ທ່ານພັນຄໍາ ວິພາວັນ ລັດຖະມົນຕີແລະເລຂາພັກ ກະຊວງສຶກສາທິການຄົນໃໝ່ ໄດ້ຖະແຫລງຢືນຢັນຕໍ່ກອງປະຊຸມໃຫຍ່ຄັ້ງທີ່ 7 ຂອງພັກ ກະຊວງເມື່ອທ້າຍອາທິດຜ່ານມານີ້ວ່າ
ເປົ້າໝາຍສໍາຄັນຂອງແຜນການຍຸດທະສາດການປະຕິຮູບການສຶກສາແຫ່ງຊາດລາວຈາກ
ປັດຈຸບັນນີ້ໄປຈົນເຖິງປີ 2015 ກໍຄືການຂະຫຍາຍໂອກາດທາງດ້ານການສຶກສາເພື່ອຄົນ
ລາວທຸກຄົນ, ໂດຍສະເພາະແມ່ນການຂະຫຍາຍໂອກາດໃນດ້ານການສຶກສາໄປສູ່ເຂດຊົນ
ນະບົດໃນທົ່ວປະເທດລາວໃຫ້ໄດ້ຢ່າງທົ່ວເຖິງຢ່າງແທ້ຈິງ. ເຖິງແມ່ນວ່າໃນປັດຈຸບັນນີ້ລາວຈະ
ມີ ໂຮງຮຽນປະຖົມຢູ່ໃນລາວ 94% ຂອງຈໍານວນໝູ່ບ້ານທັງໝົດໃນທົ່ວປະເທດ ແລະໃນ
ຂະນະດຽວກັນກໍເຮັດໃຫ້ 91.6% ຂອງເດັກນ້ອຍໃນໄວຮຽນທັງໝົດມີໂອກາດໄດ້ຮຽນໜັງ
ສືໃນລະດັບປະຖົມ. ສ່ວນ 68% ກໍໄດ້ຮຽນຈົນຈົບມັດທະຍົມຕົ້ນກໍຕາມ ຫາກແຕ່ວ່າໂອກາດ
ໃນການໄດ້ຮຽນລະດັບມັດທະຍົມປາຍ ແລະລະດັບປະລິນຍາຕີນັ້ນ ກໍຍັງຄົງມີອັດຕາສະເລ່ຍ
ທີ່ຕໍ່າຫລາຍກັບທັງຍັງປາກົດວ່າມີຄຸນນະພາບການສຶກສາໃນລະດັບທີ່ຕໍ່າອີກດ້ວຍ.
ຍິ່ງໄປກວ່ານັ້ນ ການທີ່ທາງການລາວໄດ້ດໍາເນີນການປະຕິຮູບທາງດ້ານການສຶກສາດ້ວຍການ
ເພີ່ມປີຮຽນສໍາລັບ ຂັ້ນມັດທະຍົມຕົ້ນຂຶ້ນອີກ 1 ປີ ຊຶ່ງກໍເປັນຜົນເຮັດໃຫ້ການຮຽນໃນລະດັບ
ມັດທະຍົມຕົ້ນຈະຕ້ອງໃຊ້ເວລາເພີ່ມຂຶ້ນຈາກເດີມ 3 ປີ ເປັນ 4 ປີ. ສ່ວນການຮຽນໃນລະ
ດັບປະຖົມກໍຍັງຄົງຕ້ອງໃຊ້ເວລາ 5 ປີ ແລະມັດທະຍົມປາຍ 3 ປີ ເຊັ່ນເດີມນັ້ນ ກໍຍັງມີ
ຄວາມແຕກຕ່າງກັບປະເທດອື່ນໆໃນກຸ່ມອາຊ່ຽນດ້ວຍກັນ ເພາະວ່າໃນລະດັບປະຖົມນັ້ນ
ປະເທດສ່ວນໃຫຍ່ຈະມີການຮຽນການສອນເປັນເວລາ 6 ປີ ຫາກແຕ່ຢູ່ໃນລາວກໍຍັງຄົງເປັນ
5 ປີ ເຊັ່ນເດີມ. ໂດຍເຊື່ອວ່າມີສາເຫດສໍາຄັນມາຈາກຂໍ້ຈໍາກັດໃນດ້ານງົບປະມານລາຍຈ່າຍ
ຂອງລັດຖະບານລາວນັ້ນເອງ. ຊຶ່ງດ້ວຍການຂາດແຄນທາງດ້ານງົບປະມານດັ່ງກ່າວ ກໍຍັງ
ເຮັດໃຫ້ການພັດທະນາການສຶກສາ ມີຄວາມແຕກໂຕນກັນຢ່າງຫລວງຫລາຍລະຫວ່າງເຂດ
ໃນເມືອງກັບເຂດຊົນນະບົດ. ທັງນີ້ກໍເພາະວ່າງົບປະມານສໍາລັບພັດທະນາການສຶກສາ ຍັງຄົງ
ບໍ່ຕົກໄປເຖິງເຂດຊົນນະບົດຢ່າງແທ້ຈິງ. ດັ່ງທີ່ເຈົ້າໜ້າທີ່ຫ້ອງການສຶກສາທິການຢູ່ໃນແຂວງ
ອັດຕະປືໄດ້ໃຫ້ການອະທິບາຍເຖິງສະພາບການທີ່ເປັນຈິງຢູ່ໃນແຂວງອັດຕະປືວ່າ:
“ອຸບປະກອນຮັບໃຊ້ການສອນນີ້ກະບໍ່ພຽງພໍ ເປັນຕົ້ນແມ່ນສອນວິຊາຄະນິດສາດນີ້
ໄມ້ບັນທັດອີສັງກະບໍ່ມີ ໂຕ໊ະ ຕັ່ງນີ້ກໍບໍ່ມີພຽງພໍ ເປັນຕົ້ນແມ່ນນັກຮຽນ ປ. 1 ນີ້ນັ່ງ
ສາມນັ່ງສີ່ແຫຍ້ກັນ. ບາງຄົນກໍບໍ່ມີໂຕ໊ະ ຝົນຕົກແຮງກະຮົ່ວ ລົມແຮງກະຮຽນບໍ່ໄດ້
ຂີ້ດິນປິວມາໃສ່ ຈັກໜ່ອຍຮອດຍາມໜາວນີ້ລົມກະແຮງ ຂີ້ຝຸ່ນໄງ່ຈົນຮຽນກະບໍ່ເປັນ
ພື້ນ ກະເປັນຂີ້ດິນເປື້ອນ ຝົນຕົກເປັນບວກງົວຄວາຍກະມາຂີ້ໃສ່ ກະຢາກເຮັດຫລັງ
ໃໝ່ແລະໂຕະຕັ່ງນີ້ຄັນມາຄົບກະບໍ່ພໍກັນ”
ແຕ່ຢ່າງໃດກໍຕາມ ທາງການລາວກໍຄາດຫວັງວ່າດ້ວຍການພັດທະນາທາງເສດຖະກິດທີ່ມີ
ການຂະຫຍາຍຕົວເພີ່ມ ຂຶ້ນຢ່າງຕໍ່ເນຶ່ອງນັ້ນ ກໍຈະເປັນຜົນເຮັດໃຫ້ລັດຖະບານລາວມີລາຍ
ຮັບເຂົ້າງົບປະມານລາຍຈ່າຍສໍາລັບການພັດ ທະນາທາງດ້ານການສຶກສາຫລາຍຂຶ້ນເຊັ່ນກັນ
ໂດຍສໍາລັບເປົ້າໝາຍຂອງລັດຖະບານລາວນັບຈາກປີນີ້ໄປຈົນ ເຖິງປີ 2015 ກໍຄືການເພີ່ມ
ງົບປະມານສໍາລັບການພັດທະນາການສຶກສາໃຫ້ເປັນລະຫວ່າງ 18-20% ຂອງ ງົບປະມານ
ລາຍຈ່າຍທັງໝົດໃນແຕ່ລະປີ ໂດຍໃນໄລຍະທີ່ຜ່ານມາລັດຖະບານລາວສາມາດຈັດສັນງົບປະ
ມານໃຫ້ກັບການພັດທະນາການສຶກສາຂອງຊາດໄດ້ສະເລ່ຍພຽງແຕ່ 12% ເທົ່ານັ້ນ.
