ກອງປະຊຸມອາຊຽນຄັ້ງທີ 44 ແລະ 45 ໄດ້ໄຂຂຶ້ນແລ້ວໃນນະຄອນຫຼວງ ວຽງຈັນ ເຊິ່ງວັນທີ 6 ທີ່ຜ່ານມາກໍມີກອງປະຊຸມຂອງຄະນະກຳມະ ການຜູ້ ແທນອາຊຽນ ແລະ ວັນທີ 7 ມື້ນີ້ ກໍມີກອງປະຊຸມຂອງບັນດາເຈົ້າໜ້າທີ່ອາວຸໂສ ອາຊຽນ. ແຕ່ກອງປະຊຸມສຸດຍອດຂອງບັນດາຜູ້ນຳລະດັບສູງ ແລະ ປະມຸກລັດ ຈະເລີ່ມ ຕົ້ນຂຶ້ນໃນວັນອັງຄານທີ 8 ມື້ອື່ນ. ແລະ ກອງປະຊຸມຄັ້ງນີ້ ພວກເຮົາ ຄວນຄາດ ຫວັງຫຍັງແດ່. ມີບັນຫາໃດທີ່ຈະຄອບງຳກອງປະຊຸມດັ່ງກ່າວ.
ສປປ ລາວ ແມ່ນພ້ອມແລ້ວທີ່ສຳລັບການເປັນເຈົ້າພາບຈັດກອງປະຊຸມ ອາຊຽນ. ສະພາບການຢູ່ໃນນະຄອນຫຼວງ ວຽງຈັນ ມີຄວາມສະຫງົບດີ ຕາມປົກກະຕິ, ມີການຮັກສາຄວາມປອດໄພທີ່ເຄັ່ງຄັດຂຶ້ນເປັນພິເສດ ໂດຍເຈົ້າໜ້າທີ່ ຕຳຫຼວດ ແລະ ທະຫານໄດ້ອອກມາປະຈຳການຢ່າງຕັ້ງໜ້າ, ພ້ອມທັງມີລົດຫຸ້ມເກາະອອກລາດຕະເວນທົ່ວເຂດຕ່າງໆ.
ກອງປະຊຸມສຸດຍອດຄັ້ງນີ້ຄາດວ່າຈະມີບັນດາຜູ້ແທນເຂົ້າຮ່ວມປະມານ 2000 ຄົນ ແລະ ນັກຂ່າວ 1000 ຄົນ. ໂຮງຮຽນ ແລະ ມະຫາວິທະຍາໄລ ຈະຖືກ ປິດຈາກວັນທີ 8 ມື້ອື່ນນີ້ຈົນປິດກອງປະຊຸມວັນທີ 11, ເພື່ອອຳນວຍຄວາມສະ ດວກໃຫ້ບັນດາຜູ້ແທນເດີນທາງໄປສະຖານທີ່ຈັດກອງປະຊຸມດຳເນີນໄປຢ່າງລາບລື່ນ ແລະ ຫຼີກລ່ຽງການສັນຈອນທີ່ແອອັດ ແລະ ລົດຕິດຕ່າງໆ, ເຊິ່ງກະຊວງ ສຶກສາ ທິການ ແລະ ກິລາໄດ້ປະກາດໃນວັນພະຫັດທີ່ຜ່ານມາວ່າ ໂຮງຮຽນ 497 ແຫ່ງໃນນະຄອນຫຼວງວຽງຈັນຈະຖືກປິດ.
ໃນປີນີ້ປະທານາທິບໍດີ ສະຫະລັດ ທ່ານ ໂຈ ໄບເດັນ ແລະ ຮອງປະທານາທິ ບໍດີ ທ່ານນາງ ຄາມາລາ ແຮຣິສ ແມ່ນບໍ່ໄດ້ມາຮ່ວມ, ໂດຍຈະມີລັດຖະມົນຕີ ການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ ມາຮ່ວມແທນ.
ບັນຫາທີ່ຄາດວ່າຈະຢູ່ໃນລາຍຊື່ສູງສຸດຂອງວາລະກອງປະຊຸມກໍຄົງຈະແມ່ນການແກ້ໄຂບັນຫາຂັດແຍ້ງໃນປະເທດ ມຽນມາ ແລະ ບັນຫາຄວາມຂັດແຍ້ງໃນທະ ເລຈີນໃຕ້, ເຊິ່ງທັງສອງບັນຫານັ້ນແມ່ນຍັງບໍ່ສາມາດແກ້ໄຂໄດ້ ແລະ ເບິ່ງຄືວ່າ ຈະບໍ່ໄດ້ຮັບການແກ້ໄຂງ່າຍໆດ້ວຍ.
ໃນເດືອນກຸມພາ 2021, ກອງທັບ ມຽນມາ ໄດ້ໂຄ່ນລົ້ມລັດຖະບານທີ່ຖືກຕັ້ງ ຢ່າງເປັນປະຊາທິປະໄຕຂອງທ່ານນາງ ອອງ ຊານ ຊູ ຈີ, ຜູ້ທີ່ຖືກຂັງພ້ອມ ກັບຜູ້ນຳພັກສັນນິບາດຊາດເພື່ອປະຊາທິປະໄຕຄົນອື່ນໆ.
ວິກິດການໃນປະເທດ ມຽນມາ ໄດ້ກໍ່ໃຫ້ເກີດການສະແດງປະຕິກິລິຍາຫຼາຍຫຼາກ ຈາກສາກົນ ແລະ ບັນດາປະເທດສະມາຊິກ ອາຊຽນ ອື່ນໆ.
ແຕ່ບັນຫາດັ່ງກ່າວກໍຍັງບໍ່ສາມາດແກ້ໄຂໄດ້ ແລະ ເບິ່ງຄືວ່າຍາກທີ່ຈະແກ້ໄຂ ໄດ້ຍ້ອນວ່າສະມາຄົມ ອາຊຽນ ເອງກໍມີຄວາມບໍ່ເຫັນພ້ອມກັນ ເພື່ອແກ້ໄຂ ບັນຫານັນ.
ອີກບັນຫານຶ່ງທີ່ບໍ່ສາມາດຫຼີກລ່ຽງໄດ້ກໍແມ່ນບັນຫາທະເລຈີນໃຕ້, ເຊິ່ງປັດຈຸບັນນີ້ ຟີລິບປິນ ທີ່ເປັນສະມາຊິກຂອງ ອາຊຽນ ໄດ້ມີການປະທະກັນຢ່າງເປັນປະ ຈຳກັບ ຈີນຢູ່ໃນທະເລນັ້ນ ຈົນກໍ່ໃຫ້ເກີດຄວາມເສຍຫາຍ ແລະ ບາດເຈັບ ຫຼາຍຄັ້ງ, ເຊິ່ງແຕ່ລະຝ່າຍຕ່າງກໍໄດ້ຖິ້ມໂທດໃສ່ກັນ ແລະ ກັນສຳລັບການ ຂັບເຮືອຕຳເຂົ້າໃສ່ກັນ.
ຈີນ ໄດ້ອ້າງເອົາເຂດແດນສ່ວນໃຫຍ່ໃນທະເລຈີນໃຕ້ ແຕ່ສານຍຸດຕິທຳ ສາກົນໄດ້ຕັດສິນໃຈປີ 2016 ວ່າການກ່າວອ້າງຂອງຈີນແມ່ນບໍ່ຖືກຕ້ອງ.
ຄວາມຄາດຫວັງທີ່ຈະປະສົບຄວາມສຳເລັດໃນການແກ້ໄຂບັນຫາດັ່ງກ່າວນີ້ແມ່ນຕໍ່າ ເພາະວ່າບັນດາສະມາຊິກ ອາຊຽນ ແມ່ນບໍ່ເຫັນພ້ອມກັນ.
ກອງປະຊຸມ ອາຊຽນ ສະຫະລັດ ກໍມີຄວາມສຳຄັນເຊັ່ນກັນ, ເພາະວ່າ ສະຫະລັດ ແມ່ນກຳລັງແຂ່ງກັນຍາດແຍ່ງອິດທິພົນກັບ ຈີນ ຢູ່ໃນ ພາກພື້ນນີ້. ແລະ ສະຫະລັດ ກໍກຳລັງເຂົ້າມາມີບົດບາດຫຼາຍຢູ່ໃນພາກ ພື້ນນີ້ຫຼາຍຂຶ້ນ, ໂດຍສະເພາະແມ່ນຍ້ອນບັນຫາທະເລຈີນໃຕ້. ເຊິ່ງເມື່ອບໍ່ດົນ ມານີ້ ປະທານປະ ເທດ ຫວຽດນາມ ໄດ້ໄປຢ້ຽມຢາມປະທານາທິບໍດີ ສະຫະລັດ ທ່ານ ໂຈ ໄບເດັນ ເພື່ອເສີມຂະຫຍາຍສາຍພົວພັນ ແລະ ການເປັນຄູ່ຮ່ວມໃນລະດັບທີ່ ສູງຂຶ້ນ.
ແລະ ກໍມີຈະມີກອງປະຊຸມ ອາຊຽນ ຈີນ ດ້ວຍ. ສະນັ້ນການປະຊຸມຕ່າງໆ ພວກເຮົາກໍຈະນຳມາລາຍງານໃຫ້ທ່ານໄດ້ຮັບຊາບ. ກະລຸນາຕິຕາມຊົມໃຫ້ໄດ້.
ເຊິ່ງເຮົາຈະມີລາຍງານຂ່າວ ມາໃຫ້ທ່ານໄດ້ຮັບຟັງໃນແລງມື້ອື່ນນີ້.
ຟໍຣັມສະແດງຄວາມຄິດເຫັນ