ປະເທດລາວໄດ້ສູນເສຍປ່າໄມ້ໄປຫຼາຍກວ່າ 4.8 ລ້ານເຮັກຕາ ໃນ 20 ປີຜ່ານມາ ສ່ວນໃຫຍ່ເປັນຍ້ອນການລັກລອບຕັດໄມ້ແບບຜິດກົດໝາຍ ທີ່ຍັງບໍ່ທັນໄດ້ຮັບການແກ້ໄຂ ແລະ ປາບປາມຢ່າງແທ້ຈິງ.
ຜູ້ປະສານງານຂອງເຄືອຂ່າຍ Global Forest Watch ໃນອາຊຽນ ເປີດເຜີຍວ່າ: ການລັກລອບຕັດໄມ້ແບບການຄ້າຜິດກົດໝາຍລະຫວ່າງປີ 2003 ຫາ 2023 ໄດ້ເຮັດໃຫ້ປະເທດລາວສູນເສຍເນື້ອທີ່ປ່າໄມ້ຫຼາຍກວ່າ 4.8 ລ້ານເຮັກຕາ, ໂດຍສະເພາະໃນປີ 2023 ພຽງປີດຽວນັ້ນ ມີການລັກລອບຕັດໄມ້ຫຼາຍກວ່າ 445,000 ເຮັກຕາ. ຊື່ງເປັນຍ້ອນວິກິດການເສດຖະກິດແລະການເງິນທີ່ເຮັດໃຫ້ປະຊາຊນລາວຈຳນວນບໍ່ໜ້ອຍຕ້ອງຍອມເປັນແຮງງານຮັບຈ້າງຕັດໄມ້ໃຫ້ກັບຂະບວນການຄ້າໄມ້ຜິດກົດໝາຍຂ້າມຊາດ ໂດຍສະເພາະຍູ່ເຂດຊາຍແດນລາວ ທີ່ຕິດຕໍ່ກັບຫວຽດນາມ ແລະຈີນນັ້ນ.
ພາຍໃຕ້ສະພາບການດັ່ງກ່າວ, ຍັງຖືວ່າ ເປັນເຫດຜົນສຳຄັນທີ່ເຮັດໃຫ້ຄະນະຜູ້ຕາງຫນ້າດ້ານການຄ້າຂອງສະຫະພາບເອີຣົບ ຍັງບໍ່ອະນຸຍາດໃຫ້ນໍາເຂົ້າຜະລິດຕະພັນໄມ້ຈາກລາວ ຈົນເຖິງປັດຈຸບັນ. ເພາະເຫັນວ່າ ການລັກລອບຕັດໄມ້ເພື່ອການຄ້າຜິດກົດໝາຍຍັງມີຢູ່ຢ່າງແຜ່ຫຼາຍໃນລາວ. ຊື່ງນອກຈາກບໍ່ມີຄວາມເຊື່ອໝັ້ນຕໍ່ຜະລິດຕະພັນໄມ້ຂອງລາວວ່າ ບໍ່ມີສ່ວນປະກອບທີ່ມາຈາກການຕັດໄມ້ທີ່ຜິດກົດໝາຍຈາກການຄ້າໄມ້ທີ່ຜິດກົດໝາຍແລ້ວ, ຍັງເຮັດໃຫ້ຄະນະຜູ້ຕາງຫນ້າຂອງສະຫະພາບເອີຣົບ ບໍ່ມີຄວາມເຊື່ອໝັ້ນຕໍ່ມາດຕະການຂອງລັດຖະບານລາວ ໃນການປາບປາມການລັກລອບຕັດໄມ້ທີ່ຜິດກົດໝາຍອີກດ້ວຍ ໂດຍເຫັນໄດ້ຈາກການອະນຸຍາດພິເສດຂອງລັດຖະບານລາວໃນການສົ່ງອອກໄມ້ທ່ອນຫຼາຍກວ່າ 1 ລ້ານແມັດກ້ອນທີ່ຍຶດໄດ້ຈາກການລັກລອບຕັດໄມ້ທີ່ຜິດກົດໝາຍໃນໄລຍະປີ 2022-2023 ຜ່ານມາ.
ໂດຍເຖິງແມ່ນວ່າ ກົມການເມືອງສູນກາງພັກປະຊາຊົນ ປະຕິວັດລາວ ໄດ້ອອກຄຳສັ່ງໃຫ້ເພີ່ມມາດຕະການເຂັ້ມງວດ ໃນການປາບປາມບັນດາໂຮງງານປຸງແຕ່ງໄມ້ໃນທົ່ວປະເທດ ແລະໃຫ້ມີການປະຕິບັດ ຄຽງຄູ່ກັບການເພີ່ມທະວີການມີສ່ວນຮ່ວມຂອງປະຊາຊົນລາວບັນດາເຜົ່າ ເພື່ອປົກປັກຮັກສາປ່າໄມ້ໃຫ້ຍືນຍົງ ເຊັ່ນ ການສ້າງລາຍຮັບຈາກສິນເຊື່ອຄາບອນ ແລະການທ່ອງທ່ຽວທໍາມະຊາດ ເພື່ອສ້າງອາຊີບໃຫ້ແກ່ປະຊາຊົນຢູ່ທ້ອງຖິ່ນເປັນສຳຄັນກໍຕາມ. ແຕ່ວ່າ ກໍຍັງບໍ່ສາມາດປະຕິບັດໄດ້ຈິງ ແລະ ການລັກລອບເຜົາປ່າເພື່ອເຮັດໄຮ່ຢ່າງຜິດກົດໝາຍ ກໍຍັງເກີດຂຶ້ນຢ່າງກວ້າງຂວາງອີກດ້ວຍ ດັ່ງນັກທຸລະກິດໃນສະພາການຄ້າແລະອຸດສາຫະກໍາແຫ່ງຊາດ ໄດ້ຢັ້ງຢືນວ່າ:
“ບັນຫາທີ່ 1 ນີ້ ກໍຍ້ອນແມ່ນຄົນມີການບຸກລຸກປ່າໄມ້ເພື່ອເຮັດກິດຈະກຳຕ່າງໆ, ເຊັ່ນປູກເຂົ້າ ມັນຕົ້ນ ຢາງພາລາ ມີການບຸກເບີກເພື່ອການຜະລິດ ໂດຍທີ່ບຸກເບີກໄປແລ້ວ ກະການຈູດ ການຖາງ ບໍ່ສາມາດສິຮັກສາໄດ້, ມັນກະລາມໄປ ອັນທີ 2 ແມ່ນສະພາບດິນຟ້າອາກາດ ເກິດໄພແຫ້ງແລ້ງ ປະລິມານນ້ຳຝົນໃນເມື່ອກ່ອນນີ້ ມັນໄດ້ 400 ກວ່າ ມີລີແມັດ ແຕ່ປີນີ້ມີພຽງ 40-50 ມີລີແມັດເທົ່ານັ້ນ ເຮັດໃຫ້ປ່າໄມ້ນີ້ ມັນແຫ້ງແລ້ງຫຼາຍ, ສຸດທ້າຍນີ້, ມັນກະມີຄົນທີ່ສວຍໂອກາດ ແລະຈູດລາມໄປເພື່ອຢາກໄດ້ດິນດອນທີ່ຖືກໄຟໄຫມ້.”
ສ່ວນກະຊວງກະສິກຳ ແລະ ປ່າໄມ້ ໄດ້ວາງຄາດໝາຍວ່າ ຈະປູກຕົ້ນໄມ້ໃຫ້ໄດ້ໃນເນື້ອທີ່ 42.000 ເຮັກຕາ ໃນປີ 2024. ໃນນີ້ ເປັນປ່າສະຫງວນ-ປ່າປ້ອງກັນ 7,600 ເຮັກຕາ, ປ່າອຸດສາຫະກຳ 24,800 ເຮັກຕາ ແລະ ປ່າໄມ້ເອກະຊົນ 9,600 ເຮັກຕາ ພາຍໃຕ້ເປົ້າໝາຍການເພີ່ມເນື້ອທີ່ປ່າໄມ້ໃຫ້ໄດ້ 16 ລ້ານເຮັກຕາ ຫຼື 70% ຂອງເນື້ອທີ່ທັງໝົດຂອງລາວພາຍໃນປີ 2025, ແຕ່ບັນຫາກໍຄືການຄຸ້ມຄອງປ່າໄມ້ບໍ່ສາມາດປະຕິບັດໄດ້ຈິງ ແລະ ເນື້ອທີ່ປ່າໄມ້ໃນລາວ ຍັງເຫຼືອພຽງ 58% ເທົ່ານັ້ນ ເພາະວ່າ ຍັງບໍ່ທັນມີການລົງໂທດທີ່ເດັດຂາດ ຕໍ່ເຈົ້າໜ້າທີ່ ພັກ-ລັດທີ່ພົວພັນກັບການລັກລອບຕັດໄມ້ ເພື່ອການຄ້າຜິດກົດໝາຍດັ່ງກ່າວ ດັ່ງທີ່ ສະມາຊິກ ສະພາແຫ່ງຊາດລາວ ໄດ້ໃຫ້ທັດສະນະວ່າ:
“ພວກເຮົາບໍ່ທັນສາມາດອັດຊ່ອງຫວ່າງການຮົ່ວໄຫລຂອງງົບປະມານ ທັງລາຍຮັບ ແລະລາຍຈ່າຍ ແລະຮ້າຍແຮງໄປກວ່ານັ້ນ ກໍເກິດມີປະກົດການຫຍໍ້ທໍ້ຫລາຍຢ່າງ ເປັນຕ້ນແມ່ນການສໍ້ລາດບັງຫຼວງຂອງລັດຖະບານ ທີ່ເຫັນໄດ້ວ່າ ແຜ່ຫລາຍຫັ່ນແຫລະ ທັງໃນລະດັບສູນກາງ ແລະລະດັບທ້ອງຖິ່ນ ແລະການນໍາໃຊ້ສິດອໍານາດຂອງເຈົ້າຫນ້າທີ່ທີ່ກ່ຽວຂ້ອງບໍ່ໄດ້ປະຕິບັດຕາມລະບຽບກົດຫມາຍ ອັນນີ້ ກະບໍ່ສາມາດແກ້ໄຂໄດ້ ອັນແກ້ໄດ້ ກະແກ້ແຕ່ບ່ອນອ່ອນ ບ່ອນແຂັງຫັ່ນ ແກ້ບໍ່ໄດ້.”
ທັ້ງນີ້ ນາຍົກລັດຖະມົນຕີລາວ ໄດ້ອອກຄຳສັ່ງເລກທີ 15/ນຍ ເພື່ອຫ້າມການສົ່ງອອກໄມ້ທ່ອນໄປຕ່າງປະເທດຢ່າງເດັດຂາດ ນັບແຕ່ເດືອນພຶດສະພາ 2016 ເປັນຕົ້ນມາ, ໂດຍໄດ້ຈັດຕັ້ງຄະນະສະເພາະກິດ ເພື່ອກວດກາໂຮງງານໄມ້ 3,454 ແຫ່ງ ໃນໄລຍະ 2016-2023 ພົບວ່າ ມີໂຮງງານປຸງແຕ່ງໄມ້ 2,364 ໂຮງງານ ທີ່ໄດ້ຊື້ໄມ້ຈາກການລັກລອບຕັດໄມ້ຜິດກົດໝາຍ ດັ່ງນັ້ນ ຈຶ່ງໄດ້ສັ່ງໃຫ້ຢຸດກິດຈະການຂອງໂຮງງານໄມ້ທັງໝົດ 2,364 ແຫ່ງດັງກ່າວ.
ຟໍຣັມສະແດງຄວາມຄິດເຫັນ