ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ລັດ​ຖະ​ບານ ລາວ ​ເລື່ອນ​ງານ​ມະ​ຫາ​ກຳ ​ກິ​ລາ​ແຫ່ງ​ຊາດ​ຄັ້ງ​ທີ 11 ແລະ ງານ​ສະຫຼອງ​ມໍ​ລະ​ດົກ​ໂລກ​ທົ່ງ​ໄຫ​ຫີ​ນ ​ອອກ​ໄປ​ຢ່າງບໍ່​ມີ​ກຳ​ນົດ


ທົ່ງ​ໄຫ​ຫີນ, ແຂວງ​ຊຽງ​ຂວາງ, ປະ​ເທດ ລາວ.
ທົ່ງ​ໄຫ​ຫີນ, ແຂວງ​ຊຽງ​ຂວາງ, ປະ​ເທດ ລາວ.

ລັດ​ຖະ​ບານ ລາວ ໄດ້​ເລື່ອນ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້ງ​ທີ 11 ແລະ ງານ​ສະຫຼອງ​ມໍ​ລະ​ດົກ​ໂລກ​ທົ່ງ​ໄຫ​ຫີ​ນ​ອອກ​ໄປ​ຢ່າງບໍ່​ມີ​ກຳ​ນົດ ທັງ​ນີ້​ເພື່ອ​ປ້ອງ​ກັນ​ບໍ່​ໃຫ້​ເຊື້ອ​ໄວ​ຣັ​ສ Covid-19 ເກີດ​ລະ​ບາດ​ຢູ່​ໃນ ລາວ.


ທ່ານ​ນາງ ແສງ​ເດືອນ ຫຼ້າ​ຈັນ​ທະ​ບູນ ລັດ​ຖະ​ມົນ​ຕີ​ວ່າ​ການ​ກະ​ຊວງ​ສຶກ​ສາ​ທິ​ການ ແລະ ກິ​ລາ ໄດ້​ໃຫ້​ການ​ຢືນ​ຢັນ​ວ່າ ໄດ້​ມີ​ການ​ເລື່ອນ​ການ​ຈັດ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້​ງ​ທີ 11 ຈາ​ກ​ກຳ​ນົດ​ການ​ເດີມ​ໃນ​ຊ່ວງວັນ​ທີ 22 ມີ​ນາ-1 ເມ​ສາ 2020 ອອກ​ໄປ​ຢ່າງບໍ່​ມີ​ກຳ​ນົດ ທັງ​ນີ້​ເພື່ອ​ເປັນ​ການ​ປ້ອງ​ກັນ​ບໍ່​ໃຫ້​ເຊື້ອ​ໄວ​ຣັ​ສ Covid-19 ເກີດ​ລະ​ບາດ​ຢູ່​ໃນ ລາວ ສ່ວນ​ກຳ​ນົດ​ການ​ໃໝ່​ຈະ​ມີ​ຂຶ້ນ​ໃນ​ຊ່ວງ​ໃດ​ນັ້ນ ກໍ​ຈະ​ຕ້ອງ​ລໍ​ຖ້າ​ເບິ່ງ​ສະ​ພາບ​ການ​ຕົວ​ຈິງວ່າ​ນາ​ນາ​ຊາດ ສາ​ມາດ​ສະ​ກັດ​ກັ້ນ ແລະ ຄວບ​ຄຸມ​ເຊື້ອ​ໄວ​ຣັ​ສ Covid-19 ໄດ້​ຢ່າງ​ຄັກ​ແນ່​ແລ້ວຫຼືບໍ່ ແຕ່​ໃນ​ໄລ​ຍະ​ສະ​ເພາະ​ໜ້ານີ້ ລັດ​ຖະ​ບານ​ກໍ​ຈະ​ພໍ​ຈາ​ລະ​ນາ ກ່ຽວ​ກັບ ມາດ​ຕະ​ການ​ຢຽວ​ຢາ ແລະ ໃຫ້​ການ​ຊ່ວຍ​ເຫຼືອ ແກ່​ພາກ​ສ່ວນ​ຕ່າງໆ​ທີ່​ໄດ້​ລົງ​ທຶນ-ລົງ​ແຮງ​ໄປ​ແລ້ວ​ໃນ​ການ​ກະ​ກຽມ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້ງ​ນີ້ ດັ່ງ​ທີ່​ທ່ານ​ນາງ ແສງ​ເດືອນ ໄດ້​ຖະ​ແຫຼງ​ຢືນ​ຢັນ​ວ່າ

"ສະ​ພາບ​ປັດ​ຈຸ​ບັນ​ນີ້ ຖື​ວ່າ​ການ​ແຜ່​ລະ​ບາດ​ຂອງ​ພະ​ຍາດ Covid-19 ນີ້​ເປັນ​ໄລ​ຍະ​ທີ່​ວ່າ​ມີ​ຄວາມ​ສ່ຽງຫຼາຍ ແລະ ກະ​ມີ​ຄວາມ​ຮຸນ​ແຮງຫຼາຍ ສະ​ນັ້ນ​ຂໍ​ບອກ​ກ່ອນ​ເລີຍ​ວ່າ​ແມ່ນ​ຖືກ​ໂຈະ​ຫັ້ນ​ຫຼະ​ເນາະ ກໍ​ບໍ່​ທັນ​ຮູ້​ວ່າ​ຍາມ​ໃດ ເພາະ​ວ່າ​ສະ​ພາບ​ພະ​ຍາດ​ມັນ​ຍັງ​ແຮງ​ຢູ່ ພວກ​ເຮົາ​ກະ​ບໍ່​ຮູ້​ວ່າ​ສິ​ເຊົາ​ຍາມ​ໃດ​ຫັ້ນ​ນະ ແລະ ພວກ​ເຮົາ​ຈະ​ມີ​ແຈ້ງ​ການ​ຕື່ມ​ວ່າຫຼັງ​ຈາກ​ໂຈະ​ແລ້ວ ພວກ​ເຮົາ​ຈະ​ມີ​ວິ​ທີ​ການ​ແນວ​ໃດ​ຕໍ່​ນັກ​ກິ​ລາ ຫຼື​ວ່າ​ຕໍ່​ນັກ​ທຸ​ລະ​ກິດ​ທີ່​ວ່າ​ໄດ້​ໃຊ້​ຈ່າຍ​ໄປ​ແລ້ວ ອັນ​ນີ້​ພວກ​ເຮົາ​ກໍ​ຈະ​ພະ​ຍາ​ຍາມ​ໃຫ້​ມີ​ຄວາມ​ຍຸ​ຕິ​ທຳ​ທີ່​ສຸດ."

ກ່ອນ​ໜ້ານີ້​ລັດ​ຖະ​ບານ ລາວ ໄດ້​ອະ​ນຸ​ມັດ​ງົບ​ປະ​ມານ 47 ຕື້​ກີບ​ເພື່ອ​ໃຊ້​ໃນ​ການ​ຈັດ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້ງ​ທີ 11 ຢູ່​ທີ່​ແຂ​ວງ​ຊຽງ​ຂວາງ ໂດ​ຍ​ສະ​ເພາະ​ແມ່ນ​ໃນ​ພິ​ທີ​ເປີດ​ນັ້ນ ຍັງ​ຈະ​ມີ​ການ​ຈັດ​ງານ​ສະ​ເຫຼີມ​ສະຫຼອງ​ທົ່ງ​ໄຫ​ຫີນ​ເປັນ​ມໍ​ລະ​ດົກ​ໂລກ ແລະ ການ​ສະ​ເຫຼີມ​ສະຫຼອງວັນ​ສ້າງ​ຕັ້ງ​ພັກ​ປະ​ຊາ​ຊົນ​ປະ​ຕິ​ວັດ ລາວ ຄົບ​ຮອງ 65 ປີ​ໃນ​ວັນ​ທີ 22 ມີ​ນາ 2020 ອີກ​ດ້ວຍ ເພາະ​ສະ​ນັ້ນ​ການ​ເລື່ອນ​ການ​ຈັດ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້ງ​ນຶ່ງ ຈຶ່ງ​ໄດ້​ສົ່ງ​ຜົນ​ກະ​ທົບເຖິງ​ການ​ສະ​ເຫຼີມ​ສະຫຼອງ​ທົ່ງ​ໄຫ​ຫີນ​ເປັນ​ມໍ​ລະ​ດົກ​ໂລກ ແລະ ການ​ສະ​ເຫຼີມ​ສະຫຼອງວັນ​ສ້າງ​ຕັ້ງ​ພັກ​ປະ​ຊາ​ຊົນ​ປະ​ຕິ​ວັດ ລາວ ຄົບ​ຮອບ 65 ປີ​ດ້ວຍ​ເຊັ່ນ​ກັນ.

ສຳ​ລັບ​ງານ​ມະ​ຫາ​ກຳ​ກິລາ​ແຫ່ງ​ຊາດ​ຄັ້ງ​ທີ 11 ນັ້ນ​ຈະ​ມີ​ການ​ແຂ່ງ​ຂັນ​ໃນ 28 ປະ​ເພດ​ກິ​ລາ​ທີ່​ມີ 20 ພາກ​ສ່ວນ​ທີ່​ເຂົ້າ​ຮ່ວມ​ການ​ແຂ່ງ​ຂັນ​ຄື​ນະ​ຄອນຫຼວງວຽງ​ຈັນ ກັບ 17 ແຂ​ວງ ແລະ 2 ກະ​ຊວງ ເພື່ອ​ຊິງ​ເອົາ 385 ຫຼຽນ​ຄຳ, 385 ຫຼຽນ​ເງິນ, 627 ຫຼຽນ​ທອງ​ແດງ ໂດຍ​ສະ​ໜາມ​ກິ​ລາ​ກາງ​ທີ່​ສ້າງ​ໃໝ່​ເພື່ອ​ໃຊ້​ໃນ​ການ​ຈັດ​ພິ​ທີ​ເປີດ ແລະ ປິດ​ສາ​ມາດ​ຮອງ​ຮັບ​ຜູ້​ຊົມ​ໄດ້ 17,000 ຄົນ ທັງ​ຍັງ​ໄດ້​ປັບ​ປຸງ 11 ສະ​ໜາມ​ກິ​ລາ​ເພື່ອ​ຮອງ​ຮັບ​ການ​ແຂ່ງ​ຂັນ ແລະ ປັບ​ປຸງ​ໂຮງ​ຮຽນ 27 ແຫ່ງ ເປັນ​ບ່ອນ​ພັກ​ສຳ​ລັບ​ນັກ​ກິ​ລາ 7,000 ກວ່າ​ຄົນ​ຈາ​ກ​ທົ່ວ​ປະ​ເທດ ຊຶ່ງ​ຕ້ອງ​ນຳ​ໃຊ້​ງົບ​ປະ​ມານ​ເກີນກວ່າ 47 ຕື້​ກີບ​ໂດຍບໍ່​ລວມ​ເຖິງ​ງົບ​ປະ​ມານ 200 ຕື້​ກີບ​ທີ່​ນຳ​ໃຊ້​ໃນ​ການ​ກໍ່​ສ້າງ​ສະ​ໜາມ​ກິ​ລາ​ໃໝ່​ແຕ່​ຢ່າງ​ໃດ.

ທາງ​ດ້ານ​ທ່ານ ວິ​ໄລ​ສຸກ ພິ​ມະ​ສອນ ສະ​ມາ​ຊິກ​ສະ​ພາ​ແຫ່ງ​ຊາດ ລາວ ຈາກ​ແຂວງ​ຊຽງ​ຂວາງ ກໍ​ຍອມ​ຮັບ​ວ່າ​ໃນ​ແຊວງ​ຊຽງ​ຂວາງ ຍັງ​ຂາດ​ແຄນພື້ນ​ຖານ​ໂຄງ​ລ່າງ​ເພື່ອ​ຮອງ​ຮັບ​ການ​ທ່ອງ​ທ່ຽວ​ທີ່​ຄາດ​ວ່າ​ຈະ​ຂະ​ຫຍາຍ​ຕົວ​ເພີ່ມ​ຂຶ້ນ​ຈາກ​ການ​ທີ່ UNESCO ໄດ້​ປະ​ກາດ​ຮັບ​ຮອງ​ໄຫ​ຫີນ​ເປັນ​ມໍ​ລະ​ດົກ​ໂລກ​ດັ່ງ​ກ່າວ ໂດ​ຍ​ສະ​ເພາະ​ແມ່ນ​ສະ​ໜາມ​ບິນ​ທີ່ບໍ່​ສາ​ມາດ​ຮອງ​ຮັບ​ເຮືອ​ບິນ​ຂະ​ໜາ​ດ​ໃຫຍ່​ໄດ້​ເລີຍ ສ່ວນ​ຖະ​ໜົນ​ຫົນ​ທາງ​ໄປ​ຫາ​ແຫຼ່ງ​ທ່ອງ​ທ່ຽວ​ຕ່າງໆ​ກໍ​ຍັງ​ບໍ່​ໄດ້​ມາດ​ຕະ​ຖານ, ໂຮງ​ແຮມ-ບ້ານ​ພັກ-ຮ້ານ​ອາ​ຫານ-ສະ​ຖານ​ບໍ​ລິ​ການ​ຕ່າງໆ​ຍັງ​ບໍ່​ພຽງ​ພໍ ຈຶ່ງ​ເຮັດ​ໃຫ້​ຊາວ​ຕ່າງ​ຊາດ​ເດີນ​ທາງ​ມາ​ທ່ຽວ​ໃນ​ແຂ​ວງ​ຊຽງ​ຂວາງ​ພຽງ​ແຕ່ 80,000 ກວ່າ​ຄົນ​ເທົ່າ​ນັ້ນ​ໃນ​ແຕ່​ລະ​ປີ.

ສ່ວນ​ເຈົ້າ​ໜ້າ​ທີ່​ທະ​ນາ​ຄານ​ພັດ​ທະ​ນາ​ເອ​ເຊຍ (ADB) ປະ​ຈຳ​ລາວ ຢືນ​ຢັນ​ວ່າ​ລັດ​ຖະ​ບານ ລາວ ໄດ້​ສູນ​ເສຍ​ດ້ານ​ງົບ​ປະ​ມານ​ລາຍ​ຈ່າຍ​ໄປ​ໃນ​ການ​ຕຽມ​ພ້ອມ​ສຳ​ລັບ​ການ​ຈັດ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ​ຄັ້ງ​ທີ 11 ມາ​ແລ້ວ​ຄັ້ງ​ນຶ່ງ​ໃນ​ປີ 2018 ໂດຍ​ສາ​ເຫ​ດ​ທີ່​ເຮັດ​ໃຫ້​ຕັ້ງ​ເລື່ອງ​ການ​ຈັດ​ງານ​ໃນ​ຄັ້ງ​ນັ້ນ​ເພາະ​ອຸ​ທົກ​ກະ​ໄພ​ຄັ້ງ​ໃຫຍ່​ທີ່​ເກີດ​ຂຶ້ນ​ໃນ​ທົ່ວ​ປະ​ເທດ ຊຶ່ງ​ລວມ​ເຖິງ​ກໍ​ລະ​ນີ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ​ດ້ວຍ​ນັ້ນ ໄດ້​ສົ່ງ​ຜົນ​ກະ​ທົບ​ຢ່າງ​ໜັກ​ໜ່ວງ​ໃນ​ທົ່ວ​ປະ​ເທດ ລາວ ທີ່​ຄິດ​ເປັນ​ມູນ​ຄ່າ​ເສຍ​ຫາຍຫຼາຍກວ່າ 4,000 ຕື້​ກີບ ແລະ ໃນ​ປີ 2019 ກໍ​ຍັງ​ເກີດ​ໄພ​ນ້ຳ​ຖ້ວມ​ຄັ້ງ​ໃຫຍ່​ໃນ​ພາກ​ກາງ ແລະ ພາກ​ໃຕ້ ທີ່​ເຮັດ​ໃຫ້​ເກີດ​ການ​ເສຍ​ຫາຍຫຼາຍກວ່າ 4,000 ຕື້​ກີບ​ເຊັ່ນ​ກັນ ສ່ວນ​ໃນ​ປັດ​ຈຸ​ບັນ​ນີ້ ລາວ​ກໍ​ຕ້ອງ​ຖືກ​ກະ​ທົບ​ຈາກ​ການ​ລະ​ບາດ​ຂອງ Covid-19 ຊຶ່ງ​ຄາດ​ວ່າ​ຈະ​ເຮັດ​ໃຫ້ ລາວ ສູນ​ເສຍ​ລາຍ​ຮັບ​ໃນ​ພາກ​ບໍ​ລິ​ການ ແລະ ທ່ອງ​ທ່ຽວຫຼາຍກວ່າ 500 ລ້ານ​ໂດ​ລາ.

XS
SM
MD
LG