ລິ້ງ ສຳຫລັບເຂົ້າຫາ

ລມຕ ລາວ ຢືນຢັນ ໃນເປົ້າໝາຍ ທີ່ຈະກ້າວໄປ ເປັນໝໍ້ໄຟ ຂອງກຸ່ມອາຊ່ຽນ


ທ່ານວີລະພົນ ວີລະວົງ ລັດຖະມົນຕີຊ່ວຍວ່າການ ກະຊວງພະລັງງານ ແລະບໍ່ແຮ່ ໄດ້ຖະແຫລງຢືນຢັນເປົ້າໝາຍ ຂອງລັດຖະບານລາວ.

ລັດຖະມົນຕີລາວຢືນຢັນໃນເປົ້າໝາຍທີ່ຈະກ້າວໄປເປັນໝໍ້ໄຟ
ຫຼື Battery ຂອງກຸມອາຊ່ຽນດ້ວຍການເຊື່ອມໂຍງລະບົບ ແລະ
ໂຄງຂ່າຍສາຍສົ່ງກະແສໄຟຟ້າເຂົ້າດ້ວຍກັນ ທັງພູມິພາກ.

ທ່ານວີລະພົນ ວີລະວົງ ລັດຖະມົນຕີຊ່ວຍວ່າການກະຊວງ
ພະລັງງານ ແລະບໍ່ແຮ່ ໄດ້ຖະແຫລງຢືນຢັນວ່າເປົ້າໝາຍ
ສຳຄັນທີ່ສຸດ ຂອງກອງປະຊຸມ ລະດັບລັດຖະມົນຕີ ດ້ານພະລັງງານ ຂອງອາຊ່ຽນຄັ້ງທີ
32 ທີ່ ລັດຖະບານລາວ ເປັນເຈົ້າພາບ ໃນລະຫວ່າງ ວັນທີ 22 ຫາ 24 ກັນຍານີ້ ຢູ່ນະຄອນ ຫລວງວຽງຈັນ ກໍຄືການກຳນົດແຜນການ ທີ່ຈະເຊື່ມໂຍງລະບົບ ແລະໂຄງຂ່າຍສາຍສົ່ງ
ກະແສໄຟຟ້າທັງ 10 ປະເທດສະມາຊິກເຂົ້າດ້ວຍກັນ.

ທ່ານວີລະພົນ ໄດ້ໃຫ້ການອະທິບາຍວ່າເປົ້າໝາຍດັ່ງກ່າວນີ້ ຖືເປັນຄວາມພະຍາຍາມ
ຂອງລັດຖະບານລາວ ທີ່ຈະກ້າວໄປເປັນໝໍ້​ໄຟ ຫຼື Battery ຂອງ​ອາ​ຊ່ຽນ​ໃຫ້​ໄດ້​ຢ່າງ​ແທ້​
ຈິງ ​ເພາະ​ການ​ເຊື່ອມ​ໂຍງ​ລະບົບ ​ແລະ​ໂຄງ​ຂ່າຍ​ສາຍ​ສົ່ງ​ກະ​ແສ​ໄຟຟ້າ ​ເຂົ້າດ້ວຍ​ກັນຍ່ອມ ​ພົວພັນໂດຍ​ກົງ​ເຖິງ​ການ​ພັດທະນາ​ພະລັງງານ ການ​ຄ້າ ​ແລະ​ການ​ຕອບ​ສະໜອງ​ພະລັງງານ ລະຫວ່າງ​ປະ​ເທດ​ສະມາຊິກ ​ໃນ​ອາ​ຊ່ຽນ​ດ້ວຍ​ກັນ ​ໃຫ້​ໄດ້​ຢ່າງ​ພຽງພໍ ​ໃນ​ລະຍະ​ຍາວ ດັ່ງ​ທີ່​ທ່ານ​ວີລະ​ພົນ ​ໄດ້​ໃຫ້ການ​ຊີ້​ແຈງ​ວ່າ:

“ກອງປະຊຸມ​ທີ່​ເຮົາ​ຈັດ​ຂຶ້ນ ລະຫວ່າງ​ວັນ​ທີ 22 ຫາ 24 ​ເດືອນ​ 9 ​ຖືວ່າ​ເປັນ​ກອງ​
ປະຊຸມ​ເທື່ອ​ທີ 32 ຂອງ​ລັດຖະມົນຕີ​ພະລັງງານ​ອາ​ຊ່ຽນ ຫຼືຮ້ອງວ່າ ການ​ເຮັດ​ໃຫ້
ການ​ນຳ​ໃຊ້​ພະລັງງານ​ນີ້ ມີ​ຄວາມ​ຍືນ​ຍົງ ​ແລະ​ມີ​ປະສິດທິ​ຜົນ ມີ​ການ​ເຊື່ອມ​ໂຍງ​
ທາງ​ດ້ານ​ໄຟຟ້າ​ນຳ​ກັນ Power Integration ຢູ່​ໃນ​ຂົງ​ເຂດ​ນີ້.”

​ໂດຍ​ໃນ​ປັດຈຸບັນ​ລາວ​ມີ​ເຂື່ອນ​ໄຟຟ້າ ທີ່​ກໍ່ສ້າງ​ແລ້ວ​ສຳ​ເລັດ ​ແລະ​ໄດ້​ຜະລິດ​ພະລັງງານ​
ໄຟຟ້າ​ແລ້ວ​ຈຳນວນ 24 ​ໂຄງການ ສ່ວນ​ທີ່​ກຳລັງ​ຢູ່​ໃນ​ລະຫວ່າງ ດຳ​ເນີນ​ການ​ກໍ່ສ້າງ​ມີ​
ຈຳນວນ 38 ​ໂຄງການ ​ແລະ ອີກ 100 ​ໂຄງການ​ຢູ່​ໃນ​ຂັ້ນການ​ສຶກສາ ອອກ​ແບບ ຫຼືສະ​
ແຫວ​ງຫາ​ເງິນ​ທຶນ ທີ່​ຈະ​ນຳໃຊ້​ໃນ​ການ​ກໍ່ສ້າງ​ຕໍ່​ໄປ.

ກອງປະຊຸມ ລະດັບລັດຖະມົນຕີ ດ້ານພະລັງງານ ຂອງອາຊ່ຽນຄັ້ງທີ 32 ທີ່ ລັດຖະບານລາວ ເປັນເຈົ້າພາບ ໃນລະຫວ່າງ ວັນທີ 22 ຫາ 24 ກັນຍານີ້ ຢູ່ນະຄອນຫລວງວຽງຈັນ.
ກອງປະຊຸມ ລະດັບລັດຖະມົນຕີ ດ້ານພະລັງງານ ຂອງອາຊ່ຽນຄັ້ງທີ 32 ທີ່ ລັດຖະບານລາວ ເປັນເຈົ້າພາບ ໃນລະຫວ່າງ ວັນທີ 22 ຫາ 24 ກັນຍານີ້ ຢູ່ນະຄອນຫລວງວຽງຈັນ.

ທັງ​ນີ້​ໂດຍ​ຈາກ​ການ​ສຶກສາ​ໃນ​ລະຍະ ທີ່​ຜ່ານ​ມາ ພົບ​ວ່າການ​
ກໍ່ສ້າງ​ເຂື່ອນ​ໃນ​ລາວ​ຢ່າງ​ເຕັມ​ກຳລັງ​ນັ້ນ ຈະ​ເຮັດ​ໃຫ້​ສາມາດ
​ຜະລິດ​ພະລັງງານ​ໄຟຟ້າ​ໄດ້​ລວມກັນ ລະ​ຫວ່າງ 28,000 ​ເຖິງ
30,000 ແມ​ກກະ​ວັດຕ໌ (MW) ທັງ​ກໍ​ຍັງ​ຈະ​ສົ່ງ​ຜົນ​ດີ ຕໍ່​ການ​ພັດ
ທະນາ​ເພື່ອ​ລົບ​ລ້າງ​ຄວາມ​ຍາກຈົນ ຂອງ​ປະຊາຊົນ​ບັນດາ​ເຜົ່າ​
ທີ່ຢູ່​ເຂດ​ຊົນນະ​ບົດອີກ​ດ້ວຍ.

ກ່ອນ​ໜ້າ​ນີ້ ກະຊວງ​ພະລັງງານ​ແລະ​ບໍ່​ແຮ່ ລາຍ​ງານ​ວ່າ​ບັນດາ​
ໂຄງການ​ທີ່​ຈະ​ກໍ່ສ້າງ​ແລ້ວ​ສຳ​ເລັດ​ພາຍ​ໃນ​ປີ 2015-2016 ມີ​ຢູ່
20 ​ໂຄງການ​ດ້ວຍ​ກັນ ​ໂດຍ​ໃນ​ນີ້​ກໍ​ເປັນ​ການ​ກໍ່ສ້າງ​ເຂື່ອນ 19 ​
ໂຄງການ ​ແລະ​ໂຮງງານ​ຜະລິດ​ກະ​ແສໄຟຟ້າ​ຈາກ​ຖ່ານລິກໄນຕ໌
1 ​ໂຄງການ ຊຶ່ງ​ຈະ​ເຮັດ​ໃຫ້​ຄວາມ​ອາ​ສາມາດ​ ໃນ​ການ​ຜະລິດ​ພະ
ລັງ​ໄຟຟ້າ​ ໃນ​ລາວ​ເພີ້​ມຂຶ້ນ ຈາກ 3,000 MW ​ໃນ​ປັດຈຸບັນ​ ​ເປັນ
ຫຼາຍກວ່າ 7,000 MW.

ໂດຍ​ໂຄງການ​ທີ່​ຄາດໝາຍ​ວ່າ ຈະ​ກໍ່ສ້າງ​ແລ້ວ​ສຳ​ເລັດ​ພາຍ​ໃນ​ປີ 2014-2015 ກໍ​ປະກອບ ​ດ້ວຍ​ເຂື່ອນ​ຫ້ວຍລຳ​ພັນ​ຂະຫນາດ 88 MW ​ໃນ​ແຂວງ​ຫລວງ​ນ້ຳທາ ​ເຂື່ອນ​ນ້ຳຄານ 2 ຂະຫນາດ 130 MW ​ໃນ​ແຂວງ​ຫລວງ​ພະ​ບາງ ​ເຂື່ອນ​ເຊ​ນ້ຳນ້ອຍ 1 ຂະຫນາດ 15 MW ​ເຂື່ອນ​ນ້ຳງຽບ 3A ຂະຫນາດ 44 MW ​ເຂື່ອນນ້ຳກົງ 2 ​ແລະ ​ໂຮງ​ຜະລິດ​ກະ​ແສ​ໄຟຟ້າ​ຫົງ​ສາລິກ​ໄນ​ຕ໌ ຂະຫນາດ 1,800 MW ​ໃນ​ແຂວງ​ໄ​ຊຍະ​ບູລີ ສ່ວນ​ທີ່​ຈະ​ກໍ່ສ້າງ​ໃຫ້​ແລ້ວ​ສຳ​ເລັດ
​ໃນ​ປີ 2016 ກໍ​ປະກອບ​ດ້ວຍ​ເຂື່ອນ​ນ້ຳອູ 5 ຂະຫນາດ 240 MW ​ເຂື່ອນ​ນ້ຳອູ 6 ຂະຫນາດ 180 MW ​ໃນ​ແຂວງ​ຫລວງ​ພະ​ບາງ ​ແລະ​ເຂື່ອນນ້ຳ​ງຽບ 1 ຂະຫນາດ 180 MW ​ໃນ​ແຂວງ
​ວຽງ​ຈັນ.

ນອກຈາກ​ນັ້ນ ກໍ​ມີ​ເຂື່ອນ​ເຊ​ຂະ​ໝານ 1 ຂະຫນາດ 322 MW ​ເຂື່ອນ​ນ້ຳອູ 2 ຂະຫນາດ
120 MW ​ເຂື່ອນນ້ຳຄານ 3 ຂະຫນາດ 60 MW ຢູ່​ໃນ​ແຂວງ​ຫລວງ​ພະ​ບາງ ກໍ​ຈະ​ສ້າງ​
ແລ້ວ​ສຳ​ເລັດ ​ໃນ​ປີ 2016-2017 ​ແລະ​ໂຄງການ​ເຂື່ອນ​ໄຊ​ຍະ​ບູລີ​ເທິງ​ແນວ​ແມ່ນ້ຳ​ຂອງ
​ໃນ​ເຂດ​ແຂວງ​ໄຊ​ຍະ​ບູລີ ຊຶ່ງ​ຈະ​ສາມາດ​ຜະລິດ​ພະລັງງານ​ໄຟຟ້າ​ໄດ້​ເຖິງ 1,280 MW ນັ້ນ
ກໍ​ມີ​ກຳນົດ​ການ​ກໍ່ສ້າງ​ໃຫ້​ແລ້ວ​ສຳ​ເລັດ​ໃນ​ປີ 2019.

ທັງ​ນີ້​ໂດຍ​ກະຊວງ​ພະລັງງານ ​ແລະ​ບໍ່​ແຮ່ ​ໄດ້​ວາງ​ແຜນການ​ທີ່​ຈະ​ເພີ້​ມ ລະດັບ​ຄວາມ​ອາດ​
ສາມາດ ​ໃນ​ການ​ຜະລິດ​ພະລັງງານ​ໄຟຟ້າ​ຈາກ 3,200 MW ​ໃນ​ປັດ​ຈຸ​ບັນ​ເປັນ​ບໍ່​ນ້ອຍກວ່າ 12,500 MW ​ໃນ​ປີ 2020 ຊຶ່ງ​ການ​ທີ່​ຈະ​ສາມາດ​ບັນ​ລຸເປົ້າໝາຍ​ດັ່ງກ່າວ​ໄດ້ ຢ່າງ​ແທ້​ຈິງ ​ນັ້ນ
ກໍ​ຈະ​ຕ້ອງ​ດຳ​ເນີນ​ການ​ກໍ່ສ້າງ​ເຂື່ອນ ​ແລະ​ໂຮງງານ​ໄຟຟ້າ​ໃຫ້​ໄດ້​ເຖິງ 39 ​ໂຄງການ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG