ລິ້ງ ສຳຫລັບເຂົ້າຫາ

ມູນ​ນິທິ​ມໍລະດົກ​ລາວ​​ ຈັດງານ ສະຫຼອງ​ຄົບຮອບ 6 ປີ

  • ວັນນະສອນ ແກ້ວດາຣາ

ມູນ​ນິທິ​ມໍລະດົກ​ລາວ​​ ຈັດງານ ສະຫຼອງ​ຄົບຮອບ 6 ປີ

ມູນ​ນິທິ​ມໍລະດົກ​ລາວຈັດ​ງານສະຫຼອງ​ປະຈຳປີຂຶ້ນທຸກໆປີ​ ​ຊຶ່ງ​ນຳ​ເອົາເຍົາວະຊົນຫຼື​ນັກຮຽນ​ຂອງ​ມູນ​ນິທິ​ຈາກ​ທັງ​ສອງ​
ສາຂາຄື Seattle ລັດ Washington ໃນພາກຕະເວັນ
ຕົກສຽງເໜືອຂອງສະຫະລັດ ແລະໃນເຂດນະຄອນຫຼວງ
Washington DC ມາຮວມກັນເພື່ອສືບສານສິນລະປະ,
ວັດທະນະທຳຂອງລາວ ຜ່ານທາງການສະແດງຟ້ອນລໍາ
ແລະການດົນຕີ ແລະໃນວັນເສົາທີ່ 18 ກັນຍາ ຜ່ານມານີ້
ກໍໄດ້ມີການນຳສະເໜີການສະຫຼອງດັ່ງກ່າວ ໂດຍໄດ້ນຳ
ເອົາກຸ່ມເຍົາວະຊົນຜູ້ທີ່ເກີດໃນສະຫະລັດ ມາສະແດງໃນ
ຄັ້ງນີ້ ຊຶ່ງມີຫຼາຍກ່ວາສິບຄົນ ແລະຕາງໜ້າໃຫ້ຄະນະກໍມີ
Nathan Noravong, Nacy Bounyavong, Alexis Kongmanivong ແລະ Karissa Vongkhamchanh ນັກສະແດງຈາກຄະນະກິນນະລີ ສາຂາຕາເວັນຕົກສຽງເໜືອ
ແລະຕົວແທນຈາກສະມາຄົມສະຕີລາວອະເມຣິກັນ ຂົງເຂດ Washington DC ກໍແມ່ນ Alison Phanthavong ຊຶ່ງ​ຕ່າງກໍ​ໄດ້​ສະ​ແດງ​ຄວາມຮູ້ສຶກ​ແລະຄວາມ​ເຫັນ​ທີ່​ແຕກ​ຕ່າງ​ ກັນ ຊຶ່ງ Nathan Noravong ກ່າວ​ວ່າ:

ມູນ​ນິທິ​ມໍລະດົກ​ລາວ ຈັດງານ ສະຫຼອງ​ຄົບຮອບ 6 ປີ
ມູນ​ນິທິ​ມໍລະດົກ​ລາວ ຈັດງານ ສະຫຼອງ​ຄົບຮອບ 6 ປີ

"ຄໍ່າຄືນ​ນີ້ ຂ້ານ້ອຍ​ຈະ​ຫລິ້ນ​ແຕ່​ດົນຕີ ຈະ​ບໍ່​ໄດ້​ຟ້ອນ​ມື້​ນີ້. ການ​ໄດ້​ເຂົ້າ​ມາ​ເປັນ​ສ່ວນນຶ່ງ ຂອງມູນ​ນິທິ​ມໍລະດົກລາວນີ້ ສຳລັບຂະນ້ອຍແລ້ວ ຖືວ່າ ເປັນກຽດຢ່າງໃຫ່ຽຫລວງ ມັນເຮັດ​ໃຫ້ ຂະ​ນ້ອຍໄດ້ໃກ້ ຊິດແລະຄຸ້ນເຄີຍກັບ​ຮີດຄອງ​ ປະເພນີ ແລະ​ວັດທະນະ​ທໍາ ຂອງລາວ ແລະ​ໄດ້​ຮູ້​ວ່າ​ມີ​ ປະຊາ​ຄົມ​ລາວ ​ແລະ​ມີວັດທະນະ​ທຳລາວ​ແທ້ ແທນ​ທີ​ຈະ​ຄິດ​ວ່າມັນສູນຫາຍ​ໄປ​
ແລ້ວ​. ຂະ​ນ້ອຍມັກ​ໃນ​ຄວາມ​ເປັນ​ຄົນລາວນີ້ ກໍເພາະ​ວ່າລາວ​ມີ​ຫຼາກຫຼາຍຊົນ​ຊາດ​
ຊົນເຜົ່າແລ​ະມີ​ຮີດຄອງ​ປະ​ເພນີ​ທີ່ປະສົມປະສານກັນ ​ແລະຂະ​ນ້ອຍກໍ​ມັກສິນລະປະ ແລະ​ຂະ​ນ້ອຍກໍມັກກຳມະວິທີຕ່າງໆເຊັ່ນ ພິທີບາສີສູ່ຂວັນເປັນຕົ້ນ. ແລະແນ່ນອນ ອາຫານລາວ, ຂະ​ນ້ອຍມັກເຂົ້າປຽກເສັນຫຼາຍທີ່ສຸດ."

ສ່ວນ​ນັກ​ຮ້ອງ​ ນັກ​ແຕ່ງ​ເພງ​ແນວ Pop ຢ່າງ​ເກດສະນາ ວິໄລລັກ ກໍ​ໄດ້​ສະ​ແດງ​ເຖິງ
ຄວາມຮູ້ສຶກ​ສາ​ປື້​ມໃຈຢ່າງ​ສຸດ​ຊຶ້ງຈົນ​ນຳ​ຕາ​ຊຶມ​ວ່າ ພູມ​ໃຈ​ທີ່​ໄດ້​ເຫັນ​ເຍົາວະ​ຊົນ​ເສບ​ດົນຕີ
ລາວ​ເດີມ​ໃຫ້​ເກ​ດສະນາຮ້ອງ​ເພງ​ລາວ​ເດີມ “ສາຍ​ລົມ​ເຢັນ” ຊຶ່ງເກ​ດສະນາໄດ້​ກ່າວ​ຢ່າງ​
ຕື້ນ​ຕັນ​ໃຈ​ວ່າ:

ມູນ​ນິທິ​ມໍລະດົກ​ລາວ ຈັດງານ ສະຫຼອງ​ຄົບຮອບ 6 ປີ
ມູນ​ນິທິ​ມໍລະດົກ​ລາວ ຈັດງານ ສະຫຼອງ​ຄົບຮອບ 6 ປີ

“​ເຮົາ​ເຫັນ​ ເຮົາ​ກໍ​ຮູ້ສຶກຂົນ​
ໝາກ​ໜາວ​ແຕກ ນໍ້າຕາກໍ​ຕົກ
ອັນ​ນີ້ຫ​ລະ ມັນ​ເປັນ​ເນື້ອ​ໃນ​
ແທ້ໆ​ເຫ​ລະ​ ເຖິງ​ແມ່ນວ່າ
ຊິ​ຢູ່​ໄກ​ບ້ານ​ເກີດ​ເມືອງ​ນອນ
ກະ​ຢ່າເຮົາ​ຍັງ​ຮັກສາ​ວັດທະ
ນະທຳລາວ ​ເພາະສະ​ນັ້ນ​
ເຮົາ​ຢາກ​ໃຫ້​ຮູ້ວ່າ ອັນ​ນີ້ລູກ​
ຫລານ​ເຮົາ​ ເຮົາ​ຕ້ອງ​ໄດ້​
ຊຸກ​ຍູ້​ໄປ ​ໃຫ້​ໂອກາດ​ໂລດ ​ເວທີ​ໃດ​ມີ​ໃຫ້​ຂຶ້ນ ຫລິ້ນ ຮັກສາ​ວັດທະນະທຳ​ມ້ຽນ ອັນ​ນີ້ດີ​ທີ່​ສຸດ...


ພ້ອມ​ດຽວ​ກັນ​ນີ້, ກໍ​ຍັງ​ມີແມ່ນັກຮຽນ​ນັກສະ​ແດງຄື ທີ່​ເດີນທາງ​ມາຈາກ ນະຄອນ ຊີອາໂຕ
ລັດ ວໍຊິງຕັນ​ເພື່ອມາສົ່ງເສີມການສະອດງຂອງລູກສາວ ທີ່ເປັນລູກເຄິ່ງ ລາວ-ອະເມຣິກັນ
ໃນ​ຄັ້ງ​ນີ້ ກໍໄດ້ສະແດງຄວາມເຫັນໃຫ້ພວກເຮົ້າຟັງວ່າ: “ພາກພູ​ມ​ໃຈ​ຫຼາຍ​ແລະ​ບໍ່​ຄິດ​ວ່າ
ຊິ​ມີໂປຣກຣາມແບບ​ນີ້​ຢູ່​ເມືອງ​ອະ​ເມຣິການີ້ ກໍ​ເລີຍ​ຢ່າກ​ໃຫ້​ລູກ​ຮຽນ ຮຽນ​ຮູ້ວັດ​ທະ
ນະ​ທຳ​ລາວ ເພາະ​ມັນ​ແມ່ນ Heritage ຂອງ​ເຮົາ ພໍ່​ແມ່​ຕ້ອງ support ​ເຂົາ​
ເຈົ້າຄັນ​ເຂົາ​ເຈົ້າ​ຢາກ​ຮຽນ ຄັນ​ເຮົາ​ບໍ່​ພາ​ໄປ​ພວກ​ເຂົາ​ເຈົ້າ​ກໍໄປຮຽນ​ບໍ່​ໄດ້ ເພາະວ່າ ພວກ​ເຂົາ​ເຈົ້າ​ໄປເອງ​ບໍ່​ໄດ້ ພໍ່​ແມ່​ຕ້ອງ​ພະຍາຍາມ​ເຮັດ​ທຸກ​ສິ່ງ​ທຸກ​ຢ່າງ​ໃຫ້ມັນເກີດ​ ຂຶ້ນ…


ສ່ວນ​ອາຈານສອນ​ທ່ານ​ທອງ​ຕັນ ສຸວັນ​ນະ​ພັນ ກໍ​ໄດ້ໃຫ້ຄວາມ​ເຫັນ​ກ່ຽວ​ກັບການສະ​ແດງ​
ຂອງເຍົາ​ສະ​ຊົນ​ຮຸ່ນ​ໃໝ່​ວ່າ: “ພູມ​ໃຈ ພູມ​ໃຈ​ທີ່​ເດັກນ້ອຍ​ລາວ​ຍັງ​ເອົາ​ໃຈ​ໃສ່ ສືບ​ຕໍ່​
ຂະ​ນົບ​ປະ​ເພນີ ​ໂດຍ​ສະ​ເພາະ​ສິນລະປະການ​ດົນຕຣີນີ້​ກໍ ອັນ​ນີ້​ຂ້າພະ​ເຈົ້າ​ພູມ​
ໃຈທີ່​ສຸດ ແປ​ວ່າຄວາມ​ພະຍາຍາມ​ບໍ່​ແມ່ນ​ໝົດ​ທໍ່​ນີ້ ປີໜ້າ​ປີ​ຮື​ມັນ​ຈະ​ຄັກ​ກ່ວາ​ນີ້…

ຜູ້​ທີ່​ປຽບ​ສະ​ເໝືອນ​ວ່າ​ເປັນ​ແມ່​ຂອງ​ພວກ​ເຍົາ​ສະ​ຊົນ​ພວກ​ນີ້​ກໍ​ຄື ປ້ອມ ຫລື ຈິດຕະ​ພອນ
ອຸດຕະມະ ຄຳ​ປຣະດິດ ຊຶ່ງ​ເປັນ​ຄູ​ຝຶກ​ຟ້ອນ, ທັງ​ຍັງ​ສອນ​ແລະ​ຄວບ​ຄຸມມາລະຍາດ​ຕ່າງໆ​
ນາໆທັງ​ໄປ​ສົ່ງ​ໄປ​ຮັບ​ແລະ​ບາງ​ຄັ້ງ​ຄາວ​ກໍ​ຍັງ​ຈັດ​ອາຫານ​ລ້ຽວນຳ​ອີກ ຊຶ່ງ​ປ້ອມ​ເອງ​ກໍ​ໄດ້
ແບ່ງປັນ​ຄວາມຮູ້ສຶກ ທີ່​ເຫັນ​ໝາກຜົນ​ຂອງ​ຕົນ​ທີ່​ໄດ້​ກໍ່ສ້າງ​ຈົນ​ມາ​ຮອດ​ມື້ນີ້ ທີ່​ຕ້ອງ​ຜ່ານ​ຜ່າ
ອຸບປະສັກຕ່າງໆນາໆ ຈົນ​ວັນ​ນີ້​ສາມາດກ່າວ​ຢ່າງ​ເຊີດ​ໜ້າ​ແລະ​ພູມ​ໃຈ​ເປັນ​ທີ່​ສຸດ ຊຶ່ງ​ນາງ​
ກ່າວ​ສະ​ລຸ​ບວ່າ:

ອຸດຕະມະ ຄຳ​ປຣະດິດ ​ຄູ​ຝຶກ​ຟ້ອນ​ແລະ​ຄວບ​ຄຸມ.
ອຸດຕະມະ ຄຳ​ປຣະດິດ ​ຄູ​ຝຶກ​ຟ້ອນ​ແລະ​ຄວບ​ຄຸມ.

“…ປ້ອມ​ເອງ​ກໍ​ບໍ່​ເຄີຍ​ຄິດ​ວ່າ​
ມັນ​ຊິ​ໄດ້​ກ້ວາງ​ປານ​ນີ້ ​ເພາະ​
ເຮົາ​ກໍ​ຮູ້​ວ່າ​ ເຮົາກໍ​ຄວນ​ມີ ແລະພວກ​ເດັກນ້ອຍ​ກໍຮູ້​ວ່າ​ ສົນໃຈ​ແລະ​ມີ​ຄວາມ​ຕ້ອງການ
ຈາກປະຊາ​ຄົມ​ລາວ ກະ​ບໍ່​ຄິດ​
ວ່າ​ມັນ​ຊິ​ໄປ​ໄກ​ໄດ້​ປານ​ນີ້
ສຳລັບ​ພໍ່​ແມ່​ທີ່​ເຂົາ​ເຈົ້າ​ມາ​
ຊ່ອຍ​ມາ​ສົ່ງ​ເສີມລູກ​ເຂົາ​ເຈົ້າ​
ຫັ້ນ ​ເຂົາ​ເຈົ້າ​ເອົາ​ໃຈ​ຊ່ອຍ​
ແທ້ໆ ​ເຫັນ​ແລ້ວກໍ​ພູມ​ໃຈ​
ທີ່​ວ່າ​ພໍ່​ແມ່​ຢາກ​ສົ່ງ​ເສີ​ມລູກ
ອີຫຼີ…

ສິນລະ​ປະການ​ດົນ​ຕີ​ຂອງ​ແຕ່​ລະ​ຊາດ ​ແມ່ນ​ການສະ​ແດງ​ອອກ​ຢ່າງ​ນຶ່ງ​ເຖິງ​ຂະ​ນົບ​ປະ​ເພນີ
ຮີດຄອງ​ແລະ​ວັດທະນະທຳ​ຂອງ​ຊາດ​ນັ້ນ. ພວກ​ເຮົາ​ຂໍ​ສັນລະ​ເສີນ ພວກ​ເຍົາວະ​ຊົນ​ລາວ​
ອະ​ເມຣິກັນ​ທີ່​ພາກັນ​ຮິ​ບ​ໂຮມ​ແລະ​ສືບ​ສານໃຫ້ປະ​ເພນີ​ແລະ​ວັດທະນະທຳ​ຂອງ​ລາວ​ຢູ່​ຄູ່​ກັບ
ຄົນ​ລາວ​ຕະລອດ​ໄປ ບໍ່​ວ່າ​ຈະ​ຢູ່​ທີ່​ໃດໆ​ໃນ​ໂລກ​ກໍ​ຕາມ.

ກະລຸນາ​ຕິດຕາມເລື່ອງທີ່​ໜ້າ​ສົນ​ໃຈ​ໄດ້​ໃໝ່ອີກ​ໃນ​ອາທິດ​ໜ້າ ທາງ​ລາຍການ​ຊີວິດຊາວລາວ​
ໃນ​ຕ່າງ​ແດນຂອງວີໂອເອ.

XS
SM
MD
LG