ທາງການລາວ ຈະເພີ້ມອັດຕາຄວາມໜາແໜ້ນ ຂອງປ່າໄມ້
ໃຫ້ສູງຂຶ້ນ ດ້ວຍການແບ່ງປ່າໄມ້ ອອກເປັນ 3 ປະເພດ ຢ່າງ
ຊັດເຈນ ກໍຄືປ່າປ້ອງກັນ ປ່າສະຫງວນ ແລະ ປ່າຜະລິດໃນ
ທົ່ວປະເທດ.
ທ່ານນູລິນ ສິນບັນດິດ ລັດຖະມົນຕີວ່າການກະຊວງຊັບພະຍາກອນ ແລະສິ່ງແວດລ້ອມ
ທຳມະຊາດ ໄດ້ໃຫ້ການຢືນຢັນວ່າມາດຕະການໜຶ່ງ ທີ່ຈະເຮັດໃຫ້ການຄຸ້ມຄອງ ແລະ
ປົກປັກຮັກສາຊັບພະຍາກອນປ່າໄມ້ໃນລາວ ໄດ້ຢ່າງມີປະສິດທິພາບສູງຂຶ້ນ ກໍຄືການ
ກຳນົດ ແລະແບ່ງປ່າໄມ້ອອກເປັນ 3 ປະເພດຢ່າງຊັດເຈນ ຊຶ່ງປະກອບດ້ວຍປ່າປ້ອງກັນ
ປ່າສະຫງວນ ແລະປ່າຜະລິດຕາມລຳດັບ.
ໂດຍສຳຫລັບປ່າປ້ອງກັນນັ້ນ ໄດ້ມີການປະກາດໃຫ້ກວມເອົາພື້ນທີ່ທັງໝົດ 7 ລ້ານ
9 ແສນ ເຮັກຕາ ຊຶ່ງແບ່ງເປັນປ່າປ້ອງກັນລະດັບຊາດ 49 ແຫ່ງ ແລະ ປ່າປ້ອງກັນລະດັບ
ທ້ອງຖິ່ນ 90 ແຫ່ງ ແຕ່ການສຳຫລວດໃນລະຍະທີ່ຜ່ານມາກໍພົບວ່າ ປ່າປ້ອງກັນໃນທົ່ວ
ປະເທດຍັງຄົງເຫລືອສະພາບປ່າໄມ້ປົກຫຸ້ມຢູ່ພຽງແຕ່ 3 ລ້ານ 7 ໝື່ນເຮັກຕາ ເທົ່ານັ້ນ.
ສ່ວນເຂດປ່າສະຫງວນນັ້ນ ກໍໄດ້ປະກາດກວມເອົາພື້ນທີ່ທັງໝົດ 4 ລ້ານ 7 ແສນເຮັກຕາ
ຊຶ່ງແບ່ງເປັນປ່າສະຫງວນ ລະດັບຊາດ 24 ແຫ່ງ ແລະ ປ່າສະຫງວນລະດັບທ້ອງຖິ່ນ 2
ແຫ່ງໂດຍຈາກການສຳຫລວດຕົວຈິງນັ້ນ ກໍພົບວ່າປ່າສະຫງວນຍັງຄົງເຫລືອສະພາບ
ປ່າໄມ້ປົກຫຸ້ມຢູ່ພຽງ 2 ລ້ານ 2 ແສນ 1 ໝື່ນເຮັກຕາ ເທົ່ານັ້ນ ແລະສຳຫລັບປ່າຜະລິດ
ທີ່ແບ່ງອອກເປັນ 51 ເຂດໃນພື້ນທີ່ 3 ລ້ານ 1 ແສນເຮັກຕານັ້ນ ກໍຍັງຄົງເຫລືອສະພາບ
ປ່າໄມ້ປົກຫຸ້ມຢູ່ພຽງແຕ່ 1 ລ້ານ 4ແສນ 6 ໝື່ນເຮັກຕາ ເທົ່ານັ້ນ.
ຍິ່ງໄປກວ່ານັ້ນ ທ່ານນູລິນ ກໍຍັງຍອມຮັບດ້ວຍວ່າ ປ່າໄມ້
ຢູ່ໃນເຂດປ່າສະຫງວນແຫ່ງຊາດ ໄດ້ລົດລະດັບຄວາມໜາ
ແໜ້ນລົງຢ່າງຫລວງຫຼາຍໃນລະຍະ 10 ປີມານີ້ ໂດຍຈາກ
ການສຳຫລວດໃນປີ 2013 ພົບວ່າເຂດປ່າສະຫງວນ ແຫ່ງ
ຊາດ ທີ່ຢູ່ພາຍໃຕ້ຄວາມຮັບຜິດຊອບ ຂອງກະຊວງຊັບພະ
ຍາກອນແລະສິ່ງແວດລ້ອມ ທຳມະຊາດນັ້ນ ມີເນື້ອທີ່ລວມ
ພຽງ 4 ລ້ານກວ່າເຮັກຕາເທົ່ານັ້ນ ໃນທົ່ວປະເທດ.
ຫາກແຕ່ໃນປັດຈຸບັນກໍເຊື່ອວ່າ ລະດັບຄວາມໜາແໜ້ນ ຂອງ
ປ່າໄມ້ໃນເຂດປ່າສະຫງວນດັ່ງກ່າວ ໄດ້ລົດລົງເຫລືອຢູ່ບໍ່ເຖິງ
4 ລ້ານເຮັກຕາ ໂດຍນອກຈາກຈະມີສາເຫດມາຈາກການຖາງ
ແລະ ເຜົາປ່າ ເພື່ອເຮັດໄຮ່ເລື່ອນລອຍ ຂອງປະຊາຊົນລາວແລ້ວ
ກໍຍັງມີສາເຫດສຳຄັນມາຈາກການລັກລອບຕັດໄມ້ ເພື່ອການຄ້າຜິດກົດໝາຍ ທີ່ເກີດຂຶ້ນ
ຢ່າງກວ້າງຂວາງໃນທົ່ວປະເທດລາວ ໃນປັດຈຸບັນນີ້.
ໂດຍສະເພາະແມ່ນການທີ່ບັນດາພໍ່ຄ້າໄມ້ໄດ້ວ່າຈ້າງໃຫ້ປະຊາຊົນລາວ ໃນລະດັບ
ທ້ອງຖິ່ນເພື່ອໃຫ້ເຂົ້າໄປລັກລອບຕັດໄມ້ໃນເຂດປ່າສະຫງວນແຫ່ງຊາດນັ້ນ ຖືເປັນ
ບັນຫາທີ່ໄດ້ເກີດຂຶ້ນຢ່າງກວ້າງຂວາງທີ່ສຸດໃນເວລານີ້ ທັງກໍຍັງເປັນການຍາກທີ່ຈະ
ປ້ອງກັນອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງ ໄດ້ຢືນຢັນວ່າ:
“ການບຸກລຸກປ່າສະຫງວນ ປ່າປ້ອງກັນນີ້ ມັນມີຫຼາຍສາເຫດ ເປັນຕົ້ນນີ້ແມ່ນການ
ຖາງປ່າເຮັດໄຮ່ຫັ້ນ ໄຟໄໝ້ປ່າແລ້ວກະມີນັກທຸລະກິດຈຳນວນໜຶ່ງທີ່ຢູ່ເບື້ອງຫລັງ
ໃຫ້ປະຊາຊົນລັກລອບຕັດໄມ້ ໂດຍນຳໃຊ້ລົດໄຖນາຫັ້ນ ແລ້ວໄປແກ່ໄມ້ໃນກາງຄືນ ອັນນີ້ຍາກໃນການສະກັດກັ້ນ.”
ເຈົ້າໜ້າທີ່ຂັ້ນສູງຍັງໄດ້ໃຫ້ການຍອມຮັບດ້ວຍວ່າ ນອກຈາກການລັກລອບຕັດໄມ້ ໃນ
ເຂດປ່າສະຫງວນແຫ່ງຊາດດັ່ງກ່າວແລ້ວ ເຂດປ່າປ້ອງກັນ ໃນລາວທີ່ມີພື້ນທີ່ກວ້າງກວ່າ
7 ລ້ານເຮັກຕາ ໃນທົ່ວປະເທດລາວໃນປັດຈຸບັນນີ້ ກໍກຳລັງຕົກຢູ່ພາຍໃຕ້ສະພາບບັນຫາ
ດຽວກັນ.
ກ່ອນໜ້ານີ້ ໜ່ວຍຕຳຫລວດສະເພາະກິດຂອງລາວຢຶດໄມ້ທີ່ລັກລອບຕັດໂດຍຜິດກົດໝາຍ ໄດ້ຫຼາຍກວ່າ 8 ແສນແມັດກ້ອນໃນຊ່ວງ 6 ເດືອນທຳອິດຂອງປີ 2014 ນີ້ ໂດຍໄມ້ ທີ່ຢຶດໄດ້ ດັ່ງກ່າວ ມີປະລິມານຫຼາຍກວ່າ ໄມ້ທີ່ທາງການລາວອະນຸຍາດໃຫ້ຕັດຢ່າງຖືກຕ້ອງໃນລະຍະດຽວກັນນີ້ເຖິງ 8 ເທົ້າຕົວ.
