​ບໍ່​ແຮ່ ກໍ​ຄື​ການ​ຕອບ​ສະໜອງ​ຕໍ່​ເປົ້າໝາຍຂອງ​ພັກ ​ແລະ​ລັດຖະບານ​ລາວ ທີ່​ຈະ​ພັດ​ທະ​ນາລາ​ວ​ເປັນ​ໝໍ້​ໄຟ​ຂອງ​ເອ ​ເຊຍ (Battery of Asia) ​ໃຫ້​ໄດ້​ດ້ວຍ​ການ​ສົ່ງ​ເສີມ​ການ​ລົງທຶນ​ເພື່ອ​ກໍ່ສ້າງ​ເຂື່ອນ​ຢູ່ໃນ​ລາວ ​ໃຫ້​ຫຼາຍ​ຂຶ້ນຢາງ​ບໍ່​ຢຸດ​ຍັ້ງ ​ແລະ​ກໍ​ຍັງ​ເປັນ​ການ​ນໍາ​ໃຊ້​ ປະ​ໂຫຍ​ດຈາກ​ທ່າ​ແຮງບົ່ມ​ຊ້ອນ​ດ້ວຍຊັບພະຍາກອນ​ນໍ້າຂອງ​ລາວ​ໄດ້​ເປັນ​ຢ່າງ​ດີ​ອີກ​ດ້ວຍ.

ແຕ່ຢ່າງໃດ​ກໍ​ຕາມ ການ​ດໍາ​ເນີນ​ແຜນການ​ດັ່ງກ່າວ​ກໍ​ເຮັດໃຫ້​ລັດຖະບານ​ລາວ​ຕ້ອງ​ປະ​ເຊີນ​ກັບ ການ​ຄັດຄ້ານ​ຈາກ​ບັນດາ​ອົງການ​ອະນຸລັກ​ສະພາບ​ແວດ​ລ້ອມ​ທໍາ​ມະ​ຊາດ​ລະ ດັບ​ສາກົນ ຫຼາຍຂຶ້ນນັບ​ມື້​ ​ເຊັ່ນ​ດຽວ​ກັນ ​ໂດຍ​ລ່າ​ສຸດ 19 ອົງການ​ພັນທະ​ມິດ​ເພື່ອ​ການ​ປົກປ້ອງ​ແມ່​ນໍ້າຂອງ ຫຼື Save the Mekong ກໍ​ໄດ້​ພາກັນ​ຍື່ນ​ຈົດໝາຍ​ເຖິງ​ນາຍົກລັດ ຖະມົນຕີລາວ ​ໄທ​ ກໍາປູ​ເຈຍ ​ແລະ​ຫວຽດນາມ ​ເພື່ອ​ຮຽກຮ້ອງ​ໃຫ້​ໂຈະໂຄງການ​ກໍ່ສ້າງ​ເຂື່ອນ​ດອນ​ສະ​ຫົງ ຢູ່​ຄອນ​ພະ​ເພັງ ​ໃນແຂວງ​ຈໍາປາ​ສັກ​ຂອງ​ລາວ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG