ອັນດັບໂລກໃນການອຳນວຍຄວາມສະດວກໃຫ້ແກ່ການດຳເນີນທຸລະກິດຂອງຕ່າງປະເທດໃນ ລາວ ເພີ່ມຂຶ້ນຈາກອັນດັບທີ 155 ເປັນອັນດັບທີ 148 ຫາແຕ່ວ່າ ລາວ ຍັງປະເຊີນກັບການຂາດ
ດຸນການຄ້າຢູ່ເລື້ອຍມາ.
ທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ຖະແຫຼງຕໍ່ກອງປະຊຸມກອງເລຂາອຳນວຍຄວາມສະດວກທາງດ້ານການຄ້າຄັ້ງທີ 4 ເມື່ອບໍ່ດົນມານີ້ຢູ່ທີ່ນະຄອນຫຼວງວຽງຈັນ ວ່າໄລຍະ 2 ປີມານີ້ ອັນດັບໂລກຂອງ ລາວ ກ່ຽວກັບການອຳນວຍຄວາມສະດວກໃຫ້ແກ່ການດຳເນີນທຸລະກິດ ແລະ ການລົງທຶນຂອງຕ່າງປະເທດໃນ ລາວ ໄດ້ຮັບການຈັດອັນດັບໃຫ້ດີຂຶ້ນເຖິງ 7 ອັນດັບກໍຄືຈາກອັນດັບທີ 155 ໃນປີ 2013 ເປັນອັນດັບທີ 148 ໃນປີ 2015 ຈາກ 189 ປະເທດທົ່ວໂລກ.
ທ່ານນາງ ເຂັມມະນີ ບອກວ່າອັນດັບໂລກທີ່ດີຂຶ້ນດັ່ງກ່າວນີ້ ເປັນຜົນໂດຍກົງຈາກການພັດທະນາ ແລະ ປັບປຸງນະໂຍບາຍທາງດ້ານການຄ້າ ແລະ ການລົງທຶນໃນ ລາວ ນັບແຕ່ປີ 2011 ເປັນຕົ້ນມາ ຊຶ່ງເຮັດໃຫ້ຂັ້ນຕອນການຄ້າ ແລະ ພາສີມີຄວາມກະທັດຮັດ ໂປ່ງໃສ ສະດວກວ່ອງໄວ ກົມກຽວກັນ ໂດຍແນໃສ່ການຫຼຸດຜ່ອນຕົ້ນທຶນທາງການຄ້າ ເພື່ອເພີ່ມຄວາມສາມາດໃນການແຂ່ງຂັນທາງການຄ້າໃຫ້ແກ່ພາກທຸລະກິດເອກະຊົນ ລາວ ແລະ ຕ່າງ
ປະເທດໃນຕະຫຼາດໂລກ ແລະ ດຶງດູດເອົາການລົງທຶນຈາກຕ່າງປະເທດໃຫ້ເຂົ້າມາໃນ ລາວ ໃຫ້ຫຼາຍຂຶ້ນຢ່າງຕໍ່ເນື່ອງ.
ແຕ່ຢ່າງໃດກໍຕາມ ທ່ານນາງ ເຂັມມະນີ ກໍຍອມຮັບວ່າ ລາວ ຍັງຄົງຕ້ອງປະເຊີນໜ້າກັບການຂາດດຸນການຄ້າຕ່າງປະເທດຢູ່ເລື້ອຍໆມາ ໂດຍໄລຍະເດືອນ ຕຸລາ 2014 ເຖິງມິຖຸນາ 2015 ຊຶ່ງເປັນໄລຍະ 9 ເດືອນຂອງແຜນການປີ 2014 ຫາ 2015 ການຄ້າຕ່າງ
ປະເທດຂອງ ລາວ ມີມູນຄ່າລວມ 6,171.63 ລ້ານໂດລາແບ່ງ ເປັນການສົ່ງອອກໃນມູນຄ່າ 2,401.91 ລ້ານໂດລາ ແລະ ນຳເຂົ້າໃນມູນຄ່າ 3,769.72 ລ້ານໂດລາ ຈິ່ງເຮັດໃຫ້ ລາວ ຕັ້ງຂາດດຸນການຄ້າຕ່າງປະເທດໃນມູນຄ່າເຖິງ 1,367.81 ລ້ານໂດລາ ແລະ ປະເທດທີ່ໄດ້ປຽບດຸນການຄ້າຕໍ່ ລາວ ຫຼາຍທີ່ສຸດກໍຄືປະເທດ ໄທ.
ທາງດ້ານກະຊວງການຄ້າຂອງ ໄທ ກໍໄດ້ຄາດໝາຍວ່າການຄ້າລະຫວ່າງ ໄທ ກັບ ລາວ ຈະມີມູນຄ່າລວມຫຼາຍກວ່າ 5,770 ລ້ານໂດລາຕະຫຼອດປີ 2015 ຊຶ່ງໃນນີ້ຈະເປັນການສົ່ງສິນຄ້າ ໄທ ໄປ ລາວ ໃນມູນຄ່າລວມຫຼາຍກວ່າ 4,460 ລ້ານໂດລາ ໂດຍເພີ່ມຂຶ້ນເຖິງ 10.6 ເປີເຊັນ ເມື່ອທຽບກັບປີ 2014 ແລະ ໄທ ກໍຈະນຳເຂົ້າສິນຄ້າຈາກ ລາວ ໃນມູນຄ່າລວມ 1,310 ລ້ານໂດລາ ໂດຍຫຼຸດລົງຫຼາຍກວ່າ 7 ເປີເຊັນ ເມື່ອທຽບກັບປີ 2014 ທີ່ຜ່ານມາຊຶ່ງຈະເຮັດໃຫ້ ໄທ ໄດ້ປຽບດຸນການຄ້າຕໍ່ ລາວ ຫຼາຍກວ່າ 3,150 ລ້ານໂດລາ.
ຍິ່ງໄປກວ່ານັ້ນ ທາງການ ໄທ ກໍຍັງຄາດໝາຍດ້ວຍວ່າຈະໄດ້ປຽບດຸນການຄ້າຕໍ່ ລາວ ເພີ່ມຂຶ້ນເປັນ 5,000 ລ້ານໃນປີ 2017 ຊຶ່ງກໍເປັນຜົນຈາການຕົກລົງລະຫວ່າງກະຊວງການຄ້າຂອງ ໄທ ກັບກະຊວງອຸດສາຫະກຳ ແລະ ການຄ້າຂອງ ລາວ ທີ່ຈະເພີ່ມມູນຄ່າການຄ້າຂອງ ໄທ ກັບກະຊວງອຸດສາຫະກຳ ແລະ ການຄ້າຂອງ ລາວ ທີ່ຈະເພີ່ມມູນຄ່າການຄ້າລະຫວ່າງກັນໃຫ້ເຖິງ 8,000 ລ້ານໂດລາໃນປີ 2017 ດັ່ງກ່າວ ໂດຍໃນນີ້ກໍຄາດໝາຍວ່າຈະເປັນການສົ່ງສິນຄ້າ ໄທ ໄປ ລາວ ໃນມູນຄ່າລວມເຖິງ 6,500 ລ້ານໂດລາ ໃນຂະນະທີ່ ໄທ ກໍຈະນຳເຂົ້າສິນຄ້າຈາກ ລາວ ໃນມູນຄ່າລວມພຽງ 1,500 ລ້ານເທົ່ານັ້ນ.
ທາງດ້ານທ່ານ ທະນະໂຊດ ໂຊດບຸນສັກ ຮອງປະທານຫໍການຄ້າຈັງຫວັດ ມຸກດາຫານ ກໍເຊື່ອໝັ້ນວ່າມີຄວາມເປັນໄປໄດ້ສູງທີ່ມູນຄ່າການຄ້າລະຫວ່າງ ໄທ ກັບ ລາວ ຈະເພີ່ມຂຶ້ນໄດ້ຕາມການຕົກລົງດັ່ງກ່າວດັ່ງທີ່ທ່ານໄດ້ອະທິບາຍເຖິງສະພາວະການຄ້າລະຫວ່າງແຂວງ ສະຫວັນນະເຂດ ກັບຈັງຫວັດ ມຸກດາຫານວ່າ:
“ເມື່ອກ່ອນເຮົາບໍ່ມີສະພານ ມູນຄ່າການຄ້າຊາຍແດນເຮົາແຕ່ 2 ໝື່ນກວ່າລ້ານ ແຕ່ພໍເຮົາມີສະພານມູນຄ່າການຄ້າຊາຍແດນເຮົາເຕີບໂຕເຖິງແສນລ້ານບາດ ສະແດງວ່າ ຈິກຊໍທີ່ສຳຄັນທີ່ສຸດກໍຄືອົງປະກອບຂອງໂຄງສ້າງພື້ນຖານຕ່າງໆ ຢ່າງເຊັ່ນສະໜາມບິນ ຫຼື ສະຖານີລົດໄຟກໍມີແຜນການຢູ່ແລ້ວ ສິ່ງທີ່ເຮົາມີຄວາມຈຳເປັນຈະຕ້ອງສ້າງຈິງໆ ກໍຄືເລື່ອງຂອງສະຖານີຂົນສົ່ງສິນຄ້າຂະໜາດໃຫຍ່ແລ້ວ ກໍແລ້ວເລື່ອງຂອງສະຖານີຂົນສົ່ງຜູ້ໂດຍສານນານາຊາດແຫ່ງທີ 2”
ການຕົກລົງທີ່ຈະເພີ່ມມູນຄ່າການຄ້າໃຫ້ເຖິງ 8,000 ລ້ານໂດລາ ພາຍໃນປີ 2017 ໄດ້ມີຂຶ້ນໃນໂອກາດການປະຊຸມແຜນຄວາມຮ່ວມມືລະຫວ່າງ ກະຊວງອຸດສາຫະກຳ ແລະ ການຄ້າຂອງ ລາວ ກັບກະຊວງການຄ້າຂອງ ໄທ ຄັ້ງທີ 6 ຢູ່ທີ່ ບາງກອກ ຖືເປັນມູນຄ່າການຄ້າທີ່ເພີ່ມຂຶ້ນເຖິງ 150 ເປີເຊັນ ຈາກປີ 2014 ທີ່ ລາວ ແລະ ໄທ ມີມູນຄ່າການຄ້າລະຫວ່າງກັນຫຼາຍກວ່າ 5,443 ລ້ານໂດລາ ຊຶ່ງແບ່ງເປັນການນຳເຂົ້າສິນຄ້າ ໄທ ໂດຍລາວ ໃນມູນຄ່າ 4,032 ລ້ານໂດລາ ແລະ ລາວ ສົ່ງສິນຄ້າໄປ ໄທ ໃນມູນຄ່າ 1,420.56 ລ້ານໂດລາ ຊຶ່ງເຮັດໃຫ້ ລາວ ເປັນຝ່າຍເສຍປຽບດຸນການຄ້າຕໍ່ ໄທ ໃນມູນຄ່າລວມເຖິງ 2,621.99 ລ້ານໂດລາ.
