ລັດຖະບານ ລາວ ວາງແຜນການຈະກໍ່ສ້າງທາງລົດໄຟເພີ່ມຂຶ້ນອີກ 3 ເສັ້ນທາງເພື່ອເຊື່ອມຕໍ່ ລາວ ກັບ ໄທ ແລະ ຫວຽດນາມ ທັງຍັງເປັນການເຊື່ອມໂຍງກັບເສັ້ນທາງລົດໄຟ ລະຫວ່າງ ລາວ ກັບ ຈີນ ອີກດ້ວຍ.
ທ່ານ ບຸນຈັນ ສິນທະວົງ ລັດຖະມົນຕີວ່າການກະຊວງ ໂຍທາທິການ ແລະ ຂົນສົ່ງຖະແຫຼງ ຢືນຢັນວ່າ ລັດຖະບານ ລາວ ໄດ້ວາງແຜນການທີ່ຈະກໍ່ສ້າງທາງລົດໄຟເພີ່ມຂຶ້ນໃນ 3 ເສັ້ນ ທາງດ້ວຍກັນ ກໍຄືເສັ້ນທາງຈາກນະຄອນຫຼວງວຽງຈັນ ໄປທ່າແຂກໃນແຂວງຄຳມ່ວນ ແລະ ເຊື່ອຕໍ່ໄປທ່າເຮືອ Vung Ang ແຂວງ Ha Thinh ຂອງ ຫວຽດນາມ ກັບເສັ້ນທາງຈາກທ່າແຂກໄປ ສະຫວັນນະເຂດ - ປາກເຊ - ດ່ານວັງເຕົ່າໃນແຂວງ ຈຳປາສັກ ເພື່ອທີ່ຈະເຊື່ອມຕໍ່ກັບເສັ້ນທາງລົດໄຟຂອງ ໄທ ທີ່ຈັງຫວັດ ອຸບົນຣາຊທານີ ແລະ ເສັ້ນທາງຈາກ ສະຫວັນນະ ເຂດໄປດ້ານ ລາວ ບາວ ເພື່ອທີ່ຈະເຊື່ອມຕໍ່ໄປຍັງທ່າເຮືອໃນແຂວງ ດານັງ ຂອງ ຫວຽດນາມ.
ໂດຍສຳລັບເສັ້ນທາງທີ 1 ນັ້ນຈະດຳເນີນການສຶກສາຄວາມເປັນໄປໄດ້ໃນທ້າຍປີ 2015 ນີ້ດ້ວຍຄວາມຊ່ວຍເຫຼືອຈາກລັດຖະບານ ຍີ່ປຸ່ນ ແລະ ເສັ້ນທາງທີ 3 ກໍເປັນການລົງທຶນຂອງກຸ່ມບໍລິສັດ Giant ຈາກປະເທດ ມາເລເຊຍ ຊຶ່ງໄດ້ເລີ່ມລົງມືກໍ່ສ້າງເພື່ອໃຫ້ແລ້ວສຳເລັດພາຍໃນ 5 ປີຕໍ່ໜ້າ.
ທ່ານ ບຸນຈັນ ຢືນຢັນວ່າແຜນການກໍ່ສ້າງທາງລົດໄຟທັງ 3 ເສັ້ນ ທາງດັ່ງນີ້ຈະເຊື່ອມໂຍງເຂົ້າກັບເສັ້ນທາງລົດໄຟຈາກ ຈີນ ມານະຄອນຫຼວງວຽງຈັນ ຊຶ່ງຈະເລີ່ມລົງມືດຳເນີນການໃນທ້າຍປີ 2015 ນີ້ຖ້າຫາກວ່າການປະສານງານລະຫວ່າຄະນະຮັບຜິດຊອບຂອງທາງການ ລາວ ແລະ ຈີນ ໄດ້ດຳເນີນໄປຕາມແຜນການ ທີ່ວາງໄວ້ໃນທຸກໆດ້ານ ເຊັ່ນການຕົກລົງຮ່ວມລົງທຶນໃນໂຄງການ ແລະ ການສ້າງຕັ້ງບໍລິສັດຮ່ວມທຶນຂຶ້ນມາຮັບຜິດຊອບໂຄງການທັງໝົດເປັນຕົ້ນ.
ທັງນີ້ໂດຍລັດຖະບານ ລາວ ແລະ ຈີນ ໄດ້ຕົກລົງໃນຫຼັກການຮ່ວມກັນແລ້ວວ່າຈະຮ່ວມກັນລົງທຶນໂດຍກົງໃນສັດສ່ວນ 40 ເປີເຊັນຂອງມູນຄ່າການລົງທຶນທັງໝົດທີ່ຄາດວ່າຈະມີມູນຄ່າເຖິງ 6,800 ລ້ານໂດລາ ສ່ວນອີກ 60 ເປີເຊັນທີ່ເຫຼືອກໍຈະເປັນການລົງທຶນຂອງບໍລິສັດຮ່ວມທຶນທີ່ຈະສ້າງຕັ້ງຂຶ້ນມາຮັບຜິດຊອບການພັດທະນາໂຄງການການຄຸ້ມຄອງການບໍລິຫານ ແລະ ການກູ້ຢືມເງິນລົງທຶນຈາກສະຖາບັນການເງິນໃນປະເທດ ຈີນ.
ທ່ານ ບຸນຈັນ ໄດ້ໃຫ້ການຢືນຢັນວ່າ ລັດຖະບານ ລາວ ປະກອບສ່ວນການລົງທຶນໃນ ໂຄງການໃນມູນຄ່າລວມ 840 ລ້ານໂດລາຊຶ່ງໃນນີ້ຈະເປັນການກູ້ຢຶມຈາກລັດຖະບານ ຈີນ ໃນມູນຄ່າ 500 ລ້ານໂດລາ ໂດຍຈະມີໄລຍະເວລາຜ່ອນຊຳລະຄືນໃນ 20 ປີ ດ້ວຍອັດຕາດອກເບ້ຍ 3 ເປີເຊັນຕໍ່ປີ ແລະ ຍັງມີໄລຍະທີ່ປອດການຊຳລະໜີ້ໃນ 5 ປີທຳອິດອີກດ້ວຍ ຫາກແຕ່ວ່າລັດຖະບາຍ ລາວ ກໍຈະຕ້ອງຮັບປະກັນໜີ້ເງິນກູ້ດັ່ງກ່າວດ້ວຍລາຍໄດ້ຈາກບໍ່ແຮ່ Bauxite 1 ແຫ່ງ ແລະ ບໍ່ແຮ່ Potash 3 ແຫ່ງທີ່ເປັນການລົງທຶນຂອງກຸ່ມທຸລະກິດ ຈີນ ໃນ ລາວ.
ໂຄງການກໍ່ສ້າງທາງລົດໄຟໃນ ລາວ ເພື່ອເຊື່ອມຕໍ່ກັບ ຈີນ ຈະມີໄລຍະທາງຍາວ 417 ກິໂລແມັດຈາກດ່ານຊາຍແດນບໍ່ເຕັນ - ບໍ່ຫານມາຍັງນະຄອນຫຼວງວຽງຈັນ ໂດຍເປັນລາງລົດໄຟຂະໜາດກວ້າງ 1.435 ແມັທີ່ແຍກກັນລະຫວ່າງຂະບວນໂດຍສານ ແລະ ຂະບວນຂົນສິນຄ້າທີ່ມີຄວາມໄວ 160 ແລະ 120 ກິໂລແມັດຕໍ່ຊົ່ວໂມງຕາມລຳດັບໂດຍຈະມີທັງໝົດ 31 ສະຖານີ ແລະ ໃນນີ້ກໍຈະເປັນສະຖານີຂະໜາດໃຫຍ່ 5 ແຫ່ງທີ່ບ້ານ ນາເຕີຍ ທີ່ເມືອງໄຊ ທີ່ຫຼວງພະບາງ ທີ່ວັງວຽງ ແລະ ນະຄອນຫຼວງວຽງຈັນ ໂດຍຈະນຳໃຊ້ເງິນທຶນລວມເຖິງ 6,800 ລ້ານໂດລາ ຊຶ່ງລັດຖະບານ ລາວ ຈະປະກອບສ່ວນ 840 ລ້ານໂດລາ ສ່ວນທີ່ເຫຼືອກໍຈະຕ້ອງກູ້ຢືມຈາກ ຈີນ.
ແຕ່ຢ່າງໃດກໍຕາມ ທາງການ ລາວ ກໍຕຽມພ້ອມແລ້ວສຳລັບການຈັດຕັ້ງປະຕິບັດໃນພາກຕົວຈິງໃນດ້ານຕ່າງໆທັງກໍຍັງໝັ້ນໃຈດ້ວຍວ່າໂຄງການກໍ່ສ້າງທາງລົດໄຟດັ່ງກ່າວນີ້ຈະສົ່ງຜົນດີຕໍ່ການພັດທະນາເສດຖະກິດ ແລະ ການເຊື່ອມຕໍ່ ລາວ ເຂົ້າກັບ ໄທ ແລະ ອາຊຽນ ດ້ວຍ ດັ່ງທີ່ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີຜູ້ຊີນຳຂົງເຂດເສດຖະກິດການຜະລິດ ແລະ ຈະລາຈອນ ໄດ້ໃຫ້ການຢືນຢັນວ່າ
“ປະສິດທິຜົນການລົງທຶນຫັ່ນນະມັນຕ່ຳ ແຕ່ວ່າປະສິດທິຜົນເສດຖະກິດນັ້ນສູງ ປະເທດເຮົານີ້ປະສິດທິຜົນເສດຖະກິດຂອງທາງລົດໄຟນີ້ແມ່ນ 31 ເປີເຊັນ ພວກເຮົາລະບໍ່ຮູ້ວ່າເມື່ອລົດໄຟເສັ້ນນີ້ເຊື່ອມຕໍ່ກັບປະເທດ ໄທ ແລ້ວ ປະເທດ ໄທ, ມາເລເຊຍ, ສິງກະໂປ ສິມານຳໃຊ້ເທົ່າໃດພວກເຮົາກະໄລ່ບໍ່ໄດ້ເດ້ ອັນນີ້ຄາດຄະເນບໍ່ເປັນ ສະນັ້ນກະຖ້າລອງເບິ່ງຊະກ່ອນບໍ່ໃຫ້ມັນມີຊະກ່ອນແມະ ຄັນມີແລ້ວຄົນມັນຈັງສິມາໃຊ້ເວລານັ້ນຈັງເວົ້າບໍ”
ຊຶ່ງສອດຄ່ອງກັບການລົງນາມໃນບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງໄທ ແລະ ຈີນ ໃນການກໍ່ສ້າງທາງລົດໄຟລາງຄູ່ຄວາມໄວປານກາງເມື່ອທ້າຍປີ 2014 ຢູ່
ບາງກອກ ທີ່ແນໃສ່ກສຍພັດທະນາທາງລົດໄຟເພື່ອເຊື່ອມຕໍ່ກັນໃຫ້ໄດ້ພາຍໃນປີ 2022 ດ້ວຍການຮ່ວມລົງທຶນເພື່ອກໍ່ສ້າງລົດໄຟລາງຄູ່ລະດັບຄວາມໄວປານກາງ 2 ເສັ້ນທາງໃນ
ໄທ ຄື ໜອງຄາຍ-ແກ່ງຄອຍ-ມາບຕາພຸດ ແລະ ແກ່ງຄອຍ ຫາ ບາງກອກ ເພື່ອເຊື່ອມໂຍງໄປ ລາວ ແລະ ຈີນ ໄປເຖິງ ມາເລເຊຍ ແລະ ສິງກະໂປ ໄດ້ດ້ວຍນັ້ນເອງ.
