ທາງການລາວ ແລະ ໄທ ຈະຮ່ວມມືກັນຊູກຍູ້ໃຫ້ມີການຕົກລົງເພື່ອແກ້ໄຂຂໍ້ຂັດແຍ້ງໃນປະເທດມຽນມາ ທີ່ມີການປະຕິບັດຕັວຈິງໃນກອງປະຊຸມສຸດຍອດຜູ້ນຳອາຊຽນ ໃນເດືອນຕຸລາ 2024 ທີ່ ນະຄອນຫຼວງວຽງຈັນ.
ນັກຊ່ຽວຊານດ້ານການພັົວພັນ ແລະຮ່ວມມືໃນອາຊຽນເປີດເຜີຍວ່າ: ທາງການລາວ ແລະ ໄທ ໄດ້ຕົກລົງຈະຮ່ວມມືກັນໃນທຸກວິທີທາງ ເພື່ອຊູກຍູ້ໃຫ້ມີການຕົກລົງຈາກທຸກພາກສ່ວນທີ່ກ່ຽວຂ້ອງ ເຂ້າໃນການແກ້ໄຂຂໍ້ຂັດແຍ້ງທາງການເມືອງໃນມຽນມາ ຫຼື ພະມ້າ ທີ່ມີການນຳໄປສູ່ການຈັດຕັ້ງປະຕິບັດຕົວຈິງໃຫ້ໄດ້ ໃນໂອກາດກອງປະຊຸມສຸດຍອດຜູ້ນຳອາຊຽນ ຄັ້ງທີ 44 ແລະ 45 ທີ່ຈະຈັດຂຶ້ນຢ່າງເປັນທາງການໃນລະຫວ່າງວັນທີ 6-12 ຕຸລາ 2024 ທີ່ນະຄອນຫຼວງວຽງຈັນ. ໂດຍຜ່ານມາ ລັດຖະບານລາວໃນຖານະປະທານ ອາຊຽນ ປີ 2024 ກໍໄດ້ໃຫ້ການສະໜັບສະຫນູນລັດຖະບານໄທໃນການ ໃຫ້ການຊ່ວຍເຫລືອທາງດ້ານມະນຸດສະທຳແກ່ປະຊາຊົນຊາວມຽນມາ ທີ່ໄດ້ຮັບຜົນກະທົບຈາກຄວາມຂັດແຍ້ງດັງກ່າວ, ແຕ່ສຳລັບການຮ່ວມມືໃໝ່ນີ້ ຈະເນັ້ນໜັກເຖິງການຊຸກຍູ້ການເຈລະຈາລະຫວ່າງບັນດາຝ່າຍທີ່ກ່ຽວຂ້ອງ ເພື່ອໃຫ້ບັນລຸຂໍ້ຕົກລົງຮ່ວມມືກັນໃນການແກ້ໄຂປັນຫາຂັດແຍ້ງໃຫ້ໄດ້ຢ່າງເປັນຮູບປະທຳ, ດັ່ງທີ່ນັກຊ່ຽວຊານການພັວພັນຮ່ວມມືໃນອາຊຽນ ໄດ້ໃຫ້ການຢືນຢັນວ່າ:
“ປະເທດ ໄທ ຢາກຊຸກຍູ້ແຜນການສັນຕິພາບຂອງອາຊຽນກ່ຽວກັບມຽນມາ, ເຊິ່ງທາງການລາວ ໃນຖານະປະທານອາຊຽນ ກໍສະໜັບສະໜູນ, ສະນັ້ນ ປະເທດ ໄທ ແລະ ລາວ ກໍຈະຮ່ວມມືກັນຊຸກຍູ້ ເພື່ອທີ່ຈະສົ່ງເສິມໃຫ້ມີການປະຕິບັດແຜນການສັນຕິພາບ 5 ຂໍ້, ໂດຍສະເພາະການໃຫ້ການຊ່ວຍເຫຼືອດ້ານມະນຸດສະທໍາ, ສ່ວນໃນປະເດັນອື່ນໆ ຈະເປັນໄປໄດ້ກໍຕໍ່ເມື່ອມີຄວາມຫມັ້ນໃຈສູງ ເພາະວ່າໃນທີ່ສຸດແລ້ວ ການແກ້ໄຂວິກິດການຢູ່ມຽນມາຈະຕ້ອງເປັນຄົນມຽນມາທັງໝົດ.”
ສ່ວນ ທ່ານສະເຫລິມໄຊ ກົມມະສິດ, ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງການຕ່າງປະເທດໄດ້ຖະແຫຼງຢືນຢັນວ່າ ອຳນາດການປົກຄອງລາວ ໄດ້ເພີ້ມທະວີການຮັກສາຄວາມປອດໄ, ແລະຕິດຕາມຢ່າງໃກ້ຊິດທຸກການເຄື່ອນໄຫວໃນຂອບເຂດທົ່ວປະເທດ ໃນໂອກາດທີ່ລັດຖະບານລາວເປັນປະທານອາຊຽນໃນປີ 2024 ລວມທັງຈະຕິດຕາມການເຜີຍແຜ່ຂໍ້ມູນ ແລະຂ່າວສານທາງສື່ສັງຄົມຢ່າງໃກ້ສິດ ທັງໃນລາວ ແລະ ຕ່າງປະເທດອີກດ້ວຍ, ທັງຍັງຈະຕອບໂຕ້ຄືນໃນທັນທີ ໃນກໍລະນີທີ່ສື່ສັງຄົມ ນຳສະເໜີຂໍ້ມູນຂ່າວສານທີ່ໂຈມຕີລັດຖະບານລາວໃນຖານະປະທານອາຊຽນຈະຈັດກອງປະຊຸມສຸດຍອດຜູ້ນຳອາຊຽນຄັ້ງທີ 44 ແລະ 45 ໃນວັນທີ 6-12 ຕຸລາ 2024, ລວມເຖິງກອງປະຊຸມສຸດຍອດອາຊີຕາເວັນອອກ, ເຊິ່ງຈະມີຜູ້ນໍາຂອງ ສະຫະລັດ, ຈີນ, ຣັດເຊຍ, ອິນເດຍ, ຍີ່ປຸ່ນ, ເກົາຫຼີໃຕ້, ອອສເຕຣເລຍ ແລະ ນິວຊີແລນ ເຂົ້າຮ່ວມ, ກໍຍັງຈະມີການປຶກສາຫາລືກັນໃນຫຼາຍດ້ານ. ໃນນີ້ລວມທັງການສ້າງແຜນແມ່ບົດ ສ້າງປະຊາຄົມອາຊຽນໃຫ້ປະສົບຜົນສຳເລັດໃນປີ 2045 ທີ່ລັດຖະບານ ລາວ ແລະ ມາເລເຊຍ ຈະຮ່ວມກັນຈັດທຳດ້ວຍ, ດັ່ງທີ່ ທ່ານ ສະເຫຼີມໄຊ ຖະແຫຼງຢືນຢັນວ່າ:
“ເປົ້າໝາຍຕໍ່ໜ້ານັ້ນ ແມ່ນພວກເຮາເອິ້ນວ່າ ແຜນແມ່ບົດກ່ຽວກັບການຈັດຕັ້ງປະຕິບັດວິໄສທັດການສ້າງປະຊາຄົມອາຊຽນປີ 2045, ໃນໄລຍະນີ້ລ່ະແມ່ນລາວເຮົາໃນຖານະເປັນປະທານອາຊຽນປີ 2024 ໄດ້ເຮັດວຽກຮ່ວມກັບປະທານໃນປີຫນ້າກໍຄື ມາເລເຊຍ ເພື່ອຮ່າງເອກະສານດັງກ່າວນີ້ ແລະຖ້າວ່າສໍາເລັດແລ້ວ ເປັນເອກກະພາບກັນແລ້ວ ເອກະສານດັ່ງກ່າວນີ້ ກໍ່ຈະໄດ້ຮັບການຮັບຮອງເອົາໃນໄລຍະທີ່ ມາເລເຊຍ ເປັນປະທານອາຊຽນໃນປີ 2025. ສະນັ້ນ, ເອກກະສານນີ້ ເປັນເອກກະສານທີ່ສຳຄັນ ແລະເຮ້ດໃຫ້ການສ້າງປະຊາຄົມອາຊຽນນີ້ໄດ້ຮັບຜົນສຳເລັດ”
ທັ້ງນີ້ ການຊ່ວຍເຫຼືອດ້ານມະນຸດສະທໍາທີ່ລັດຖະບານ ໄທ ມອບໃຫ້ປະຊາຊົນມຽນມາທີ່ໄດ້ຮັບຜົນກະທົບຈາກຄວາມຂັດແຍ້ງທາງດ້ານການເມືອງໃນມຽນມາ ເມື່ອວັນທີ 25 ມີນາ 2024 ເປັນການຊ່ວຍເຫລືອຄັ້ງທຳອິດໃຫ້ແກ່ຊາວມຽນມາຫຼາຍກວ່າ 20,000 ຄົນ ແລະຈະສືບຕໍ່ໃຫ້ການຊ່ວຍເຫລືອຕື່ມອີກ ຖ້າຫາກສະຖານະການໃນມຽນມາມີຄວາມສະດວກ ໂດຍຖືເປັນ 1 ໃນສັນທາມະຕິ 5 ຂໍ້ຂອງອາຊຽນກ່ຽວກັບການແກ້ໄຂຄວາມຂັດແຍ້ງໃນມຽນມາ ເຊິ່ງລວມມີ ການຍຸຕິຄວາມຮຸນແຮງໃນທັນທີ, ການຈັດຕັ້ງໃຫ້ທຸກຝ່າຍເຈລະຈາໂດຍສັນຕິ, ການຊ່ວຍເຫຼືອດ້ານມະນຸດສະທຳ, ການອະນຸຍາດໃຫ້ທູດພິເສດປະສານງານຢ່າງເປັນເອກະລາດ ແລະ ພົບປະກັບທຸກຝ່າຍຢູ່ມຽນມາ. ເຊິ່ງໃນໄລຍະທີ່ຜ່ານມາ ລັດຖະບານລາວໄດ້ແຕ່ງຕັ້ງໃຫ້ ທ່ານ ອາລຸນແກ້ວ ກິດຕິຄຸນ ເປັນທູດພິເສດ ເພື່ອປະສານງານກັບທຸກພາກສ່ວນທີ່ກ່ຽວຂ້ອງ ໂດຍແນໃສ່ການຂັດການເລືອກຕັ້ງທົ່ວໄປຄັ້ງໃຫມ່ໃນມຽນມາ ໃຫ້ໄດ້ໄວທີ່ສຸດ
ຟໍຣັມສະແດງຄວາມຄິດເຫັນ