ທາງການລາວສ້າງຕັ້ງໜ່ວຍສະເພາະກິດປະຈຳຢູ່ດ່ານຊາຍແດນ
ທີ່ຕິດກັບປະເທດໄທ ເພື່ອຂຶ້ນທະບຽນ ແລະ ໃຫ້ການຊ່ວຍເຫຼືອ
ແຮງງານລາວ ໃນການເດີນທາງໄປທຳງານຢູ່ໄທຢ່າງຖືກຕ້ອງ.
ທ່ານພູວັນ ຈັນທະວົງ ຫົວໜ້າກົມພັດທະນາຝີມືແຮງງານ ແລະ
ຈັດຫາງານໃນກະຊວງແຮງງານ ແລະສະຫວັດດີການສັງຄົມຂອງ
ລາວ ໄດ້ໃຫ້ການຢືນຢັນວ່າ ກະຊວງແຮງງານ ໄດ້ສ້າງຕັ້ງໜ່ວຍ
ງານສະເພາະກິດຂຶ້ນມາ ເພື່ອຮັບຜິດຊອບ ໃນການດຳເນີນງານ
ຂຶ້ນທະບຽນ ແລະ ໃຫ້ການຊ່ວຍເຫຼືອ ແຮງງານລາວທີ່ຕ້ອງການເດີນທາງ ໄປທຳງານຢ່າງຖືກຕ້ອງຕາມກົດໝາຍ ຢູ່ປະເທດໄທເມື່ອບໍ່ນານມານີ້.
ໂດຍໜ່ວຍສະເພາະກິດດັ່ງກ່າວນີ້ ຈະປະຈຳຢູ່ທີ່ດ່ານຊາຍແດນ ທີ່ຕິດກັບໄທໃນ 8 ດ່ານ
ຊາຍແດນດ້ວຍກັນ ກໍຄືດ່ານຊາຍແດນປະຈຳຂົວມິດຕະພາບລາວ ໄທ 4 ແຫ່ງຢູ່ທີ່ເຂດ
ນະຄອນຫລວງວຽງຈັນ ແຂວງຄຳມ່ວນ ສະຫວັນນະເຂດ ແລະແຂວງບໍ່ແກ້ວ ສ່ວນອີກ 4
ໜ່ວຍ ທີ່ເຫຼືອນັ້ນ ກໍປະຈຳຢູ່ດ່ານຊາຍແດນໃນແຂວງໄຊຍະບູລີ ບໍລິຄຳໄຊ ສາລະວັນ ແລະ ຈຳປາສັກ ເນື່ອງຈາກວ່າເປັນເຂດທີ່ມີແຮງງານລາວເດີນທາງໄປທຳງານໃນໄທຫຼາຍທີ່ສຸດ.
ທັງນີ້ໂດຍທາງການລາວ ໄດ້ປະມານການວ່າ ມີແຮງງານລາວຫຼາຍກວ່າ 1 ແສນຄົນທີ່ເດີນ ທາງໄປທຳງານໃນໄທ ຊຶ່ງໃນຈຳນວນນີ້ ກໍປະກົດວ່າ ມີພຽງ 17,000 ກວ່າຄົນເທົ່ານັ້ນ ທີ່ໄດ້ຂຶ້ນທະບຽນໃນລາວ ເພື່ອເດີນທາງໄປທຳງານຢ່າງຖືກຕ້ອງຕາມກົດໝາຍໃນໄທ ສ່ວນອີກເກີນກວ່າ 9 ໝື່ນຄົນນັ້ນ ກໍຄືແຮງງານລາວ ທີ່ລັກລອບທຳງານ ໂດຍຜິດກົດໝາຍຢູ່ໃນໄທ
ນັ້ນເອງ.
ເພາະສະນັ້ນ ເພື່ອເປັນການໃຫ້ຄວາມຊ່ວຍເຫຼືອ ແລະເຮັດໃຫ້
ແຮງງານລາວເຫຼົ່ານີ້ ເປັນແຮງງານທີ່ຖືກຕ້ອງຕາມກົດໝາຍໃນ
ໄທ ທາງການລາວຈຶ່ງໄດ້ສ້າງໜ່ວຍສະເພາະກິດຂຶ້ນມາດຳເນີນ
ງານດັ່ງກ່າວ ໃຫ້ແລ້ວສຳເລັດພາຍໃນວັນທີ 24 ສິງຫານີ້ ດັ່ງທີ່
ທ່ານພູວັນ ໄດ້ໃຫ້ການຢືນຢັນວ່າ:
"ຕ້ອງໄດ້ຫັນເຂົ້າສູ່ກອບຂອງກົດໝາຍ ມີຈຳນວນໜຶ່ງກໍ
ເກີດຈາກຄວາມບໍ່ເຂົ້າໃຈລະບຽບກົດໝາຍແດ່ ເຂົາເຈົ້າ
ກະເຂົ້າມາເລີຍ ສ່ວນຜູ້ໃຊ້ແຮງງານນັ້ນ ກະບາງເທື່ອ ກໍ
ບໍ່ເຂົ້າໃຈຂະບວນການ ແລະຂັ້ນຕອນໃນການນຳເຂົ້າ
ກະນຳເອົາເຂົ້າມາເລີຍ ເຮັດໃຫ້ການນຳໃຊ້ແຮງງານນັ້ນ
ມັນບໍ່ເປັນໄປຕາມຂະບວນການຂອງກົດໝາຍ."
ແຕ່ຢ່າງໃດກໍຕາມ ເຄືອຂ່າຍເພື່ືອໃຫ້ການຊ່ວຍເຫຼືອແຮງງານລາວ ພະມ້າ ແລະກຳປູເຈຍ ຢູ່ໃນໄທ ກໍເຊື່ອວ່າມີແຮງງານລາວຫຼາຍກວ່າ 5 ແສນຄົນທີ່ລັກລອບທຳງານ ໂດຍຜິດກົດໝາຍຢູ່ໃນເວລານີ້ ຈຶ່ງຖືເປັນແຮງງານທີ່ມີຄວາມສ່ຽງສູງ ທີ່ຈະຕ້ອງຕົກໄປເປັນເຫຍື່ອ ຂອງຂະບວນການຄ້າແຮງງານໃນໄທ ໂດຍສະເພາະແມ່ນແຮງງານລາວເພດຍິງນັ້ນ ກໍຍັງສ່ຽງທີ່ຈະຖືກບີບບັງຄັບ ໃຫ້ຕ້ອງຂາຍບໍລິການທາງເພດໃນໄທຫຼາຍຂຶ້ນນັບມື້ອີກດ້ວຍ.
ທັງນີ້ໂດຍສາເຫດສຳຄັນທີ່ເຮັດໃຫ້ແຮງງານລາວ ຕ້ອງພາກັນເດີນທາງເຂົ້າໄປທຳງານໃນໄທຫຼາຍຂຶ້ນນັບມື້ນັ້ນ ກໍຍ້ອນວ່າອັດຕາຄ່າຈ້າງສູງກວ່າຢູ່ໃນລາວ ທັງກໍຍັງມີລະດັບຄ່າຄອງຊີບຕ່ຳກວ່າຢູ່ໃນລາວນຳອີກ ສ່ວນສາເຫດທີ່ເຮັດໃຫ້ແຮງງານລາວບໍ່ຍອມຂຶ້ນທະບຽນກັບທາງການລາວນັ້ນ ກໍເພາະວ່າມີຄ່າໃຊ້ຈ່າຍທີ່ສູງກວ່າ 5 ລ້ານກີບ ຫຼື ປະມານ 2 ໝື່ນບາດຕໍ່ປີ ໃນຂະນະທີ່ການເລືອກໃຊ້ບໍລິການ ຂອງບັນດານາຍໜ້າຈັດຫາງານໃນໄທ ຈະເສຍຄ່າໃຊ້ຈ່າຍພຽງແຕ່ 5,000 ບາດເທົ່ານັ້ນ.
ຊຶ່ງດ້ວຍສະພາບການດັ່ງກ່າວ ກໍຍັງເຮັດໃຫ້ລາວຕ້ອງປະສົບກັບບັນຫາຂາດແຄນແຮງງານພາຍໃນປະເທດຫຼາຍຂຶ້ນນັບມື້ອີກດ້ວຍ ໂດຍຈາກລາຍງານຂອງກະຊວງແຮງງານ ຂອງລາວໄດ້ລະບຸວ່າໃນຊ່ວງປີ 2011-2013 ໄດ້ອະນຸຍາດເພີ້ມຂຶ້ນອີກ 9 ໝື່ນກວ່າຄົນ ເພື່ອຕອບສະໜອງຄວາມຕ້ອງການແຮງງານຂອງບໍລິສັດຕ່າງຊາດ ທີ່ລົງທຶນຢູ່ໃນລາວ ຊຶ່ງສ່ວນໃຫຍ່ກໍແມ່ນແຮງງານຈາກຫວຽດນາມ ຈີນ ແລະໄທນັ້ນເອງ.
