ທາງການລາວຈະຈັດຕັ້ງສະຖາບັນແຫ່ງຊາດ ເພື່ອຮັບຮອງ
ຄຸນວຸທິວິຊາຊີບ ແລະ ມາດຕະຖານຝີມືແຮງງານ ທີ່ໄດ້ລະດັບ
ຄຸນນະພາບ ແລະ ມາດຕະຖານດຽວກັນກັບ ທຸກປະເທດ
ສະມາຊິກໃນກຸ່ມອາຊ່ຽນດ້ວຍກັນ.
ທ່ານຄຳພຽງ ແກ້ວລັງສີ ຮັກສາການຫົວໜ້າສະຖາບັນພັດທະນາຝີມືແຮງງານ ລາວ-
ເກົາຫຼີໃຕ້ ຖະແຫລງຢືນຢັນວ່າ ທາງການລາວມີແຜນການ ທີ່ຈະສ້າງຕັ້ງສະຖາບັນ
ລະດັບຊາດ ເພື່ອຮັບຜິດຊອບໃນການໃຫ້ການຮັບຮອງ ຄຸນວຸທິວິຊາຊີບ ແລະມາດຕະຖານ ຝີມືແຮງງານລາວໃຫ້ໄດ້ໃນທ້າຍປີ 2015 ນີ້ ໂດຍໃນປັດຈຸບັນ ກໍໄດ້ເລີ້ມ ການສຶກສາຄົ້ນ ຄວ້າໃນເບື້ອງຕົ້ນ ເພື່ອຈະເຊື່ອມໂຍງຝີມືແຮງງານ ໃນເຂດລຸ່ມແມ່ນ້ຳຂອງ ກ່ອນທີ່ ຈະເຊື່ອມໂຍງກັບທຸກປະເທດ ໃນກຸ່ມອາຊ່ຽນດ້ວຍກັນຢ່າງຄົບຖ້ວນ.
ການຮັບຮອງຄຸນວຸທິວິຊາຊີບ ແລະມາດຕະຖານຝີມືແຮງງານດັ່ງກ່າວນີ້ ຈະເຮັດໃຫ້ແຮງງານມີຝີມືຂອງລາວໄດ້ຮັບຄ່າຈ້າງໃນອັດຕາທີ່ເທົ່າທຽມກັບແຮງງານຂອງປະເທດເພື່ອນບ້ານ ໂດຍສະເພາະແມ່ນພາຍຫຼັງຈາກ ທັງ 10 ປະເທດສະມາຊິກໃນອາຊ່ຽນໄດ້ກາຍເປັນປະຊາຄົມເສດຖະກິດດຽວກັນ ນັບແຕ່ວັນທີ 31 ທັນວາ 2015 ເປັນຕົ້ນໄປນັ້ນ ກໍຍ່ອມຈະສົ່ງຜົນໃຫ້ມີການແຂ່ງຂັນ ໃນການຫາວຽກເຮັດງານທຳ ລະຫວ່າງແຮງງານໃນອາຊ່ຽນຫຼາຍຂຶ້ນ ຈຶ່ງຈຳເປັນຢ່າງຍິ່ງ ທີ່ຈະຕ້ອງກໍ່ຕັ້ງສະຖາບັນດັ່ງກ່າວນີ້ ໃນລາວ ຫາກບໍ່ສະນັ້ນແລ້ວ ກໍຈະເຮັດໃຫ້ແຮງງານລາວບໍ່ເປັນທີ່ຍອມຮັບ ໃນກຸ່ມອາຊ່ຽນດ້ວຍກັນນັ້ນເອງ.
ກ່ອນໜ້ານີ້ ເຈົ້າໜ້າທີ່ຂັ້ນສູງ ໃນກົມພັດທະນາຝີມືແຮງງານ
ແລະຈັດຫາງານຂອງລາວຍອມຮັບວ່າ ນັກສຶກສາທີ່ຈົບການ
ສຶກສາລະດັບວິຊາຊີບຊັ້ນສູງ ເຖິງປະລິນຍາຕີໃນປີ 2014
ຈຳນວນ 115,523 ຄົນ ມີໂອກາດຕ່ຳຫຼາຍທີ່ຈະຖືກວ່າຈ້າງ
ໂດຍບັນດາບໍລິສັດຕ່າງຊາດໃນລາວ ເພາະວ່າ ຜົນຈາກການ
ເກັບກຳຂໍ້ມູນ ກ່ຽວກັບລະດັບຄວາມເພິ່ງພໍໃຈ ຂອງບໍລິສັດ
ຕ່າງຊາດໃນລາວ ທີ່ມີຕໍ່ຄຸນນະພາບຂອງນັກສຶກສາລາວ
ພົບວ່າ ມີພຽງແຕ່ 17,300 ກວ່າຄົນ ຫຼືຄິດເປັນ 15 ເປີເຊັນ
ເທົ່ານັ້ນທີ່ມີຄວາມຮູ້ຄວາມສາມາດ ໄດ້ລະດັບມາດຕະຖານ
ຕາມຄວາມຕ້ອງການ ຂອງບັນດາບໍລິສັດຕ່າງຊາດໃນລາວ.
ທັງນີ້ໂດຍມີສາເຫດມາຈາກ ຄ່ານິຍົມດ້ານການສຶກສາໃນລາວ ທີ່ບໍ່ສອດຄ້ອງກັບສະພາບ
ຕົວຈິງ ກໍຄືໃນຂະນະທີ່ບັນດາບໍລິສັດຕ່າງຊາດຕ້ອງການວ່າຈ້າງແຮງງານ ທີ່ມີຄວາມຮູ້
ຄວາມສາມາດດ້ານວິຊາຊີບ ແລະ ຊ່າງເທັກນິກ ຫາກແຕ່ນັກສຶກສາສ່ວນໃຫຍ່ໃນລາວ
ກັບນິຍົມສຶກສາ ແລະ ຈົບດ້ານບໍລິຫານທຸລະກິດ ສ່ວນທີ່ຈົບວິຊາຊີບຊັ້ນສູງສ່ວນໃຫຍ່ກໍ
ບໍ່ມີຄຸນນະພາບ ດັ່ງທີ່ເຈົ້າໜ້າທີ່ຂັ້ນສູງ ໄດ້ໃຫ້ການຢືນຢັນວ່າ:
“ໃນສາຍອາຊີວະສຶກສາ ແລະການສຶກສາຊັ້ນສູງ ຫຼືມະຫາວິທະຍາໄລນັ້ນ ນັກຮຽນ ແລະນັກສຶກສາມາຮຽນບໍ່ໄດ້ຕາມຄາດໝາຍການສ້າງຝີມືແຮງງານ ກະຍັງບໍ່ສາມາດຕອບສະໜອງໄດ້ຕາມຄວາມ ຕ້ອງການຂອງຕະຫລາດແຮງງານ ແລະຜູ້ທີ່ຮຽນຈົບອາຊີວະສຶກສາລະດັບຊັ້ນສູງຈຳນວນບໍ່ນ້ອຍ ຊອກວຽກເຮັດງານທຳບໍ່ໄດ້.”
ພາຍໃຕ້ສະພາບການດັ່ງກ່າວນີ້ ບໍ່ພຽງແຕ່ຈະເຮັດໃຫ້ອັດຕາການວ່າງງານໃນລາວເພີ້ມຂຶ້ນເຖິງ 7 ເປີເຊັນແລ້ວໃນເວລານີ້ ຫາກແຕ່ຍັງເຮັດໃຫ້ກະຊວງແຮງງານ ແລະສະຫວັດດີການສັງຄົມ ຕ້ອງຍອມໃຫ້ບັນດາບໍລິສັດຕ່າງຊາດ ສາມາດນຳແຮງງານຈາກຕ່າງປະເທດ ເຂົ້າມາໃນລາວ ໄດ້ເພີ້ມຂຶ້ນນັບມື້ອີກດ້ວຍ.
ທັງນີ້ໂດຍທາງການລາວຄາດໝາຍວ່າ ໃນຊ່ວງປີ 2011-2015 ບັນດາບໍລິສັດຕ່າງຊາດທີ່ລົງທຶນໃນລາວ ຕ້ອງການແຮງງານມີຝີມືຈຳນວນຫຼາຍກວ່າ 9 ໝື່ນຄົນ ຊຶ່ງໃນລະຍະ 4 ປີ ທີ່ຜ່ານມາກໍໄດ້ມີການນຳເຂົ້າແຮງງານ ມີຝີມືຈາກຕ່າງປະເທດແລ້ວ 4 ໝື່ນກວ່າຄົນ ຈຶ່ງຍັງ
ເຫຼືອອີກ 5 ໝື່ນກວ່າຄົນທີ່ຈະຕ້ອງນຳເຂົ້າມາເພີ້ມຂຶ້ນອີກ ນັບຈາກປັດຈຸບັນ ໄປຈົນເຖິງ
ທ້າຍປີ 2015 ນີ້.
ແຕ່ຢ່າງໃດກໍຕາມ ລັດຖະບານລາວກໍໄດ້ວາງເປົ້າໝາຍທີ່ຈະພັດທະນາເພື່ອຍົກລະດັບຝີມືແຮງງານຂອງລາວໃຫ້ໄດ້ເຖິງ 240,000 ຄົນ ພາຍໃນປີ 2020 ເພື່ອຕອບສະໜອງແຮງງານມີຝີມືໃຫ້ກັບບັນດາບໍລິສັດຕ່າງຊາດ ທີ່ລົງທຶນຢູ່ໃນລາວໃຫ້ໄດ້ຢ່າງພຽງພໍ ແລະຍົກລະດັບແຮງງານລາວ ໃຫ້ມີມາດຕະຖານ ແລະຄຸນນະພາບທີ່ເຊື່ອມໂຍງເສດຖະກິດອາຊ່ຽນໃຫ້ໄດ້ຢ່າງແທ້ຈິງ.
