ທາງການລາວແລະມຽນມາ ຕົກລົງເຊື່ອມຕໍ່ການບິນໃນ 2 ເສັ້ນທາງເພື່ອເສີມຂະຫຍາຍ ການ ທ່ອງທ່ຽວລະຫວ່າງນະຄອນຫຼວງວຽງຈັນ ກັບນະຄອນຢ່າງກຸ້ງ ແລະເມືອງມໍລະດົກໂລກ ຫຼວງພະບາງກັບເມືອງພູກາມ. ຊົງຣິດ ໂພນເງິນ ນັກຂ່າວ VOA ມີຣາຍງານຈາກບາງກອກ ມາສະເໜີທ່ານໃນອັນດັບຕໍ່ໄປ.
ການຕົກລົງເຊື່ອຕໍ່ການບິນລະຫວ່າງ ສປປ ລາວ ກັບ ມຽນມາ ໄດ້ມີຂຶ້ນໃນໂອກາດການເດີນ ທາງຢ້ຽມຢາມ ສປປ ລາວ ຢ່າງເປັນທາງການໂດຍ ທ່ານ ຖິ່ນ ຈໍ ປະທານາທິບໍດີ ສາທາລະ ນະລັດແຫ່ງສະຫະພາບມຽນມາ ຕາມການເຊີນຂອງທ່ານບຸນຍັງ ວໍຣະຈິດ ປະທານປະເທດລາວ ເມື່ອຕົ້ນເດືອນ ພຶດສະພານີ້ ພາຍໃຕ້ເປົ້າໝາຍເພື່ອເຊື່ອມໂຍງການທ່ອງທ່ຽວລະຫວ່າງນະຄອນຫຼວງວຽງຈັນກັບນະຄອນຢ້າງກຸ້ງ ແລະເມືອງມໍລະດົກໂລກ ຫຼວງພະບາງ ກັບເມືອງ ພູກາມ.
ໂດຍໃນປະຈຸບັນນີ້ ລັດວິສາຫະກິດການບິນລາວ (Lao Airlines) ມີທ້ຽວບິນເຊື່ອມຕໍ່ກັບ 6 ປະເທດໃນ 12 ເສັ້ນທາງຈາກນະຄອນຫຼວງວຽງຈັນ ໄປບາງກອກ ແລະຊຽງໃໝ່ຂອງໄທ ເມືອງຄຸນໝິງ ຊຽງຮຸ່ງ ແລະເມືອງ ກວາງໂຈວຂອງຈີນ ນະຄອນຫຼວງໂຊລ ແລະເມືອງປູຊານຂອງເກົາຫຼີໃຕ້ນະຄອນຮາໂນ່ຍແລະໂຮຈິມິນຊີຕີ້ ຂອງຫວຽດນາມ ນະຄອນຫຼວງພະນົມເປນ ແລະເມືອງສຽມຣຽມຂອງກຳປູເຈຍ ແລະນະຄອນຫຼວງວຽງຈັນ - ສິງກະໂປ ຫາກແຕ່ວ່າ ສຳຫຼັບການບິນໃນ 2 ເສັ້ນທາງລະຫວ່າງລາວກັບມຽນມາ ດັ່ງກ່າວກໍຍັງບໍ່ມີກຳໜົດ ທີ່ຊັດເຈນວ່າ ຈະເຣີ່ມເປີດການບິນໄດ້ເມື່ອໃດແທ້.
ແຕ່ຢ່າງໃດກໍຕາມ ການເປີດເສັ້ນທາງການບິນເພີ່ມຂຶ້ນດັ່ງກ່າວນີ້ ກໍຈະເຮັດໃຫ້ສະໜາມບິນນາໆຊາດວຽງຈັນ ຕ້ອງປະເຊີນກັບບັນຫາແອອັດເພີ່ມຂຶ້ນ ໂດຍຈາກການສຶກສາພົບວ່າ ສະໜາມບິນທີ່ລາວມີຢູ່ໃນປັດຈຸບັນ ຈະບໍ່ສາມາດຮອງຮັບການຂະຫຍາຍຕົວດ້ານການເງິນແລະການທ່ອງທ່ຽວ ໄດ້ໃນອີກ 10 ປີ ຕໍ່ໜ້າ ໂດຍ ເຖິງແມ່ນວ່າ ສະໜາມບິນວັດໄຕ ໃນປະຈຸບັນຈະສາມາດຮອງຮັບເຮືອບິນຂະໜາດ 350 ບ່ອນນັ່ງໄດ້ ແຕ່ກໍມີລານຈອດທີ່ສາມາດຮອງຮັບເຮືອບິນຂະໜາດໃຫຍ່ ໄດ້ພຽງ 48 ລຳ ເທົ່ານັ້ນ ສ່ວນອາຄານທີ່ພັກຜູ້ໂດຍສານ ກໍສາ ມາດຮອງຮັບໄດ້ພຽງ 3 ລ້ານຄົນ ໃນແຕ່ລະປີ ທັງຍັງບໍ່ມີພື້ນຖານທີ່ພຽງພໍ ສຳຫຼັບການຂະ ຫຍາຍອາຄານຜູ້ໂດຍສານໄດ້ອີກ ຈຶ່ງເຮັດໃຫ້ຈະຕ້ອງກໍ່ສ້າງສະໜາມບິນໃຫຍ່ ໃຫ້ແລ້ວ ເສັດໄວທີ່ສຸດ.
ທັງນີ້ລັດຖະບານລາວໄດ້ວາງແຜນການທີ່ຈະກໍ່ສ້າງສະໜາມບິນໃໝ່ໃນເຂດຮອບນອກ ນະຄອນຫຼວງວຽງຈັນໃຫ້ແລ້ວເສັດພາຍໃນປີ 2025 ໂດຍກຳມະການບິນພົນລະເຮືອນ ກໍໄດ້ລົງນາມໃນບັນທຶກຄວາມເຂົ້າໃຈວ່າດ້ວຍການສຶກສາ ຄວາມເປັນໄປໄດ້ ຂອງໂຄງ ການກໍ່ສ້າງສະໜາມບິນນາໆຊາດແຫ່ງໃໝ່ດັ່ງກ່າວ ຮ່ວມກັບກຸ່ມບໍລິສັດ ຈາກຈີນ ເມື່ອບໍ່ນານມານີ້ ໂດຍກຸ່ມບໍລິສັດຈາກຈີນຈະຮັບຜິດຊອບໃນການສຶກສາຄວາມເປັນໄປໄດ້ຂອງໂຄງການໃຫ້ແລ້ວເສັດ ພາຍໃນປີ 2018.
ສຳຫຼັບພື້ນທີ່ ທີ່ຈະທຳການສຶກສາຕາມບົດບັນທຶກຄວາມເຂົ້າໃຈດັ່ງກ່າວ ຢູ່ທີ່ຫຼັກ 35 ຖະໜົນເລກ 13 ໄດ້ ຊຶ່ງຖ້າຫາກຜົນການສຶກສາພົບວ່າ ມີຄວາມເໝາະສົມແລະຄຸ້ມຄ່າທາງເສດ ຖະກິດ ລັດຖະບານລາວ ກໍຈະໃຫ້ການສົ່ງເສີມການລົງທຶນ ທັງພາຍໃນແລະຈາກຕ່າງປະເທດໃນທັນທີ ດ້ວຍເປົ້າໝາຍຈະຊຸກຍູ້ໃຫ້ການກໍ່ສ້າງສະໜາມບິນແຫ່ງໃໝ່ໃຫ້ແລ້ວ ແລະເປີດໃຊ້ໃຫ້ໄດ້ພາຍໃນປີ 2030 ເປັນຢ່າງຊ້າ.
ແຕ່ສຳຫຼັບໄລຍະສະເພາະໜ້ານີ້ ທາງການລາວກໍໄດ້ແກ້ໄຂ ບັນຫາແອອັດຢູ່ໃນສະໜາມບິນວັດໄຕອດ້ວຍການພັດທະນາແລະປັບປຸງ ເພື່ອຍົກລະດັບສະໜາມບິນວັດໄຕໃຫ້ໄດ້ມາດ ຕະຖານ ສາກົນຫຼາຍຂຶ້ນ ດັ່ງທີ່ເຈົ້າໜ້າທີ່ຂັ້ນສູງໃນກະຊວງໂຍທາທິການແລະຂົນສົ່ງໄດ້ໃຫ້ການຢືນຢັນວ່າ“ລັດຖະບານເນາະ ພວກເຮົານີ້ ກໍໄດ້ເອົາໃຈໃສ່ໃນການພັດທະນາການບິນໃນໄລຍະຜ່ານມານີ້ ຖືວ່າໝາຍຄວາມວ່າ ລານຈອດລົດເຮືອບິນບໍ່ ຫຼືວ່າທາງຂຶ້ນ-ລົງ ລະບົບບັນຊີການບິນ ດຽວນີ້ບັນຫາທີ່ວ່າ ພວກເຮົາຈະຕ້ອງໄດ້ປັບປຸງ ກໍຄື ຍົກລະດັບອາຄານຜູ້ໂດຍສານນີ້.”
ນອກຈາກແຜນການກໍ່ສ້າງສະໜາມບິນໃໝ່ຢູ່ນະຄອນຫຼວງວຽງຈັນແລ້ວ ລັດຖະບານລາວ ກໍຍັງມີແຜນການກໍ່ສ້າງສະໜາມບິນໃໝ່ອີກ 3 ແຫ່ງທີ່ຫຼວງພະບາງ ປາກເຊ ແລະສະຫວັນນະເຂດ ຫາກແຕ່ວ່າ ກໍຍັງບໍ່ມີລາຍລະອຽດຂອງແຜນການແຕ່ຢ່າງໃດ ເພາະວ່າ ເປັນໂຄງ ການ ທີ່ຈະໃຊ້ຕ້ອງໃຊ້ເງິນລົງທຶນຢ່າງຫຼວງຫຼາຍ ໃນຂະນະທີ່ລັດຖະບານລາວ ກໍມີຂໍ້ຈຳກັດທາງດ້ານທາງດ້ານງົບປະມານງົບປະມານດ້ວຍແລ້ວ ຈຶງເຮັດໃຫ້ຕ້ອງເພີ້ມພາ ການລົງທຶນຂອງຕ່າງປະເທດເປັນດ້ານຫຼັກ ຮວມເຖິງຂໍການຊ່ວຍເຫຼືອຈາກຕ່າງປະເທດ ເພື່ອດຳເນີນການສຶກສາຄວາມເປັນໄປໄດ້ຂອງແຜນການກໍ່ສ້າງສະໜາມບິນໃໝ່ ທັງ 3 ແຫ່ດັ່ງກ່າວອີກດ້ວຍ.
