ທ່ານຄໍາເຫລັກ ໄຊດາລາ ຫົວໜ້າຫ້ອງການກະສິກໍາປ່າໄມ້ແຂວງຫລວງນໍ້າທາ ຖະແຫລງ
ຍອມຮັບວ່າ ບັນຫາທີ່ແຂວງຫລວງນໍ້າທາ ຈະຕ້ອງປະເຊີນຢ່າງຫລີກລ້ຽງບໍ່ໄດ້ ພາຍໃນ
3 ປີຂ້າງໜ້ານີ້ ກໍຄື ບັນຫາຂາດແຄນແຮງງານໃນການປາດຢາງພາລາ ເນື່ອງຈາກວ່າ
ແຂວງຫລວງນໍ້າທາ ນັບເປັນພື້ນທີ່ ທີ່ກຸ່ມນັກທຸລະກິດຈາກຈີນ ໄດ້ພາກັນເຂົ້າໄປລົງທຶນ
ປູກຢາງພາລາເປັນພື້ນທີ່ທໍາອິດເມື່ອ 10 ກວ່າປີມາແລ້ວ. ມາເຖິງປັດຈະບັນນີ້ກໍປາກົດວ່າ
ກວ່າ 40% ຂອງພື້ນທີ່ປູກຢາງພະລາທັງໝົດທີ່ກວ້າງກວ່າ 30 ພັນເຮັກຕານັ້ນ ສາມາດ
ປາດເອົານໍ້າຢາງໄດ້ແລ້ວ. ສ່ວນທີ່ເຫລືອກໍຈະສາມາດປາດເອົານໍ້າຢາງໄດ້ທັງໝົດນັບຈາກ
ຕົ້ນປີ 2015 ເປັນຕົ້ນໄປ.
ຫາກແຕ່ວ່າ ບັນຫາກໍຄື ແຮງ
ງານທີ່ມີຢູ່ໃນປັດຈຸບັນນີ້ ສາມາດ
ທີ່ຈະຂີດເອົານໍ້າຢາງພາລາໄດ້
ພຽງໃນເນື້ອທີ່ບໍ່ເກີນ 8,000
ເຮັກຕາເທົ່ານັ້ນ ໃນຂະນະທີ່
ພື້ນທີ່ປູກຢາງພາລາທັງໝົດໃນ
ແຂວງຫລວງນໍ້າທາກໍຍັງມີທ່າ
ອ່ຽງທີ່ຈະເພີ້ມຂຶ້ນອີກຢ່າງຕໍ່ເນື່ອງ
ໂດຍສະເພາະແມ່ນພື້ນທີ່ປູກຢາງ
ພາລາທີ່ກ້ວາງກວ່າ 30,000
ເຮັກຕານັ້ນ ຈະຕ້ອງໃຊ້ແຮງງານ
ຫຼາຍກວ່າ 60,000 ຄົນພາຍໃນປີ 2015 ແລະເມື່ອປະກອບກັບພາຍໃນແຂວງເອງ ກໍ່ສາ
ມາດຝຶກອົບຮົມແຮງງານຂີດຢາງພາລາໄດ້ຢ່າງຈໍາກັດອີກດ້ວຍແລ້ວ ຈຶ່ງເຮັດໃຫ້ຈະຕ້ອງປະ
ເຊີນກັບບັນຫາຂາດແຄນແຮງງານຂີດຢາງພາລາ ຢ່າງຫຼີກລ້ຽງບໍ່ໄດ້ ດັ່ງທີ່ທ່ານ ຄໍາເຫລັກ ໄດ້ໃຫ້ການຊີ້ແຈງວ່າ:
“ແຮງງານີ້ ກໍສິບໍ່ພໍ ມັນຈະຕ້ອງການຄົນຢູ່ເຈັດສິບຄົນ ປະມານນັ້ນເດ້ ເພາະວ່າ
ຮອດປີ 2015 ນີ້ ຊິມີຢູ່ສາມສິບພັນເຮັດຕາເປັນຢ່າງໜ້ອຍເດ້ ບາດນີ້ກໍຕ້ອງການ ຄົນຢູ່ຫົກສິບພັນຄົນແລ້ວ ຕອນນັ້ນນະທີ່ນີ້ ບັນຫາເລື້ອງແຮງງານນີ້ ມີແນ່ນອນ
ແຫລະ ພະຍາຍາມວ່າຈະຝຶກເອົາປະຊາຊົນ ແຕ່ລະເຂດໆຫັ້ນເດ້ເຂົ້າບັນຊີໄວ້
ແລ້ວກໍຕອບສະໜອງໃຫ້ແກ່ບັນດາບໍລິສັດແລະຜູ້ບໍ່ມີແຮງງານນັ້ນ.”
ເພາະສະນັ້ນ ຖ້າຫາກວ່າ ທາງການແຂວງຫລວງນໍ້າທາ ບໍ່ສາມາດທີ່ຈະຕອບສະໜອງ
ແຮງງານດັ່ງກ່າວ ໄດ້ຢ່າງພຽງພໍກັບຄວາມຕ້ອງການທີ່ເປັນຈິງນັ້ນ ຈຶ່ງມີຄວາມເປັນໄປ
ໄດ້ສູງ ທີ່ບັນດານັກທຸລະກິດຈາກຈີນ ຈະແກ້ໄຂບັນຫາຂາດແຄນແຮງງານດັ່ງກ່າວດ້ວຍ ການນໍາເຂົ້າແຮງງານຈາກຈີນ ນັ້ນເອງ.
ທາງດ້ານເຈົ້າໜ້າທີ່ຂັ້ນສູງໃນກະຊວງແຮງງານ ແລະສະຫວັດດີການສັງຄົມຂອງລາວ
ກໍຍອມຮັບວ່າ ບັນຫາຂາດແຄນແຮງງານດັ່ງກ່າວບໍ່ໄດ້ເກີດຂຶ້ນ ສະເພາະໃນແຂວງຫຼວງ
ນໍ້າທາ ເທົ່ານັ້ນ ຫາກແຕ່ເປັນບັນຫາທີ່ທຸກໆແຂວງທີ່ມີການປູກຢາງພະລານັ້ນ ຈະຕ້ອງ ປະເຊີນຢ່າງຫລີກລ່ຽງບໍ່ໄດ້ເຊ່ນກັນ.
ທັ້ງນີ້ກໍເນື່ອງຈາກວ່າໃນໄລຍະກວ່າ 10 ປີມານີ້ທາງການ
ລາວໄດ້ອະນຸມັດສໍາປະທານສິດໃນການເຊົ່າທີ່ດິນໃຫ້ແກ່
ເອກະຊົນລາວແລະຕ່າງຊາດໄປແລ້ວຫລາຍກວ່າ 2,000
ໂຄງການ ຊຶ່ງມີເນື້ອທີ່ສໍາປະທານຮວມກັນ ກວ້າງກວ່າ
4 ແສນເຮັກຕາ ໃນທົ່ວປະເທດແລະໃນນີ້ກໍແມ່ນພື້ນທີ່ສໍາ
ປະທານເພື່ອການປູກຢາງພາລາເກີນກວ່າ 70% ຊຶ່ງສ່ວນ
ໃຫຍ່ກໍຈະສາມາດເລີ່ມຂີດເອົາຢາງໄດ້ພາຍໃນປີ 2015
ເປັນຕົ້ນໄປ ຈຶ່ງເຮັດໃຫ້ຕ້ອງການນໍາໃຊ້ແຮງງານເຂົ້າໃນ
ການຂີດຢາງພາລາໃນພື້ນທີ່ສໍາປະທານທັງໝົດດັ່ງກ່າວ
ຫຼາຍກວ່າ 5 ແສນຄົນ ຫຼືຄິດເປັນອັດຕາສ່ວນແຮງງານ 2 ຄົນຕໍ່ພື້ນທີ່ 1 ເຮັກຕາ.
ກ່ຽວກັບການໃຫ້ສໍາປະທານທີ່ດິນນີ້ ບໍ່ພຽງແຕ່ຈະເຮັດໃຫ້ລາວຕ້ອງປະເຊີນກັບບັນຫາຂາດ
ແຄນແຮງງານເທົ່ານັ້ນ ຫາກແຕ່ວ່າການໃຫ້ສໍາປະທານສິດແກ່ບັນດາເອກກະຊົນລາວແລະ
ຕ່າງຊາດໃນໄລຍະກວ່າ 10 ປີມານີ້ ຍັງໄດ້ສົ່ງຜົນກະທົບຕໍ່ສະພາບແວດລ້ອມທໍາມະຊາດ
ແລະສັງຄົມລາວເພີ້ມຫລາຍຂຶ້ນນັບມື້ອີກດ້ວຍ.
ທັງນີ້ ກໍເນື່ອງຈາກວ່າ ການໃຫ້ສໍາປະທານ
ທີ່ດິນ ໄດ້ເຮັດໃຫ້ມີການຕັດໄມ້ທໍາລາຍປ່າ
ເກີດຂຶ້ນຢ່າງກວ້າງຂວາງ ແລະໃນຫລາຍໆ
ກໍລະນີ ກໍເປັນການໃຫ້ສໍາປະທານທີ່ດິນ
ທີ່ໄປກວາມເອົາເຂດປ່າສະຫງວນ ຫລືວ່າ
ແຫລ່ງນໍ້າທໍາມະຊາດ ລວມທັງໄປກວາມ
ເອົາທີ່ດິນຂອງປະຊາຊົນ ແລ້ວກໍ່ໃຫ້ເກີດ
ຄວາມຂັດແຍ້ງກັນ ລະຫວ່າງບັນດາບໍລິສັດ
ເອກະຊົນຜູ້ໄດ້ຮັບສໍາປະທານທີ່ດິນ ກັບປະ ຊາຊົນລາວອີກດ້ວຍ.
