ລັດຖະມົນຕີລາວໝັ້ນໃຈວ່າຈະບັນລຸເປົ້າໝາຍ ໃນການກະຈາຍ
ໂອກາດດ້ານການສຶກສາ ສຳຫລັບເດັກນ້ອຍທຸກຄົນໃນປີ 2015
ຫາກແຕ່ກໍຍອມວ່າຢູ່ເຂດຊົນນະບົດນັ້ນ ຍັງເປັນບັນຫາທີ່ທ້າທາຍ.
ທ່ານພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການແລະກິລາ ຖະແຫລງ
ວ່າເປົ້າໝາຍສຳຄັນທີ່ສຸດ ຂອງການພັດທະນາທາງດ້ານການສຶກສາ ຂອງລາວໃນລະຍະ
ນັບແຕ່ປັດຈຸບັນໄປເຖິງທ້າຍປີ 2015 ກໍຄືການກະຈາຍໂອກາດດ້ານການສຶກສາ ສຳ
ຫລັບເດັກນ້ອຍທຸກຄົນໃນລາວໃຫ້ຢ່າງແທ້ຈິງ.
ທັງນີ້ດ້ວຍການດຳເນີນມາດຕະການໃນທຸກວິທີທາງ ເພື່ອເຮັດໃຫ້ເດັກນ້ອຍ ແລະປະຊາ
ຊົນລາວທຸກຄົນໄດ້ຮຽນໜັງສືຈົບຊັ້ນປະຖົມສຶກສາ ອັນຈະເປັນພື້ນຖານຮອງຮັບເປົ້າ
ໝາຍການຂະຫຍາຍໂອກາດດ້ານການສຶກສາຂຶ້ນສູ່ລະດັບ ມັດທະຍົມຕົ້ນໃຫ້ໄດ້ຢ່າງ
ເປັນຮູບປະທຳດັ່ງທີ່ທ່ານພັນຄຳ ໄດ້ໃຫ້ການຢືນຢັນວ່າ:
“ອັນສຳຄັນທີ່ສຸດຢູ່ໃນນີ້ນິ ແມ່ນຈະຕ້ອງໄດ້ສູ້ຊົນໃຫ້ບັນລຸການບຳລຸງຊັ້ນປະຖົມ
ໃນທົ່ວປະເທດນີ້ໃຫ້ຈົບ ແລະ ໃຫ້ສາມາດປະການລົບລ້າງບຳລຸງປະຖົມທົ່ວ
ປະເທດໄດ້ໃນປີ 2015 ແລະທັງໝົດນັ້ນ ເພື່ອກ້າວສູ່ການກະກຽມການກ້າວໄປ
ສູ່ການຈັດຕັ້ງປະຕິບັດການສຶກສາມັດຖະຍົມຕົ້ນພາກບັງຄັບໃນຕໍ່ໜ້ານີ້.”
ທາງດ້ານ ທ່ານຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກິລານະຄອນຫລວງ ວຽງຈັນ ໄດ້ໃຫ້ການຢືນຢັນວ່າເປົ້າໝາຍສຳຄັນ ຂອງເຂດນະຄອນຫລວງວຽງຈັນ ໃນສົກຮຽນ 2014 ນີ້ ກໍຄືການເພີ້ມອັດຕາການສຶກສາກ່ອນໄວຮຽນໃຫ້ໄດ້ເຖິງ 81 ເປີເຊັນ ຂອງເດັກນ້ອຍອາຍຸລະຫວ່າງ 3-5 ປີ ແລະເພີ້ມອັດຕາການເຂົ້າຮຽນຊັ້ນປະຖົມໃຫ້ບັນລຸເຖິງ 99.95 ເປີເຊັນ ຂອງເດັກນ້ອຍອາຍຸລະຫວ່າງ 6-10 ປີ ພ້ອມທັງຮັບປະກັນໃຫ້ມີອັດຕາການຮຽນຈົບຊັ້ນ
ປະຖົມໃຫ້ໄດ້ເຖິງ 95.5 ເປີເຊັນ ຂອງເດັກນ້ອຍໃນໄວຮຽນທັງໝົດ.
ໂດຍຖ້າຫາກການຈັດຕັ້ງປະຕິບັດ ເປັນໄປຕາມແຜນການທີ່ວາງ
ໄວ້ດັ່ງກ່າວ ກໍຈະເປັນຫລັກປະກັນທີ່ດີ ໃຫ້ແກ່ການບັນລຸເປົ້າໝາຍ
ສະຫະສະວັດການພັດທະນາດ້ານການສຶກສາ ໃນປີ 2015 ໃນ
ເຂດນະຄອນຫລວງວຽງຈັນ ໄດ້ຢ່າງຄັກແນ່ ກໍຄືການເພີ້ມອັດຕາ
ການເຂົ້າຮຽນ ແລະຈົບຊັ້ນປະຖົມໃຫ້ໄດ້ທັງ 100 ເປີເຊັນ ໃນທົ່ວ
ເຂດນະຄອນຫລວງວຽງຈັນ ໃນປີ 2015 ດັ່ງກ່າວ.
ແຕ່ຢ່າງໃດກໍຕາມ ການບັນລຸເປົ້າໝາຍດັ່ງກ່າວຈະບໍ່ສາມາດເກີດ
ຂຶ້ນໃນເຂດຊົນນະບົດຂອງລາວໄດ້ຢ່າງແນ່ນອນ ເນື່ອງຈາກວ່າ
ການຈັດຕັ້ງປະຕິບັດແຜນການໃນການກະຈາຍໂອກາດດ້ານການສຶກສາສຳຫລັບເດັກ ນ້ອຍທຸກຄົນໃນທົ່ວປະເທດ ໂດຍສະເພາະແມ່ນຢູ່ໃນເຂດຊົນນະບົດ ທີ່ໄດ້ເລີ້ມຈັດຕັ້ງ ປະຕິບັດ ນັບແຕ່ສົກຮຽນປີ 2011-2012 ເປັນຕົ້ນມານັ້ນ ສາມາດປະຕິບັດໄດ້ຕ່ຳກວ່າເປົ້າໝາຍທີ່ວ່າງໄວ້.
ກໍຄືໃນຂະນະທີ່ແຜນການໄດ້ວາງໄວ້ວ່າ ຈະຕ້ອງກະຈາຍໂອກາດດ້ານການສຶກສາສຳຫລັບເດັກນ້ອຍທຸກຄົນໃຫ້ໄດ້ເຖິງ 98 ເປີເຊັນ ຂອງເດັກນ້ອຍອາຍຸລະຫວ່າງ 6-10 ປີ ໃນທົ່ວປະເທດໃນປີ 2015 ນັ້ນຫາກແຕ່ວ່າໃນຕົວຈິງກັບສາມາດປະຕິບັດໄດ້ພຽງ 95.2 ເປີເຊັນ ໂດຍເພີ້ມຂຶ້ນພຽງ 1.2 ເປີເຊັນ ເທົ່ານັ້ນ ເມື່ອທຽບໃສ່ລະຫວ່າງສົກຮຽນປີ 2012-2013 ກັບສົກຮຽນປີ 2013-2014 ນີ້.
ໂດຍສາເຫດສຳຄັນທີ່ເຮັດໃຫ້ການຈັດຕັ້ງປະຕິບັດໄດ້ຕ່ຳກວ່າເປົ້າໝາຍທີ່ວ່າໄວ້ ກໍຍ້ອນວ່າລັດຖະບານ ບໍ່ສາມາດຕອບສະໜອງງົບປະມານໃຫ້ກັບການຂະຫຍາຍໂອກາດດ້ານການສຶກສາໄດ້ຢ່າງພຽງພໍ ແລະໃນຂະນະດຽວກັນ ບັນຫາຄວາມຍາກຈົນຂອງປະຊາຊົນໃນຊົນນະບົດກໍຍັງໄດ້ເຮັດໃຫ້ຈຳນວນເດັກນ້ອຍທີ່ບໍ່ຈົບຊັ້ນປະຖົມມີຈຳນວນເພີ້ມຂຶ້ນດ້ວຍ.
ໂດຍສະພາບການດັ່ງກ່າວ ຍັງເຮັດໃຫ້ຄາດໝາຍໄດ້ວ່າລັດຖະບານລາວ ຈະສາມາດກະຈາຍໂອກາດດ້ານການສຶກສາສຳຫລັບເດັກນ້ອຍໄດ້ບໍ່ເຖິງ 96 ເປີເຊັນ ແລະໃນນີ້ກໍຈະມີພຽງ 74 ເປີເຊັນ ເທົ່ານັ້ນທີ່ຈະມີໂອກາດໄດ້ຮຽນຈົນຈົບຊັ້ນປະຖົມ ໃນສົກຮຽນປີ 2014-2015 ແລະແນ່ນອນວ່າ ໂອກາດໃນດ້ານການສຶກສາຊັ້ນສູງກໍຍ່ອມຈະມີອັດຕາສະເລ່ຍທີ່ຕ່ຳກວ່າໃນລະດັບປະຖົມດ້ວຍເຊັ່ນກັນ ດັ່ງຈະເຫັນໄດ້ຈາກສົກຮຽນ 2013 ທີ່ມີນັກຮຽນຈົບຊັ້ນມັດຖະຍົມປາຍ 44,490 ຄົນ ແຕ່ກໍມີພຽງ 9,950 ຄົນ ເທົ່ານັ້ນທີ່ມີໂອກາດໄດ້ສຶກສາຕໍ່ໃນມະຫາວິທະຍາໄລແຫ່ງຊາດທັງ 4 ແຫ່ງຂອງລາວໃນສົກຮຽນ 2014 ນີ້.
