ລາຍງານຂອງອົງການສືບສວນສະພາບແວດລ້ອມ the Environmental Investigation Agency ຫລື EIA ເວົ້າວ່າ ຮູບວີດີໂອທີ່ພວກນັກເຄື່ອນໄຫວຂອງຕົນໄດ້ລັກລອບຖ່າຍເອົາໃນໄລຍະສອງປີຜ່ານມາ ສະແດງໃຫ້ເຫັນວ່າ ໄມ້ທ່ອນຈາກລາວນັ້ນໄດ້ຖືກລັກລອບເອົາໄປຍັງໂຮງງານຜະລິດເຄຶ່ອງເຟີນິເຈີຫລືເຄື່ອງເຮືອນ ຢູ່ໃນຫວຽດນາມໄດ້ ໂດຍວິທີໃດ.
ຄໍາບັນລະຍາຍໃນຮູບເງົາວີດີໂອເວົ້າວ່າ: “ກອງໄມ້ໃຫຍ່ໆທີ່ເຫັນຢູ່ນີ້ ແມ່ນກໍາລັງລໍຖ້າ
ການລໍາລຽງໄປຍັງປະເທດ ເພື່ອນບ້ານຫວຽດນາມ ຜ່ານດ່ານຂ້າມຊາຍແດນ ທີ່
ໃຊ້ເວລາຂັບລົດໄປ ພຽງນຶ່ງຊົ່ວໂມງເທົ່ານັ້ນ ຈາກບ່ອນນີ້. ກອງທ່ອນໄມ້ນີ້ແມ່ນ
ກອງທັບຫວຽດນາມເປັນເຈົ້າຂອງ ແລະຈະຖືກລໍາລຽງຂ້າມຊາຍແດນໄປ ຊຶ່ງເປັນ
ການຝ່າຝືນກົດໝາຍຫ້າມສົ່ງໄມ້ທ່ອນອອກຂອງລາວ.”
ລາຍງານດັ່ງກ່າວທີ່ຖືກນໍາອອກເຜີຍແຜ່ເມື່ອອາທິດແລ້ວນີ້ ເວົ້າວ່າ ອຸດສາຫະກໍາໄມ້ທີ່
ກໍາລັງຈະເຣີນເຕີບໂຕຂອງຫວຽດນາມ ທີ່ມີມູນຄ່າສົ່ງອອກ 4 ພັນລ້ານໂດລາຕໍ່ປີນັ້ນ
ແມ່ນເປັນໂຕຊຸກຍູ້ການຄ້າໄມ້ເຖື່ອນໃນລາວ ຊຶ່ງລາວເປັນປະເທດທີ່ຍັງມີປ່າຝົນດົງດິບ
ທີ່ຮວມຢູ່ໃນພວກປ່າໄມ້ເຂດຮ້ອນທີ່ບໍ່ໄດ້ຖືກບຸກເບີກ ທີ່ຫລົງເຫລືອຢູ່ສຸດທ້າຍ ໃນເຂດ
ແມ່ນໍ້າຂອງນັ້ນ.
ລາຍງານຂອງອົງການ EIA ກ່າວຫາກອງທັບຫວຽດນາມວ່າ ໃຫ້ສິນບົນແກ່ພວກເຈົ້າ
ໜ້າທີ່ລາວ ແລ້ວກໍລັກລອບຂົນສົ່ງໄມ້ໄປຍັງໂຮງງານຜະລິດເຟີນິເຈີ ໃນຫວຽດນາມ.
ອົງການ EIA ລະບຸຊື່ ບໍລິສັດຮ່ວມມືດ້ານເສດຖະກິດຂອງຫວຽດນາມ ວ່າເປັນຕົວການ
ໃຫຍ່ໃນການຄ້າຜິດກົດໝາຍນີ້ ແລະກ່າວວ່າບໍລິສັດນີ້ແມ່ນຢູ່ ໃຕ້ການກໍາກັບດູແລຂອງ
ໜ່ວຍນຶ່ງຂອງກອງທັບຫວຽດນາມ ທີ່ເມືອງວິນ.
ທ່ານ ຈູລຽນ ນິວແມນ (Julian Newman) ນັກຄົ້ນຄ້ວາຂອງອົງການສືບສວນ EIA
ກ່າວວ່າ ການສໍ້ລາດບັງຫລວງຫລືຄໍຣັບຊັ່ນ ໄດ້ເອື້ອອໍານວຍໃຫ້ການຄ້າເຖື່ອນທີ່ວ່ານີ້
ດໍາເນີນຕໍ່ມາໄດ້ເລື້ອຍໆ ໂດຍທີ່ສ້າງປະໂຫຍດໃຫ້ພວກປະຊາຄົມທ້ອງຖີ່ນໜ້ອຍທີ່ສຸດ.
ທ່ານ ນີວແມນ ເວົ້າວ່າ
“ທີ່ເຮົາເຫັນກັນຢູ່ໃນເວລານີ້ ແມ່ນສະແດງໃຫ້ເຫັນ ເຖິງຄວາມລົ້ມແຫລວຢ່າງສິ້ນ
ເຊີງຂອງການຄວບຄຸມໃນລາວ ກໍຄືລາວເປັນປະເທດທີ່ພວກນັກທຸລະກິດທີ່ມີອິດ
ທິພົນເຫລົ່ານີ້ ສາມາດຝ່າຝືນກົດໝາຍຢ່າງເປີດແປນໄດ້. ແລະມັນຍາກຫລາຍທີ່
ພວກເຮົາຈະເຫັນຜົນປະໂຫຍດທີ່ແທ້ຈິງໃດໆ ສໍາລັບປະຊາຊົນລາວຈາກວົງການ
ອຸດສາຫະກໍານີ້. ໂຮງງານຂອງພວກເຂົາເຈົ້າເອງແມ່ນບໍ່ສາມາດເອົາໄມ້ນີ້ໄດ້ແລະ
ການດໍາລົງຊີວິດຫາຢູ່ຫາກິນຂອງປະຊາຊົນຕາມທ້ອງຖິ່ນນັ້ນກໍໄດ້ຖືກລົບກວນ.”
ໃນການສະແດງຄວາມເຫັນຕໍ່ວິທະຍຸວີໂອເອ ໂຄສົກຍິງຄົນນຶ່ງຂອງກະຊວງການຕ່າງປະເທດ
ຫວຽດນາມ ປະຕິເສດວ່າ ກອງທັບຫວຽດນາມບໍ່ໄດ້ມີການພົວພັນ ໃນການລັບລອບຂົນສົ່ງ
ໄມ້ທ່ອນໄປຈາກລາວນັ້ນ. ໂຄສົກ ເວົ້າວ່າ ຫວຽດນາມແມ່ນມີກົດຫ້າມການລັກລອບຂົນສົ່ງ
ໄມ້ເຖື່ອນ ແລະຕັດໄມ້ເຖື່ອນ ຢ່າງເຂັ້ມງວດ.
ພວກເຈົ້າໜ້າທີ່ຫວຽດນາມຍັງໄດ້ບອກກັບອົງການສື່ມວນຊົນອື່ນໆວ່າ ບໍລິສັດຮ່ວມມືເສດຖະ
ກິດ ມີໃບອະນຸບາດຈາກລັດຖະບານລາວ ເພື່ອນໍາເຂົ້າໄມ້ໄປຍັງຫວຽດນາມ.
ໃນປີ 1997 ຫວຽດນາມໄດ້ສັ່ງຫ້າມການຕັດໄມ້ຢູ່ພາຍໃນປະເທດເປັນສ່ວນໃຫຍ່ ແລະເວລາ
ນີ້ ຫວຽດນາມແມ່ນນໍາເຂົ້າ 80 ເປີເຊັນຂອງໄມ້ທັງໝົດທີ່ຕົນຕ້ອງການໃຊ້.
ລາຍງານຂອງອົງການ EIA ເວົ້າວ່າ ມູນຄ່າການນໍາເຂົ້າໄມ້ໄດ້ຖີບຕົວສູງຂຶ້ນຈາກ 123 ລ້ານ
ໂດລາ ໃນປີ 2000 ເປັນຫລາຍກ່ວານຶ່ງພັນລ້ານໂດລາໃນປີ 2008. ອົງການນີ້ເວົ້າຕໍ່ໄປວ່າ
ໄມ້ເຖື່ອນທີ່ມາຈາກ ສປປ ລາວ ແມ່ນປະກອບເປັນ 16 ເປີເຊັນ ຂອງຈໍານວນທັງໝົດ.
ຝ່າຍພວກເຈົ້າໜ້າທີ່ລາວກໍໄດ້
ເວົ້າ ເມື່ອບໍ່ເທົ່າໃດເດືອນຜ່ານ
ມານີ້ວ່າ ພວກຕົນກໍາລັງເພີ່ມ
ທະວີຄວາມພະຍາຍາມເພື່ອ
ຍຸຕິການຄ້າໄມ້ເຖື່ອນ. ໃນ
ເດືອນມິຖຸນາຜ່ານມານີ້ ນາ
ຍົກລັດຖະມົນຕີລາວ ທ່ານ
ທອງສິງ ທໍາມະວົງ ກໍໄດ້
ອອກຄໍາສັ່ງໃຫ້ຮັດເຄ່ງຂຶ້ນ
ການນໍາໃຊ້ມາດຕະການຕໍ່
ຕ້ານການຕັດໄມ້ເຖື່ອນແລະ
ລັກລອບຂົນສົ່ງໄມ້ເຖື່ອນ ອອກນອກປະເທດນັ້ນ.
ຢ່າງໃດກໍຕາມ ອົງການ EIA ກ່າວວ່າ ເຖິງແມ່ນຈະມີການອອກກົດໝາຍຫ້າມດັ່ງກ່າວ ແຕ່
ສະຖານນະການກໍຍັງ “ສັບສົນວຸ້ນວາຍ ແລະເອື້ອອໍານວຍໃຫ້ແກ່ການສໍ້ລາດບັງຫລວງ ຢູ່.”
ຄວາມໜາແໜ້ນຂອງປ່າໄມ້ລາວ ໄດ້ລົດຕໍ່າລົງຢ່າງວ່ອງໄວໃນໄລຍະ 40–50 ປີຜ່ານມາ ຄື
ຈາກ 60 ເປີເຊັນ ໃນຊຸມປີ 1960 ລົງມາ ເຫລືອຢູ່ປະມານ 40 ເປີເຊັນ ໃນປັດຈຸບັນນີ້.
ເບງວີດີໂອຂອງອົງການ EIAG:
Crossroads from EIA on Vimeo.
