ເຈົ້າໜ້າທີ່ຂັ້ນສູງໃນກະຊວງແຮງງານ ແລະສະຫວັດດີ
ການສັງຄົມຂອງລາວໃຫ້ການຍອມຮັບວ່າ ກໍລະນີທີ່ໜ້າ
ເປັນຫ່ວງທີ່ສຸດສໍາລັບການຜະລິດໃນພາກກະສິກໍາຂອງ
ລາວໃນປັດຈຸບັນນີ້ ກໍຄືການທີ່ຈະຕ້ອງປະເຊີນກັບບັນຫາ
ຂາດແຄນແຮງງານຫລາຍຂຶ້ນ ໂດຍສະເພາະແມ່ນແຮງ
ງານທີ່ມີປະສົບການໃນການຂີດຢາງພາລານັ້ນ ຈະເປັນ
ພາກສ່ວນທີ່ຈະຕ້ອງປະເຊີນບັນຫາຫລາຍທີ່ສຸດ.
ທັ້ງນີ້ກໍເນື່ອງຈາກວ່າໃນໄລຍະກວ່າ 10 ປີມານີ້ທາງການ
ລາວໄດ້ອະນຸມັດສໍາປະທານສິດໃນການເຊົ່າທີ່ດິນໃຫ້ແກ່
ເອກະຊົນລາວແລະຕ່າງຊາດໄປແລ້ວຫລາຍກວ່າ 2,000
ໂຄງການ ຊຶ່ງມີເນື້ອທີ່ສໍາປະທານຮວມກັນກວ້າງກວ່າ
4 ແສນເຮັກຕາ ໃນທົ່ວປະເທດແລະໃນນີ້ກໍແມ່ນພື້ນທີ່ສໍາ
ປະທານເພື່ອການປູກຢາງພາລາເກີນກວ່າ 70% ຊຶ່ງສ່ວນ
ໃຫຍ່ກໍຈະສາມາດເລີ່ມຂີດເອົາຢາງໄດ້ພາຍໃນປີ 2015
ເປັນຕົ້ນໄປ ຈຶ່ງເຮັດໃຫ້ຕ້ອງການນໍາໃຊ້ແຮງງານເຂົ້າໃນ
ການຂີດຢາງພາລາໃນພື້ນທີ່ສໍາປະທານທັງໝົດດັ່ງກ່າວ
ຫຼາຍກວ່າ 5 ແສນຄົນ ຫຼືຄິດເປັນອັດຕາສ່ວນແຮງງານ
2 ຄົນຕໍ່ພື້ນທີ່ 1 ເຮັກຕານັ້ນເອງ.
ສໍາລັບພື້ນທີ່ທີ່ປະເຊີນກັບປັນຫາຂາດແຄນແຮງງານໃນການຂີດຢາງພາລາແລ້ວໃນປັດຈຸ
ບັນນີ້ກໍ່ຄື ແຂວງຫຼວງນໍ້າທາ ຊຶ່ງເປັນພື້ນທີ່ທີ່ກຸ່ມນັກທຸລະກິດຈາກຈີນໄດ້ພາກັນເຂົ້າໄປ
ລົງທຶນປູກຢາງພາລາເປັນພື້ນທີ່ທໍາອິດເມື່ອ 10 ກວ່າປີມາແລ້ວ ແລະມາເຖິງປັດຈຸບັນນີ້
ກໍ່ປາກົດວ່າຫລາຍກວ່າ 40% ຂອງພື້ນທີ່ປູກຢາງພາລາທັງໝົດ ໃນເນື້ອທີ່ກ້ວາງກວ່າ
27,000 ເຮັກຕານັ້ນ ກໍ່ສາມາດທໍາການຂີດເອົານໍ້າຢາງໄດ້ແລ້ວ.
ຫາກແຕ່ວ່າປັນຫາກໍ່ຄືແຮງງານທີ່ມີຢູ່ໃນປັດຈຸບັນນີ້ກໍສາມາດ
ທີ່ຈະຂີດເອົານໍ້າຢາງພາລາໄດ້ພຽງໃນເນື້ອທີ່ບໍ່ເກີນ 11,000 ເຮັກຕາເທົ່ານັ້ນ ໃນຂະນະທີ່ພື້ນທີ່ປູກຢາງພາລາທັງໝົດໃນ
ແຂວງທີ່ມີເນື້ອທີ່ກ້ວາງກວ່າ 27,000 ເຮັກຕານັ້ນ ຈະຕ້ອງ
ໃຊ້ແຮງງານຫຼາຍກວ່າ 54,000 ຄົນພາຍໃນປີ 2015
ແລະເມື່ອປະກອບກັບພາຍໃນແຂວງເອງ ກໍ່ສາມາດຝຶກອົບ
ຮົມແຮງງານຂີດຢາງພາລາໄດ້ຢ່າງຈໍາກັດອີກດ້ວຍແລ້ວ ຈຶ່ງ
ເຮັດໃຫ້ຈະຕ້ອງປະເຊີນກັບປັນຫາຂາດແຄນແຮງງານຂີດຢາງ
ພາລາຢ່າງຫຼີກລ້ຽງບໍ່ໄດ້ ດັ່ງທີ່ທ່ານເປີແລ ພົງສະໄຫວ ຮອງຫົວໜ້າພະແນກແຮງງານແລະ
ສະຫວັດດີການສັງຄົມຂອງແຂວງ ໄດ້ໃຫ້ການຊີ້ແຈງວ່າ:
“ແຕ່ນີ້ຫາປີ 2015 ນີ້ ຖ້າວ່າໄດ້ປີນຶ່ງປະມານ 50 ຄົນກໍໄດ້ແຕ່ປະມານ 200 ກວ່າຄົນ
ມັນບໍ່ຕອບສະໜອງ ສົມມຸດວ່າປາດຢາງຈັ່ງຊີ້ ເນື້ອທີ່ຢາງ 20 ກວ່າພັນເຮັກຕາ ໂດຍ
ເຮັກຕານຶ່ງມັນຕ້ອງປາດ 2 ຄົນຕໍ່ນຶ່ງຄືນ ສະນັ້ນ ແຮງງານລາວ ມັນແນວໃດກໍ່ບໍ່ສາ
ມາດຕອງສະໜອງໄດ້ ຈຶ່ງເປັນປັນຫາທີ່ຈະຕ້ອງໄດ້ສືບຕໍ່ແກ້ໄຂ.”
ກ່ຽວກັບການໃຫ້ສຳປະທານທີ່ດິນນີ້ ບໍ່ພຽງແຕ່ຈະເຮັດໃຫ້ລາວຕ້ອງປະເຊີນກັບບັນຫາຂາດ
ແຄນແຮງງານເທົ່ານັ້ນ ຫາກແຕ່ວ່າກ່ອນໜ້ານີ້ ທ່ານ ຄໍາອ້ວນ ບຸບຜາ,ລັດຖະມົນຕີປະຈຳ
ສຳນັກງານນາຍົກລັດຖະມົນຕີລາວ ກໍໄດ້ຖະແຫລງຢືນຢັນວ່າ ການໃຫ້ສຳປະທານສິດແກ່
ບັນດາເອກກະຊົນລາວແລະຕ່າງຊາດໃນໄລຍະກວ່າ 10 ປີມານີ້ ໄດ້ສົ່ງຜົນກະທົບດ້ານລົບ
ທັງຕໍ່ສະພາບແວດລ້ອມທຳມະຊາດ ແລະສັງຄົມຢູ່ໃນລາວເພີ້ມຫລາຍຂຶ້ນ ນັບມື້ອີກດ້ວຍ.
ທັງນີ້ ຈາກວ່າການໃຫ້ສຳປະທານທີ່ດິນ ໄດ້ເຮັດໃຫ້ມີ
ການຕັດໄມ້ທຳລາຍປ່າ ເກີດຂຶ້ນຢ່າງກວ້າງຂວາງ ແລະ
ໃນຫລາຍໆກໍລະນີ ກໍເປັນການໃຫ້ສຳປະທານທີ່ດິນ ທີ່ໄປ
ກວາມເອົາເຂດປ່າສະຫງວນ ຫລືວ່າແຫລ່ງນໍ້າທໍາມະຊາດ
ລວມທັງໄປກວາມເອົາທີ່ດິນຂອງປະຊາຊົນ ແລ້ວກໍ່ໃຫ້ເກີດ
ຄວາມຂັດແຍ້ງກັນ ລະຫວ່າງບັນດາບໍລິສັດເອກະຊົນຜູ້ໄດ້
ຮັບສຳປະທານທີ່ດິນກັບປະຊາຊົນລາວອີກດ້ວຍ.
ຍິ່ງໄປກວ່ານັນ ທ່ານ ຄຳອ້ວນ ກໍຍັງໄດ້ຢືນຢັນອີກດ້ວຍ
ວ່າ ການໃຫ້ສຳປະທານທີ່ດິນໃນຕະຫລອດໄລຍະທີ່ຜ່ານ
ມາ ກັບສ້າງລາຍຮັບແລະສ້າງຜົນປະໂຫຍດໃຫ້ແກ່ລັດຖະບານໄດ້ພຽງແຕ່ເລັກນ້ອຍເທົ່າ
ນັ້ນ ເນື່ອງຈາກວ່າໄດ້ມີການກໍາໜົດອັດຕາຄ່າສຳປະທານທີ່ດິນຕໍ່າຫລາຍ ຄືລະຫວ່າງ 1-3 ໂດລາ ຕໍ່ເຮັກຕ້າຕໍ່ປີເທົ່ານັ້ນ.
