ລິ້ງ ສຳຫລັບເຂົ້າຫາ

logo-print

ເຈົ້າ​ໜ້າ​ທີ່ ​ຂັ້ນ​ສູງ​ຂອງ ໄທ ລະ​ບຸ​ວ່າ ລາວ ເປັນ​ສູນ​ກາງ ​ໃນ​ການ​ລັກ​ລອບ ຂົນ​ສົ່ງ​ໄມ້​ຄະ​ຍູງ


ຕຳຫຼວດ ໄທ ຍອດ​ໄມ້​ຄະ​ຍູງ​ທີ່​ຖືກ​ລັກ​ລອບ​ຂົນ​ສົ່ງ​ຄ້າ​ຂາຍ​ຢ່າງ​ຜິດ​ກົດ​ໝາຍ.

ເຈົ້າ​ໜ້າ​ທີ່​ຂັ້ນ​ສູງ​ຂອງ ໄທ ລະ​ບຸ​ວ່າ ລາວ ເປັນ​ສູນ​ກາງ​ສຳ​ຄັນ​ໃນ​ການ​ຂົນ​ສົ່ງ​ໄມ້​ຄະ​ຍູງ
ທີ່ລັກລອບຕັດຈາກເຂດປ່າສະຫງວນແຫ່ງຊາດໃນ ໄທ ແລະ ລັກລອບຂົນສົ່ງຜ່ານ
ລາວ ຕໍ່ໄປຍັງ ຫວຽດນາມ ແລະ ຈີນ.

ທ່ານ ອັດ​ທະ​ພົນ ຈະ​ເລີນຊັນ​ສາ ຮອງ​ອະ​ທິ​ບໍ​ດີກົມ​ປ່າ​ໄມ້​ ໃນ​ສັງ​ກັດ​ກະ​ຊວງ​ຊັບ​ພະ​
ຍາກອນທຳມະຊາດ ແລະ ສິ່ງແວດລ້ອມ ຢືນຢັນວ່າ ການລັກລອບຕັດໄມ້ຄະຍູງຢູ່
ໃນເຂດປ່າສະຫງວນແຫ່ງຊາດຂອງ ໄທ ຍັງຄົງເກີດຂຶ້ນຢ່າງຕໍ່ເນື່ອງ ແລະ ມີລັກສະ
ນະເປັນຂະບວນການຂ້າມຊາດທີ່ມີການຈັດແບ່ງໜ້າທີ່ລະຫວ່າງກັນຢ່າງຊັດເຈນຄື
ຂະບວນການໃນ ໄທ ຈະຮັບຜິດຊອບການລັກລອບຕັດໄມ້ຄະຍູງໃນ ໄທ ສ່ວນຂະ
ບວນການໃນ ລາວ ຈະຮັບເອົາໄມ້ຄະຍູງຈາກ ໄທ ແລະ ຂົນສົ່ງຜ່ານ ລາວ ໄປ ຫວຽດ
ນາມ ສ່ວນຂະບວນການຢູ່ໃນ ຫວຽດນາມ ກໍຈະສົ່ງຕໍ່ໄປໃຫ້ຜູ້ສັ່ງຊື້ໃນ ຈີນ ຕາມລຳດັບ.

ທາງ​ດ້ານ​ເຈົ້າ​ໜ້າ​ທີ່​ຂັ້ນ​ສູງ​ຝ່າຍ​ປາບ​ປາມ​ຂອງ​ກົມ​ປ່າ​ໄມ້ ໄທ ເປີດ​ເຜີຍ​ວ່າ​ຂະ​ບວນ​
ການ​ໃນ ລາວ ຍັງ​ເປັນ​ຄົນ​ກາງ​ໃນ​ການ​ປະ​ສານ​ງານ​ລະ​ຫວ່າງ ຂະ​ບວນ​ການ​ໃນ ໄທ
ກັບ ຫວຽດນາມ ອີກດ້ວຍ ໂດຍຄົນລາວ ທີ່ເປັນຄົນກາງຈະເດີນທາງໄປປະສານງານ
ແລະ ຈ່າຍຄ່າໄມ້ຄະຍູງ ໃຫ້ກັບຂະບວນການໃນ ໄທ ໂດຍກົງ ສ່ວນຂະບວນການໃນ ຫວຽດນາມ ນັ້ນກໍເປັນທັງນາຍທຶນ ຜູ້ຮັບຄຳສັ່ງຊື້ ແລະ ຮັບເອົາໄມ້ຄະຍູງຈາກ ລາວ ໄປ
ສົ່ງຕໍ່ໃຫ້ຜູ້ສັ່ງຊື້ໃນ ຈີນ ອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງຂອງ ໄທ ໃຫ້ການຢືນຢັນພາຍ
ຫຼັງຈາກການຈັບກຸມຜູ້ຕ້ອງຫາສັນຊາດ ລາວ ໄດ້ 2 ຄົນເມື່ອບໍ່ນານມານີ້ວ່າ

"ເຮົາ​ກວດ​ສອບ​ຈາກ​ການ​ໃຊ້​ໂທ​ລະ​ສັບ ການ​ໃຊ້ ໄລ​ນ໌ ນີ້​ມີ​ອີກ 40 ຄົນ​ທີ່​ກ່ຽວ​ຂ້ອງ​ກັບ​
ການເຮັດໄມ້ ຊຶ່ງເຮົາໄດ້ຊື່ຫຼິ້ນ ຊື່ຫຍັງມາໝົດແລ້ວ 40 ນີ້ຖືວ່າເປັນຂະບວນການໃຫຍ່
ແລ້ວກໍມີນາຍທຶນເປັນຊາວ ຫວຽດນາມ ໂດຍຄົນລາວ ທີ່ເຂົ້າມານີ້ ກໍຄືເປັນຄົນ ລາວ
ຊຶ່ງມາເໝືອນມາຄວບຄຸມການຈ່າຍເງິນ ການເບິ່ງແຍງ."

ທັງ​ນີ​ໂດຍ​ໃນ​ຊ່ວງ 8 ປີ​ທີ່​ຜ່ານ​ມາ ຝ່າຍ​ປາບ​ປາມ​ຂອງ​ກົມ​ປ່າ​ໄມ້ ໄທ ສາ​ມາດ​ຈັບ​ກຸມ​
ສະມາຊິກໃນຂະບວນການຄ້າໄມ້ຄະຍູງຂ້າມຊາດໄດ້ 6,936 ຄົນຈາກການຈັບກຸມ
9,196 ຄັ້ງ ແລະ ຍຶດໄມ້ຄະຍູງໄດ້ເຖິງ 127,055 ທ່ອນ ຄິດເປັນມູນຄ່າສູງກວ່າ
3,070 ລ້ານບາດ ໂດຍເຂດທີ່ມີການລັກລອບຂົນໄມ້ຄະຍູງອອກຈາກ ໄທ ຫຼາຍທີ່ສຸດ
ກໍຄືເຂດຕິດຕໍ່ຊາຍແດນລະຫວ່າງ ໄທ-ລາວ ແລະ ກຳປູເຈຍ ນັ້ນເອງ ດັ່ງທີ່ເຈົ້າໜ້າທີ່
ພາສີ ໄທ ໃຫ້ການຢືນຢັນວ່າ

"ກໍ​ຈະ​ມີ​ອອກຫຼາຍ​ເສັ້ນ​ທາງ ກໍ​ຄື​ໄປ​ທີ່​ຊຽງ​ຣາຍ ໄປ​ແມ່​ນ້ຳ​ຂອງ ອີກ​ສ່ວນ​ນຶ່ງ ກໍ​ອອກ​
ທາງອິສານ ບໍ່ວ່າຈະເປັນທາງໜອງຄາຍ, ບຶງການ ແລ້ວກໍອີກຊ່ອງທາງນຶ່ງ ກໍຄືຊາຍ
ແດນທາງດ້ານ ກຳປູເຈຍ."

ນອກ​ຈາກ​ການ​ເປັນ​ທາງ​ຜ່ານ​ຂອ​ງ​ການ​ລັກ​ລອບ​ຂົນ​ສົ່ງ​ໄມ້​ຄະ​ຍູງ​ຈາກ ໄທ ໄປ ຫວຽດ​
ນາມ ແລະ ຈີນ ດັ່ງກ່າວແລ້ວ, ສຳນັກງານເລຂາທິການແຫ່ງອະນຸສັນຍາທີ່ວ່າດ້ວຍ
ການຄ້າລະຫວ່າງ ປະເທດ ກ່ຽວກັບ ຊະນິດສັດປ່າ ແລະ ພືດປ່າທີ່ໃກ້ສູນພັນ
(CITES) ຍັງໄດ້ຈັດສົ່ງໜັງສືເຖິງລັດຖະບານ ລາວ ເພື່ອຢ້ຳເຕືອນວ່າ ສປປ ລາວ
ຍັງຄົງເປັນປະເທດທີ່ມີການລັກລອບຄ້າຂາຍສັດປ່າ ແລະ ຊິ້ນສ່ວນຂອງສັດປ່າຕ້ອງ
ຫ້າມຕາມອະນຸສັນຍາ CITES ທັງຍັງມີການລັກລອບນຳເຂົ້າຊິ້ນສ່ວນສັດປ່າທີ່ຕ້ອງ
ຫ້າມເຊັ່ນ ງາຊ້າງ ແລະ ນໍແຮດຈາກ ອາຟຣິກາ ເພື່ອສົ່ງຕໍ່ໄປຍັງປະເທດທີ 3 ອີກດ້ວຍ.

ການ​ແຈ້ງ​ເຕືອນ​ຂອງ CITES ໃນ​ຄັ້ງ​ນີ້​ໄດ້​ມີ​ຂຶ້ນ​ກ່ອນ​ກອງ​ປະ​ຊຸມ​ປະ​ຈຳ​ປີ 2018 ທີ່​ກຳ​
ນົດ​ຈະ​ມີ​ຂຶ້ນ​ໃນ​ເດືອນ​ຕຸ​ລານີ້ທີ່​ນະ​ຄອນ ເຈ​ນີ​ວາ ປະ​ເທດ ສວິດ​ເຊີ​ແລນ ໂດຍ​ສຳ​ນັກ​
ງານເລຂາທິການ CITES ໄດ້ແຈ້ງການເຕືອນເພື່ອໃຫ້ລັດຖະບານ ລາວ ດຳເນີນມາດ
ຕະການປ້ອງກັນ ແລະ ປາບປາມການລັກລອບຄ້າສັດປ່າ ແລະ ຊິ້ນສ່ວນສັດປ່າດັ່ງ
ກ່າວຢ່າງເຂັ້ມງວດ ທັງຍັງເນັ້ນຢ້ຳດ້ວຍວ່າ ທາງການ ລາວ ຈະຕ້ອງສະເໜີລາຍງານ
ຜົນການຈັດຕັ້ງປະຕິບັດຕໍ່ກອງປະຊຸມ CITES ອີກດ້ວຍ.

ສ​ປ​ປ ລາວ ໄດ້​ເຂົ້າ​ຮ່ວມ​ໃນ​ການ​ຕ້ານ​ອາ​ຊະ​ຍາ​ກຳ​ຕໍ່​ສັດ​ປ່າ​ໃນ​ປີ 2014 ໂດຍ​ຂຶ້ນ​ບັນ​
ຊີສັດປ່າ ແລະ ສັດນ້ຳ 95 ຊະນິດເປັນສັດປ່າສະຫງວນຫວງຫ້າມ ແລະ 65 ຊະນິດ
ເປັນສັດປ່າຄຸ້ມຄອງຕາມກົດໝາຍ.

ເບິ່ງຄວາມເຫັນ (3)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG